يا مفتونـــــــــة ...... أغنية للمرأة الوردة

يا مفتونه
بصدق الوَعدْ
يا مسكونه بحلم الغَدْ
أنا خيّرتكْ
بين الشّهَدْ
وبين البُّن الفِطْرِهَ
وانتِ اخترتي سَواد البُّن
وطَعْمَ القهوه البِكْرَه
أنا خيّرتكْ...
وانتِ اخترتي ،
هل قدَّرتي الرُقعَه الواقعه
بين الليله وْأحلام بكرهْ
وكيف حَتْمِلى الحِتَّه الواسعه
بين الواقع وبين الفكره
وين حتلقي المويه الناقعهْ
يوم نصطادِ في المويه العِكْرَه؟
أنا بدّيكِ موانع الصاقعه
إنتِ ادِّينى الموت السُتره
أنا خيّرتك...
وانتِ اخترتي
واقف جَنْبِك لو إحترتى
بايع نفسي وشارِيكِ
دافنِكْ بيني مُواريكِ
واصْلِك مَنّى أتاريكِ
لوتعْرفي يوم شاهدْتِكْ
من روحي بتَدخُلي فى نفسي
باريتكْ خلِسَه وغازلِتكْ
سمعّتِك وما سامع همسي
كضّبتَ عيوني وصدّقتِكْ
غّيبتَ احساسك في حسِّي
وناديتك:
يا مطمنِّه فى قلبى الخوف
بتونِّسي روحي وبتحَجَّي
بترجِّعي لعيوني الشوف
اتلوّمى دايما واحتجّي
مشتاقِلكْ جداً وملهوف
واقف فى دَرْبِكْ مُترجِّى
وحَجيجِكْ بي قَلبي يطوف
جوايَ بِتْعتمرى وْبِتْحِجِىّ
وانا جيتِكْ
مكسور الخاطر
جيِتكْ مجروحْ
ولقيتِكْ مفضوح الصمت
ألفي عيونِك بالبوح
مَمْحوق الزمن البين ضحِكْ والنوحْ
سَكّنتِكْ كل الأنفاس الحيّه
وسلَّمتِك مُفتاح الروحْ
لو تعرفي يوم هدهدتِك
فى ليل بستجدى الغَمْضه
أقدامِكْ كانت فى الصحرا
وايديك فى الْبَحرْ بِتتْوضا
كم حائط ينهض بيناتنا
كم حائط من بينا اتْهَدَّ
قاومتَ الرهبه وناديتِكْ
والصوت من عندِك مارَدَّ
طاوعت الرغبه وغَنيتِكْ
غنيت للمرأه الورده

يا مشرع الحلم الفسيح
أنا بينى مابينك جزر
تترامى .. والموج اللّديح
القدرة والزاد الشحيح
كملتو .. ما كِمل الصبر
نتلاقى فى الزمن المريح
ميعادنا فى وش الفجر
يا مشرع الحلم الفسيح

***_***
يا مشرع الحلم الفسيح
يا بعض منى .. وفينى ساكن
أنا أصلى منك ومشتهيك
و بيناتنا ليل الغربة ... داكِنْ
هبّة هبوبك..
أفتح شبابيك المساكن
وسـِّع دروبك ..
ولـِّع مصابيح الأماكن
يا مشرع الحلم الفسيح

***_***
يا مشرع الحلم الفسيح
يومنا النـّهِـبْ .. أسلِبنا خوفنا
كبـِّرنا قدرك .. مرتين
وطـِّول قدر كتفك .. كتوفنا
يا رغبة الرعد البيسكن ..
بين غناوينا وحروفنا
ضوِّى الدساكر والضفاف
عبِّى الحناجر بالهتاف
سدِّد مسامات الرِّعاف
نوِّر مغاراتنا وكهوفنا

***_***

يا مشرع الحلم الفسيح
أنا وإنت .. والمطر الفصيح
حانطوِّع الزمن القبيح
نأخد بعض .. شكل السما
حدِّثنى دايماً .. كلما
تنشف على البر الضفادع
يهجر الضو المواضع
وتسقط من الكف الأصابع
حدثني دايماً كلما
تحرد مراسيك السفن
تسكن مرافيك الزعامات .. الدُمى
حدثنى لو تاهت خطانا ..
على الدروب المبهمة
أو ربما..
تهدم آلات الشوارع ..
وترجمْ العُزّى الصواقِع
حدثنى لو مطرك همى ..
حدثنى لو صادف الكى المواجع
وضلك على الساحل رمى
حدثنى لو مطرك همى
علمنا دايماً كلما
نبذر على أرضك شهيد
يطلع شمس ..
يبهر بأنوارو السما


******_******

أبداك من وين
وفينى منك لسه حاجات
من مخاوف ومن شجن
أبداك من وين
وظنى إنك فكرة إعلان الحياه
وإنتهاءات العوارض والمحن
نفسى ألقاك
وأكون أنا كلى من بعضك
أو بعضى من كل بدن
وداير ابقاك وأوحد دورة الدم
المقسمة بينى بينك والسحن
أبداك من وين
أبداك منى ولاَ منك أبتديك محل محل
من ياتو منفذ ادخلك
وكل المنافذ فيك
سداها النحل
من ياتو شارع أوصلك
وكل الدروب معطونة لى آخر الوحل
أستبيح كل الحواجز وأدخلك
من بين مسامك .. أدخلك
من أىَ قاسم مشترك
وشبه التشابه .. أدخلك
ونتلاقى نهرين من تسامى وإشتها
وأبداك من حيث إنتهت عندك
خواتم الإنتهاء
أبداك .. واخلع خيام عمرى المضى
والقاك مبسوطة اليدين
مفتوحة أبواب الرّضا
أبداك من لحظة آنستك نار
وأخدت من قبسك هدى
وانا ضمه زاهد
فى الدروب الما بتجيك
ولا بترجع لىّ من تالاك صدى
أبداك من وين ؟؟؟
من وين ....!!!
وين ....!!!
******-*******
أشكرك للمرور المهيـــب.....يا غالي الحروف " م ح م د عبدالله قــادم" هي محاولة ..توثيق للشاعر أزهري محمد علي... صاحب
الـصباح الـباهى لونك
وضّـاحه يافجر المشارق
غـابة الأبـنوس عيونك
يَـابْنَيّه مـن خُبز iلفنادق .....!!!!


والتي أمتعنا بها الراحل المقيم مصطفى سيد أحمد " رحمه الله "
له مع الراحل الكثير ...... !!!
...مع خالص الود