شاي القايلة

تعالو اليوم نتجمع في شجرتنا الضليلة ونشرب كباية شاي مع اهلنا في الحُباك؛الحباك منقة وجوافة نبغ وغضيم وهجليج وعرديب سمسم وعيش وبافرة وبمبي و00000الخ كل تلك خيرات بلدي ؛
نتكلم اليوم عن اهم عنصرمن ادبنا الشعبي وهو شراب الشاي في القايلة او القيلولة(وقت الظهيرة)
عندما يتلم الناس في الشجرة اكيد تلقي احدهم جاء من الضحوة (جا من الزراعة)او جاء من العمل سواء كان وظيفي اوتجاري او جاء من السرحة فهي لحظات جميلة يتناقشو فيها كل مستجدات الحياة ويتحدثون عن الماضي0
فاليوم اتلمو في دكان عم منصور عبد العظيم (مشهورة نيمايتو) وهنا بدأت الونسة وبعد شوية سمعنا صوت كبابي الشاي زي صوت فُلل الصراعة (الفلل هي غِطاء زجاجات المياه الغازية بانواعها)فكثير من محبي الونسة يقطعون عشرات الكيلومترات لتك البقعة المباركة للونسة فبعد الجقمة الاولي تبداء الونسة في تلك اللحظة تخطر ببالك من كان مخبيئ من حديث او مشكلة فيبدا الاباء يخرجون ذاك المخزون الجميل ؛ منهم من يقول الشاي ده جبتيهو من دكان منو؟ ومن من يقول والله شاهيك احمر زي شعار المريخ واخر يقول الليلة شوال العيش بي كم عليك الله؛فمن اظرف النكات في بلدنا فكان واحد من رموز بلدنا واحد الفصّاح علي مستوي السودان رحمة الله عليه؛ فبعد ماتناول كباية شاي من النوع ابو كديس قال لابنه هاي فُلان حاله كي تلقي وكتدا العربات في الخرطوم بسوّن ويييك وييك ؛ واخري حدثت مع واحد خرمان جداً فبعد ماتناول ابو قطية ؛اخذ قصباية من العدّار(نوع من الغشْ للمابعرفو) وبدون اي مقدمات وقال عاوز يقيس شجرة دليباية
فعندما بتلمو في شجرة الصهباية هنا الونسة الجد ؛فتسمعهم هاي فُلاني شاهيك دا لسع اتي مسوي بي حمُو الشمْ ولا شنو؟ ونسة تجيب الرايح وتسمع هاي فلان اتي سنة الجفاف كان سنت كم؟ طبعا كل واحد من اهلنا يتحدث في ونستوعلي حسب البيئة التي نشاء فيها فيقول واحد بعد الشفطة الاولي (بقري السني بتمن ميي) واخر يقول قبُلْ نمشي اللبيض بي التيران ‘ فانا كنت في جلسة خالدة في الفريق (سوق الجبل) واثنا الونسة وشربة الشاي سالني احد الحضور هاي ول قادم اتي الظلط ده بجينا بتين طبعا سؤاله كان بدون اي مقدمات؛ واخر قال لي اتي ياول قادم الطيارة دي بتمشي كيف في الهوا دا وفي تلك اللحظة قام واحد من الفصاح قال له اسال الكباية دي بتوريك بتمشي كيف؟ واثنا الونسة يتحدثون عن الجميلات بنات البقارة ! ونسة عفيفة ويعبرون الوديان والمسارات ويزرعون في دربوهم شعراً واساطير حب خالدة وعفيفة عن الحسناوات ؛منفردين بخصال حميدة نادرة لانجدها مجتمعة وقلما نجدها منفردة لدي الشعوب الارضية القديمة والحديثة ؛ فالحب عند البقارة ولد وعاش في ظل الحرية الطبيعية والشجاعة والكرم الحاتمي والحكمة والتضحية والفراسة ؛ وهو في كل حالاته كان الطاقة المحركةونبض الحياة والاحساس بالجمال0
ويكنون الجميلات باسم جهنم وفريع البان وبت المدير و0000الخ
فمنهم من يقول :
بت المدير عديلة مسطرة
الذاكرة خانتنيي مع عِراك الحياة لكن انشاء الله استعيد الزاكرة وامدكم بالكتير
تحياتي‘‘‘‘‘‘

ول نوية

كان الراحل عبدالله قادم يتبارى مع الأخ الدكتور حامد محمد أبوه فى شكر الشاي ومناقبه هلا أتحفتنا بشئ من ذلك

تحيتي

اهدى هذه القصيده من ادب البرامكه الحرفه
بفتح الحاء والراء
والحريف هوالزول البعرف لى شراب الشاى ويجيد عمله
وقد استعملت الكلمه لاصحاب ود عمارى اى ان الحريف بسف التمباك
مع ان البقاره يكرهون التمباك ولايتعاطونه ويصفون صاحبه بانه تمباكى وسجمان


القصيده جميله باللهجه البقاريه
اتلموا الحرفة
في قعرشجرة
و شربوا الشاهي
و دفقوا تفلة
و جي زمقة الحريف
دود الخلا
شقلبه شقلبه أكلا
و جي الكمكلي اللعين
تارك الصلاة
و زمقة من شافه
كرهه
عرفه بكتله
وجري يا المشقة
و في المشقة استخبأ
و الكمكلي قال كي و طرده
وقال كي و لقطة
هني دربه و هني دربه
يا المشقة
و في المشقة

طاح بخلقة زقلة
و نزل ألمي بكوس زمقة
و لقي منطبع لي
مع عرق شجرة
و سل سكين طفحة تاخ ضبحه
و علقه لي في شجرة سلخه
و مرق من بطنه شحماية
بقولوا ليها أججة
و ظبط شية
أكله بلا دقة
وجاته نعسه
و عني تبلدية أم عنقرة
إلوسد خلقه
قال بنوم النوم كله غلبه
و جاته طمة
و قال ماشي لي مرته
و في الدرب لاقوه
تلاميذ المدرسة
و فيهم واحداً حريف ظريف و نضيف
فرقة من مدير الجلسة إلا الصغرة
قال أه زمقة وين
أنا بشم عفنة
و الكمكلي قال كي و طرده
و الصبي دقش بي الكترة
و الكمكلي مرق من الكترة
إلا بقدة خلقه
و مشي لي مرته
طلب عرديب المرة سوته
جر شربه
أ هني الهواء ضربه
قال عيال المدرسة عيال العزبة
الزول كن أكل لي أكله
تطيب لي في بطنه مع ربه
تبقي لي بمجلغة
و قالوا لي تلاميذ المدرسة
الكمكلي اللعين فوقه ما ترتي
و ماله زاته
كن أكلته أجر و حسنه

سلمت يداك يا عبد السلام ، منذ زمن وأنا أبحث مثل هذا لأستمتع بكباية شاي على مزاجك ... لابد لول نوية من رد لهذه القصيدة الرائعة ... ولا يطلع كمكلي.

هاي صباح الخير ماكو طيبين بشكركو كتير مع الصباح ده ؛وبرادكو مدّور فوق ضرانا الصباح ده؛ كي اطيكو تشكير شوييّ عن ابوقطييّ
تلل تلل تلل ..
الشاى شاينا كسار كبابينا ..
كن أنطيته للبقارى يوريك عدد بقيراته
كن أنطيته للكردفانى يوريك عدد مخماسته
كن أنطيته للقاضى يسوى ليك النصيحة مدنقسة
كن أنطيته للفكى يقرا ليك البسملة
كن أنطيته للعجوز تقول ليك ولدى بيتنا فيهو تلاته عذبه مالك ما بتقشاه

كنت متاكد بنسبة كبيرة جدا من نجاح منتدى التراث يا جماعة.

محمد انسان رائع جدا و كذلك مجتهد و لا يبخل على المنتدى بالجهد و الوقت.

حيوا معى ول نوية و مزيدا من النجاحات.

دمت

قعدة الخميس ؛ يوم الخميس الفات كنا في جلسة اسرية رائعة مع الاعمام اولاد جدنا الحاج البشير وجدنا حاج الامين وكانت جلسة مليئة بالنكات من طرف عمنا ازهري وكانت هي المرة الاولي التي اري فيها عمنا ازهري علي هذه القعدة والفونقات اهديكم هذه المقاطع من اشعار البرامكة في الشاي:
لحريف صوبن ظهر في حريره اتحكر
يا أخــــواني الشاي مواجبه كـم
الحرفه قــــالوا نعنــاع وهبهان
وعــــرق قرنجان وقـرفاية دم
حمار الخواطر .. جبار الخواطــر
ولا شابع جعان ولا مسمن باطــل
نشربك الليلة ونقريف ليك بكــر
أبوشعيرة الجـــام للأريـــاح
وما أحلى شرابك مع الصــباح
واللا مــــا يسوطـك بمسواط
الصبى البشربك راقــد مرتاح
واللــى ما يشربك كلامـــه
ساكـــت مــا بـــــاح

جمعتنا لحظات جميلة فى دار أخونا عبدالرحمن الحاج .. سعدنا جدا بزيارة إبننا الغالى ول نوية والأخ الكريم البيه محمود البيه وكان أخونا محمد توم بانقا بهاء الدين والأبناء منير وموسى فى الحضرة الإبن الحاج الجعلى والخال على ود العوض وبشير الحاج وأبنائه أخونا حسن الحاج والأخ حسن عبدالعظيم عبدالماجد ، معتز إبن خالنا الشاعر محمد سعد دياب ، كانت أبوجبيهة محور الحديث وتذكرت عثمان ود الشاويش وسيف الدولة وفات على أن أدعوهم ذلك اليوم ليكتمل الأنس فلهم منى التحية فهم فى القلب والعيد إن شاء الله يجمعنا ، أخونا الرقيق والمهذب ول نوية كان بشوشا وهادئا ولم يناوشنا وجدتة هادئا غير مصادم يسمع أكثر من ما يتكلم عفوا من ما يكتب ، لعله الهدوء الذى يسبق العاصفة ولكنى حزنت له فالعاصفة هبت على القلعة الحمراء ... خيرها فى غيرها ..

اولا الحمدلله ان الاخ محمد نوية وجد باقى اسرتة بالرياض و كده نحنا اطمئنينا عليه.

ثانيا يا ازهرى محمد رجل مهذب شديد و و هادئ شديد بس عيبكم كلكم ماقدرتو ترجعوه

للبيت الازرق.

ارجو ان اشكر الاخ عبد الرحمن على استضافتة ليكم و كرمه الجم.

تحياتى

شوية .. شويه .. زولكو ما ساهل .. توه ده قاعد بكاتل وحيده .. إلا الجماعة أخوانكو زاغوا .

صاح ول نوية استخدم سياسة النفس الطويل و دى دبلوماسية.

و مؤكد افضل بكثير من اللذين هربوا من الساحة.

فله التحية

الفوز بالسحر ده تاريه بفّرح كدة؟ الجماعة الليلة الواحد كان لقي ليه دندوراية واقعة في الشارع بتكتب فيها ؛اتمني هذا النشاط الغير محدود يكون متواصل ؛ احياناً امبتارة بنفعو الجماعة حتي فكي عوين بتاع ام بدات جابوهو ؛ وندي القلعة علمو ليها دلوكة كبيرة شايفا في المقصورة وقاعدة تغني المرة الجاية جيبو افراح عصام كان رضت
تحياتي لكم

كيف اخبارك عمنا ازهري المرة لو جيت العيد جيب معاك حبوب بندول لاني شربت كل ونسة الجماعة فالسكتة دييك كانت جس نبط انا خفت اخش فيكم شمال وتقولو خاي الفعيلة فعيلة ول قادم ده شنو ماكسر راسنا بالكلام ؛ بس انشاء الله حريف وِستْ west كشتينة طبعاً
تحياتي لغاية ما نتلاقي

وست ، هارت ، أربعطاشر بكل أشكاله .. سوف أخبرك لاحقا ببرنامج العيد ........... مودتى

شوقتونا لعيدكم ده رغم اننا بنعيد في الحباك وبنصلي في ميدان المجلس وبنبد في الزيارات مابنرجع البيت الا المغرب وبكرة وبعد بكرة تفطر حيث انتهى بك المطاف وتتغدأ كذلك

سلم لى على كل الأحبة. ويا بختكم.