اهل المنتدى الظرفاء اخوة واخوات عزيزات

الدهب حجبني عنكم فزعا هربت والليل أرخى سدوله علي بهموم الأسى...

الدهب ركضت وراءه ولونه الأصفر الزاهي المشوق وقيمته الثابتة الغالية .بمجرد رؤيته يرتاح البال وتسعد الحال ويختصر الزمان ويقرب المسافات ويحقق الآمال العراض.أحبه كحبي لابنائي ذهبت اليه مهرولا باحثا عنه في مريفعين ووادي الحميض محلية ابوجبيهه التي حباها الله بالجمال والخضرة والذهب.الدهب ياأخون غير كثيرا من ملامح البلدة والحياة فيها رغم ذلك الا والدهب له معضلات كثيرة جسام 1_الحالة الأمنية غير مستقرة لوجود الطابور الخامس المندس وسط العمال قام بحرق سوق الحميض ومدخراته خسائر كبيرة المقاهي والمتاجر والموتورات وبعض العربات الصغيرة

فررنامن الحميض وأعيينا تفيض من الدمع لما خولناه وراء ظهورنا آبار اوشكت على التنسيب بئر منسبة تعني بئر فيها الذهب دون أدنى شك

اخواني معاناه مابعدها اعظم الواحد منهم مجرد مايشوف الدهب بطش شبكة طوالي ده اذا كانت كمية الدهب المتحصل عليه كبيرة هناك معادلة صعبة كيف يضاهي مجهود الشاب ذو العشرين من عمرة مفتول الساعد شارب اللبن المحلوب من أمه دون اضافات الممتليء حيوبة ونشاط القوي بآلاته اليدوية ((أبو راسين _الكوريك _العتلة))الجاك همر.تقنية عالية في الحفر ساعة واحدة من الزمن تعادل شهرا كاملا ونيف بالساعد شريطة ان تتكون العضلات تبش.

عشان تحصل على الذهب يلازمك الصبر وللذهب لغة خاصة به الذين يعملون في المنجم في رحابة صدر وخلق عظيم بقولو الدهب بتاع جنون.لايتفق مع االهرجلة والصياح والنقة الكثيرة .والخصومات والخيانة واحد جرام كرفيس لاعين رأت ولاأذن سمعت كتامي هادي الخيانة المقصودة فالصدق هو المعيار للحصول على الذهب .الدهب يأخوان انواع دهب لاقط ودا بالجهاز طبعا ودهب الحجر الناقر ويظهر كحبة العيش في حجمها داخل الحجر وبعد تفتيته دهب خالص ..يلا على الميزان ثم الجيب أو الجزلان ونوع آخر اسمه الروت دا كمية التراب الخارجة من البئر بالغربال ثم الغسيل لهذا التراب يظهر ليك الاصفر محبوب العشاق المبتغى رجاؤه حلال االمشاكل خافض الضغط للكثيرين أمثالي وللذين ضاقت بهم الارض ومارحبت

في اماكن الذهب الناس سوا سوا يلتحفون الثرى تحت ظلال الاشجار هذه المجموعة من الناس تسمى التاية او الكامبوي بالأفرنجي وبلغة الخليج العزبة اكلهم مابمبلع عصيدة جبل كرن بملاح مصران عفن يسمى الظفر سمح للراجل الضكر.والكجيك بلا محسنات دكوة أو حتى ليمون.السر في اختيار هذا النوع من الاكل اقل تكلفة لصاحب العمل ومرغوب لدى العاملين لقوته يزعمون ان الفيتامين الموجود فيه عالي الكثافة ده بلغتهم وساند للجوع لفترة طويلة.أنا رجعت بخفي حنين .لاني لم اقوى على أحتمال هذه الظروف يعني بصراحة بصراحة سنة ناعمة .ومعاي المصران هاتان الحالتان حالت دون الصمود لكن شهران مضت وأنا أجوب هذه الاماكن مغامرا تعلمت الكثير بأن الرجال معادن اغلى و اثمن من الذهب يااخوان ناس الدهب الواحد منهم يدخل بئر عمقها اربعون راجل مقت عندها ينتهي الاكسجين ويزود بأكسجين من مولدات عن طريق المروحة وهو داخل البئر يغني للبنات ويتنبر كوب فلانة .هلا هلا اخوان البنات مخاطرة منهم من قضى نحبه ومنهم من ينتظر وما بدلو تبديلا يوم واحد في مناطق تلودي اثنان وعشرون شابا ماتوا داخل البئر ولحق بهم 16 في الاخضر وفرادى في مناطق أخرى للذهب دا ياجاعة الواحد منهم مرتبط بواحدة شعرها لايتجاوز البوصتان في الطول لكن الحب اعمى ليس له دار او وطن والنسوة بصفة خاصة كثيرا ظالمات للرجال يضحي الواحد بحياته لاسعادهن وفي الاخير تقول ليهو جبت لي شنو ...حكاوي كثيرة داية قعدة ومخمخة وكباية شاي بنعناع أخضر تحياتي لكم فردا فردا..وأنا في طريقي لجبل العطرون حدود ليبيا باحثا عن الذهب الاقط

ودمتم

المحترم ابوعلاء جيتا جيت طيب ..كلامك في الدهب ورجالو زين..وكلامك في العوين شييين..هههههه.

اهلا بيك ام الحلوين تحياتي لبعللك حديثي النوع ده من الطراز الثقيل للنسوة الرجل مغامر وهن قاعدات في الدار نقة بس دايرين دايرين وينكم ووين المعاناة في مريفعين

تيمى مالك داير تكسر الحربه يا راجل البير ما قربت تنسب

تحياتى ووصيتى ليك اصبر تظفر بالاصفر الوهاج قريبا

تحياتى

اخي الزعيم كلامك حكم لكن اخوك مروتا قليلة وين انا والجاك همر والقرنيتة سادة اابير

شكرا يا عبد الرحمن

الجايات كتار عاود الكره تانى

اهلا وسهلا ومرحبا بالزعيم ابو علاء

والف حمد على السلامة

والله العظيم انا ما عرفتك لانو الاسم تغير علي ومن مداخلات الاعضاء عرفت انك عبد الرحمن تيمي..

يعني عاوز تخوفنا يا زعيم ول شنو نحن عملنا شركة انا وفيصل وابو هريرة وودعشمان وجايين نستلم مربع للتنقيب عن الذهب الاصفر والاسود وخسرنا اجهزة استشعار ضخمة وجديدة ودقيقة وجمعنا عمال وحفارين ومنقبين وشغلانه كبيرة جدا..

يعني ما نجي ول شنو؟؟؟
تحياتي لكل الاصدقاء والمعارف في ابوجبيهة وتحياتي الخاصة لاسرتك الكريمة

السلام عليكم يا اخ تيمى انشاء الله تلقى عشرة كيلو
بس عاوز اسأل عن سعر الجهاز كاشف الذهب بى كم
وهل اذا احضنا جهز بيسمحو لينا بدفع الجمارك والا الا بتصديق مسبق ارجو افدنى ياغريق

حمدلله بالسلامه
الصابرات روابح ومافى ربح اجمل من العافيه والصحه ادامها الله لك وللجميع

دعواتنا لك بالتوفيق ويجعل لك فى كل خطوه سلامه

ربنا يوفقك ويبعد البلاء من طريقك
ويجعل ليك فى كل خطوه سلامه
ويرجعك سالم غانم
تحياتى لكل الاهل

حمد لله بسلامتك يا ابو علاء

كدة اصبر شوية زى ما قال الاخوه ونحنا جايين وجايبين معانا محمود منصور

بعدين حنديك لورى من لوارى محمود تنقل بيه الحجر

يا غايبين عن عيني مع انكم في بالي .....يحدوني الشوق ملاقاتكم وجها لوجة حتى اسعد بوجودي بينكم لأنهل من ماعون المعرفة وأن اتعلم كيف ومتى اضع عباراتي .جلَكم قامة في مجال اللغة االعربية تخصصا وابداعا في اختيار العبارات ((لفظا صريحا ومبهما))وايماءات واشارات وكنايات وهلمجرا .وأنا التلميذ صححوني ان اخطأت أرجو ان تكون العقوبة بشد الاذن.

الاستاذة اقبال عبد اللطيف

اعتذر لكلامي الشين في العوين كونك واحدة منهن فطرة لكن.....اقبال تختلف حاذقة لكل فن البيها وعليها.

الزعيم :

بنتلاقى في الرملة الدقاقة .....تصور العرق ضاربو بركان تقيل قطع العشم.

محمود منصور:

قلت لي توهتك بالاسم دا اسم مثبت في الرقم الوطني يعني سوداني مية المية جيب لي عربيتكم قدوم قصير الحمرا ديك انت مصر ود عشمان يكون معاك الراجل ده اختاهو

ود التوم(المقنع))

.انت ماقريب مني وناقش .كلامك مريح اخوك معصور وليالي ابوعلاء دايما دامسة وخيوط الاشراق متقطعة عندي وأنا طول عمري عشت راهب بين تراتيلي وخشوعي

يعقوب ايها النبي ابا يوسف عليه السلام الاجهزة بتصديق من شرطة الجمارك والمحلية في مكان الدهب بتدفعك 750جنية لكل جهاز طالع نازل تفتيش ولازم تدفع قرصة لكل نقطة .ابعد..تسلم

الاستاذ احمد مرحوم((ود حلتي))

بالمناسبة قابلت حسن مرحوم قادم من تالودي الراجل شيب جنس شيب استاذ أحمد نوع الجهاز دا أنا مابقدر عليهو انا زول أم بتاري ساكت امكانياتي محدودة الزعيم غريق سبقني في هذا المجال من كلامك ده الزعيم نقش الفلم وبدأتحركاته الماكوكية لوزارة الطاقة للبحث عن هذا الجهاز بالتوفيق يازعيم

ناهد:

شكرا بت اختي فعلا انا محتاج لمثل هذه الدعوات وحياة الغالية خالتي ام آمنة الا اكمش الاصفر واعمل ليك حلق هدية .

سهاد :ترجعي لينا انت سالمة والوليدات .لاقيت علي عبد الغفار والناس كلهم طيبين

الحازمي((ابو كزيمة))

يافردة ليك وحشة سلامي لمعاذ وعبلة وصديقي ابو عبد الله حيدر وناس الخالدية وسلام حار لود الحاج وابوسارة

ابو هريرة ((الصحابي الجليل))

تعذر وجود الذهب هي تجربة والتجارب تخلق الابداع بعدين القلتها دي مابتنفع معاي الفارقولة دا جيبوا لي وقتي أشكرك على هذا الشعور الطيب

اخى عبدالرحمن تيمى((تيماء))لقد عايشنا معك سردك كلمة كلمة بخفة دم لم تعدمها وانت فى تلك الظروف واللحظات وفى هذا العمر لقد كنت تلقى بخفشاتك ونحن مقدميين على الامتحانات من ابوجبيهه الشمالية والمتوسطة والثانوى فلك التحية مبللة بالشوق والحنيين معطرة بالودالخزين....اظنك اخى تيمى قد استدعيت تجاربك ايام سفرنا من الحباك لكادقلى فى خريف تقف اللوارى والطوارى..اخى لك التحية اينما كنت وحفظك الله فى كنفه ورعاك ..
وتعود غانما سالما..وجزى الله من دفع الناس الى البحث غن لقمة العيش تحت المغارات والكهوف لحد فقد الانفس ..

اخي قمر الدين الصديق لك الود والحب الذي تواثق عليه آباؤنا .ياسليل ابراهيم ابو الدود اهل بيت أكن لهم من الاحترام والتقدير وما يخطه يراعي اقل بكثير بحقكم ايها الاعزاء اهلا بك في مشواري للذهب خير صحبة وخير انيس في تلكمو الصحاري

عثمان ابوهم :رفيق دربي وزميلي وخاصتي في الونسة قرمان ليك كتير تلو والذكريات الحلوة مازالت عالقة بالخاطر لانها من ذهب والذهب لايصدا ولا يعتليه الغبار عشان كدة انا ببحث عليه لك ودي

العزيز ابن عمي ادرحمان فصل الله الامين تيمي

ماك طيب .. يا اخوي اعمل حسابك الكركو ما يلهردم فييك .. والله قالو في عيال بحفرو في الدهب و دخلوا لهم في نقره و اتهردمت فوكم اعمل حسابك الدهب يطير تعالنا في امبرمبيطه ننطيك ليك تراب اقعد حش فوقا ..

سعدت كثيرا اخي بلقاءكم ربنا ما يحرمنا منكم ..

و كتر خيركم للمشاركه في النادي الوطني ..

لكم التقدير

الظريف وبكل المقاييس تيمي ...
أعرفك جيداً ... وأعرف أنك صبور ...طيب ...كريم ...عفوي ...نبيل ...
أعرف أنك ومنذ نعومة أظافرك تمني نفسك بالوضع المرموق ..وأعرف أنك سعيت بكل ما تملك من قوة ... لتحسين وضعك ...
وأعرف أنك تحملت كل شئ وصبرت على كل شئ ...وأنت سعيت والموفق دائماً هو الله عزً وجلً ...
وأرجو أن تواصل كدك وإجتهادك ...ولا تسأم ...وواصل كفاحك أنت صبرت كثير وما تبقي إلا القليل ...وبإذن الله سوف تجني ثمار صبرك ...
صدقني لقد قرأت كلامك الجميل حرفاً حرفاً ... وقد كتبته بكل صدق ودراية , وأعرف ملكاتك اللغوية وأسلوبك الرصين القويم ...
ولكني من دواخلي حزنت ... نؤمن بأن كل شئ مسطر ...ولكن أخي نحن دائماً حظنا عاثر ... وهذه الأشياء المكتوبة لنا وقد رضينا بقسمتنا في هذه الحياة ...
صدقني أخي عبدالرحمن ممكن في ثانية أن تكون من أثري أثرياء جنوب كردفان ...وأتمني لك من كل قلبي التوفيق ...
فقط إعمل ألف حساب للحفر العميقة ...ولا تجازف بروحك ...نحن محتاجنك أخي الغالي ...وأسأل الله لك التوفيق ... وتفضل بقبول معزتي وإحترامي ،،،،