قميرية ... يوسف البنا

قميرية يوسف البنا

الليلة البلوم اصبح يقوقى وينوِّح
وميزان قلبى اصبح من بكانو مفوّح
على بـهماً لِوَيِّنْ بى النتيلة مِسَّوِّح
لى شوفتو بترد الروح بعد ما تروّح
الليلة البلوم طربان يقوقى ويصيّح
والعاشق ينوح لامن صباحو يبيّح
عناب الحجاز فدّع غصونو مميّح
ترا الحارق حشانا ولى قلوبنا مسيّح

يا قميرية نغمات الغرام زيديهن
وسوى القوق ونماتك عقب رديهن
على بهم النديمات القفر واديهن
ليهو سلامى والشوق يا أم جناح وديهن

انزلى فوق فريع قبل الفريق يا نايحة
كترى في الطنين متل الحوارة الرايحة
مربوعة بنات لينة ورطيبة ومايحة
قوليلا السلام ليك يا أم ضفيرة سايحة

قوليلا العشوق تعبان اذاهو مطوّل
يات من شافو اصبح في العليه متهوّل
عشان عينيك مبارى البى القفار متجوّل
لاكين لى الممات من عهدو مو متحول

كل ما شاف برق في القبلة يشلع وجّة
يتقافى المنام من عينو ياخد لجّة
نيران الجحيم ليهو في الفراش منفجة
دكتور الغرام مع اهلو عامل حجّة

قال مرضان هواك لى شفاهو مافى طريقة
في كبدو الحراب في جوفو باقة حريقة
قط ما ليه علاج من غير يقرطع ريقا
والا يمددوهو ويمسحوه بى عريقا

طارت منى قمرية المحبة وقفّت
نافضاهن على بلد الحبيّب خفّت
براى خلتنى زى جاهلا يتيم اتلفت
تقطر عينى بى الدمعة الروية الصفت

قمزت وصفقت وضربت هوايا فوق
وخلست بى رشيشا اصلو مو ملحوق
نافضاهن قلب والداً رؤوف وشفوق
شاهد في المنام دم الصغير مدفوق

قط لا اتصددت لا اتصنتت لى قوق
وسوّت لى الهبوب لفحى الهدم مشقوق
هوّت بى صقيعا منطرح واقوق
في شوفو البعير متل الخلال مدقوق

الصقر المضر لا حسب لا راعى
لى مركب غرامى الجبدولها شراعا
شافا وانعدل ختف الجناح بسراعا
واتجمع تقول حرحافا ماضى ضراعا

يا صقر السواد عينك تشوف الابرة
يخرخر ماها جدول لا تطيب لا تبرى
جناحك بى حديد شركا سريع في الهبرة
يردخو لى الكتف ردخا منافى الجبرة

علّق فوق تقول نجمة وهجع شاتيها
جاها مخوى متل الصاقعة متواتيها
هيّق لى الكفت لاكين وقع خاتيها
قيّع وانعدل عقان سبح بى تيها

حست بى هواهو اتدلدمت وانصرت
وانبرمت متل مترار فلانة الترت
هوّت بى الصقيعة تقول نجمة خرّت
وخوّت جو تقول طنوب وجيبة درّت

غتسن في السماء وقطعن سبيبة الشوف
عقب ادنقسن لى الأرض بسون فوف
بجمّع عليها بشوف حمار الدوف
وهى بتنصرّ منو غادى تسو رحيل الخوف

كبدو انسل دم داير يقصّر قيدا
وهى بقت تحوّت في المِكَر رِقِّيدة
من ربط الحبيل تب فضلتلو عِقيدة
مقطوع النصيب دخلت طريدتو عَقيدة

نزلت في كتيرا اتركبت في فروعا
كلها تترجف من السفر والروعة
قالتلو القدام قالو البلد مضروعة
كان ما صب مطر ما تنبت المزروعة

غير اليوما تام قط ما بتموت لك صيدة
والبجدعها القدر قطعا حربتو تصيدا
معلوم في المقانص تربح الرصيدة
والنوم لى القماح أم الزرع حصيدة

علق يسوى جاك لامن شميشتو انجمعت
وضحكن من قماحو بروق قبلتو ولمعت
حنت لى القميرية سحيبة ماعت ودمعت
وكت الليل برد في الوعرة ناو انسمعت

طلعت فوق فريع من الهبوب لوّاج
وجدعت شوفا بى ضى البروق وجواج
رضيت بى سقط زيفة انطلق سوّاج
وقالت الزيفة اخير لى من اضافر اب عاج

كل الليل تهلع عدتو القمرية
من اب عاج مبيتة في مخافة وريا
قبل القبلة تشرب غبشتا البدرية
صبحت دارا خالية ترا السفر باكرية

حصّلت الفريق وديارو ساعة النافلة
نظرت في البنات من غير حفل والحافلة
لقت في محبوبتى كفل أم سبيبة الجافلة
وعنق اللريل وعيون الجدية الغافلة

نزلت فوق فرع سيالة تبكى تنين
مراتن تردد لك نغيمها حنين
مراتن تسوى القوق معاهو طنين
تطرى الزول حبيبا ليهو منو سنين

محبوبتى سمعت وفهمت نمة الغناية
ونظرت ليها بى عيون التملى تنايا
دميعة زى نداية مقدة متناية
قطرت بى الخديد متبعة مى وناية

قالت كيفن حالو يا قميرية
يبقى عليهو متل العلى حمة عضام نارية
بذّكرنى عند ساعة الهجعة ويقول يا ريا
والا خلاص نسانى وبقيت عندو ما مطرية

كل ما اطراهو يا قميرية ريشات فؤادى يفرن
تقول عقد انقطع يجرن دموعى يترن
قلبى مرات يجر مرات يقيف يتحرن
واحس بى تياب جمر فوق لى عضاى انشرن

يعلم خالقو يا قميرية قلبى بريدو
فكرى معاهو رحل شال المنام فوق ايدو
لشوق العلى زايد تملى جديدو
والريد العلى فات العبار تحديدو

روّحى ليهو يا قميرية واحكى الحاصل
قوليلو الشوق عليك ليل بى النهار متواصل
قوليلو المنام بقى بى السهر متفاصل
قوليلو كفاك نجيع عود لى ديارك واصل

روّحى سافرى يا قميرية والله يعينك
ومن عقب الطريق مولاى يبقى ضمينك
جمّعى في هواك من الشمال ويمينك
لامن توصلى سيد حياك وفيهو بتنوم عينك

الله عليك يا الفاتح وعلى غناء الراحلة منى الخير عليها رحمة الله وبالمناسبة منى الخير زارت أبوجبيهة في عام 1970 في حملة محاربة العطش وفي معيتها الفنان الراحل عثمان حسين وصلاح بن البادية والفنان محمد الأمين وثنائي الجزيرة وكنت أحدأعضاء لجنة الاستقبال بجانب الدكتور جعفر قيلي والمرحوم حسن إبراهيم والمرحوم الأستاذ حسن السيد البشير وعوض عطية ومحمد رابح سعيد وحامد الطيب ومحمد تنير محمد أحمد والأستاذ يعقوب حسن وكان حفلاً محفوراً في الذاكرة.