أغنيات حقيبة بليغة اللغة

سأحاول جهدي أن أوفر لقراء المنتدى بعض من شعر الحقيبة البليغ الرصين ..وهدفي من ذلك اضطلاع أبناء لنا عاشوا في زمان انحدرت فيه لغة الأغنيات بشكل يدعو للتقزز ولكن تراثنا ثر بما هو جميل سأسعى بكل همة لإيصال الكلمة الجميلة لغناء الحقيبة فلنبدأ ولتكن بالشاعر مصطفى بطران:
(أطرد الاحلام)
للشاعر/ مصطفي بطران
قوم نقضى الليل ..فى ضفاف النيل.. ننشد الفسحة
أطرد الاحلام ياجميل واصحى

شوف جمال الليل يا جميل و أصحى
و اسمع البلبل و لهجته الفصحى
الغصون ماخدات مع النسيم كسحة
والطبيعة تخيل.. ثوبها كاسى النيل... من جمال مسحة

عير كلامى معاك ياجميل لمحة
قوم معاي و ميل بقامتك السمحة
كل شىء ميسور والظروف سامحة
منظر النوار.. يغنى عن انوار... ولى الظلام يمحى

ديك شواطى النيل بالسرور طافحة
لابسة بدر التم وللنجوم لافحة
شتلة الياسمين مايلة بصفحة
ميلها بيشجيك.. و من شذاها يجيك... كل حين نفحة

شوف وجوه الروض باسمة منطرحة
وتضحك الأزهار ميتة بى الفرحة
ليه شجرة الفل ياخى منشرحة
والورود بالمَر.. لونة ليه إحْمَر... كانها منجرحة

شوف الطيور منظوم روقة زي سبحة
طايرة كالآمال في الفضاء سابحة
فى جوارنا قريب ظلالها جات شابحة
ياخى ما فايتات ...اظنهن بايتات... وفى الرياض صابحة

النسايم لو غادية او رايحة
بى ندى الازهار و العبيرفايحة
و الفروع بتميل بالطرب مايحة
و السواقى تئنْ... بى نغمة الْحِنْ.... صوتها كالنايحة

منظر البدرى و بهجته الفاضحة
تبدو ليك فى النيل كالدرر واضحة
والطيور تختال فى الغصون صادحة
و السرور ميَّلْ... روق و اتخيل... كفته الراجحة