مناديل من كفن المسيح

رد على ما يدور الآن بالوطن نهديه الى الجميع بمناسبة عيد الفطر

اوعى الكلام الفارغ المنفوش فشوش
هقالي امبريالي سام
حفض السلام في ايدينا مافي ايد عم سام

بس بالمطايبه بالسماح ارضاً سلاح

منك السلام ولك السلام وبك السلام
مياك وليد الحن لزم طياب

نفج لي صدري بي عطرون زغاوة نقاوة لو شقاق هجم
ماك الكسيت الكعبة ديك

ماك السقيت بي آبار علي

ماك العزمت علي الفقير العقلو راح

ابن النصاح سوى النصاح
قل للزنوج النوبوية دم العرب

كيف البجاوية واريحيت الحلب
لي كل خلاصات النسب

من بطن سودانيي جد بطراني اي بالحيل نعم

ماسادنا دون سودانا سيد

طول الزمن شانك خدم ليك ياوطن جمعاً عبيد
لا لليسو دا عريبي شو بلويد بجم
جلابي مندكرو انقهم
تلك النعوت الماهي فيك والماهو فيك ماتشيلو هم

(((سمحة المشاغلة عن وداد )))

فريق قطع قافت مزاح قريق مو زم

هيظار حبايب اباني خاله لي اباني عم
مو دواس ودم

سيب للزمن مال الزمن
تلك النعوت هيا بي فهم

نحيا وتموت موت الخرافات الوهم

عن فتحت الموية العويش والروث تفوت

كل السخافات للعدم
ويبقى الدم السوداني ده الوين زيو دم

اما الفواخير الوخم من منقد الزمن الجحيم

اتكومت رتت فحم ياملمع القدر القديم
لمعنا من قدر السجم ملسنا من خرش الشلوخ
خلصنا من نتش الوشم

وسمنا صاح بالاندياح والارتياح لبعضنا صاح

اثنية لي واحد تشق عرقية ماعادت فهم
الشي ابن ادم فد عرق والدم دوم

تحت اللحم هو الدم دوم
كل اليقلب الخوة دم كل اليكب في الجوة سم
ما لما لم
سودانا صم

مابتنضرع غير للزرع
ومابتنقسم غير انها الاوطان قسم

زيح عنو روحك واستريح
بعضا من الله ياوطن

واحد صحيح من يقسمك نصين كضب
من يرسمك وطنين ولو في ولا اترسم
سودانا بس ما سو فهم
جوانا صاح بس كيف نحيا صاح
جما جم صراح

سوا بالكفاح هو ده الاهم
يامثبت الريش في الجناح ثبتنا صاح

كركون سلام لي وطن دوام واحد تمام
قدام وطن دايما امام
طوالي في صلاة الزمن لي جملة الاوطان امام

اسمع كلامي ده ماكلام

كير الحرب ماعندو حد
هو لعيب قعوونج المي السعيير
قلبك تعب قبلك كتير
يابا الحرب مي فيها خير أي الحرب مي فيها خير
أي الحرب مي فيها خير

ثم ان في خيرا في الحرب
انك عصي ولايوق قدر ماك الهدي
وطيب قلب
اسمع كلامي ده ياتلب
اختا الحرب درب السلام ان كان بعيد للحول قرب
وما الحرب اخرتا غير نخور على خيرنا تنكالب امم
طول ما بتنكافا الطيور

وا بختها الحدي والصقور
حظ المرافعين والرخم
ارخ الجناح فوق السلاح
وارضاً سلاح
اسمع كلامي ده يابلد

كان ذات زمان كان في بوكان
زي البوكان ده وها الزمان
وقعت شرارة علي برج ساكنو الحمام
في سراع هرع ريح الخريف

من جاي و جاي لما الغمام
في سراع هرع ريح الخريف من جاي لي جاي
لما الغمام

نزلت مطيرة برت برت طفت الحريق
والريح معلق في الركام لما اتنفض
وقف المطر والجو برد فزعوا العصافير لي بعض
حفتوا الحطام مرق المرق واللنحرق بين الورق
لفوه بي كل احترام
قبل الظلام يغشى الفريق زي اكنو ماقدكان حريق
كان البرج زي ماهو قام من تاني قام سكنو الحمام
باض الحمام هدل الحمام
نزل الحمام طاهر قدم على جملة الايمان قسم
الدندريس ودحوا ابوالهدهد جزم
والمنصف البستان حكم

بوم الخراب وين باني
جاني ومتهم في كل حربة
ويات سهم مسنون من اعواد السلم
في راسو سم
كل اليقلب الخوه دم
كل اليكب في الجوه غم

ما لما لم
لا ديمي راح يبقى الوطن ده وهيييييط خلاص
واوسع براح
اخر الكلام منو السلام ان جيتني جد

وا جيتلنا ويجت للبلد

ياابن الكرام حل العقد

حليته بيطول الحبل
فكيته راح يصل الدلو البير الحلو

ويات من ولد تلقاه استمخ مع النشل

وسقى البلد ياحواء بنوتك ملؤ

ويادم جناتك تغتسل
من لوثة الزمن الفسل
يازول وفي وسمممح خلاص
يامن عشان عين الوطن
تبرد نشيل الدنيي حاس
قوماك ياخيي ندوس دواس

كجنا ياجنا ها العكاس
يضرصنا كلنا حس رصاص
دايرين نونس مااحنا ناس

على احلى نخب وداد وكاس
علة حلا نخب وداد وكاس
من راس قرورة لحدي كاسوزي مابيعاطن الموج درج
اومابيباطن الغيم اويل
نلهج لهج حلو سلسبيل

والنيل يغني حليلي ولاحلاليانا المكتول عديل والله في حوش البلد

مكتول كتل
ــــــــــــــ
وياك بالفعل
سوداني ياموية الحياة
ياخالدة يامنذ القدم
لا ريحة لا لون لاطعم
الماهو فيك ماتشيلو هم
اد الوطن مااداك يا
ادو الحياة وي ده الاهم
بالجاي راح ننسى اللراح
فر الجناح فوق الجراح
ارضاً سلاح
ياجمنا
امسك شباطين الصراع الفكري صاح

انضر حزم بين باطك الدفاي ياخي
حزم الكفاح بالوعد بي شد البصيرة على الشعاع
الدغري راح نصلو الصباح
لا بالصياح
لا بالتباكي علي بوانكي اليانكي

لا بالانبطاح تحت السواهي
وتحت السواهي دواهي
نصباها الضباح
انا شوقي لا متناهي للوطن البراح

انا دمي دم ماشاهي وين شاهي الصباح

بي همي لا تلاهي

انا همي شايلو صاح

لي آهي لا تشاهي لا بالله يانخب الكساح
وديتي وين وطني الخزين ؟؟؟
سبتيلي هادي التاح تراح

وانت العليك ركتنا هات جكتنا سايمين المهج
ودينا خاطرك ياوطن

ناس في سبيلك كالغيوم
وا شوقنا للوديان زمن

سكتنا دغريية وحداك

سكتنا دغريية حداك

سكتنا دغريية وحداك

جاتك بشاراتك اذن
علمنا نستشهد فداك

علمنا نستشهد فداك
ونحنا البنتماوت سدن

شكـــــــــــــــراً ..ربنا يجنّب بلادنا شرّ هذي البلاوي ..وإنشاء الله ينعم بالخير والأمن والسلام في كل أرجاءه

من طرف **بوعزيزى** 7th سبتمبر 2011, 11:24

ابن النصاح سوى النصاح
قل للزنوج النوبوية دم العرب

كيف البجاوية واريحيت الحلب
لي كل خلاصات النسب

من بطن سودانيي جد بطراني اي بالحيل نعم

ماسادنا دون سودانا سيد

طول الزمن شانك خدم ليك ياوطن جمعاً عبيد
لا لليسو دا عريبي شو بلويد بجم
جلابي مندكرو انقهم
تلك النعوت الماهي فيك والماهو فيك ماتشيلو هم

هذا هو حالنا الآن بعد الترسيخ للجهوية والعنصرية..
شكراً يا وريف على قول اخونا النضيف الفاتح محمد توم, بالمناسبة أين هذا الرجل..
تحياتى ..
عزيزي..

ارضا سلاح يا نويه و بوعزيزى

شكرا على المرور

نحيا وتموت موت الخرافات الوهم

عن فتحت الموية العويش والروث تفوت

كل السخافات للعدم
ويبقى الدم السوداني ده الوين زيو دم.

اين الدم السودانى الذى انهدر كالنيل وهو زعلان
بدلا ان يروى ويعمر يدمر ؟؟؟
التحيه لك شاعرنا الجميل ( حميد)على الجمال .
التحيه لك عزيزى (ابو احمد).
التحيه الى شعبى الجميل
واهلى واحبابى
فى جبال النوبه
واهلى فى دارفور واهلى فى النيل الازرق .
تحياتى

ارضا سلاح يا سهاد

شكرا على المرور و غياباتك كترت

كل عام و الجميع بألف خير

تحياتى

أرضا سلاح
عمداي غصون
زيتون وورد الياسمين
وانا من زمان قِبال سنين
حجيت على البيت العتيق
وعرج على آبار على
ولمن رجعت على البلاد لاقيت
علي
دينكاوي من أرض الجنوب
نوباوي من أرض الجبال
حلفاوي من أرض الشمال
من مدني من صلب النضال
وعبد الفضيل ود النوير
وعبيد ولد حاج اللمين
عز الشباب دفعواالعمر
مهر الوطن
أرضا سلاح
عمداي زهور
عبوا البخور
دقنة البطل سيف الشرق
تور شين جسور
ود الغرب
أبا الفكي أمحمد
وليد برنو الهصور
دينار علي
ود حبوبة الحق الجلي
وغيرهم كتير
نبزوا القبائل والحسب
خلوا النسب
شان الوطن
تسلم عزيز
وطن الشموخ
وطن الشلوخ
وطن الشيوخ
أرضا سلاح
عمداي وطن
صفه واسترح
أنت البطل

شيخ الطيب ارضا سلاح

شكرا على القيمة المضافة

تحياتى و كل عام و انتم بألف خير

ياوريف مســاءاتك أزاهر انشاء الله
اسمع كلامي ده ماكلام
كير الحرب ماعندو حد
هو لعيب قعوونج المي السعيير
قلبك تعب قبلك كتير
يابا الحرب مي فيها خير أي الحرب مي فيها خير
أي الحرب مي فيها خير
......................................
نسأل منو يا ودصديق ؟؟؟؟

مناديل من كفن المسيح

مناديل من كفن المسيح

رد: مناديل من كفن المسيح

رد: مناديل من كفن المسيح

رد: مناديل من كفن المسيح

رد: مناديل من كفن المسيح

رد: مناديل من كفن المسيح

رد: مناديل من كفن المسيح

رد: مناديل من كفن المسيح

رد: مناديل من كفن المسيح