ابوامنة حامد

انت ما ياكا الحنين

انت ما ياكا الامير

كيف نسيبك تمشى تانى

انت نورت البلد

والعزاب فارق طريقنا


ياخى كتلتنى يا شهاب

محمود شكرا على المرور و هاك يا عزيزى ملك الطيور

ملك الطيور ارقص
وسط الرياض نشوان
خلى الزهور تفتح
مختلفة الالوان
ارقص وهل فى الكون
طائر جميل مثلك
بيهو الوجود مفتون
من درك المكنون
اكشف كنوز حسنك
ورينا فيك كم لون
ما بين جمال وفنون
للزهر تصحو عيون
تهدى الشذى واحيان
تهدى الهوى النديان
للعاشق الولهان

افرد جناحك وميل
حي الربيع يا جميل
خلى الشمس تسكب
ذهب الاصيل فى النيل

فى رياضك النضرات
النورفي القطرات
محمرة العبرات
الروعة تستكمل
يبقى المكان اجمل
زى لوحة الفنان

يا سلام يا اقبال نص غاية الروعة

هذا الادروب يا جماعة شاعر جميل

شكرا عمو محمود يا رهيف والله عايز اسمع منك غناء يا محمود

تحياتى

ليتني كنت في هيـا ارعى الغنم ...

ابوآمنة حامـد
ليتني كنت في هيا ارعى الغنم .. بدل غنم ابليس في الخرطوم ..
****_****

في بيت مثل كهف تتدلى منه خيوط الفقر.. باض فيه حمام البؤس وافرخ، وجدته نصف مستلقٍ على سرير عالٍ حتى ان احدى قدميه تخلصت من فردة السفنجة لانها لا تكاد تلامس الارض..
امامه صحن من محلول الفول كان يغمس فيه رقائق من رغيف الصبر لم اتبينه او انه انتهى من تناوله او ربما لم يجده من الاصل فطفق الصحن يفغر فاهه الضيق ينظر لصاحبه الذي تلهى عنه بدخولي عليه..

علي حامد علي ايلا آدم ، الشهير بأبي آمنة حامد، اول ما سألته ساعة نطق اسمه الرباعي هذا ، ان كان على علاقة بالسيد محمد طاهر ايلا، والي البحر الاحمر.. اهتز ابو آمنة لوقع الاسم وقال:
- بالله اسألوا يمكن يكون ود عمي..!
في العاشرة من عمره، بعثه جده محمد الامين ترك، ناظر عموم الهدندوة الى بيت عبدالله بك خليل ليتعلم ، فهبط بامدرمان ليتخذها مقراً ومتاعا الى حين..
لاحقاً حصل على درجة البكالريوس في الاعلام من جامعة القاهرة التي عاد منها يتأبط دكتوراة غير مرئية في التعلق بالزعيم جمال عبدالناصر، الذي من فرط تعلقه به اطلق على مولوده الاول اسم: جمال عبدالناصر حسين وحين سأله الزعيم عن ذلك قال له ابو آمنة: لو كنت اعرف ابا حسين لالحقته ببقية الاسم..!

شاعر وساخر فقير، وحين يجتمع الفقر والسخرية، كلاهما يعزى الاخر، لاحظت حرصه على الا يذكر تاريخا بعينه، وكنت اعلم في قرارة نفسي ان ذاكرته الواهنة لا تقوى على ذلك لكنه برر زوغانه قائلاً
شوف .. الشعراء والمؤدباتية زي حالتنا كدا ما بيذكرو تواريخ عشان ما تقدر تعرف عمر الواحد فيناكم..!
ابو آمنة يبدو ستينياً ضامراً عصرته اصابع الفقر الغليظة الذي ترك توقيعه بخط « شين» على وجهه وفم واسع يبتسم ساخراً من فعلته.. اجاباته اقصر من قبلة مودع يكاد قطار بورتسودان ان يفوته.
* ما لا نعرفه عن «ابو امنة حامد» ..!
كنت راعيا لغنم الحلة في هيا.. والان ارعى غنم ابليس في الخرطوم.. ولهذا لم اصلح ضابطاً في الشرطة ولا قنصلاً اعلاميا ولا انسانا يصلح للقرن الحادي والعشرين.
* ماذا حملته من هيا ولم تفارقه حتى الآن؟!
- كل شئ.. وينتابني الاحساس بالغربة في شوارع الخرطوم، واتمنى مراحا من الضأن ارعاه في استاداتها ..
ماذا بقى لك من كلية الشرطة؟
تخرجت فيها برتبة ملازم، ومن دفعتي الفريق عثمان الشفيع وعباس ابو شامة.. ومدربي كان هو السر الباتيرا.. هل كان معاك أبارو؟
يا راجل ابارو شنو.. قول كما كان معاي عثمان دقنة..!
لماذا لم تستمر في الشرطة؟
والله قدمت استقالتي .. ما نافعة معاي.
طيب جيت من هيا ليه؟
جابتني شقاوتي.. لا قعدت مع الهدندوة بقيت سعيد.. لا لقيت « سعية» في الخرطوم.
* لماذا توقف ابو آمنة عن كتابة الشعر؟
اكتب لي منو؟
للجمال والوطن والمبادئ؟
يا سلام عليك انت الظاهر رسلوك من السما الليلة.
ليه؟
انا لا ارى في الوجود شيئا جميلا غير المرتب والمصاريف.. حتى دا ما لاقيهو عشان اكتب فيهو شعر.
واين المبادئ؟
ياخي خليك من الرومانسيات دي..
وماذا يفعل ابو آمنة الآن؟!
زي ما شايف.. اتأمل فنجاني المقلوب
طيب ماتشتغل؟
اشتغل شنو... انا كنت مدرس في بربر الثانوية سنتين ومن تلاميذي البروفسير احمد علي قنيف.. ياخي ناس بربر ديل اجمل ناس شكلا ومضموناً
من هم الذين غنوا لابي امنة؟
وردي غنى بنحب من بلدنا وقالوا بتحب..
وانت لسع بتحب من بلدك؟
والله اعفيني من السؤال دا.
ليه؟
لاسباب قد تجعلني معتقلاً
من السلطات الرسمية؟
لا.. من السلطات المنزلية..!
واين التي سال من شعرها الذهب؟
في ملكوت الله.. الله يرحمها كان عندها صوت وصورة مش زي البيشخشخو حسع..!
متى تعرفت على الحب؟
تعرف انا اول مرة اعرف انو الحب غير منطقي وعميان وعبيط كمان كان في القاهرة عندي واحد صاحبي حسع من اشهر الشعراء العرب. 36 ساعة في اليوم يكتب شعر في زوجتو . تعرف يوم مشيت معاهو البيت لقيت زولة شينة خلاص.. قال دي مرتو.. حكمة ربنا..
يعني انت ما بتحب الشينين؟!
يا اخي اقطع قلبي ليه معاهم..
اغنياتك يا ابو آمنة .. هل قبضت ثمنها؟
والله ما قصروا معاي.. محمد الامين عندو جانا الخبر شايلو النسيم وسيد خليفة عندو جاري وانا جارو، الله يرحمو .. خلانا نتعذب بي نارو! نار منو؟
نارالفلس طبعاً
وتاني؟
ما نسيناك للجابري... والفنانة المصرية فايزة احمد قربت تغني لي اغنية.. لكنها ما صبرت .. ماتت!
رأيك في تعدد الزوجات؟
والله المرا اذا شدت حيلا ما في داعي.. واذا الراجل مقتدر وحيعدل يتوكل طوالي.
يعني انت سعيد؟
ابداً.. مفلس بس..!
كم رصيدك في البنك الآن؟
بنك.. والله بنك الدم ذاتو ما يلقى فينا قزازة.. انا اسمي ابو آمنة ما ابو العلا.
هل كان بامكانك ان تكون ثريا؟
شوف، انا احساسي بالحياة لم يكن عن طريق الثراء.. لذا لم اناضل لجمع المال.
ألست نادماً الآن؟
ابداً.. نفسي التي قد تملك الاشياء ذاهبة.. فكيف ابكي على شئ اذا ذهبا؟
لماذا ترك ابوآمنة رياضة المشي؟
يا بوي الشعب السوداني كلو ماشي..تصدق اطلع الشارع القى الدنيا كلها ماشة..
شخص فقدته..؟
الفنان ابو داؤود.. كان صديقي وجاري.. ومفلس زي حالتنا كدا.
هل تفتقد في حياتك شيئاً
ايوه افتقد ان اكون وزيراً
وزير شنو؟
وزير اعلام
ليه ما تبقى وزير مالية؟
ما بعرف حساب.. لو مسكت الوزارة دي بعد يوم واحد البلد كلها تفلس..!
لو بقيت وزير اعلام حتعمل شنو؟
كنت حا أسعد الاعلاميين.
ابو آمنة رئيس جمهورية.. اول قرار؟
كنت حاقدم استقالتي طوالي
ليه ؟
يا خي دا شعب صعب... يحلم وهو صاحي.
صحفي سوداني؟
حسن ساتي
وحسين خوجلي؟
رجل فنان . احبه ولا احبه.
كيف ؟
اختلف معه واحترمه.
اسحق احمد فضل الله؟
جبهجي مرتاح في الدنيا وداير يرتاح في الاخرة..
السودان ناقص الانقاذ يساوي ؟
يساوي جبانة هايصة
الحب ناقص المال يساوي؟
يساوي حمي ورمتلة ساكت..
القصيدة ناقص الفكرة تساوي؟
تساوي اسهال حروفي مزمن.
هل تخاف من الغد؟
الهدندوة علموني الآّ اخاف إلا من رب العالمين؟
لماذا تبدو حزينا؟
ومن قال لك ذلك ياخي شكلي كدا
آخر مرة بكى فيها ابو آمنة؟
عند وفاة والدتي.. انا بقيت يتيم حسع..!
بماذا تحلم؟
احلم بمجاورة امير المؤمنين الذي يدفع لي خمسين الف دينار من حقات زمان وجارية و...
أما بعد..
وبرفقتي الصحافي عوض محمد أحمد ، صديق أسرة ابو آمنة حامد الذي اسهم كثيرا في فك شفراته... غادرنا الشاعر وهو يمتص رحيق سيجارته « المقروصة» ثم يطلق دخانها في فضاء الغرفة ويلاحقها بعينيه الواهنتين، وهي تحلق على رأسه مثل احلام المساء، وليتها امطرت عليه الدنانير، لتسد بعضاً من رمقه وتشبع جوع احلامه.
*********************************************
في شعر الشاعر (ابي آمنة حامد) خصائص جوهرية متى توفرت في عمل.. أصبح ذلك العمل فناً صرفاً.. ومن تلك الخصائص أذكر الرنين الذي يمكن أن يقودنا إلى الموسيقى في الشعر عامة، وإلى قدرة الشاعر على استعمال تلك الموسيقى بطرائق مختلفة، متعانقة الأنغام، أو متضادة الأنغام بهدف فني مقصود..!».
والموسيقى في شعر ابي آمنة حامد تنهض بدور فعال في الإيحاء، وحسب الفن أن يوحي.. لا أن يفصح. وأن يشير.. لا أن يخطب.. وأن يهمس لا أن يزعق.
استمع إلى قوله:
مشينا الطريق يداً بيد
واسكرنا الحب جفناً بجفن
ونبقى شموخاً تعالى
وحباً عصياً على كل شك وظن
فلا ذبل الورد في حقله
ولا جف في الحرف نبض التغني
*************
فيصل .....
زميلنا المصري "معلم الأدب و الشعر "قرأ المقال .... وعندما خلص الى أبيات الشعر ويبدو أنها أعجبته صاح " آآآه يـــاني " ....وقال لمــاذا لا ينشر هذا الكلام الجميل ليكون متعارف دولياً أو على الأقل إقليمياً ...
قلتا ليهو : دي مشكلتكم إنتو.. ما قادرين تستوعبوا أن المسك من دم الغزال..... أما نحن رواياتنا و أشعارنا وكتاباتنا يفهمها فقط خاصة القوم و الكتاب والأدباء في الفن والرواية و الشعر....................
معليش طولتا عليكم .....شكراً اتحملتوني ..... خالص الود

اسحق احمد فضل الله؟
جبهجي مرتاح في الدنيا وداير يرتاح في الاخرة..

*************************

القصيدة ناقص الفكرة تساوي؟
تساوي اسهال حروفي مزمن.


**************************

بماذا تحلم؟
احلم بمجاورة امير المؤمنين الذي يدفع لي خمسين الف دينار من حقات زمان وجارية و...
أما بعد.

والله يا شهاب كلام ما يجى الا من عبقرى للامانه

شكرا ليك و للاخت اقبال و محمود منصور الرجل الفنان

تحياتى.

متى تعرفت على الحب؟
تعرف انا اول مرة اعرف انو الحب غير منطقي وعميان
وعبيط كمان كان في القاهرة عندي واحد صاحبي حسع من اشهر الشعراء العرب. 36
ساعة في اليوم يكتب شعر في زوجتو . تعرف يوم مشيت معاهو البيت لقيت زولة
شينة خلاص.. قال دي مرتو.. حكمة ربنا..

تعرف يا شهاب هذا الحوار يلخص حالة هذا المبدع

شكرا ليك

ابو آمنة رئيس جمهورية.. اول قرار؟
كنت حاقدم استقالتي طوالي
ليه ؟
يا خي دا شعب صعب... يحلم وهو صاحي.
صحفي سوداني؟
حسن ساتي
وحسين خوجلي؟
رجل فنان . احبه ولا احبه.
كيف ؟
اختلف معه واحترمه.
يا وريــف هذا الآدمي ....." ود إيــلا " جســد أسمى القيم والدروس لمن يريد أن يعرف ,,,,، علاقة الحب بالإحترام ... الحب يستلزم حضور الاحترام اما الإحترام فقد يتوفر دون حب .
وخير قدوة لنا الرسول الكريم الذي كان يعامل الناس باختلاف اديانهم بكل احترام على الرغم من عدم وجود حب بينهم ..... شكراً لك أيها الشاعر على هـــذا اللقاء الأنموذج " اللهم أنزل عليه شآبيب رحمتك "....