بسأل عن نفسي

الف حمدالله على سلامتك

اخونا الجبالى



ونورت المنتدى

وانت موجود ما بين جبل كرن وجبل العمده

نعم اخى انى فتحت بوست وسالت من الناس وكنت بقول كمان كل الاخوه والاخوات الغائبين

من غير فرز .

وحقيقى المنتدى فاقدك



ومنتظرين منك ان تعوضنا الفات

تحياتى

ماكا هوين و الله ..
تاوقت كم مرة و لم أجدك ..
إفتقدتك ..
و كنت أعرف أنك بخير ..
صدقني ..
قابلتك و سلمت عليك بحرارة في وسط السوق ..
تحياتي تاني ..

اول حاجه نحمد الله علي السلامة
وبعدين انت آخر شخص شاف الحباك
وشاف بيتنا زمان
وعليك الله ناس الحله " جبل العمدة" كلهم طيبين؟
والخور والجناين الفي الدرب والدليب
والسيل لسه بجي ؟
وبصل إستراحة المحلج؟
وشجر العوير الجنب المحلج في ولا بقي عليه البقي علي ناس المحلج؟
وشجر الانجل لسه في؟
بركة بالجية اخوي وبركة بي سلامة الاهل

اولا حمدا بالسلامه والبركه الجيت

حلوه بسأل من نفسى دى خبينه ....... ياخى معاك حق انا كنت فاكراك ح تسأل من الجبالى المثل بقول كن ما دارك ما لامك

اهم حاجه انوالحباكى لقاك حاول تفتكر اللاقوك

تحياتنا

والله البيت طبعاً موجود لاكن لم يكن بالصورة التي الفناها اياه بالتأكيد فقد رونقه المألوف وناس الحله بأكملها تبدلو والله يجازي الكان السببب والاستراحة وسكن العسكر
والخور والله بسرسب والمشيش ومويتو الحلوة وشجر الانجيل حول سور المحلج اكل عليه الدهر وشرب إلا من رحم ربي
الاخت ناهد واختياري لعنوان الموضوع والله مجرد شوق للاهل والاسرة بالمنتدي
الف شكر علي المرور الراقي المعبر
لكما الاحترام

الف حمدا لله علي السلامة
بركة الشفناك شديد اخي الجباااااااااااااااالي
منور منتداك

أخي الجبالي صراحةً رسالتك هزتني من الأعماق ... وصدقني أنا أيضاً لظروف عملي لقد إنقطعت فترة طويلة ثم عدت بلا إنذار أو إستئذان...وحتي تاريخ اللحظة لم أفهم من الذي غاب ومن هو الموجود دائماً بين الأعضاء واللي حارس لينا العقاب ..
فمعذرة أخي ...

الدكتورة الغالية ...لقد لمستي فيني وتر حساس ...و سعالك سمح بالحيل ...وبتتفقدي حي المحلج ...وحتي العوير :[[وشجر العوير الجنب المحلج في ولا بقي عليه البقي علي ناس المحلج؟]]

وأنا أتمها ليك : عوير ود الشاويش ...فشكراً لكي ...تصدقي العوير شالوا أرضوا ...حيازة الوالد لقد قسموها للناس ... ونحنا طلعنا فشوش ...[وبقي عليه البقي على ناس المحلج ....]
وأتمني عند عودتي أن أراجع الأراضي ...وأن نأخذ ما تستحقه حيازة الوالد .... ووالله العظيم أنا حتي هذه اللحظة
لا أملك ولا سنتمتر من أراضي الحباااك ...
ومعظم ناس المحلج وكل ناس جبل العمده ...
وود عابد ...وفطاطات ...ومريفئين ... يعرفون هذا العوير وحيازة من !!؟؟وبس عشان نطلع ملوص دي حاره عشان كدا علقت على مداخلتك الرائعة ... وتسلمي يادكتورة ...
الجبالي لك التحية وكل الحب ...

الدكتورة الغالية ...لقد لمستي فيني وتر حساس ...و سعالك سمح بالحيل ...وبتتفقدي حي المحلج ...وحتي العوير :[[وشجر العوير الجنب المحلج في ولا بقي عليه البقي علي ناس المحلج؟]]

وأنا أتمها ليك : عوير ود الشاويش ...فشكراً لكي ...تصدقي العوير شالوا أرضوا ...حيازة الوالد لقد قسموها للناس ... ونحنا طلعنا فشوش ...[وبقي عليه البقي على ناس المحلج ....]

عمي عثمان الله يعوضكم لكن الحاصل بيورم القلب والفشفاش
خايفين من المرض بس
والله ما عارفاه حقكم بس بيتنا فاتح فيه
وكتر الف خيرك عمو

بالله يا دكتورة نحنا جيرناكم وما عارفانا !!؟؟؟
عليك غرامة ...ولازم تحكي نكته قوية وخطيرة ....

وتعرفي أنا ذكرت الحكاية دي ليه عشان كل ناس المنتدي يعرفوا أننا ظُلمنا ...والله بالجد مظلومين ...

وأيضاً قد ظلم صديقي الغالي المرحوم : محمد يوسف إسماعيل ... توفي وتم طرد أبناء المرحوم من المنزل ...
وكنت أتمني أن أجد أحد أبناء الحباك بالأراضي كي ينصف أسرة المرحوم ...والله العظيم حتي الآن مشردين ...وليس لهم أي مأوي ...
معليش يالجبالي ...قلنا نتنفس شوية ...
وتحياتي لكل أهلي ناس جبل العمده ..... معزتي ،،،

العزيز الجبالي

قرمان ليك حار ..

و ناس امبرمبيطه بسلمو عليك ..

اول حاجه معاك حق تزعل و نحن كرابطة ابناء امبرمبيطه بالمنتدي بنساندك و بنقيف معاك وقت الحاره .. كيف ناس ابوجبيهه ما يسالوا عنك ؟؟
مش انت براك الان اذا اي واحد من ابنا ارابطة ابناء جارة الوادي بالمنتدي سجل غياب من المنتدي مافي زول بعبرو و اضرب لك مثل الان الاخ احمد كوكو و الاخ يسن ووووووو و غيرهم من ابناء امبرمبيطه النشطين غايبين لظروف انا بعرفها مافي زول عبرهم و لا سال منهم بعد دا كلو نحن صابرين و ما قلنا حاجه ..

علي كل حال نحن برحب بك و بنقيف معاك في وقت الحاره ..

الاخ عثمان شاويش اذا في ابوجبيهه ما عندك قطعة ارض تعالنا نحن بنديك قطعة ارض مجانا في امبرمبيطه و ما تنسي المنطقه لها مستقبله ..

لكم التقدير

رابطه ابناء جارة الوادي .. عنهم ود عشمان

يعني يا ود عشمان إنت قاعد تحرض النااااس ...

لكين تصدق والله ضحكتني شديد ....هههههههههههه الله يجازي محنك يا ودعشمان كان داير تمرقني من أبوجبيهة .....
وبعدين ياخي نحنا ناس جارة الوادي ديل ناس عززززاز عندنا شديد ...
وما تتخيل مرورك الظريف كيف يلطف الأجواء ... ياخي ما تجي تعرس من أبوجبيهة أو ضواحيها !!!
لأنك درة ثمينة وغالية ...
الله يحفظك يا ود عشماااان ..... ويحفظ جميع أسرة المنتدي بدون فرز .... محبتي

سلامات العزيز الجبالى الحمدلله رجعت بعافيتك وحركت الناس دى شوية بينك وبينك مرات بحصل جمود كده لكن اتا كسرتو لينا وتبارى المحبين فى الترحاب بعودتك شئ جميل .
الاخ جاويش مع احترامنا ليكم و لبنياتكم الا زولا متل اخوى مطير ما بنجوزه من غير جارت الوادى شوف ليك شغلة تانية .
العزيز فيصل والله مشتاقين ياخ ول عشمان لى حمية وناسك الاتنين كان ابوهريرة او التانى انا جاهز ليهم تب ول عشمان يعقد سبارى ساى .
ولكم ودى وتقديرى

فيصل أنت دائماً زهرة يانعة ...وربنا يخليك لينا ياعمده ...
بس ضحكتني شديد أنك لقيت ليك مصارع وأنك كنت السباري .... يا سلااام عليك وعلى كلااام الزمن الجميل ...
تسلم أخي يا فيصل بروحك الطيبة المرحة .

أخي الجبالي ...آهو البوست بتاعك طلع وماشاء الله ميه بالميه ... كدي رضيناك ولا لسه زعلاااان !!!؟؟؟

بالأمس كنا سوياً مع الأخ العزيز : أحمد كوكو ... ما هذا الإنسان ... أخلاق ...ذوووق ...تهذيب ... بالجد شخص ما عادي ... ويسلم جميع أبناء جارة الوادي الأشاوس ...
بس ود عشمان دا شوفوا ليه طريقه ...
أخي محمود ننتظر أفكارك الجهنمية ....

وتفضلوا بقبول معزتي ،،،

مرحب يالحباكي وكيف الحباك وراك

الجبالى سلامات

انا قاعد فى الحباك

انت عارف الحباك بقت كبيره وكلنا بقينا فيها غرباء

كده يا الجبالى اتزكر الزول السلم عليك بحراره فى السوق وكده تكون فكيت لينا طلسم الحباكى ويرتاح اخونا يس

ول عشمان سلام

الداره جاهزه

ما تكب الزوقه

الجبالي حمدالله على السلامة
ان شاءالله اتدكرت الزول ؟
شايفاك تزوغ بي جاي وبي جاي
سلم علي العيال

HUBBAKI كتب:
ماكا هوين و الله ..
تاوقت كم مرة و لم أجدك ..
إفتقدتك ..
و كنت أعرف أنك بخير ..
صدقني ..
قابلتك و سلمت عليك بحرارة في وسط السوق ..
تحياتي تاني ..

ياتو سوق ده يا شيخنا الحباكي !!!!