لا بتعرفوا تشتكوا ولا بتعرفوا البنظروا الشكاوي ولا بتعرفوا المواعيد حتى!!

لا بتعرفوا تشتكوا ولا بتعرفوا البنظروا الشكاوي ولا بتعرفوا المواعيد حتى!!
يعني ناس الخرطوم3 .. والتلاتة دي لعدد المشجعين.. عشان ما واحد يقول لي الناس ديل غيروا اسمهم ! ناس الخرطوم بدون تلاتة طلعوا بعرفوا يقدموا الشكاوي أحسن من المريخ.. علي الأقل شكواهم في سادومبا رفضت موضوعاً وليس شكلاً في الاتحاد السوداني !! يعني شكل الخرطوم كان أحسن من شكل المريخ !! يعني وصيف الوصيف أحسن من الوصيف !! دائما محرجننا مع الأندية الصغيرة !!
ناس المريخ طلعوا لا بعرفوا يكتبوا الشكوي ولا بعرفوا يقدموا الشكوى ولا بعرفوا اسم اللجنة البتنظر الشكوى.. ولا حتي بعرفوا مواعيد نظر الشكوي!!
عندكم ضعف نظر؟ واضح إنو نظركم ستة علي تلاتة... ثقييييل..
هلالابي ثقيل قالو ليهو ستة علي تلاتة فيها الكم.. قال ليهم نقطتين !!
ونقطة نقطة الليل نعدو !!
الشكوى كتبوها في ورقة مروّسة باسم نادي المريخ! ما فيها حاجة صاح غير التوقيع بتاع هيثم مصطفي!! واحد ثقيل قال كفاية عليهم أهو يفتخروا بأنو هيثم وقع ليهم !! رفضوا ليهم الشكوى شكلاً.. في 25 ثانية تم رفض الشكوى من أول نظرة للخطاب!! رقم قياسي جديد للمريخ (برلوم) دوري المجموعات في دوري الأبطال!!
شكوتهم انتهت انتظروا شكوي كانو بيلارز.. شالو الورق كلو أدوهو لي كانو.. خطاب الاتحاد النيجيري (الشرطو) شداد والايميل (الاتمسح) وخطابات تانية حامياني!!
فرحانين فرح برالمة جداد قالو خلاص انتهي الهلال وانتهي شداد.. وأبوالشد يضحك من البرالمة.. ما دكتور وأستاذ جامعة عارف إزعاج الطلبة الصغار!!
شداد قال موضوع المريخ دا ساهل أنا مركِّز مع طارق التائب والاتحاد السعودي والاتحاد الدولي (فيفا).. الاتحاد الافريقي دا ما حقي أنا وأنا واثق فيه..
شداد انتهي من الدرس الخصوصي للاتحاد السعودي وأرسل مجدي شمس الدين للاتحاد الافريقي..
صاحبنا مجدي ضحك في اجتماع اللجنة.. ما زولك لقى روحوا مسؤول من صحة الشكوي.. ااااي الورق ذاتو الكتبو ووافق عليهو وقال سادومبا تسجيلو صاح جابو ليهو قالو ليهو يا مجدي سادومبا تسجيلو صاح؟!! يا ناس انتو نصاح ؟!!
يا طبيب أنا سالك قل لي بكل صراح.. انحنا هل جنينا أم عقولنا نصاح..
المشكلة إنو ناس المريخ القنبلة جاتهم فجأة زي مطرة اليومين دي!! صبّت عليهم والجماعة في الشارع والبيوت مفتحة والخيران مقفلة !! ما عارفين إنو الليلة اجتماع اللجنة قائلين الموضوع لسه فاضل ليهو كم يوم !!
نحن في جريدة الهلال ما (شفوت) عارفين الموضوع لكن عشان ما نصحي الجماعة عملنا فيها نحن ذاتنا نائمين.. فيكتور ناموا.. ونحن صاحين..
وقوم يا ساحر وخلي النوم.. بنغني عشانك أرقص قوم.. يلا يا ها.. ساكاها قوووووم..
قلنا ليكم من أول يوم.. انتو بتشتكو في ناس ميتين.. يعني علي سبيل ضرب المثل فقط طبعاً الله يدي أمولادي وكواريزما طولة العمر.. مافي زول بشتكي في لاعب ما موجود في الكشف!! قالو سادومبا تسجيلوا ما صحيح عشان إعارة أمولادي ما صحيحة.. معقولة بس.. خلاص رجعوا لينا أمولادي نديكم سادومبا!! وبا با بمبه..
يعني هسة المريخ كسبان نقطتين وخسران 1200
الألف وميتين دولار دي كان اتصدقتوا بيها لمسكين ما كان أخير من الشكاوي البتجيب الفضائح دي!!
ناس كانو بيلارز كترت ما قنعانين من الشكوي في بلدهم ما اشتكو الهلال.. ما في زول قال ليهم بدفع ليكم رسوم الشكوي..
يعني هسة نحن نقول كانو بيلارز يفشل في الشكوى.. وللا نقول المريخ فاشل في تقديم الشكاوي.. ولا نقول الزول الكان وراء الشكاوي طلع فاشل وفاشل جداً!!
كنا عايزين نخلي عماد الطيب يديكم دروس خصوصية في الإعارة.. اتضح إنكم لسه بدري عليكم من عماد انتو عايزين اساتذة بتاعين محو أمية.. رشحنا ليكم قسم.. رأيكم شنو!!
بس صديق علي صالح دا ما تجيبو لينا.. خلو لي كورس التحكيم!!
يا لئيم !!
يعني انتو تقدموا الشكوى ونحن نعرف ليكم مواعيدها!!
والله مجدي شمس الدين ثقيل ثقالة.. لما سألوه وقالو ليهو تسجيل سادومبا صاح يا مجدي.. قال ليهم.. yes
صلاح مشكلة يا بعيد؟!!!
طالما إنتو عرفتو انو الاتحاد النيجيري دا فوضى وبزوِّر في الأرواق كمان حقو تراجعو شهادة انتقال (وارغو) دا.. مش احتمال يكونو رسلو ليكم شهادة زول تاني!!
إنتو متأكدين إنكم خاطبتو نادي أنيمبا!!
مش احتمال تكونوا خاطبتو نادي أوكبي يونايتد..
قلت لي هو ذاتو ما عندو نادي.. غرفتين وصالة وكدا..
ما عايز يأجروهم.. والله عندنا واحد صاحبنا عريس عايز ليهو بيت صغير !!
شايفكم حكاية تسجيل كواريزما في بوليفيا دي ما جبتو ليها سيرة تاني..
قلنا نذكركم لو نسيتو.. وبالمرة شوفو أمولادي الحصل ليهو شنو؟!!
مع مشكلة الطرف الأيسر الحاصلة عليكم.. حقو تشوفوا أمولادي.. نعيروا ليكم في ديسمبر!!
هسّة المشكلة في إعارة اللاعبين ولا المشكلة في النقطتين!!
قلنا الوصيف قالو لا الطيش!!
تاني بتشتكو.. التوبة..
أشكككم !!!

**منقول** خالد عزالدين

بالجد حنّيت علي تعبير قلم هذا الصحفي ؛ اذا كانت هي كتابات وتعبير الصحفين فالنقل اللهم أرحم صحفيننا ؛فهذا الصحفي يفتقر الموضوعية والمنطق في الحديث
انشاء الله سوف ارد له في مقبل الايام في الصحف السودانية واوضح له كتاباتو التي تتنافي مع الاحداث

This person is suffering from a psychological problem

خالد عزالدين من اميز كتاب الهلال وإن كان في هذا المقال حاول ان يكتب بسخرية لازعة ويقصد تحديداً من كل سطر في هذا المقال "مزمل أبوالقاسم تحديداً" زعيم أمة المريخ الجديد وبالمناسبة مزمل يكتب بنفس الأسلوب في كثير من مقالاته