سقوط تلة كبيرة علي راعي الجمال بمنطقة ابوجبيهة

سقوط تلة كبيرة علي راعي الجمال بمنطقة ابوجبيهة
بتاريخ 22-6-1433 هـ الموضوع: اخبار الاولى

بينما كان راعي الإبل العم علي النعمة يبحث عن مكان مخضر ترعي فيه ابله في الخلاء الذي يقع بمنطقة ابوجبيهة وعندما كان سارحاً بابله أصابه الجهد والتعب وحاول ان يسترخي علي ظل تلة عالية باحد الخيران حتي يتسني له مراقبه ابله ولكن في اثناء ذلك سقطت التلة علي جسد العم علي النعمة مما ادي لكسر في اليد اليسري واصابة في الحوض واصابات متفاوتة في رجليه بينما تم تحويل راعي الابل المصاب لمستشفي الخرطوم قسم العظام واجريت عملية ناجحة لجبر كسر اليد اليسري بينما حشد كبار جراحي العظام طاقتهم لشفاء صاحب الجمال المصاب



صحيفة الدار

لله دركم يا اصحاب الأبل الأباله

عاجل الشفاء لعمنا علي النعمة

اولا يالسيد محمود انت دايما تلقط فى الاخبار وما قاعدين نسالك الكلام دا جبتو من وين وحصل متين وفى اى مكان فى ابوجبيهة والظلطاية الوقعت دى من ياتو جب بترى ولا ابصابع ولا بازنقر ولا الجبيلات الحمر ولا جبيل حوه ولاجبل جادالسيد ولا جبل كرن لا جبل طرم ولا جبل العمدة

وهل الوقعت فى الزول دا ظلطاية ولاقيفة خور وفى اى خور الضكير ولا البطحة ولا جال ولا ابودلدل ولا ود المليسة

ارجو الاتصال بالسيد مونج لتاكيد الخبر وكمان اذكر لينا مواقع الجبال والخيران المذكورة

وربنا يشفى اخونا الشنبلى وشكرا

نسال الله ان يشفي اخونا المصاب
بقول يا ابوهريرة انت عايز تحك الزول دة حتى يجيب الدم لي شنو .

.

تشكر يا استاذ جابر

انت ما عارف ابوهريرة ول شنو؟؟؟

ابوهريرة ضيع صاحب البرادو و قبل علي انا... وبعدين انا مسكين لاعندي برادو ولاعندي براد ولا حتى رادو...

بعدين ابوجبيهة فيها جبل غير جبل العمدة؟؟؟

تحياتي

ههههههههههههههه ههههههههههههههههههه ههههههههههههه

ياود عبدالساتر انت عارف عمو محمود دا نحنا سكتنا ليه كتيروهو يجيب لينا فى الاخبار شايفو زاغ كيف وقال مافى جبل غير جبل العمدة كدة ورينا الظلطاية الوقعت وينها

وبرضو زايغ من توضيح مناطق الجبال دى وبعد دا كلو مشنق طاقية حمراء وتقول لى من فطاطات

ومنو القال انت مسكين انت عندك كم لورى توامس وسفنجات واواستن وقدوم قصير

والان دبابات

ولا ابصابع
ولا بازنقر
ولا الجبيلات الحمر
ولا جبيل حوه
ولاجبل جادالسيد
ولا جبل كرن
ولا جبل طرم
ولا جبل العمدة

انت يا ابوهريرة الاسماء دي جايبها من وين؟؟

وبالمناسبة انا مولود في ام صاقعة انت طبعا مابتعرفا ولا سمعت بيها... وازيدك من الشعر بيت كمان؟؟
انا مامولود في فطاطات .... وفطاطات دي انا درست فيها الجامعة وحصلت على الدكتوراة من جامعة امبرمبيطة...

هههههههههههههههاي كما أخاف الكضب انا سمعت ناس دبة البخس قالوا دايرين معهد زراعي متخصص في الهيليج والنبق، لكن ناس فطاطات قالوا كُلّ كُلّ مل يكون في الدبة إن شاء الله يودو فجغ النوم، إنت عارف يا ابوهريرة في قائمة كبيرة من المطالبين وفي مقدمة القائمة محمود منصور هذا يدل علي إنو من مواليد دبة البخس ولا شنو

اول يا محمود هى ما اسمها ام صاقعة اسمها ان صاقعى

وجبيل حوه وجبيل جادالسيد وجبل العمدة ديل فى طربقها هى وفطاطات مسقط راسك

وبازنقر وطرم وابصابع فى تجملا وكرن شرق ابوجبيهة

والجبلات الحمر ديل جنوب غرب جبل العمدة

تعرف جبيلات الاربعاء وين

ديل ما بعرفهم الا ود نوية وود النو

انت احمد مرحوم شنو شابك صاحبك محمود دا هجليج ونبق عشان كان شغال تاجر هجلج ونبق بين فطاطات ابوجبيهة

نسأل الله له الشفاء العاجل ...
طبعاً أخي محمود أنت تعرضت لأسئلة محامي ...
وبعدين السؤال الآخر ... من أين يأتي رعاة الإبل للحباك ؟؟؟
وتحياتي لأهلنا بأم كداده ... وفريق الكوز ....

محبتي ،،،

عمو محمود ماتزوغ من الاسئلة زى ما قال عمو عثمان

بعدين العجلات تاجورها تمشو بيها فطاطات ده معناهو اكيد كنتو بتتاخرو وعمك حسين بشيل نعلاتكم

والله يا ابوهريرة عايز اعرف انت خبثير قانون ولا خبير في الاسماء البكانات الصعبة دي وبعدين يابوهريرة في محلات انا بعرفها لكن ماعرفت اكتب اساميها عديل لكن تحتاج لتصوير

مشكورين ياسباب

وربنا يشفي عمنا النعمة من الكركو الانهدة فوقه وربنا يحفظ الجميع من كل مكروة

عمنا محمود منصور والاخ ول نوية والعزيز ابوهريرة والحبيب جابر والاخ الكريم عثمان وكل من تداخل لكم كل الود والمحبة مع القرم الشديد

والله اليوم فكرتونا تراب وحدب ورصرص ودبك واشياء من البلد لنا في كل اسم قصة لكن ما عايزين نذكر ليكم الماضي كنا بالجد اشقياء

ياابوهريرة انت ما حصل الخور قرعك او حبسك خارج البندر ونمت بعيد من اهلك خور جالي او البطحة او ابو عروق

تذكرنا ايام العوم وعصابة العوم ناس موسى كلموا واسطى بيلو والكثير من ابناء ابوجبيهة

ود النو جيدا جيت الله مرقك يامحمود منصور

يالله عمو محمود دا وريهو

كيف الخور ما قرعنا نحن كنا نمشم امحاحير ونجى نلقى البطحة ملانه نرجع ننوم فى معوان وبكرة طوالى الى امحاحير

ومرات ترجع من البطحة تلقى ابعروق مليان تنوم فى الجناين

بالله يا ود النو شوف الشقاوة دى

ود النو

جيدا جيت يارجل يااصيل ... ياخي ماتغيب كدة والله نحن بنتشوق لكتاباتك..وشايف ايضا عود الصندل دخل الغابة وكذلك ادم عيسى ابراهيم نسال الله ان يكونوا على خير...

اما محامي الحيرة دة زي ماقلت انت... غايتو باين عليهو كان كمساري في بص عشان كدة حافظ كل الحلال الواقعة في الطريق مابين ابوجببهة والرهد ابودكنة شارع الهواء000


تحياتي

انا اشتعلت مساعد حله مع الطاهر ابو عويج ومساعد صغير مع فرح جكما ومساعد كبير مع عبيد جبر الله ثم لوممبا وكنت سايق لورى قدوم قصير بتاع الحاج منصور

هههههههههه

الزلطايه دي اوع تكون فهقت الزول دا كمان .. الله يشفي

يا عمي ابوهريره .. ما تنسي صحبي محمود برضو عندو كوارو و عندو حمار ابيض ريفاي ..



مع التقدير

هوى ودعشمان انت راكب من ياتو محطة هو قالو ليك الزول اتكسر وجابو مستشفى الخرطوم وبعد تعب عالجوه اطباء كبار فى جراحة العظام

تجى تقول فهقتو

بعدين انت مالك ومال كوارو محمود وحماره الريفاوى كان داير الحمار الريفاوى دا تهال سوقو

لك التحية يا ود النو ...

ودنوية ياخ الخور القرعنى دا كان الموية بتاعتو وصلت مفرق الدروب محل النمايات جنب جنية المغوارى

وابو عروق لاقا فى نفس المكان

يا استاذ الفاتح هو صاحبك ماعرف جبيل حوه يعرف ليك جبل ام النية خلى ام البنية خلى يورينا جبل ابو لاكوعة وين

عمو عثمان ما تلحق صاحبك محمود دا خلى يجيك زيارة ومدو ببخرات

ههههههههههههههههههها
شكراً مولانا وعم محمود الليلة فرقتوا للواحد ياخي من لغة الأرقام دي وسرحت بعيد رحت البلد وشايف نفسي كأني في قيفة خور البطحة معلناً حضوره بشخيره وشايل معاهو هشيم شجررشاد ومنقة تجملا مروراً بدبيكر وابوندكينة والكور حتي نقطة التلاقي مع أبو عروق

ههههه ..الله يطيب عليكم...محمود برا؟وحات ودكراشي انا ذاتي قعدت بلفت

ههههههههههههههه ههههههههههههه هههههههه

الاخ محمود منصور محمد علي

انت ماشي تداوس منو بالراجمه بتاعتك دي ,, شوفو ليكو بهول

شكرا يا اخي والله ضحكتني و ود عشمان قال لي كنت عندك خرطوش ابو ماسورتين و تتطورت لمدافع و دبابات .. ياخ ما تدقش لينا الجماعه ديل براجمتك دي عشان تشتتهم لينا البمش ماليزيا يمش و البمش مصر يمش .

لك التحية

الهم اشفيه وعافيه

الشافو خلو

ده صاروخ عابر للقارات وانا اشتريتو لود عشمان لانو قال الجماعة ماخلو ليهو ولا بقرة واحدة ولازم يدافع عن امبرمبيطة من عصابات النهب المسلح...

تحياتي

لقد قررنا انا والسيد فيصل خليل الذهاب الى مستشفى الخرطوم لزيارة عمنا النعمة ونقل تحاياكم اليه

لكن يا محمود قلت لى راقد فى ياتو عنبر ورقم السرير كم عشان ما نمشى نلف لف ساى وانت عارف صاحبك مونج

لو ماعرف الجهة بالظبط ما بمشى

يا ابوهريرة

الراجل اتنوم في المستشفى واتعالج وخرج وسافر ووصل لابوجبيهة وساق الجمال حقتو وسرب سربة وخت الجبال غربه ورجع لام بادر ولو عاوز تقص دربة الا تخلي ودعشمان يديك شربة

هوى يا محمود موضوع الزيارة دا من صميم عمل الاخ فيصل خليل بصفته المشرف الاجتماعى للمنتدى

والهدف من الزيارة ابلاغ تحايا اعضاء المنتدى لعمك النعمة ومساعدة ودالنعمة فى اجراء اى عملية لان الاخ فيصل لديه علاقات وسط المجتمع الطبى بالخرطوم وثالثا التاكد من الحادثة نفسها ومدى صحتها ومعرفة مكان الحادث وهل سقط النعمة من جبل ولا جمل لو سقطت علية ظلطة او قيفة او كركو

وفى ماذكرنا تكمن اهمية الزيارة

وطالما الشغلانة جابت ليها قص درب وشربة من ودعشمان انا برة الموضوع ونترك الامر للمشرف الاجتماعى

نحن يا الفاتح الزول دا حنلم فيه وموضوع الكشف دا مقترح جميل ولازم السيد محمود يبدا المساهمة بدفع 5000 ريال وود عشمان يدينا 5000 استرلينى ويكلم لينا الملكة تدعم الراجل وكمان شوفو لينا الامراء هناك

وتحول المبالغ فى حساب المشرف الاجنماعى لانو دا يعتبر من صميم عملو