لقمة فى بطن جائع

تمت اضافة ساعتين لزمن الكهرباء يعنى الكهرباء الى الساعة الواحده صباحا والواحد بيكتب ويدعك فى عيونو من النعاس لانو انحنا بننوم زى الجداد والكهرباء مابتحضرنا نشرة الاخبار عشان كده ارفعو كراعكم من الجاز شويه بعدين اناحنا احلام زلوط دى مابتردف معانا المهم عندنا اربعه ساعات كهرباء يوميا من الوالى على حقاتنا ووعود فيما يخص الماء وصيانة المدارس الثانويه والراجل لووعد بينفذ يعنى مسركن معانا

عزيزي عبد المجيد
الله يزيدكم يا سيدي ؛ وان شاء الله تاني ساعتين عشان المدارس الثانوية التي بصدد
صيانتها كما اسلفت يجد طلابها كهرباء للقراءه كما المدن الاخري ! حتي نري طلابنا
في الجامعات العليا .
وهي ليست أحلام يا عزيزي ولكنها مطالب (لمظالم) عشناها اجداد علي اباء علي
ابناء ولنا الحق في ذلك ؛ اولسنا أكبر منتج للصمغ كما تقول الولايه والصحف ؟
اولسنا من قطع من حصص (سكرنا) سنين عددا

وتيب !

يا له من زمن كئيب و بائس و عجيب اخى حتيلة.

صرنا متواضعين فى احلامنا و نندهش لمجرد ان والى الولاية رد جزء يسير من حقوقنا المهضومة.

ان مدينة ابوجبيهه و ما لها من مقومات و دخل تستحق كهرباء 24 ساعة و لكن هيهات.

يتسول مواطنى ابوجبيهه لابسط الخدمات و يستنجدوا بالعون الشعبى و ما ادراك بالعون الشعبى!!!!!!

على الوالى ان يعلم ان اى ظلم يقع على مواطنينا هو وحده المسئؤل عنه.

تحياتى

مبروك الساعتين أبا وعد ... لم تذكر هل هى مدفوعة أم هبة من الوالي أطال الله عمره. كيف يتم إحتساب الكهرباء عندكم وهل لديكم جمرة خبيثة أم تم إستصالها مع بقية الأمراض المزمنة كالملاريا والطريق الأسطورة.

بعد 20 سنه من ثورة الانقاذ زادونا ساعتين كهرباء.
المشكله اهلنا فى ابوجبيهه طيبين وما متفقين فى مثل هذه الامور عشان كدا حقوقنا مهضومه.
الله يعين

ساعات التشغيل الآن سبعة ساعات .. تمت زيادتها ساعتين فى عشرون عاما بمعدل ساعة كل عشر سنوات وباقي لينا لسع سبعة عشر ساعة نحتاج فقط لمائة وسبعون سنة لوصول الإمدادات 24 ساعة .. طول بالك شوية وعمرك وعمرنا إن شاء الله وطويل وحافل بالطاعات.

عشرون عاما فوق درب الهوى ولا يزال الدرب مجهولا...
فمرة كنت أنا قاتلا وأكثر المرات مقتولا ..........
عشرون عاما يا كتاب الهوى وما زلت فى الصفحة الأولى

نعم سبعة ساعات لكن لمن تجي تحسبها من ناحية رياضية تلقاها تلاتة ساعاعات في الليلة لان الاربعة الباقية انقطاع مستمر
ياريت السبعة القالوها دي تكون مستمرة

الاخ عوض السيد عزف على وتر حساس وهو ان اهلنا مامتفقين وهى القشه التى قسمت ظهر البعير وبصراحة شديده انحنا كل زول فينا شايت فى اتجاه وللاسف المستنيرين قبل البسطاء وقلنا البلد فوق كل الخلافات والمشكله ما الانقاذ لكن فى المثلواالبلدفى الانقاذ مع اختلافهم لم نرى منهم مايفيد المنطقه والغريب فى الامر المجموعة التى تازر كل المرشحين هى واحده وتعالوشوفو البيع والشراء اليومين دى اى راس مجموعة اثنين مليون راكب بالقديم شوف الرخصه دى والمرشح دافع حق الدائر مقدم منو البيطالبو يجيب لينا حاجه

أبو وعد جهّز لي مليونين أنا جاي أصّوت ..........................

من الامثال السودانية ( ام التيمان بترضع البكاي) يعني ام التوءم بترضع الذي هو اكثر بكاءا لانه مزعج والمسكين الراقد بدون بكاء لم يكن حظه مثل ذاك مع انهم اخوان وتوءم في نفس الوقت
حقيقة نحن لاية منشطرة الى غربية وشرقية فالغربية اكتر عدة وعتادا وجاهزين لايشي واكثر ازعاجا فوجب على الحكومة الام ارضاءهم وتدليلهم ينعمون بتنمية وخدمات ممتاذة طرق معبدة بل حتي الطريق الدائر قطاع ام روابة ابو جبيهة يتم تاجيله ل تنفيذ طريق الفولة
اما نحن في الشرقية منقسمون على ان فسنا
مثل ما قال اخونا حتيلة نشتري ذمم الناس والدائرة مدفوعة مقدما بماذا تتطالب نائبها
نشكر ابو الزهور على الشعر ادناه
عشرون عاما فوق درب الهوى ولا يزال الدرب مجهولا...
فمرة كنت أنا قاتلا وأكثر المرات مقتولا ..........
عشرون عاما يا كتاب الهوى وما زلت فى الصفحة الأولى