ما أشبه اليوم بي أمس - الكتيابى

الاستاذ ازهرى و الاخ الفاتح محمد توم

لكم التحية

ـــــــــــــــــــــــــــــــــــــــــــ
رسالة خاصة .. عامة
============
في رثاء الصديق الراحل المقيم الأستاذ مصطفى سيد أحمد

ما أشبهْ اليومْ بي أمِسْ !!
نفس الدواير والرموز !
نفْس الحُزُن ...
نفْس الزبََد ...
نفْس الدخانْ ..
نفْس الكلام المِنْحَبِسْ
واقفين مكان خليتنا في نفْس المكانْ
المسرحْ ـ المسرحْ ..
شخوصْ ـ بتعيد شخوص .
نفْس البَطَلْ .. نفْس الحصَل ..
نفْس الفصول ... نفس الدَّرِسْ !!..
للريح شُراعاتْنا الرئاتْ .. متنهِّداتْ
ما بين ضباب البُكره ما بين جدول الماضي اليِبِسْ ..
والضُّل على حالو القديم ـ
يقصَرْ ويطولْ ـ
يرجع ويزولْ
يلقانا في نفْس المكان
يلقانا ممسوكين ..
من الوجع القديم المستديم .. المنعكس
وجع الحروب .. وجع الشعوب .. وجع القلوب
وجع الشمال وجع الجنوب
وجع الوجع
كِضْب الكِضِب ..
وأنا وأنت عارفين الفَرِقْ ..
بين المفيد والمستفيدْ

ما أشبهْ اليوم بي أمِسْ !!..
واقفين مكان خليتنا ..
فوق تلَّة غناكْ ..
تلَّةْ غُناكْ كُبر النَّفِسْ
شايلين غُناك .. شفره ونِصَالْ ..
شايلين غُناك شتلَ النِّضال المِنْغَرِسْ
في عازَّه كانت في الفريق
للضيف مجالْ
و الليلة مبتورة قوام ـ
ممكونة لكن ..صابرة بيك ـ
مسكينه ـ بتسلم عليك ..
بتغني ليك و نشيل معاها : ـ
(و لا سلينا و ماسليتْ.. )
واقفين .. وواقف ما مشيتْ

إتْلالا يا عين الشَّمِسْ ..
إتْلالا يا عين الشَّمِسْ ..
إتْلالا يا عين الشَّمِسْ