ضيف الأسبوع

أحبتى أحباب منتدى ابوجبيهه الأفاضل.
تقبلوا تحياتى واسمحوا لى أن أطل عليكم عبر هذه النافذه بضيف جديد.
ضيفنا هذه المره من حواءات المنتدى بل ضيفتنا هى عضوه نشطه أسهمت بشكل واضح فى إثراء المنتدى منذ مشاركتها.
رحبوا معى بالأخت الفاضله الأستاذه/سهاد عبد الغفّار.
إلى الحوار:-----------------------------------------
*** البطاقه الشخصيه ***
1- الإسم بالكامل:-
2- الحاله الإجتماعيه:-
3- المراحل الدراسيه:-
4- العمل:-
5- الإقامه الحاليه:
6- الإقامه بالسودان:-

*** تعريف ***
* الكثيرون هنا لا يعرفون سهاد (((( قدّمى نفسك )))

*** إشاده ***
* ما فاكّاها فى نفسك لكن الكل يشيد بإسهامك الملفت فى إثراء المنتدى...... يعنى بإختصار الناس قاعدين يقولو سهاد متألقه(ماذا تقولين؟)

*** 3×3 ***
* مدرسات
* صديقات
* بنات دفعه

*** بإختصار ***
* ما بين ابوجبيهه حى المدارس وامدرمان ود البخيت
* مواقف من الطفوله
* مواقف من الغربه

*** هدايا لمن تعطيها ***
* باقة ورد
* نصيحه وما هى؟
* تذكرة سفر وإلى أين؟

*** ما عرّفتينا على ابو يونس ***

*** فى سطور ***
* بيت شعر أوقفك
* حكمه تؤمنى بها

*** شوية سياسه ***
* ما هو إنطباع الخواجات عن بلدنا خاصه فى هذه المرحله؟

*** كلمه أخيره ***

صباح الخير صديقى العزيز فتّوح.
سهاد جايه لا محال.
أبلغتها بالأمس فبادلتنى ثقة بثقه و هى بذات التلقائيه الجميله المعهوده فيها.
فقط إنتظروها

مرحب بالاستازه سهاد منتظرين واسئلتنا جاهزه

بسم الله الرحمن الرحيم

نفس عمييييييييييييييييق
والله فصاحتى دى كلها راحت ساى
اتاريك بتجرس الناس كده
يا اخونا الاستاذ
وحرام
تجيبنى بعد اخوى الافكاتو ده
شن جاب لجاب
المهم مشكور اخى عوض السيد ومشكورين
الساده المرحبين
وبتمنى اكون عند حسن ظنكم
اها ادعو لى عاد
انا متوجهة الى ....
نتلاقى هناك

مرحبتين حبابك سهاد
نحن في الانتظار ...ونعم الضيف
معقوله تتجرسي ...
دعواتنا معاك وقولي يالطيف

أتت سهاد تتواضع بظرفها وتلقائيتها المعهوده.
* تخريمه:-----------------
كونك تجى تورى وشّك وترجعى عشان تجى تانى دا فى حد زاتو جزء من التكنيك.
* المهم فى الأمر إنك ترجعى بسرعه مع مراعاة أن حلّتك الفى النار ما تحرق.
* منتظرينك

بسم الله الرحمن الرحيم

نفس عمييييييييييييييييق
والله فصاحتى دى كلها راحت ساى
اتاريك بتجرس الناس كده
يا اخونا الاستاذ
وحرام
تجيبنى بعد اخوى الافكاتو ده
شن جاب لجاب ___________________

هذا كلااام أختي الراقية المتألقة دائماً ..ظرف ..وذوووق ...وهذا يكفي ............ معزتي لك ...

1- الإسم بالكامل:-
انا سهاد عبد الغفار ادم على
2- الحاله الإجتماعيه:-
متزوجه من محمد عبد الرحمن
وام الحلوين
يونس وعمره 14سنه
غدير عمرها 11سنه
ربنا يحفظهم .

3- المراحل الدراسيه:-
اولا
روضة ماما التومه ادريس
رحمة الله عليها
وماما امنه مرحوم
تحياتى لها
وازكر الغفير
عمو على قروش
رحمة الله عليه
وعندنا معه مواقف كثيره
شفتو الزاكره لسا حديد كيف ؟
ثانيا
مدرسة ابوجبيهة الابتدائيه(أ)
واول يوم دخولى المدرسه
طبعا كانت اللجنه
وكل البنات معاهن
اباءهن وانا معى جدى
الطيب عليه رحمة
وكنت ببكى لماذا
انا لم يكن معى ابى
رحمة الله عليه
ووجدت وقتها عز ما عادى
من كل اعمامى واصحاب والدى
عليهم رحمة الله
الكل اتى وتحانيس وقروش
وازكر عمى خالد حنجاف
رحمة الله عليه
كان يبكى
و
وقال لى انتى اكتر واحده محظوظه
لاننا كلنا اباءك
والبنات ديل عندهم ابو واحد ..
وطبعا رجعت الدكان مع جدى الطيب
وجيبى ملان قروش
وشلت حلاوة وطحنيه
من الدكان ورجعونى البيت
مبسوطه
وعايزه متين امشى تانى المدرسه
عشان يدونى قروش تانى

.........
اسفه على الحزن

_ثالثا
مدرسة ابوجبيهة المتوسطه
وللأسف كانت سنتين
اولى وبداية تانيه و
تم رحيلنا نهائى
الى امدرمان
وواصلت تعليمى
فى مدرسة الحاره التامنه
الحكوميه المتوسطه
وطبعا كانو فايتننا
وبعد مناقشة المدير مع الغاليات
نوال وبثينه
قررو ان اعيد سنه
وطبعا رفضت وبكيت
واخيرا قررو
ان ادرس فى مدرسة الامل الخاصه
وكانت الاداره والاساتذه
اقلبيتهم
درسو فى مدارس ابو جبيهة
وازكر منهم استاذ يوسف و
حسن بارا لهم التحايا والاحترام .

رابعا _
الثانوى مدرسة امدرمان
الفنيه ودرست تجارى
وخلصت
وبعديها قدمت جامعة
القرأن الكريم
وحفظة
ثلاثة اجزاء من القرأن
وللأسف لم ابدا الدراسه
لانى اتزوجت
شفتو القهاره
دى كيف
مستعجله على شنو انا ما عارفه؟؟؟؟؟
4- العمل:-


_العمل _
طبعا للاسف لم اعمل
فى السودان
كانت فترة تدريب
فى بنك النيلين
وبوستة امدرمان
لانى طبعا عملت امتحان المحاسبه
ولازم
تعمل تدريب
ولكن عندى ضريبة عمل لازم
ارجع واعمل فى السودان
لو فى العمر بقية انشاءالله
5- الإقامه الحاليه:
فى انجلترا
فى عاصمة الضباب كما تسمونها
لندن فى
وست هندون
شمال لندن
والله البرد كتلنا
يا اخوانا شوفو لينا صرفه

6- الإقامه بالسودان

فى كل شبر من السودان محل اقامتى

طبعا ضيوف ساى
ما بين ود البخيت
والثوره الحاره السادسه
لكن قريبا الاقامه الدائمه
فى السودان انشاءالله

اها يا اخوانا
اختكم البرد كتلها
خلونى اقشى ناس ود البخيت
واشرب لى كباية شاى دافيه
كده من يد الغاليه
الوالده التومه الطيب
ربنا يحفظها ويديها العافيه
وكلكم معزومين
البيت كبير
والشاى جاهز
اها لى قدام
يعنى راحه
كده
ونرجع
فتكم عافيه

والله رايعه يا سهاد بالله شوف الزمن ده بيجرى كيف 0000رحيلكم الامس ده طول كده منتظرين يا سهاد باقى المقابله

يا سهااااااااااااااااااااااد
يا متالقة يا راقية انت
والله والله منتظرنك لمواصلة الابداع سرعة سرعة
تسلمي يارب

بصراحه منتهى الألق.
يا جماعه دا ما برد دا نهج راقى جدا فى الحوار أن تبدأ حوارا وتتوقف ثم تأتى لداعى التشويق.
انتظروا النهج المحيّر من صاحبة السؤال المحيّر

الاخت سهاد دى اضافة جديدة فى برنامج ضيف الاسبوع .
الظاهر اسنتعنت او عايزة تستعينى بود عشمان واذاكان ذلك غبر ذلك خلى ود عشمان يفتش ليه ناس يدربهم .
ما عرفنا الضيافة دى الا الان .
ونحن منتظرين

رجعت ليكم اعزائى
ووالله ده كرم كتير على
ربنا يديكم الصحه والعافيه
وانا مسررررروره جدا بيكم

اها بعد ما ادفيت
وشربنا شاى حاجه التومه
الماخمج ده
قلنا قبل الغداء كده
نتونس معاكم شويه
اها ابقو لى جوه

شنو يعني؟
دا ما اسمو كلام دا .........
كلو ما مرة تشوقييييييييييييييينا اكتر
نحنا في الانتظار
عووووووووووووووووووووووك من هنا للندن

*** تعريف ***
* الكثيرون هنا لا يعرفون سهاد (((( قدّمى نفسك )))

س _ ه _ ا _ د

ارق وتعب وجرى
فرح وزعل وبكى
الم وفراق وضحك
لعب ولهو
ومرارة الغربه
هى دى سهاد
مزيج ما عادى جواى

انا صادقه جدا مع نفسى
ومبسوطه جدا من نفسى
احب الجميع
اقدس الصداقه
لا انسى الناس بالساهل
تلقائيه لا اتكلف ابدا
وهو ده سبب نجاح علاقتى
والكل عندى متساوين
وبضع مكانات الناس بتعاملهم معى
ليست بوظيفتهم
او مكانتهم فى المجتمع

الجانب التانى
من سهاد
والعيازبالله منه
وحاولت ان اغيره
ولم استطع

لا ازعل بالساهل
وببحث عن العزر لغيرى
ولكن عندما
ازعل بنسى من زعلنى نهائى
وما بقدر اتعامل معه
مهما يكون
وهنا بتحرج من نفسى
الله يكفينا شر الزعل
والله ما جاب الزعل بيناتنا

والله عوك بتاعتك دى الصبوحه
خلتنى اجى جاريه
واواصل
اخوى الخوجلابى
التواريخ دى اسال منها
اخوى العظيم
غريق
بوريك مرقنا
متين
اما العمر ده
بقول ليك بس
قول لى راتبك كم؟؟؟

الاستاذ الرائع عوض السيد نشكرك بحرارة لاستجابتك للطلب و ذلك باستضافة واحده من الاخوات النشطات جدا ,,

شكرا يا اخي الكريم ..

*** إشاده ***
* ما فاكّاها فى نفسك لكن الكل يشيد بإسهامك الملفت فى إثراء المنتدى...... يعنى بإختصار الناس قاعدين يقولو سهاد متألقه(ماذا تقولين؟)

متألقه
والله اشكرك اخى الاستاذ
واشكر كل من قال انى متالقه
اولا
تالقى فى المنتدى
يعنى الحضور من الجميع
وتألق الجميع
لان سهاد فى منتدى ابوجبيهة
من غيركم
ومن غير حب ابوجبيهة
لا تستحق ان نطلق عليها
متألقه
وانا بقبل لقب متألقه
فى حالة اعطاءكم لى بالانابه
عن كل الاعضاء المتواجدين
وبدورى بسلمه الى ادارة
المنتدى
وتحتفظ به فى الارشيف
باسم كل الاعضاء
سهاد +اعضاء المنتدى +حب الحباك =التألق
____
*** 3×3 ***
* مدرسات

المعلم لحظة انفعال عندما نغلط
المعلم لحظة اندهاش عندما نصل الى النهاية
المعلم لحظة حب وفرحه عندما ننجح
المعلم لحظة معرفه عندما يجود لنا بعلمه
المعلم لحظة اكتشاف عندما يكتشف مقدراتنا
المعلم ..... ,,,,,, ......
التحايا والوقوف والشكر
الى كل اساتذتى العظماء
وكل ما اقف بين حضرتهم
اشعر بانى صغيره

1_الغاليه سكره بلول (ابوجبيهة الابتدائيه)
وكانت لها مكانه خاصه فى قلبى
وكنت احب اسلوبها وطريقة كلامها
وهى كانت تبادلنى الحب نفسه
مع انى كنت مدللة من كل المعلمات
لانى كنت هادئ وشاطره وحساسه جدا
وجبانه ولزلك كنت احرص على انى لا اغلط
لكى اتنهر او اتجلد .

2_استاذه سواكن قمر الدين(ابوجبيهة المتوسطه)
حقيقى
كنت احبها بجنون
احتمال لغربها من عزيزتى
بثينه
وكانت قريبه جدا من كل افراد الاسره
وانا فى الابتدائى كنت احلم ان اصل المتوسط
عشان التقى بها وفعلا دخلت المتوسط
وكنت سابعة اللجنه
الجميع فرحانين لانى سابعة اللجنه
وانا فرحانه لانى حالتقى بك
عزيزتى الغاليه
لكى منى حبى ومودتى



3- استاذه انجليزيه تدعى (ليز)
درستنى مادة الترجمه لمدة سنتين فى
كلية مانكات بمانشيستر
وكانت حبوبه جدا
وكنت احبها
واولادى بحبوها
ولها علاقه خاصه بى
امتدت الى الان
واصبحت من اعزه صديقاتى
اتعلمت العادات السودانيه
وكنت اعزمها للمناسبات السودانيه
لها التحيه
الحب والتحايا لكل معلمين ومعلمات
ابوجبيهة
وتحية خاصه الى ماما ليلى محجوب
والى ماما حواء الناظر
والى ماما ليلى بخيت
والى ماما ليلى الامين

البت الاصيله سهاد

لكن الاستاذ عوض السيد ما زراك زرة السنيين لك التحية و التقدير ..

يا اخوانا سهاد دي زوله حبوبه و اجتماعية و نشيطه مش بس هنا في هذا المنتدي .. سهاد بتلقاها مشاركه في الفرح و الكره و بعدين استاذه بتدرس ابناء الجالية السودانيه هنا في لندن و خاصة اللغة العربيه و بدون قروش .. سهاد بتشتقل ستة ايام و اليوم السابع من الاسبوع بتلقاها بتغسل و بتكوي في البيت .. سهاد بتشارك الناس في افراحههم و احزانهم .. سهاد يوم واحد ما شفتها مكشره و لا زهجانه الابتسامة ترافقها طوال الوقت ..

هي سهاد اخت الجميع الله يحفظها و اسرتها من كل شر ..

سعدت باستضافتك لهذا الاسبوع و انشاءالله يا اخي عوض السيد الاسبوع الجاي تاني تقبض لينا واحده من الاخوات ..

لكم التحية و التقدير جميعا احبتي ..

عزيزى واخى الغالى ود عشمان
والله خجلتنى
صدقنى زى ما بتقولو بالانجليزى
(زيز ماى ديوتى)
وانا ما بعمل الا البقدرنى عليه ربى
وربنا يدينا الصحه والعافيه
ونقدر نستفيد ونفيد من قدراتنا
والتحيه الى الوالده العزيزه
التومه الطيب
لتعليمها لنا
بان (الاجر طلاقيت)
ويا سيدى الدنيا قصيره
وقلنا احسن نلقط بقدر ما نقدر
تحياتى لك

*** 3×3 ***
صديقات

صديقات الطفوله والى الان
متواصله معهن
1- انعام خليل حتيله
ونحن على اتصال مع بعض
تحياتى لها
2-
حنان محجوب بنجوز
اخبارها مقطوعه نهائى
تحياتى لها
3-نازك الجيلى بخيت
اخبارها مقطوعه

صديقاتى من
حى المدارس
1- محاسن السر سعد
2- سلوى السر سعد
3-منى محمد يسين
4-المرحومه نفيسه عمر منقه
لها الرحمه والمغفره
اترحمو معى على روحها
5- مريم محمد هجانه
6-بت المنى نمر
وتحياتى لكل صديقاتى
بدون فرز

*** 3×3 ***
بنات دفعه
لن يكنن بنات دفعه فقط
تربطنى بهن صداقت طفوله
1- خالده غندور لها التحايا
2-رابعه العركى بتمنى ان تكون بخير
3-انتصار التجانى منقه
4-عائشه خالد حنجاف تحياتى لها
5-زبيده موسى شرتوك والله مشتاقه ليها
بزكر خفة دمها
وخفشاتها
6-عائشه من بنات الجبل لها التحيه
7-نهى الزين لها تحياتى وودى
لاننا كنا بنتنافس
هى فى (ب) وانا فى (أ)
8-سوزان احمد عبد الملك تحياتى لها
9-سعاد مصطفى لها حبى وشوقى
والتحايا الى كل زميلاتى
فى كل المراحل
يا اخوانا استسمحكم
امشى اجهز الغداء للعيال وابوهم
واتغدا لانى جعانه
وطبعا كلكم معزومين
معانا

ونواصل

الاخت سهاد استضافة بقت لينا زى قصة محفوظ وامه
مشدودين ومنتظرين الحلقات
حلقة وراحلقة
بعدين شايف دعشمان ساعدك كثير ووضح لينا وكشف حاجات كثيرة عنك

تسلم يا اخونا الاستاذ العظيم
الحاج الفاتح
ووالله
انا احبس دموعى وانا ازكرهم
نعم هى ابوجبيهة
تسلم اخى الفاتح
وشكرا على الدعوات
ربنا يقبلها
وادعى لى اخوكم
ابو يونس
ما يجى ويشيل الكمبيوتر ده
ويكسره
لانه محتار
يعمل شنو
ما عارف
اخر ما وصل ليه
عشان يرتاح من النقار بينى وبين العيال
جاب ليهم
لاب توب
وقرب يقول ليهم اها
خلو امكم اتشبع
تسلم
اخى الفاتح
تحياتى للعيال وامهم

تسلم اخى الافكاتو
والله
انا مستغربه كيف انا بتكلم على نفسى
لانى بكره ما بكره اتكلم عن نفسى او حاجاتى
لكن صدقنى يا اخوى الوضوح
احيانا
بودى الى مشكله
واخوى ود عشمان خلعنى
ربنا يديه العافيه
وحقيقى انا
حاولت
اركز
على حياتى فى ابوجبيهة
عشان كده ما طرقت
على
الدراسه هنا والعمل
لكن ود عشمان
الله يديه العافيه
ما قصر
وتانى شئ اخوى
الاستاذ ده ما يستضيفنى الا بعدك انت
شكله كده
عايز يخلص ناس الشركه اولا
المالك
والمدير المالى
تحياتى لك

التحيه لك يا سهاد وأن تواصلين الإبداع فى ردودك التى لم تخلو من قفشاتك المعهوده.
كل اللائى ذكرتيهن خيار من خيار.
بعدين يا فاتح أخوك ما لحق درس النخبه التى ذكرتها أختك سهاد لأنى ما عجيّز يا توحه.
درّست دفعه فى المتوسطه وأنا كنت طالب فى ثالثه ثانوى واستعانوا بى نسبة لسفر مدرس اللغه الإنجليزيه لظروف وهو من أبناء الأبيض وإسمه طاهر زكريا (ابو الزيك) والدفعه كان فيها(انعام خليل/نازك الجيلى/خالده غندور/حنان محجوب وأخريات.
تخريمه:---------------
سهاد ما تخمينا لسه عندنا باقى أسئله

اخونا الحاج الفاتح
مالك مكبر علينا
اخونا الاستاذ
الراجل صغير وجاهل
ربنا يديه العافيه
ويدرس اولاد اولادنا يا رب
مشكور استاذنا
ونعم كما قلت خيار من خيار لهن التحايا

إنبهرت حقيقتا لهذا التالق والاريحيه من هذه الفنانه البنيه سهاد 000ربنا يخليك يا رائعه 000لكى الفضل يا رائعه فى ابتداع اسلوب جديد وشيق لهذا البوست 00الله يخليك ويحفظ ليك وليداتك وابوهم !!!!!!ماجد وين 0ومالو غياب من المنتدى!!!

الغالى دوما
استاذنا ازهرى
لك التحيه
وانا مسروره جدا
وفخوره بتشبيهك
لى

بعبقرية
الخال
الغالى كمبال
واريحية والدى الحبوب
حامد الطيب ربنا يديم عليه الصحه
والعافيه يا رب
لكم منى الحب والاحترام

تسلم اخوى الحاج ود نويه
ومشكور على الكرم
والتشجيع المستمر منك
لك منى التحايا

العزيز ابن عمتى زهير
والله انتم
السبب
فى الابداع والتميز
مشكور
تحياتى

تسلم اخوى الغالى
غريق
وحقيقى
اتتانى تعليقات
بان اسلوبى
هو اسلوبك
فى الكتابه
وهذا
فخر كبير بالنسبه لى
بالنسبه الى العزيز الغالى ماجد
والله مدعوك
دعك شديد
وطبعا عارف الايام دى الاستفتاء
والسفاره زحمه شديده
ربنا يكون فى عونه
لكن اكيد حيرجع
تحياتى لك والى حبيبى ماجد

سأل الزعيم/غريق كمبال عن صديق وزميلى الرهيف الحريف/ماجد عبد الغفار.
أطمأنك أن ماجد إتصل علىّ أمس الساعه 9م بتوقيت السلطنه ودردشنا كتير جدا وبيسأل عن المنتدى وأحباب المنتدى وقال لى والله نفسى أدخل المنتدى كل يوم لكن زحمة العمل الا أنه وعد بالظهور قريبا.
نقلت له بإعجاب شديد جدا نجومية شقيقته أختنا سهاد خاصةفى نافذة ضيف الأسبوع فأجابنى بسرعه لم أكن أتخيلها معترفا بموهبة أخته وتألقها وحظها الوافر من حب الناس لها ثم أضاف وهذه من نعم الله عليها.
التحيه لسهاد التى إكتشفنا موهبتها وثبّوها أهلها.
تخريمه:----------------------(1)
***************************
غريق هاك تلفون ماجد:-------------------
00971509230565
سفارة السودان بأبى ظبى
تخريمه:----------------------(2)
سهاد بطّلى اللف والدوران وأدينا باقى إجاباتنا
انتى يا سهاد قدر الكلام دا

ونواصل

*** بإختصار ***
* ما بين ابوجبيهه حى المدارس وامدرمان ود البخيت

المرحله الاولى
لم تكن ود البخيت
كانت الثوره الحاره الثامنه
طبعا لم تكن لى نقله حضاريه
لاننا كنا
على طول
فى الاجازات
بنقضيها فى امدرمان
وطبعا كانت فرحت الاهل بينا لا توصف
وكنا فى عزومات
تغريبا عام كاملا
احتفالا بنا
ربنا يديهم العافيه
وطبعا كانت عندى صحبات
من الحله
بنتونس مع بعض فى الاجازات
وبعد داك استمرت العلاقات
واستغرينا من غير مشاكل
لان الجو لم يكن غريب بالنسبه لنا
وبعديها تم رحيلنا الى ود البخيت
واتعرفنا على الجيران
وازكر فى واحده من الاخوات
اتقابلت معها فى الطريق
وقالت لى مش انتو الناس الرحلتو من الثوره جداد هنا
قلت ليها لا نحن ما من الثوره
نحن من ابوجبيهة
قالت لى هناك كنتو بتلبسو
نفس البس ده
قلت ليها اجمل واحلى

* مواقف من الطفوله

يا سلالالالالالالالالالالام
على الطفوله
اجمل ايام
واحلاها
وبالجد انا متحسره على ابناءنا
بانهم ما عاشوا مرحلة الطفوله
كامله
طبعا كان دلالا ماعادى من جدى الطيب له الرحمه والمغفره
وجدى جعفر عثمان بشاره
له الرحمه والمغفره
ولما يجو ناس الجزيره وامدرمان
ما كان المفروض نمشى على الارض
دلالا ماعدى ربنا يقدرنا على جزاهم
ازكر موقف
مشينا امدرمان
فى الاجازه
وكنا فى بيت المال
دكاكين الطاهر
بيت جدى رحمة الله عليه
وعندهم جارتهم بقولو لينا لما تجى ما تحومو قدامها
لانها عينها حاره وبتسحر
ومره جات زياره وجات تسلم على
انا طبعا رفضت
وقلت ليه لى انا عويره عشان تسحرينى
الحاجه
قالت لى منو القال ليك
كده
قلت ليها كلهم حبوبه
وعماتى قالو لينا كده
وطبعا عماتى للان بتزكروها.

* مواقف من الغربه
اخخخخخخخخ من الغربه ومرارة الغربه
والغربه فى اوربا
بتختلف نهائى
من اى غربه
المهم المواقف كثيره
وازكر منها
مره كنا فى السوق
وفجأة
شفنا ليك حاجه لابسه توب سودانى الدنيا صيف
ومعاها راجلها لابس جلابيه وعمه
ومعاهم ولدهم
انا لما شفت الحاجه من غير ما اشعر جريت وسلمت عليها
وببكى
بصوت وسط السوق
لما الحاجه بكت كمان
وبعد داك طبعا سلمنا على بعض
وقالت لى انت بنت منو فى السودان
طبعا الحاجه قايلانى بعرفها
قلت ليها والله انا شفت التوب ده
وما اتحملت
واتزكرت امى والسودان
طبعا قالت لى كر على
امك ماتت غريب
قلت ليها لا
امى حيه الله يديها العافيه
المهم طبعا تم التعارف ومشو معانا البيت
والعلاقه مستمره الى الان
وولدها مسمينى سهاد البكايه .
الغربه وما ادراك ما الغربه
ربنا يرجعنا سالمين غانمين.

ما زلنا ننهل من جمال الأسلوب لكن برضو عندنا باقى وحقنا ما بنخلى والمحامى ابوهريره قاعد وشايف هضم الحقوق بعينو أها رأيك شنو يا أستاذنا

والله تسلم يا عوض السيد ويسلم حبيبى ماجد
وهو صاحب فضل كبير فى ثقتى فى نفسى
ربنا يخليه لينا
ويديه العافيه

والله خوفتنى يا اخوى الاستاذ
عشان كده
اخير نواصل

*** هدايا لمن تعطيها ***
* باقة ورد
* نصيحه وما هى؟
* تذكرة سفر وإلى أين؟

باقة ورد
بهديها لكل اطفال العالم
واخص اطفال دارفور واطفال الحجاره
والى كل احبابى ولكم احباب المنتدى .

نصيحه+
لا تيأس، فعادة ما يكون اخر مفتاح في مجموعة المفاتيح هو المناسب لفتح الباب.

تزكرة سفر+

الى اداء فريضة الحج
وربنا يسهل لينا

*** ما عرّفتينا على ابو يونس ***

ابو يونس وغدير
لان غدير طوالى فى حالة زعل
ليه بقولو ابو يونس
ماابو غدير

محمد عبد الرحمن محمد مصطفى
من مواليد بحرى الاملاك
والان مقيمين بالثوره الحاره السادسه
معروفين باولاد الضابط او اولاد المصرى
اصلا شوايقه من القرير
وخاله الفنان ود اليمينى
اها يلا معزومين معانا قراصى
على اصوات الطمبور
ونحن طبعا فى اختلاف
فى ان اجمل القرير ولا ابوجبيهة
من ناحية الطبيعه
وانشاءالله
حنجيبه
ويحكم
بنفسه
له التحيه
وباقة ورد
(فل ابيض وروز)

*** فى سطور ***
* بيت شعر أوقفك
* حكمه تؤمنى بها

بيت شعر اوقفنى
فاروق جويده
تغيبين عنى واعلم ان الذى غاب قلبى
وانى اليك لانك منى تغيبين عنى .

+حكمه++
من يريد الارتحال سعيدا عليه أن يرتحل خفيفا
(اللهم خفف ذنوبنا )

*** شوية سياسه ***
* ما هو إنطباع الخواجات عن بلدنا خاصه فى هذه المرحله؟

والله كله الا السياسه
مع انى شغاله فى منظمه
سياسيه
ومهتميه بالسياسه فى افريقيا
والايام دىطبعا السودان فى التوب
وانا قلبى تعب من النقاش
والبكى لان
فى الشغل طبعا
الخبر بجى باثباتات
صور وفيديوهات
وانا قلبى اتقطع
من البشوفو
فى وطنى الحبيب

فقلت
لا حياة لمن تنادى
عشان كده قررت ابعد نفسى
من السياسه

وطبعا الحاصل الان فى السودان
مفرح بالنسبه الى الانجليز كحكومه
ولاكن المواطن مستاء.
ومنهم من يقول حيصبح صومال اخر
ومنهم من يقول
رواندا اخرى
ونحن
ما بين هذا وذاك
وربك يستر

هى الحمد الله خلصت
والله نفسى اتقطع
كنت معكم وبكم
تحياتى لكم وشكرى
اعزائى الافاضل
وتحياتى لك اخى الاستاذ
عوض السيد
وتحيه خاصه الى اهلى بابى جبيهة
وهدية قزازة عطر
مخلوطه برايحة المانجو
والدليب
صنعت فى ابوجبيهة
تحياتى