قصة نواي جواد السلطان

كان في واحد اسمو جمعة جقملي سارح في غنم الحلة ذات مرة هجم جنود السلطان الصياح سلطان جبل ميدوب على الحلة وأسروا جقملي مع غنمه وذهب به مع الغنم إلى السلطان وكان جقملي مانع رويان لبن ضأن وشبعان أم حليبين وكمان أم دفانة بموية بطيخ وام بعيص "جراو تبلدى بلبن نعاز" قال السلطان هذا الراعي خلوه يربي الجواد نواي وأصبح جقملي مربي وسايس للجواد نواي ذو الثلاثة حجول وغرة ودعة وصار جقملي من نواي ونواي من جقملي ولبث حقملي عشرة أعوام وهو مشتاق لمعشوقته بخيتة بت خاله عبيد السواي والتي تدعى "الجفال" أي جدي الغزال وألف جقملي مقطع غنائى فيها يقول: "بخيتة بت خالي عبيد جدي الصيد يا ناس أنى جنيت ودوني البيت بكان قلبي مكتول الريد" وفي كل عام يحتفل السلطان الصياح في جبله ويجمع القبائل المجاورة ويذبح الإبل والكباش والتيران وتغني النساء ويرقص الرجال وتستبق الإبل والخيول وفي هذه المرة اجتمع الناس وكالعادة يستبق الشباب بالخيول وقرر جقملي أن يهرب في هذه المناسبة ومن أمام الجميع ولكن بصورة ذات تدبير بعد فاض به الولع لبخيتة بت خاله عبيد. وركب الجواد نواي بعد أن وافق له السلطان على إن "يقلب" ومعروف قلب الخيل كما في المثل الذي قيل في الشيخ حماد ود أسوسة ناظر الحوازمة صاحب أول فكرة زفة في دار بقارة " الخيل تقلب والشكرة لحماد" وحدد ميز للخيول في الذهاب الإياب وعند ما ركب جقملي على نواي قالت عجوز من جبل حلة كانت حاضرة "الليم" هول ياتو هذا الجواد قالوا لها جواد السلطان قالت والله هذا الفارس يا ركابه ويا نهابه وأخذ نواي الشوط الأول وكذلك الثاني وفي الثالث ذهب ولم يعود وضرب الكوراك والنحاس والنقارة وجرت الخيل والجمال خلف نواي وجقملي وطالت المسافة واترخ َ اللبب والشمس تدنو للغروب وكادت المهرة الدبسة أن تلحق بنواي وكانت الدنيا بروق ودهراب
قال جقملي: يا نواي يا نواي البرق البسوق دون أهلنا جاي.
رد نواي: يا جقملي يا عشاي كان رخيت لي حبل الوكاي نفاخات المخالي ما بجرن وراي.
رد جقملي: أني عارفك قطاع الوداي لحاق بعيد ودينا ديار السواي.
رد نواي: يا صاحبي ما تكتر الشاشاي الليلة بتوصل بلد التاتاي

الاخ المتوهج ول نوية انت اديب بحق وفانان
قصة عظيمة ومثيرة ونحن بنبحث عن مثل تلك القصص الحية قف
اخي انت قلت الجواد حجولو كم؟

ههههههههه والله حلوة شديد مرقتها اليوم دي كمان من وين؛ بالله ياطارق انت ولا اخوي احكو لينا حقت ابوعويش
دمتم

محمد مبروك

انا لقيت لى طيبق تارى مانى براى ترباية عجايز
يلا طلعوا لينا تراثنا من الصدور و الحكاوى الى الكتب
شكرا على اهتمامك بهذا الضرب من التراث ،،،،، تحياتي

محمد مبروك

انا لقيت لى طيبق تارى مانى براى ترباية عجايز
يلا طلعوا لينا تراثنا من الصدور و الحكاوى الى الكتب
شكرا على اهتمامك بهذا الضرب من التراث ،،،،، تحياتي

من طرف **nashi** 30th أكتوبر 2009, 02:20

يا اخي محمد نوية ما تكتر الشاشاي الليلة بتوصل بلد التاتاي.

تكوووون فهمتني؟؟؟ Very Happy

ممتعة ولابد لهذه القصة من تتمه ... وكان أستاذنا الذي لم ننتظره فى المرسة الأولية رحمة حسين حماد أسوسة .. قطعا ذاك جده فهو من ناس الحمادي ومنهم أستاذنا إبراهيم حميمة وأخونا الأستاذ الزبّال وحامد الزاهر وكثير من أهل الحمادي الأخيار.

كان في ثلاث حرامية (حامد العفريت، سالم كجمة كجمة والجضيع حوار الناقة) يقطعون الطريق على "الجلب" الذين يجلبون بهائمهم لسوق المواشي "الزريبة" وفي يوم من أيام الله السبعة كمنوا في درب المكسرة لواحد معلاوي من قبيلة المعالية جلب جماله في الزريبة وباع الجمال ودخل القروش في "الضبية" وذهب مع زوجته وفي غابة الكتر والعرد ظهر الجماعة التلاتة وقرروا قلع القروش من المعلاوي ولكن سالم كجمة كجمة قال ليهم يا جماعة الراجل دا واحد وأنحن تلاتة وكمان معاه حرمة يا جماعة عيب خلوا الزول يروح عشان الحرمة، قال له حامد العفريت عفوا خفت يا كدروك! قال ليهم كجمة كجمة أني أخويكى يا أمقايدة الزايطة لكن الزول دى عودى فوقه عود مرأة إنبطح في طرف الدرب. وصل المعلاوي وزوجته وسلم عليهم رد حامد العفريت يسل روحك. ففهم المعلاوي الأمر وقال ليهم دايرين شنو يا ناس؟ رد حوار الناقة دايرين القراش. قال المعلاوي لزوجته جيبي الضبية وأعطاهم تلاتة ريال تلاتة قروش حتى الممبطح رد العفريت كل المال ولا ينقص فرطاقة. قال المعلاوي الله بيني وبينكم ها دى المال شيلوه وأخطوا دربي أخير ليكم يا كلاب. شالوا الضبية قال المعلاوي ها ناس أخطوا دربي رد الجضيع حوار الناقة والمرأة السمحة دي بتمشى بها كيف؟ هاج المعلاوي وأصبح طويلاً كما "عنافي " وهدر وزبد وقال: المال وسته سيدهن بموت فيهن أركزوا يا ولاد العوين أني جيتكم وتناول سيفه ودرز على الكترة وقطعها من قعرها وقصها دقل وسواه درقة وتابن حامد العفريت وإحتدمت الدوسة والمعلاوي قطع درقة العفريت وقلع سيفو من أيدو وسواه درقة ودرز على الجضيع وقطع كمان درقته وقلع سيفو ولماهم مع بعض كل واحد قابل أخوه بضهرو وسالم كجمة كجمة يشاهد في المنظر وهوممبطح في طرف الدرب، قال المعلاوي لزوجته أديني خريطة الملح والشتة ورماها قدام العفريت وقال ليه ما عندك سكين؟ رد العفريت موجودة. قال المعلاوي: سلها، سلاها العفريت. قال المعلاوي: أقطع اضانك وتنجها في الملح والشتة وأقرشها. تردد العفريت لكن المعلاوي كان في أشد هياجه وقال حرم ما تقطعها وتقرشها نقطع راسك. قطعها العفريت وقرشها. قال المعلاوي: أقطع التانية وأقرشها. قطعها العفريت وقرشها. قال المعلاوي: أدي السكين أخوك. أخد الجضيع السكين. قال المعلاوي: أقطع اضانك وأقرشهن. تردد الجضيع. ولكن المعلاوي هبشه بالسيف فاستجاب الجضيع وقطع اضانه وقرشها. وبعدها أعطاهم المعلاوي تلاتة قروش وقال هاك يا الممبطح كيف الجرو تلاتة قروش. وذهب المعلاوي بباقي قروشه وزوجته. وأصبح العفريت والجضيع بلا اضنين وتاب ثلاثتهم. لكن كجمة كجمة عاش بي اضانه لأنه كان شهم ورفضه الإغارة على رجل أمام زوجته

والمرة الجاية ياعم ازهري بحكي ليك حقت جدي

مودتي

شكرا يا العزيز ول نوية .... قرشة ألأضان بالشطة والملح مرارة عديل ناقصة الليمون

من طرف **nashi** 10th أبريل 2010, 03:31

أكيد للقصه بقية
منتظرييييييين

لك التحية يا صاحب القصص .... من بيت الكلاوي... تسلم عزيزي محمد نويـــة

لكم التحية يااحباب مروركم براهو قصة حلوة ما لاها نهاية

من طرف ???? 11th أبريل 2010, 11:05

نــــــــــــمي الفكـــــــرة ستكون أكثر
من ناجحة وياريت تكون من نفس روح الحكي البسيط كم هو جاذب .
والي الأمام....نقي يانوية
11/4/2010 أبوظـبي
أم ضيـاء

بالجد إنت حكيت من صميم البيئة ... وتناولت المواضيع بصياغة رائعة وشيقة وجذابه ...ومضحكة ...قلت لي الرجل تنجا اضانا في الملح والشطة!!!؟؟ لكين والله ضحكتني شديد ...تسلم ...والقصة الأولي.. ترمز إلي إعطاء كل ذي حق حقه : في عبارة الخيل تقلب والشكر لحماد...يعني الجواد يتعب والناس تقول حماد سبق !!!؟؟ حيث صار مضرب مثل .. وتدل أيضاً على الوفاء للحب الطاهر النقي وللفروسية والهروب أمام الناس وليس خلسة وبالسرقة وهذا نوع من الشجاعة والذكاء!!! أما القصة الأخيرة فتدل على النخوة وتعظيم مكانة وإحترام المرأة ... فشكراً لك إبني الغالي ومزيداً ...ننتظر قصة جدك نوية .... محبتي

شكراً عم شاويش علي المرور الجميل هو دا براهو اجمل قصة ؛وانشاء الله تتواصل القصص....................
لك كل التقدير والاحترام

قصص حلوة ياول نوية المرة الجاية كان عارف قصة امو بت جبرين الفتنت الحوازمة وقسمتم لحلفا واولاد عبد العال

ول نوية ..كما يحلو للكل مناداتك ... القصص التي عرضتها تحكي عن التاريخ الاجتماعي الغير مدون لانسان المنطقة والذي لانعلم عنه الكثير ... نعتقد انها فرصة للكل لتدوين كل ما لديهم لتعم الفائده وليمكننا من تصور حياة اسلافنا في الحقب السابقة ...حلوها ومرها...

لك ودي وتقديري

العزيز حاج محمد..... لك الود
منتظرين بقية القصــــــه

مشكورين يا أحبه علي غشوتكم الجميلة ..وطلبكم علي الرأس والعين ..فعلاً أخي عمر سنسعي جاهدين لتدوين تاريخ أسلافنا لأنو دي ماحاجة ساهلة نتناساها بكل هذه البساطة

قصة نواي جواد السلطان

قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

الزول البلع اضانو في بطنو

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

ول نوية .... انت متألق ايها الفاااارس ...

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان

رد: قصة نواي جواد السلطان