مسدار الحباك ( الضحوي المشيل )

الضحوي المزرنق شيل
ذكرني الصعيد
سرب الغزال القيل
تحت الكبا

يا اخويا كيف تتخيل

ريحة النسيم ..

صورة الهلال الميل

الضحوي المشيل وكرب

شوف سحابو القررررررب للوطه

شايلو النسيم ومكرب

قلبي الطريت جدي الغزال الغرب

دخل الودي لحق الزراف والارنب

راحل

راحل فريد قاصد رهيد الوزه

راتع يوم جفل .... من العيون قام ....فزه

شوف عيني ! المي الرهيد انهز

شوقا للفريد ـ يمين ـ مابعزو معزه

قت ليهو يا المي الرهيد

مابراك سيد عزه !

جدي الغزال يوم فزه

مرق قلبي زت !

اداه كم كم هزه

وشالو صعد بيهو

قرب حدود النزى

ويا اخوي المسافر

ما نسيت اذكر ليك

يوم توصل هناك

سلم لي عليهم جملة

سيد السبحة والسلوكه

للفجر دغش

قبل ام سبيب توصل

تؤقد الدوكه

كرب الضحوه في المبروكه

سارب غزال

من العيون مفكوكه

فكر سمح

في دقة الدلوكه

يا عين الخريف

ليكن كتير مشتاق

ناس الطرفه ناس الجبهه ناس النترة

نجم العنقريب حت ناس

سهيل وسماك

كيف للعليل

حياتو يوم تنطاق غيركن

ياسيل السما الدفاق ؟

توتي 1999م

بعض المفردات قد تستعصى على من لم يغبشوا ارجلهم بطينة الحباك والجبال الشرقية عموما

ارجو الانتظار

مهداة للرائع كرم هجانة الذي طلبها من قبل

ولكل الرائعين بالمنتدى

قولك سمح بلحين
رجعنى للماضى
بت بقبل ليك
كان القليب راضى
انا من قبال
ما تقول بطراك فى الوادى
انا يوت بنادى عليك
كان القليب راضى بتن بقبل ليك

حبيبنا الشاذلى والله ذكرتنا ايام جامعه السوان لك التحية ومزيد من الاندياح بقامة الشعراء العظام

تسلم منزل هي الايام كلما تقدمت بنا تاخرنا
تحياتي

صديق عباس غنى
المطرة الشايلة
صبت ضحى وقايلة
ياروحي شن دايره
ورا الخدار سايره

يا أمو ما قريجة
وحمت على صيدة
خلوها تتم ريده
بنِيَّةً بيضاء

تسلم ياعزيز والف تحية للفنان صديق عباس
في مسدار اخر كتبت
شدر الكتر خدر كبر
ازرب هناك احفر حفر
ولدك حداك سوقو الذكر
اتي الكتاب خلي اللجر
تحياتي

اتي الكتاب خلي اللجر

الله عليك يا الفاتح عايزين نسمع الكلام الزي دا والضحوي من ريدتي ليه تقول كسر فيني ضلعة لامن يشيل ويحاوت الشمش تتعب الأصفاح وطرفي يجافى النوم من طيب ريه (عبيره) الفاح... وآح ثم آح عليك الله زيدني وصلِّح الصفحة الشمال

حتى الضاق "موليتك " !!وآقف ومادي القرعة
ولو مُرة واقف ومادي القرعة:

طريت الخريف الناعم ودرش الكُلم والكمبو
و براق الطرفة الشلع من قُبال حلة سمبو
حلاةأب عيوناً نواعس حلاة القعدة جنبو
خلي دبيكر تنعطن ميت العيون أيه ذنبو

تذكرت سفر الخريف لمواصلة الدراسة ووحل ديبكر والخوف من التأخر عن الدراسةوالحنين يأبى إلا الجلوس في الحباك ولاَّ بلاش

بالجد كده وديتونا بعيد معاكم ورجعتونا للبلد وذكريات الخريف في الايام الخوالي ونطالب بالمزيد من هذا الابداع المتفرد ويا الفاتح ما تقولينا دي محاولات ده شغل نجيض واكيد عندك حاجات كتيرة ما تحرمنا منها ولكم جميعا كل الود والشكر

تحياتي بشدة ايها الاعزاء

كنت بعيد عن التواصل في الايام الماضية لاسباب فنية متعلقة باداة التواصل

نواصل بقية شجر الكتر

القش كتير اسكب سكب

عمدان صحب اكرب كرب

مطرق وسوج خلي الدرب

القدح الملان ختو اسط

بربور حلو واحلى امبلط

كمبوك ملان سمنا محط

ام شنون قدح اكلك فرض

كلما نضيف مدروش درش

مصوصل مشرور فوق البرش

الطير اكل راقد فرش

مردود تمام ما بنبش

تحياتي

على الذين يجدون صعوبة في معرفة المعاني العودة فورا الى الحباك

الضحوي الرزم فو ق كرن وعالي سحابو

طراني الفريق اشواقي فوقو اتزابو

فوق ست اللهيج مشاعري شوفن دابو

طارن زي فراش النيلة الفقع يادابو

؛؛؛؛؛؛

البطحة جات ... شوف الضكير مضايق

تطلق فوقو حربة ..يطلق تلاته طبايق

جالي هدر قرع ابعروق الفايق

ياحليل منظرن وحليل جمالن رااااااايق

؛؛؛؛؛؛؛؛؛

الحباك صفت صبحت هدوء ورزانه

فوق الحسان قدلت فاقت حسان ازمانا

عشان فرقتا وبعدي من بستانا

جربت الجري .. وعرفت القفز بالزانه

؛؛؛؛؛؛؛؛

الحباك جميلة ورايعة يا مجلية

فقت الوصف ليك الف سلام وتحية

من ولدا بعيييد شالو البعاد زندية

تسلمي لي العقد ... يوم لزيارتك نية

تسلموا يارايعين بكل ما تحمله كلمة روعة من معاني

تحياتي

البطحة جات ... شوف الضكير مضايق

تطلق فوقو حربة ..يطلق تلاته طبايق

جالي هدر قرع ابعروق الفايق

ياحليل منظرن وحليل جمالن رااااااايق


هوي يا جماعة ألحقونا

استاذنا الفضل عارف جمال البطحه

تكفيك رؤيتا الرايعه جميلة وسمحه

فوق جيد البلد ملفوفه زي السبحه

تسلم يا عزيز .. عارفك سجاياك سمحه

استاذنا الفضل عارف جمال البطحة

تكفيك رؤيتا الرايعه وجميله وسمحه

فوق جيد البلد ملفوفه زي السبحه

تسلم ياعزيز .. عارفك سجاياك سمحة

تحياتي

اب جبيهة اصلا من زمان مخضرة

فيها المنقة ديك وفيها البرتكان اب صرة

قول الحسان يا سيدي فيهن درة

ملكت فؤادي ودخلت شغافو الدره

الكلام في الحباك كتير يا اخويايحلى ويروق
وشوقي لى ناعم خريفا يتحابكن فوقوالبروق
مرمي الغربة ياشاذلي انكتل ومات بالشوق
لناس ديبه وعلي الفراقهم مسخ عليَّ السوق

ابشر يالسمح الخصال وخلوق

في الحباك دايما يجيك الكلام مطبوق

كان في المنقه او عرجون حسانا الذوق

دا الخلاني مييت يالفضل في البوسته وشندي فوق

مكتول البوسطة فات القمري في القوق
عطشان مابترويه موية جالي وأب عروق
ميت مكرفس كرفيسة جنقو في صندوق
فراق الناسية مسحو مسحة دوكة بطايوق

مشاهدة النسخة كاملة : دوبيت ومسدار ونم --بين بحرى وشندى والبطانة

نهى محمد الربيع
04-08-2012, 05:58 PM
ونسة: نهى محمد ربيع: عمر كمبلاوي هو شاعر غنائي قدم العديد من البرامج من خلال اذاعة ام درمان واذاعة وادي النيل واذاعة الخرطوم، وفي كل هذه الاذاعات كان البرنامج المشترك بينهم فن الدوباي «اعداد وتقديم».. مرحب بك استاذ عمر كمبلاوي..
* حدثنا عن الدوباي؟
- هو في كثير من اقاليم السودان يطلق عليه الدوبيت والكلمة فارسية دو معناها اتنين وبيت هو بيت الشعر اذا بيتين من الشعر..
* وكيف ومتى ظهر؟
- في عهد السلطنة الزرقاء ويقال ان اوائل الشعراء في مجال الدوبيت هما حسان الحرك وابو دقينة ثم ظهرت الشاعرة شغبة المرغومابية وبعدها عائلة ابو سن في مجال الدوبيت.. ولكن الراحل المقيم الاستاذ الطيب محمد الطيب نقب عن مفردة كلمة الدوبيت فطاف معظم اقاليم السودان ووجد ان الكلمة الصحيحة هي الدوباي واصدر كتابا بهذا العنوان..
الدوبيت يتكون في معظم اقاليم السودان من اربعة ابيات وتعاقبت الاجيال في كتابة الدوبيت مرورا بالصادق ود آمنة، عكير الدامر، الفنجري، محمد علي ابو قطاطي، ود أب ناجمه، الطيب حاج عبد القادر وهذا الطيب قد زامل ود ضحوية الى شباب اليوم الذين يكتبون الدوبيت.
* من تعرف من شباب اليوم الذين يكتبون الدوبيت؟
- أحفاد الحاردلو وهم طلبة في الجامعات.. ومن الشباب الشاعر بشرى البطانة، عابدين ود كلي والكثير من الشباب.. ومن منطقة الابيض شاب يكتب الدوبيت يسمى أحمد ود الابيض.. من خلال تقديمي للبرامج وتحديدا برنامج فن الدوباي التقيت بالشاعر الكبير الطيب حاج عبد القادر من منطقة شندي في الاغنية الشهيرة التي لحنها علاء الدين أحمد علي «أغنية يا مولاي» له مقطع يقول:
يتمنى الدهب لو لونو يشبه لونك
وتتمنى الدرر لو تبقى هي سنونك
مجنون ليلى حالو أقل من مجنونك
مادام ليلى كانت في المحاسن دونك
من خلال كتاباتي للدوبيت كتبت قصيدة طويلة تتحدث عن مدينة بحري:
يا بحري الكلام عنك يطيب ما احلاهو
ما اظن قولي فيك يدي المقام معناهو
انتي مدينة الخير والجمال محياهو
باين فوقك اسع ومن زمان وارثاهو
اما ما يعرف بالمسدار فهي قصيدة طويلة تحكي احيانا عن رحلة سفر من منطقة الى أخرى واشهر من كتب المسادير الشاعر ود شوراني وهناك شعراء كثر كتبوا المسدار
هنالك شعراء لم نذكرهم في مجال الدوبيت وهم الشاعر عبد الرحمن خالد وهذا الشاعر هو والد المسرحي المعروف خالد ابو الروس .. وهناك ود الفراش «شاعر بربر » كما كتب في هذا المجال الشاعر الكبير خليل فرح، وهذا ان دل على شيء انما يدل على ان شعر الدوبيت ليس له منطقة محددة.
* هل كتابة الدوبيت في كل المناطق متشابهة؟
- في منطقة البطانة ومناطق الجعليين تقريباً يكتب المربع اما في منطقة كردفان الدوبيت يكتب بأكثر من أربعة ابيات، ومن الاشياء التي تميز الدوبيت طريقة النم وليس الالقاء وهذه النمة تختلف في الاداء من منطقة لأخرى.
* نماذج من شعر الدوبيت لبعض الشعراء؟
- قال عكير الدامر:
ختت ايداً فوق ايدي انجذبته خدرته
حبيت امشي من كتر الطرب ما قدرته
بقت الحنة بيني وبين ايديها اندرته
لولا الحنة بيني وبينا كنته ودرته
الشاعر خليل فرح قال:
نجومك والله يا ليل جيش معبأ وغاير
عشمان متلي يا ليل ولا ساكت غاير
مسيخ وطويل معتم لاك مريح لاك غاير
اضاير في همومك ويمشي جرحك غاير
الشاعر هاشم شجرابي قال:
شالنا الشوق رحلنا وبالخيال طار بينا
لي ارض الشمال والنيل مسافر بينا
يا رب العباد تبقى المسافة البينا
فرقة أقل من الفرقة بين عينينا
الشاعر عباس علي عباس من الجوير غرب شندي كتب في مجال الدوبيت قال:
جات تتهادى شوف أم قامةً مربوعة
الناعسه الكحيلة النورت لي ربوعا
لو قسنا الجمال نلقاهو معدوم نوعا
ومن نور وجنتيها القمره مابية طلوعا
وقال ايضا:
بريبة العسين انا قلبي مال حباك
توب الهيبه زانك وانتي زاهي صباك
فتاكات عيونك ترهب لمن يصباك
تنتعش النفوس لو مره هب صباك
حسنك يغني شرحو من بدري عارفو نباك
هل في يوم قليبك بي العلي اتباك
لي قلباً متيم من فراقك باك
كايس لي لماك وانتي ضاربه خباك
وقال ايضا:
حسنك في البنات معدوم وانتي احلاهن
ونورت وجنتيك بتوزنن بحلاهن
انتي شغلتي بالي واعضائي كمان ناحلاهن
السبب الفتني عيونك الكاحلاهن
شن تشبه بلا الجفلت علي وديانا
وكاسيها الجمال وبالعفاف مزدانه
السبب الفتني مقلتها النعسانة
طول الليل مساهر اناجي في اوزانها
* عمنا عباس علي عباس كيف اثرت منطقتكم الجوير غرب شندي في كتاباتك للدوبيت؟
- هنالك في منطقتنا الاستاذ بشير الحاج الطيب حيث وجدت من سبقوني في هذا المجال وقد قابلت ود شوراني سنة 1984م والصادق ود آمنة.
قال ود شوراني:
قول لأب امنة صندوق انتخابهن تم
فازت بيهو عانسة اب قفاين جمه
الشتل الوقف اوليها بيها اهتم
ود شوراني ابا فوق غيرا ما يجيب نم
وقد كان الرد مني (والحديث للحاج عباس):
قول لاب امنة لو وافيته املك تمه
فازت بالجمال عن جيلا فوق للقمه
الشتل الوقف حوليها بيها اهتم
وعباس ود علي نظم القوافي ونمه
قول لأب امنه صندوق انتخابهن قفل
وفازت بيهو بت الفي القبيله منفل
الشتل الوقف حوليها ما بتغفل
وعباس ود علي نظم القوافي وحفل
* الشاعر عباس علي عباس ماذا قلت عن شندي؟
- يا شندي مليونين سلام
فيك دار جعل اهلي الكرام
يا شندي بنظم فيك كلام
في نفسي ليك اكبر مقام
بلد المكوك اهلي القدام
الحاربو العدو بالحزام
يا شندي تاريخك اصيل
والمك نمر حرق الدخيل
ناسك اصال فراس عديل
والواقعة في بوطليح قليل
* ما هو آخر دوبيت نظمته؟
- نحن اهل المكارم في وطنا نشينا
ومعروفين اصال مطروح تملي وشينا
نحنا الما بنخاف الا من ناشينا
تعرفنا الدول قط ما بنهاب واشينا
السودان وطنا بنحمي نيلو وارضو
والجار والصديق نرعاهو ونصون عرضو
نحنا صغارنا الموت بلاقو يعرضو
فرسان في المحاص حالاً عدونا نقرضو

ياسلام على عسل الكلام استاذنا خدورة ام بشق والحازمي الفاتح لكم التحية على المساهمات الرائعة

واليكم المزيد

الحباك رزينة وهادية في اخلاقا

دوما للبلد ترفد بعيد اسواقا

فيها الدونكي صلب وحال الجناين فاقه

مين غيرنا يمسح دمعتا الرقراقه ؟

؛؛؛؛؛؛؛

الحباك رايعة جمال طبيعة وخلقة

وفي ابنوت تعجبك جمال الخلقة

لكن محنتا الناس المواصلة السرقة

تطلع كل يوم في الناس امارة فرقة

؛؛؛؛؛؛؛؛؛؛؛؛

لازم نلتزم نرجع رياض وادينا

نديها طلة دوام ...... بلدنا حنينة

فيها المنقة والموز والحسان الزينة

احسن نكرب قبال تغيم فينا

ابشروا

تحياتي

الله من ريحة الطايوق

برقك شلع يا الناسية قبلي السوق

مريودك وقع من نور باهك الفوق

ياست الاسم زكراك ديمه بلوك

عدمتي الفكر من ذرة الطايوق

جدية الوادي الليها تحن حنين النوق
وطيفها مزايل قدام عيونك وماملحوق
خايف عليك من الشاكوش تبيت مفلوق
ومكتول هواها مابحمل دقة الخازوق

مربوعة قوام ولهيجا ما ملحوق

اصيله بت ناسا كلامن ذوق

يالمريوده حبك يوم وقف خاذوق

كفاني اكال المنقه والهالوك

هتف سحاب الطرفة عبى وسيل
ذكرني الصعيد سرب الغزال القيل
تحت الكبا
يا اخويا كيف تتخيل
ريحة النسيم وصورة الهلال الميل
تحياتي

البطحة جات فارشة والموية فيها زيادة
ابعروق وقف شاف الخدود السادة
تبعهم جالي  الغريق بكرم ورفادة 
مسحو الجناين تب وخلو البيوت تتنادى

عزيزي الفاتح كل عام وانتم بخير

أخي الشـــاذلي ............. وريقات من أول ثانوي ..... ( كلمات من تأليفي ليست بقصيدة عصما ولا مسدار مربع لكنها خواطر فاحت فيها ريحة البن المقلي في عز الخريف وكان رمضان يعقبه العيد ( في عز الخريف)  والناس بتسارق فجة الشمس عشان تنشر قطن المراتب والحافات والمخدات .............)

الله الله على الابداع
استاذي الفاتح اسف على تاخر الرد
لقد كانت قصيدة مستوفية كل شروط القصيدة
فانت اخي من اولئك الذين افقدتنا لهم الغربة اعادك الله الى هذه الديار العزيز لنستفيد من علومك وابداعاتك