****سؤال محير رقم (12)****

احبابى احباب الحباك
بعد غيبه
من تسؤلاتى المحيره الكثيره جدا
اعيد بكم الى سؤال (غريب وعجيب )
(الشمممممممممممممارات). قبل السؤال ادردش معاكم
مع فكره خطرت ببالى ....

الوووووو تلفون مشغول
ويدخل (الانصر مشين )الو انا (ن) مشغوله الان مع لمليم الشمارات لو عندك شمار طازه
وما قادر تنتظرنى سجل لى شمارك سريع وبعد ما اخلص من العندى برجع ليك (شكرا)
الاخت (ج) المتصله
وينك يختى تلفونك ده مشغول كده
من قبيل بتصل عندى ليكى شمار حاااااااااااار اقفلى
اقفلى قوام وارجعى لى سريع قبل الشمار ما
يقدم
واشوف واحد تانى غيره
وما تنسى الشمار المشغوله بيهو ده
توصلى لى سريع (لكن يختى من غير زيادات ) تبقى زى (فلانه...) تزيد وتزيد فى الشمار حتى يمسخ .....
الشمار التانى ...
عباره عن ايميل مرسل من اخونا( ابو شنب)
وينك ياخى
امس (لطعتنى) كده منتظرك
تكمل لى باقى الشمار وما اشتغلت بى شغله
و(زولتك )عامله فيها نايمه
لكن عارفها تكون عايزه تسمع الشمار عشان ما تقبض بيهو الجو مع صحباتها
لكن كسرت ليها الدش فى راسها
وطلعت ليك
فى البلكونه وانتظرتك بس شريتنى وقلت

اكيد
تكون بتغالط فى (الوليه)
لانها زادت حبه
من الشمار بتاعك وانت زعلان تشاكل فيها
(يا وليه انتى مجنونه
الشمار ده
ما كتير قدر ده
جبت الزياده دى من وين .......)
السؤال هو ........
سمعنا بان (حواء) هى صاحبت (الشمارات) من زمن (عجوبا الخربت سوبا ).
هل (الشمارت) خاصه( بحواء) فقط ام ادم (شمشار) كمان ؟
ونعلم ان الاختلاف فى الراى لا ............
منتظرين (شماراتكم )هى قصدى (مداخلاتكم)
خالص احترامى لكم

تسلمى يا اقبال يا اختى
على المرور الجميل
والجبنه جاهزه امرقى لقدام .
اها (الشمارات) كيف (هى قصدى الاخبار كيف )
تحياتى .
اقبال قالت "(ادم يمتلك الخاصيه )
اها رايك شنو يا (ادم) فى الكلام ده .

صباحاتك بتتعانق مع الفكرة عشان تنضج شماراتك

يا شماراتك وكت تتقل فى جلستنا و تاخد كل نهاراتك

شكرا سهاد

موضوع غاية الروعة

اقترح ان تجمعى كل الاسئلة المحيرة فى بوست واحد

ول نويه لك الحب

ياخى رايك شنو فى شمار آدم؟

طوااااااااااالي لبّستي فينا الطاقية ؟ مامشكلة جاهزين بس منتظرين جيّة جنابو

###سؤال محير رقم 13###
سلامات احبابى احباب الحباك
نعود مع بعض الى
الاسئلة المحيرانا
لعلنا
نقدر مع بعض نفك بعض الشفرات
والحيره
العاشينها كل يوم

.....
حشمه فى توبك تملى العين يا بت بلد++

طلعت الان انواع واشكال كثيره من الثوب السودانى واسماء مختلفه
و.....و....
على الاخوات والاخوان ان يساعدونا
بما يعرفوه من اسماء الثياب
سؤالى هو
هل التوب السودانى هو نفس التوب الحشمه
والعز والفخر الزى تغنى له الكثير من فنانين بلدنا ام انه اصبح الشفاف الذى لا يعنى الستره والحشمه ؟
منظرين اراكم ومتفقين ان الاختلاف فى الراى لا ..........
مع خالص احترامى لكم ا

التوب السودانى هكذا يسمونه فهو زى قومى و لا يجب ان يتم تشويهه بأى شكل من اشكال الخلاعة

موضوع حيوى

الله يعزك استاذنا الفاتح
والله ضحكتنى
جايب خبر وعارف ابو فتقه كمان والله ليك حق اخوى تكجنو كده
عارف
السبب الخلانى انزل الموضوع ده
اتصلت بزين للتوب السودانى فى لندن
بسال من رسالة لندن عارف الزول ده لما بده يعدد لى انواع التياب لما اتخلعت

بس ركزت
مع


توب اسمو الموهوب قلت عساه ان يكون فعلا موهوبا

وفى كل حاجه فتقه ولا فتقتين وزولك مواصل
قلت ليهو شكرا بتصل عليك تانى
.........
اها وين الاخوات العزيزات محتاجين نعرف الانواع
والاسعار
كمان لو سمحتو.
اخونا ود نويه
سلامات
اها رجعناكم لسؤالات
منتظرين رايكم والانواع الجديد
تحياتى
[/size]

مرحب بيك يا أختنا سهاد بعد الغيبة ..المره دي جيتي بالتوب ذااااااااتو مافي أجمل منّو
في رأي التوب السوداني مهما توارت عليه من أسماء يظل هو التوب السوداني ؛وهذه المسميات علي التوب ليس واقعاً جديداً بل عرفه السودانيين منذ عشرات النسنين فتأتي هذه الأسماء للتوب مواكبة مع الأحداث السياسية والفنية والإقتصادية والفنية ؛فكانت مسميات التوب في الماضي مثل(رسالة لندن كرسي جابر عودة نميري والزرّاق )والآن مع المواكبة ظهر إسم(الأنترنت ؛الثورات وده بالمناسبة قالوا غالي جداً إتنين مليون ج س قديم ؛وندي القلعة والبرير )وكثير من الأسماء الحديثة

انها غيبوبة ما بين( الوعى ولا وعى)
استاذى الفاتح
يسال منك الخير والعافيه
ماجد بخير وبوعد
كل مره وبقول
ارتب امورى وادخل بتقلى
ونحن منتظرين
التقل بتاعه
وينور المنتدى
تحياتى لك ولبنت عمى والعيال

تسلم اخونا امير المنتدى ود نويه
ربنا يديك العافيه والصحه
انشاءالله نواصل السؤال رقم( 14 ) قريبا
وزى ما قلت الجرى والله مانعنا
تحياتى

احبابى احباب الحباك
اليوم سؤالى يختلف عن كل اسئلتى
لما يدور بخاطرى ومن خلال ما يدورفى منتدانا الحبيب راودنى الخوف من ان نفقد اشياء كثيره
والان بلدنا محتاجه لنا ان نقف وقفه واحده ..........
وبرضو بعيدا عن السياسه !!!!!!!!!!!

السؤال هو

ماهو الوطن وما هى الوطنيه ؟؟؟؟؟؟؟؟؟؟؟؟
ولا ننسى بان اختلاف الرأى لا يفسد .........................
خالص احترامى لكم

سهاد سلامات

السؤال كبير و يحتاج الى كثير من مداخلات الاعضاء و لا يجب ان يكون من الاسئلة المحيرة و كذلك لا يختلف الناس

كثيرا فى مفهوم الوطن و الوطنية

أقترح ان تفردى بوستا لنقاش هذا الموضوع مع الشكر

تحايا

(ابو احمد ) سلامات
كلامك على عينى وراسى
ولكن انا اضفته الى اسئلتى المحيره لانى بالجد محتاره والحيره راودتنى من دخولى المنتدى السياسى ومعرفة بعض الاراء من الاخوان وادهشونى وحيرونى حتى
بدأت ان اشك فى مفهوم الوطنيه الذى ربونا عليه ولذلك اتتنى الفكره بان احل الحيره بالسؤال ونستفيد من اراء بعض لكى تدخل الطمائنينه الى قلبى .
واعتقد ان هناك اختلافات فى مفهوم الوطنيه عند البعض فى هذا(المنتدى) وهو سبب طرح سؤالى المحير جدا . وقلتها بعيدا عن السياسه لذلك لم اطرح سؤالى فى اتجاه سياسى فى المنتدى السياسى لكى يجد الاخوه راحتهم فى الردود
وكلنا نعلم بان الاقلبيه العظمى فى هذا المنتدى لم يشاركو بارائيهم فى المنتدى السياسى وذلك يرجع الى اسباب يعلمو بها .
وحبيت ان نخرج من الحرب والقلق والخوف على وطنى .

اها ما وريتنا يعنى شنو وطن ووطنيه ؟؟؟؟؟؟؟؟؟
خالص احترامى لك


منتظرين ردودكم