لقاء جميل باعضاء الخارج وكرنفال فرح بطعم العيد

بسم الله الرحمن الرحيم

عيديه جميله بطعم اللقيه بأهلنا الطيبين القادمين من الخارج حبابكم الف ديارنا نورت وكل سنه يا رب سالمين تامين لامين .
يستضيف الأخوه اعضاء المنتدى بالداخل اخوتهم الاجلاء أعضاء المنتدى بالخارج نتمنى لهم أقامه طيبه وأجازه سعيده فى حضن الوطن

المكان :- النادى الوطنى الخرطوم

الزمان :- أمسية الاربعاء الموافق31|8|2011م

الضيوف المحتفى بهم الاعزاء

الاستاذ : فضل الحاج (خدوره ام بشق )
الاستاذ : ازهرى الحاج
الاستاذ : معتصم مصطفى بابكر
الاستاذ : عبرالرحمن تيمى
الاستاذ : ماجد عبد الغفار
ابننا : محمد المعتصم مصطفى

الدعوه للجميع كما نرجو الحرص على الحضور
ودمتم فى أمان الله وحفظه

مرحبا بالكبار..وكدا شفنا العيد قبل ماالناس يهل عيدا..

ليه كده يا اخيتى يا ناهد
انا واخيتى الدكتوره اسماءنا مافى
ولا عاملها مفأجاة؟
معليش قصبن عنى
فركشت ليكى المفأجاة.
خلاص يا اخوانا نتلاقى فى النادى الوطنى
تحياتى

عيدكم سعيد

معقول سهاد انت هنا

ومالك ما جبتى ود عشمان

عييييييييييك مشاء الله تبارك .. ازهري الحاج شخصيا في السودان !! كل فطاحلة الشعر العربي معكم يا ناس السودان ..

يا فيصل حقو اللمه دي تقلبوها سوق عكاز ..

لكم التحية جميعا و اتمني لكم اقامة طيبة مع اهلكم ..

اخوى الافكاتو كل عام وانت بالف خير
ويحقق ليك كل الامانى انت والاسره الكريمه.
يااخوى ود عشمان ده عايز ليهو اجرات من الملكه
وهو مقيد بيها ولازم يوفرو ليهو الحمايه الكافيه عشان يضمنو اجازته تكون امنه
ومن غير اختطافات ومشاكل.
اقعد انتظرو لما اجازتى تخلص ولا شنو ؟
كلامك ده (اصلو اخيتك ناس قريحتى راحت )
زول شغال بيها مافى خلينى احضر لمة النادى الوطنى دى وارجع
تحياتى

ننتظر بفارغ الصبر صور هذا اللقاء

وعلمنا ان الاستاذه / ناهد عبيد كانت نجمة اللقاء بلا منازع

وان شاء الله يوم شكرك ما يجي

نعم ناهد كانت النجمة بلا منازع.
وجلسة مامنظور مثيلا..
تشكري ياأختي عليها..وربنا يدوم علينا هذه النعمة.

نعم كان يوماً بحق .. حيث التقى كرم السماء بكرم أهلنا الطيبين ... غيث منهمر ... وحبٌ من أهلينا منهمر .. أزال نوازل الحسرات والآهات المحبوسة بفعل الغربة .. تشرف النادي بأهلنا الطيبين واستبشر بوجوههم النيرة ونفوسهم الخيِّرة .. اعتبق المكان بفيض عبيرهم فالتقت الأنفاس العطرة بعطر رائحة المطر .. الذي انسكب ففاض المكان ألقاً وازدهت جنبات النادي ... فالتقى الجمع على أمر خيرٍ قدر.. شكراً لابنتنا ناهد .. مليلكة المكان والزمان .. والتي دثرت الحفل بصبرها ورزانتها .. لها الشكر مثنىً وثلاث ورباع حيث كان لها القدح المعلا في أن يخرج الحفل بما خرج به من جمال في كل شيئ... شكراً لكل الحضور ممن تكبد المشاق جيئة وذهاباً لا لشيئ إلا الاحتفاء بنا .. شكراً للصديق أحمد قمرالدين يوسف الذي حضر من أم بدة في تلك الليلة المطيرة.. ليلتقي بنا...
شكراً لكل أهلنا الطيبين
وكل عام وأنتم بخير

دا كلو كوم نحن الان عرفنا اللقاء طلع مظبوط و قالو لينا المطره شتتكو .. لكن الشاعر الكبير خدوره ام بشق في تعليقو الاخير علي البوست كتب :

" اعتبق المكان بفيض عبيرهم فالتقت الأنفاس العطرة بعطر رائحة المطر .. الذي انسكب ففاض المكان ألقاً وازدهت جنبات النادي"

طبعا الفطاحله بتاعين العربي ديل ما بنقدر نجاريهم .. الناس قالو المطره خربت القعده خدوره الان بقول المطره صلحت القعده ..

علي كل حال نحن دايرين نشوف الصور .. الصور .. الصور .. اقبال عبداللطيف قالو الكاميرا كانت معاك يلا نزلي لينا الصور ..

لكم التقدير

والله بختكم دى فاتتنا 0000تهانينا بس نزلوا لينا الصور

كان اليوم رائعاً واللقاء حميمياً أخرجنا من رتابة الخرطوم وجمعنا بأخوة نعم أخوة لم نرهم منذ زمن بعيد وكان ذلك اليوم ذو طعم خاص . تحياتي لكل من شرف الجلسة بطلته البهية وكل فرد من الحضور مثل إضافة لحبل الود الحباكي الفريد والمتصل بإذن الله .
تحياتي الخاصة للأخ فيصل والأخت ناهد الذين بجهدهم تهيأ لنا هذا اللقاء الحميمي . وللجميع أقول كل عام وأنتم بخير .

هاي عيال ابوجبيهه اتو كلامكو دا ككيف .. مالكو ما بتشكرو عيال امبرمبيطه الشاركوك في اللقاء الجميل ..

الاخ يسن محمد يسن ..

نحن بنشكرك كتير لتمثيلك لعيال امبرمبيطه خير تمثيل .. كما نشكر الاخ عود الصندل الذي مثل عيال كلوقي خير تمثيل ..

ما دام ما في زول شكرنا اخير نشكر انفسنا ..

هو يا عيال انتو شنو كل مرة تشتتو فى الناس دة يين وده من يين

الزعيم غريق والله المره دى فاتتك مفلقة لكن تحضر حقت ول عشمان فى قندهار ولا نعزمو اقاى

وكمان البركة فيكم فى ابن عمك

أفتقدنا أخونا غريق وكل عام وأنت بخير وأحسن الله عزاك

nashi كتب:ننتظر بفارغ الصبر صور هذا اللقاء

وعلمنا ان الاستاذه / ناهد عبيد كانت نجمة اللقاء بلا منازع

وان شاء الله يوم شكرك ما يجي

كل سنه وانتى طيبه يا احسان

انتى عارفه يا دكتوره الموجدين فى اللقاء اعضاء الداخل والخارج كانوا كلهم كالبدر ضياء وبهاء والق وجمال حتى صغارى محمد موس محمد عيسى -- وافاق بقادى عبيد وامنا الجميله تينه (فاطمه) ماهل مختار ابنت اقبال عبداللطيف-- والجميله غفران عبدالقادر بت ايمان عبدالزاق قمر دورين . نجمه شفتى الفرق بين النجم والقمر

اشكرك على كرم اصلك
وربنا يردك سالمه غانمه موفقه

سهاد طبعا الجماعه صدقوا انك موجوده فى السودان وياسر سر الختم اخد على نفسو اننا لم نعلم بمجئك وكمان اسمك ما نزل مع المحتفى بهم قلت ليه البت سهاد مستهبله هههههه

ربنا يجيبك بالسلامه ونضبح ليك تور ونعلب المردوع والدرملى والنقاره ونعمل سهوره كمان
لكى دعواتنا

يس محمد يس كتب:أفتقدنا أخونا غريق وكل عام وأنت بخير وأحسن الله عزاك

فعلا فقدنا غريق الزعيم وعبدالرحمن كمبال صادقو واسامه عثمان ومحمد عبدالله قادم واعتزر الطيب كنده نسبه لظروف والدته الصحيه الف سلامه ليها

وكل عام وانتم بخير

قال خدوره ام بشق :-

نعم كان يوماً بحق .. حيث التقى كرم السماء بكرم أهلنا الطيبين ... غيث منهمر ... وحبٌ من أهلينا منهمر .. أزال نوازل الحسرات والآهات المحبوسة بفعل الغربة .. تشرف النادي بأهلنا الطيبين واستبشر بوجوههم النيرة ونفوسهم الخيِّرة .. اعتبق المكان بفيض عبيرهم فالتقت الأنفاس العطرة بعطر رائحة المطر .. الذي انسكب ففاض المكان ألقاً وازدهت جنبات النادي ... فالتقى الجمع على أمر خيرٍ قدر

صدقت يا خال فى تعبيرك شكرا لحضوركم الكريم ال>ى اثلج صدورنا جميعا جمال اللقاء يرجع الفضل فيه لله سبحانه وتعالى وتفاعل الاعضاء جمعيا والحضور المميز والتلقائيه والبساطه والطيبه والسماحه المنقطة النظير والله عندما تصافح فضل الحاج واحمدقمر الدين ادمعت عيناى ليتكم وثقتم تلك اللحظه (الزمن الجميل ). نشكرك يا الله على ه>ة النعمه .

كيف نشكر بعضنا البعض على واجب عمناه مع بعضنا البعض فالشكر للجميع دونما فرز وللضيوف الامجاد وهم


عمنا أحمد قمر الدين
جنابو الطاهر حارن نشكرك جزيل الشكر لتهئية المكان
نوره الناير (حرم اسماعيل هجانه)
ماهل مختار (زوج اقبال عبداللطيف )
البيه مختار
انصاف (حرم البيه )

واقعدوا عافيه

سلام يا ناس يا رايعين

ول عشمان انت بتجى بتين

وبعدين معاك فى حكاية يس



ماهو حسمها الان وكان هو واحد من نجوم الاحتفال


بعدين ول كوكو وين

عود الصندل صندل بى جد يا جماعه لاقيتو فى مكان اخر عود صندل عديل ريحتو فايحه حلا

شكراً للعزيزة ناهد .. شكراً على المداخلة .. أحمد قمرالدين هو صديق ورفيق عبدالرازق الحاج .. وهو بالنسبة لي أكثر من صديق افترقنا عام 1982 ولم نلتقِ إلا في تلك الليلة والتي لو خيرت تمنيت ألا يكون لها فجرُ خاصة وكنت مغادراً في صبيحة اليوم التالي إلى جزيرة نائية في قلب الخليج وأتذكر محمود سامي البارودي حينما نفي إلى جزيرة سرنديب (سيريلانكا) حلياً:

أبيت في غربة لا النفس راضيةٌ بها .. ولا الملتقى من شيعتي كثبُ

فلا رفيق تسر النفسَ طلعتُهُ ولا صديق يرى مابي فيكتئبُ

أحمد تعلمت بقربه حباكة الزراير.. وكف البناطلين والأردية وكم تآنسنا وأكلنا وشربنا !!! يا له من زمان مضى ..

شكرا الاخت ناهد والشكر موصول بالاخ ياسر وكل اعضاء المنتدى العزيزين الذين لم تتسنى لنا الفرصة بلقائهم

اتصل بي الاخ ياسر واخبرني بالعيدية واللقاء الرائع الذي تم بدوننا نسبة لظروف السفر للحباك

لكني تمنيت لو انني حضرت ويا ليتني حضرت لقاء النجوم

المثل بيقول الشردن خلهن اقرع الواقفات

الشكر اولا واخيرا للقائمين على فكرة لم شمل الاحبابا

دمتم