انا لابراهيمك - نضال حسن الحاج

أنا لا ابراهيمك .. لا رؤياك
أنا لا فرعونك .. لا موساك

أنا لا ثعبانك .. لاني عصاك

أنا بس يا دابك ساكنه مسامك ....

وجبرا جارية مجرى دماك

ومقطع أول :

ما غنيتك

اتوكيته عصاة أحلامي دخل واديك عفوا ناديتك

شلتك ريحة مطرة وغيمه وولع نارك يوم خشيتك

ودقيت بابي واتوكلت فتحت الباب بسراع لاقيتك

واتبسمتك حس الفرحة سكنت رذاذ القول ورجيتك

وعشعش فيني خيالك جّوه ..

وكنت الزول الضعف القوّه ..

وكت إت آدم وكت أنا حوّا ..

سلبت الريد الصادق مني .. وكان الريد مسكين بتتلوى

وفجأه فتحت عيوني صحيتك

سكت الصوت كان ناديتك

ودون ما أشعر كت بحتاجك

كت بحتاجك لما تعفرت سحب الوجعة تسكن خوفي

وكت بحتاجك لمّا تطش الكلمة الحلوه تلولي حروفي

وكت بحتاجك تملا فراغك فيني وتسكن آخر جوفي

وتبقى القلب النابض إنت ورهف إحساسي وعافية شوقي

ومقطع تاني:

ولا ناديتك

الناداك احساسي وشوقي الشد خيولي وقت لاقيتك

وجبتك مني جنين مستوطن عصب الفكرة وقم تاتيتك

ويوم فرعون الزمن الظالم فتش عنك أنا تاويتك

وأوحى خيالي توانس يم إحساسي المرهف وفيو ختيتك

وكان تابوتك إني أوسد ذاتي مسامك وفجأة رميتك

ولمّا رميتك ..

اتمازجت الولد الفكره ...

واتكونت الريدة الفطره ...

وكنت صباح الليلة وبكره ...

وكنت شعاع الزمن القاتم ...

ونور الحاضر وذات الذكرى

ومقطع تالت:

ما غنيتك

الغناك ده الوتر الحاير وأنا ما أنكر استنيتك

لا وصلتك لا شريتك ..

أنا لا درتك لاني أبيتك ..

لا طلقتك لا رديتك ..

لا اتيممك لا اتوضيتك ..

لا أشركتك لا صليتك ..

لا واعدتك لا خليتك ..

لا استنشقتك عنصر تالت يدي مجال لي أن تأكسد

في كريات الريد في بيتك

أنا أدمنتك لما عقاب الزمن استوطن فيني خراب

ورجعت مشيتك

سكه تلملم باقي الحسره وتخسف بي لو ما داريتك

وأنا داريتك؟

أنا داريتك بين شطآن البال والخاطر

وفي ضليل الغيم الماطر

وفي همسات أطفال بتغني ..

فاطمه السمحه .. وحسن الشاطر

وياني السمحة .. وياكا الشاطر

لا حجيتك لا بجيتك ..

لا حسيتك مقطع غنوه لا رتلتك طه وفاطر

يالعفرته الجوف الفاتر

لاني صرختك لا استسقيتك

ومدخل رابع:

أنا نفضتك لما غبار الذكرى أصابك

وماني قفلتك شان ما أفتح جبرا بابك

ياخ اتفضل قلبي حبابك

ياني ديارك وياني صحابك

ياني رذاذ المطر الجابك

وياني حضورك رغم غيابك

ألف حبابك

أنا لا شلتك لا ختيتك ..

أنا لا جيتك لا وديتك ..

لا طلسمتك لا حليتك ..

لاني ربطتك لا فكيتك ..

أنا يا دابي مرقت وجيتك

واتيممتك واتوضيتك

ويوم آنست لهيبك ولع اتكلمتك واتوكيتك

كنتك مضغة واتكونتك يوم اندمجت ذاتي وذاتك

ولع نارك وجت بغلاتك

وخش في جوفي وفتش عنك

تلقى سكونك فيني معنون بي أفراحك

وبي آهاتك

بي صوت جهرك وبي همساتك

بي دق قلبك و بي نبضاتك

ومقطع خامس:

أنا بالجد بالجد حبيتك

لاني زليخه عشان ما أراودك ...

لاك إت يوسف شان ما تابى

و لا شديتك عود وربابه

ولا كلمتك البحر إتبخر شان ما تطلع انت سحابه

ولا دقيت إيقاعك مبدأ لا حردتك تمشي الغابه

وآخر مقطع :

أنا بتوكل وأدخل جواك مادم بالأنفاس تاويتك

أنا بتوسد عصبك عنوه وتدخل انت جواي يا ريتك

وينو غناي لو ما غنيتك

وشن غنيت لو ما غنيتك

وما تطالعني إذا ما قدرت أفرتق كتلة حسي وأصارحك

اتمنيتك

وكلما يوت تشرق شمس الله

بتاتي غرامك فيني واشيلو مدام أنا في جواي تاتيتك

ما لولاي ما كنت قدرت تلولي الزمن الفيو واريتك

وياني عصير زيتونك ونارك وضو مشكاتك ونورك و زيتك

وياريت تمسس روحك فكرة اني نسيت اسمي وما نسيتك