اتوكلت عليك يا الله

(1)
اتوكلت عليك
يا الله
شديت لحصانى
درعت السيف
وفى المخلاية
حشرت الزاد
وقُت بسم الله .
ركبت مرقت
غبار الحافر
غتا الحلة .
........
اتوكلت عليك
يا الله
مرقت اكوس
ولاد حسب الله
الجونا (مناظر )
أول مرة

وبعدو اتعرض
الفيلم الاصلى
( الِقْدر البغلى )
اتمدّ مخافر
بطلو مغامر
منع القُحة
.........
......... كسّر وكَفَّر
وعجن الملة
باع ساقيتنا
شال عافيتنا
رفد أولادنا
ورقّا الشُلة .
ديل ناس
أضرب
أنهب
أختف
لفق
شرَط
فتّق
ربى دقينتك
بس شان تسرق
اقبض
حاصر
بشتن
..........
..........
حقق
أغرف
أسرف
كضّب
أختف
وءان كان راجل
أغضب وأهتف
تجيك الكشة
تقول ( ست عرقى )
وتطلع كافر
بره الملة
مهدور دمك
ومازول قِبلة .
.........
اتوكلت عليك
يا الله
مرقت اكوس
ولاد خادم الله
السفو الخزنة
وكتلو الناقة
بالجبخانة
وحلبو بقرنا
صفايح جِبنة .
..........
طفحوا لبّنا
وسووا جمودنا
براميل سمنه .
دسوا عروسنا
في ليلة الدخلة
وسجنو عريسنا
في يوم الحنة
...........
ديل ناس دنيا
سياحة وراحة
وبرضو كمان
محجوزة الجنة
..........
جابو قُرادهم
عاس في وريدنا
ومص لحمنا .
صنَوا اضنينا
صراخ (حرينا ).
سرقوا الجوكر
في الكوتشينة
وجدعو البايظ
كلو بلدنا .
شتلو اضينة
في كل جنينة
سووا سواتهم
عاسوا عواسهم
واتمحنّا
راسنا اتكهرب
عامل زنَة
واتبشتنا
واتعشكبنا
واتمسكنا
اكلو عشانا
- تقول غنماية -
وشربوا عسلنا
وطردوا نحلنا .
رقوا حمارهم
والى معالى
عملوا مسيره
شنّه ورنّه
..........
اتوكلت عليك
يا الله
مرقت اكاتل
ناس سعد الله
ولاد رخم الله
قت بسم الله
..........
نبينا معانا
ما تغشانا
قلت الليلة
ابارز راجل
زى (ترسانة )
لقيت الفارس
زول (دُلقانه)
قلت اشوف
كان القى حريف
ومخيف وتحدي
لقيت ( حنكوش )
لايجيب
لا يودى .
قلت اواجه
وش لى وش
لقيتو كتالهم
كيد بالغش
...........
قلت اجادل
بالقرآن
وكمان بالسُنة
لقيت الرد
ضرب الأنكل
وفلق الجُلة
.........
طلع ( فرمان )
من حاج ( طرزان )
سوانى ملاحد
نافر
كافر
هَدَر الدم
وقال حرّم
عملنى كنافة
عصرنى جوافة
اكلنى
جغم .
ديل ناس الله
الجونا كرامة
حصدنا الذلة .
ديل الخبرا
الجونا يعافرو
صلاح المكنة
ابت ما تَدور
بالمنفلة .
ديل الجونا
يعافوا مرضنا
زادوا العلة .
ديل ناس ( اعصر )
تقضى الحاجة .
...........
صلاحهم كضبة
وليلهم عرضة
دقونهم هاجَّة .
...........
عوير السيرة
الكان تامبيرة
اترقى وزير
واتجنح طيره
وحاجة هنايه
- زمان غنماية -
سووها أميره .
ديل ناس الله
خير المله
الخربو الرصة
وجاطو الحله .
الراقص اميرهم
أب تمبلة .
ديل ناس كامري
وعشرين فيللا .
وسُمان وأُمان
الواحد شاحنة
وقاطرة تريللا
.........
اتوكلت عليك
يا الله
شديت لى قلمى
وشلت دواتى
مرقت اكوس
الطغمة
الشلة .
مرقت أبارز
مرة عصابة
ومرة المافيا
ومرة خلاقة .
مرة القومي
ومره الشعبي (1)
مره اللُعبى .
مرة جرايد
مره قصايد
مرة عوايد
ما بتتخلا .
ناس كضابه
ناس مكريه
تسد الخانة
وناس رجافة
بتكتل روحها
وبى نشابها
وناس ما بتعرف
غير قانونها
ختم الغابة .
ناس مأمورة
وناس مكسورة
وناس ما بتعرف
غير تنذلا.
..........
اتوكلت عليك
يا الله
بكرة بنمرق
كلنا بره
من كلِ مدينة
من كلِ حواري
من كُلْ حِلة .
بكره بنمرق
كُلْ خلق الله .
ما نخلى منافق
طار بالزانه
ما نخلى معولق
داسنا اذانا .
ما نخلى الباعو
النيل وهوانا
ما نخلى العقروا
لناقة صالح
وحشّوا وريدها
وبالجبخانة.
ما نخلى السووا
الدين تلجين
والعرقى مدوّر
عن عشمانه .
...........
اتوكلت عليك
يا الله
يكره بنمرق
كلنا بره
من كّلِ مدينة
من كل حواري
من كْلِ حِلة .
نقوقى نصفق
للحرية
غُبننا كاسر
ميه الميه
ندوس الكاتل
والف سريه
نقلع حقنا
بالزنديه
ناخد تارنا
وتبرد نارنا
ونبنى بلدنا.

شكرا فيصل

وبعدو اتعرض
الفيلم الاصلى
( الِقْدر البغلى )
اتمدّ مخافر
بطلو مغامر
منع القُحة

صوره رمزيه رائعه

سرقوا الجوكر
في الكوتشينة
وجدعو البايظ
كلو بلدنا .
التحيه لك شاعرنا الجميل هاشم صديق
والتحيه لك (ابو احمد)
والتحيه لك( بلدى الحزين )الحبيب المحبوب
تحياتى

الزعيم تسلم و اشكرك على المرور الجميل

سهاد شكرا ليكى و للاستاذ هاشم و شنو غياباتك ما ليها حد

تحياتى

عوير السيرة الكان تامبيرة
اترقى وزير واتجنح طيرة

شكرا فيصل

القصيده جميلة جدا يا فيصل ؛
كنت اقراء واتخيل الحال !

تم التعديل لرغبة صاحب البوست !

شكرا جزيلا يا نقروف

هلالك الحاصل عليه شنو؟

تحياتى

لقيت الفارس
زول (دُلقانه)
حقيــــــــقي
كل التحية فيصل

وياها البقت ..... ياهاشــم
قلت اجادل
بالقرآن
وكمان بالسُنة
لقيت الرد
ضرب الأنكل
وفلق الجُلة
تسلم ياوريف .....
حداك الدنيا وقفت صفقت !!!..

ياجماعة هاشم صديق دا نصيح؟

اتوكلت عليك يا الله

اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله

رد: اتوكلت عليك يا الله