[b]عدادت الدفع المقدم الي اين؟؟؟؟؟؟؟؟

غلاء المعيشه+عدادات الدفع المقدم=!!!!!!!!!!!!!!!!!!!!!!!!!

الارتفاع الجنوني في السلع الاستهلاكيه و الضروريه وغلاء المعيشه كوم وعدادات الدفع المقدم كوم اخر,قبل ثلاث سنوات من الان وانا اتاهب للسكن مع اسرتي الصغيره وبعد معاناة و صعوبه وجدت منزلا ياويني وزوجتي بسعر يناسب محدودية دخلي ولكن المشكله كانت في الكهرباء اذ ان عداد الكهرباء كان واحدا مشترك بيني وصاحب المنزل مما سبب لي بعض المشاكل مع المالك,فقررت ان اشتري عداد من الكهرباء خاص بي,ذهبت الي الهيئه القوميه ومعي عقد الايجار,فقالو لي سعر العداد 1000 جنيه (مليون) باقساط شهريه كل شهر مائه جنيه,قلت ماشي وعلي بركة الله,اشتريت العداد وافتكرته ملك لي,وبعد سنه عندما رحلت الي منزل اخر ذهبت الي الكهرباء لاخذ العداد معي فاذا بموظف الكهرباء يقول لي يا استاذ العداد ملك للهيئه وليس لك به شان دعه مكانه وارحل.........طيب قبل يومين احد الزملاء ذهب لشراء عداد من الكهرباء , فقال لي بعد ان خلصت كل الاجراءت طلبو مني ان اسدد مبلغ 3000 جنيه يعني (ثلاثه مليون) وبدن اقساط,
ده كله كوم وعدادات الدفع المقدم للمويه ايضا (في الطريق) يعني يا تدفع مقدم يا ماتشرب مويه,
ربك يستر في انتظار عدادات الدفع المقدم (للهواء)
تحياتي..............................................

تبقي يا اخي عدادات الاكسجين ...وما بستبعدها نهائياً

بالطبع لا مقارنة!!!
لفقراء بلادي رب

احسن حاجة نعملها عشان نطلع من هذه الالتزامات نرجع الى العصر الحجري الاول لاكهرباء لا موياء ولاضرائب ولاعشور ولا وظائف ولا غيرو
باستمرار الحال دي يمين يدفعوك حق الشمس والقمر وكان ابيت يربطوا ليك عيونك ما تشوف الا تدفع حق الشمس قف
يا حسون انت قايل روحك اشتريت ليك مسجل؟
ده وطن عاتي
وطن حدادي مدادي
وطن..........
.................
قول وطن

اللهم اهدى ولاة أمورنا وألهمهم وأعنهم على التيسير والتسهيل على عبادك السودانيين انك سميع مجيب يا ارحم الراحمين

حسن ادراة حكومتنا المبجلة حفظها الله ورعاها ....
واضح من التخطيط لبناء مطار يضاهي مطارات دبي وهيثرو
ولا داعي لان يشرب مواطن البلد ماءا نظيفاً طالما ليس في البلد مطار
وحتي المطالبة بالماء قد تكون من الكبائر التي قد تدخلنا جهنم الحمراء لاننا شعب بليد ولا يستطيع التقدير... ما هو اصلح لنا؟؟!!!!
المطار ام شبكة مياه كباقي خلق الله ما اغبانا من امة

سبق ان ( حلفت بالطلاق ) ان لا أشترى كيلو طماطم ب 12 جنيه و كانت النتيجة

ان أحرم اطفالى لمدة ثلاثة أشهر من الطماطم و بعدها البطاطس و باقى الاشياء.

قبل اسبوعين ارتف السكر 100% و تحدثت الى زوجتى عن ارتفاع سعر السكر و فاجأتنى

زوجتى بأن عليها بالطلاق ان لا أحلف بالطلاق ان لا اشترى السكر حتى تنخفض اسعاره الى المعقول

وقلت لها من اين لى بكل الزيادات و انا من زوى الدخل المحدود؟

يبقى السؤال هل نستطيع ان نضرب عن شرب الماء؟

الاجابة عند من يتمشدق بأن حكومتنا المبجلة لها انجازات لا تحصى !!!

قال لى احد ابناء ابوجبيهه و هو يعمل بالاستخبارات العسكرية انهم طلبوا من العساكر تسجيل اسمائهم

لدواعى الانتخابات و قد رفض ابنكم ان يسجل اسمه بحجة انه يتقاضى راتبا شهريا يبلغ 370 جنيه

و انه ليس معنى بأى طريق او كبرى او سد بنى بل انه معنى فقط بما يحصله من عمله خلال الشهر!!

لنا عودة

معليش يا جماعه بحلها سد مروىو تعليت الرصيرص وسد الشريك وخزان ستيت ودى كلها من القرض الصينى طبعا الصين قاعده تدين امريكا 00وماعيب انها تحل لينا مشاكل الكهرباء 0000اما الماء فما فيه مشكله المواسير مامليانه لما قاعده تطق 00يافيصل عليك الله حصل يوم مرقت من بيتك الصباح لحدى ماجيت المساء راجع 00ماقابلتك ماسوره طاقه ماليه الشارع مويه 000انحنا ما مويتنا رااااااااااقده حتى الشوارع رويانه ببلاااااااش0ونيلنا فااااااارش وبدل واحد اثنبن 000اما الصديق الصدوق الاصلو مابخلف مواعيد فى كل الظروف وفى كل الفصول حبيبنا الباعوض وهسع من الله خلقك شفت ليك باعوض بدون مويه 00ونكون عشطانين كيف 000عجب

لك التحية اخوي غريق وضحكتني والله ولكن السؤال المهم اين ذهبت كهرباء مروي؟ حقيقة شئ محير وانت بتكون عارف المشكلة وين؟لبتو الكهربه دي وين ياغريق؟منتظرين اجابة

مروى ياحيدر 1250 ميقاواط دكتير اكتر من القديم كلو مرق منها 50% الجماعه المشو جابو سلوك الضقط العالى الظاهر الشركه دفعت كمشن كويس 00عارف قامو طلقوا الكهرباء من مروى كلها وجات عانيه الخرطوم وقومى ياسلوك سيحى ؟؟؟؟؟ساحت عديييييييل يا حيدر 00وهاك يافضائح ويلا دمدم دمدم دمدموها0000وطبعا دى مابراها فى قرى 1و2و3و4والجيلى 0000لكن ياحيدر البلد قامت فيها صناعه كتيره000 وده ظاهر من دعايت التلفذيون زمان كانت الدعايه حصريا للبسكويت(كبتن ماجد البرير) 000لكن وين الان الدعايه بقت (من عند هلا هات )حاجات هاى هاى 0والشعوب مش بقيسو تطورها بدعايات التلفذيون واكل الخدار طبعا كل خدار الدنيا عندنا فى الخرطوم يظلمك قرشك بس

المشكلة فيييييي قرشك

القروش مالهه يادكتوره 00 ما00 مراقده 000ما عندنا بترول 00مابقينا قنيانين 00ماباقى لينا الا العقالات 00ر بك يستر

بمناسبت المشكله فى قروشك دى 00يا اخوى ابو الزهور 00زمان فى بداية السبعينات اهلنا فى قردوداولاد حميد والدنيا خريف ومافى شقل 00جو للعمده كمبال الكبير 00قالو ليه انحنا دايرنك تطرد الجلابه من القردود000 والجلابه الفى القردود فى الوقت داك تلاته00 هم العمرانى الله يرحمه وابو ندقم وعبد الرحيم ابو شلوخ000 العمده قال ليهم مالهم؟؟؟ قالوا له ما نافعننا بحاجه000 قال ليهم نافعننا ؟ما عندهم الشقلات والداير ببيع ببيع منهم 0000قالو ليه لكن انهنا ماغندنا قروش نبيع بيها منهم00 وهم مابدينونا للدرت ؟؟؟عمك حارن قال لاياالعمده كلام الناس ده غلط الحلابه ديل نافعننا 00قالوا ليه ياحارن الجلابه ديل نافعننا فى شنو ؟؟؟قال ليهم 00هم00بكشنو000وانهنا 000بنشم000كن 00طرتوهم 00تشموا00ريحت00الكشنه وين000والخرطوم مليانه خضاروفواكه الدنيا00 الماعندو قروش اتفرج000ذى منطق عمنا حارن

الله يرحم عمنا حارن كان زول طرفه

الله يرحمهم عمك حارن المقصود هو حارن على دا من القردود اما عمنا حارن بليله هو الاشهر صاحب الطرف الغريبه بتاع القردود ذاتو بتاع طرف سبحان الله دى علاقت الاسم ولا شنو

لك التحية اخى النائب غريق كمبال:

لم اقل ان هناك ازمة فى اى سلعة من السلع! نحن نتناول مسألةالغلاء؟

نتحدث عن ارتفاع جنونى فى الاسعار لا تتناسب مع معدل دخل الفرد.

الوفرة لا تعنى بأى حال تعافى البلد من الامراض الاقتصادية.

عموما لكم جميعا التحية و لكم منى هديه ( بسيتة)

عشة...كلمينا
ميري...زكرينا
كل سنكي احسن يبقي مسطرينا
نحنا شعب اسطي
يلا جيبو مونا
نبني ..نبني..نبني
مسرحا ...ونادي
مصنعا وبوستة
حرب لالالا
كبري استبالة
صالة للثقافة
تسرح الغزالة
جنبها ...الزرافة
رك قمري طار
قيرة ..قيرة..قيرة
نطط الصغار
صفق الترولي
طمن القطار
حلقت وحلقت حمامة المطار
كل طلقة بينا نحن تبقي وفرة
سمسما وبفرة
سكرا وشاى
جاى..جاى..جاى
مافي حاجة ساى
كل عندو دين والكل عندو راي
بور وبور سودان
بارا والجنينة
عبري ولا واو
حاجة مش كويسة
كل زول براو
هي سودان بكرة من سودانا ناو
تكتب انت تقرأ
تعرف السياسة
في محل حراسة
حجرة الدراسة
تمشي انت تلقي
في الضلمة لمبة
الف ضحكة حلوة ...تسندك بي جنبة
بي تمن طبنجة احسن الكمنجة
احلي شكل منقة...احسن الحليب
ايد...وايد..وايد
تزرع الجديد
غابة النشيد
ايد...وايد...وايد
مافي بينا سيد
ايد.وايد..وايد نلحق البعيد
نحنا مش مرقنا
حتة واحدةجينا
جينا للسرقنا
حقنا وغصبنا
دمنا وعرقنا
ولعووووووووو الرتينة
وكل سنكي احسن يبقي مسطرينا

شكرا لك اخى فيصل وشكرا للمبدع هاشم صديق

لك تحياتي فيصل على الأبيات الجميلة ويبدو ان الأخ غريق قد تشابه عليه أسلوب القصيدة فهي لمحجوب شريف وليس هاشم صديق ولكم تحياتي وأهدي لكم "أم اليتامى "لمحجوب أيضاً


أم اليتامى **محجوب شريف

بين العمل والبيت
فصّد جبينها عرق..
أم اليتامى بكت
لمن حسابها فرق
ماهية تمشي السوق
مركب مصيرها غرق
حق اللبن والزيت
الكسرة والكراس
هم في عيونها برق
الما بحس ما بهم
والخان همومو سرق
هذا المرتب تب
ما بسدها الفرقة..
القعدة في المكتب
والإمضا في الورقة
العبرة في الخبرة
الأيدي لو تعمل
جرح الزمن ببرا
اتباصرت مكنة
ماكوكها يتقدّل
بين خيطها والإبرة
زي ما القلب ساساق
الخطوة ساساقة
وعيونها منتبهة
تباري زقزاقها
لا شك ولا شبهة
والسترة أشواقها
والشفع القصر
والدمعة رقراقة
يا حليل شريك العمر
الدنيا فراقة
اتيقنت أحسن
من تبقى نقناقة
شقشق مقص في ليل
نامت خلايق الله
طاير سُقد حلّق
في بيتها واتدلّى
تدّي الولاد بصة
وتجرب القصة
وتقلّب الحلة
جاهز عمل بكرة
أسأل تقاريرها
السرية والسمعية
هل ركلست يوماً ؟
حتى ولو جمعة
مشكورة في المكتب
مستورة في الحِلة
رغم الشجن هبت
لم تعرف الذلة
ما فارقت سرباً
تتفهم الموقف
تستدرك العلة
ولم تعد أماً
مسكينة بتشفِّق
تفرتق وترتق
قُصاصة في إيدها
كالوردة بتبتِّق
ريانة منشرحة
هدِم قدِم يصبح
في لمحة كم طرحة
لا بد من تكية
لا بد من بكية
لا بد من غمدة
لا بد من سرحة
أنعم بها أماً
بين العمل والبيت
يا مرحىَ يا مرحىَ

شكرا لكم جميعا والتحية لكل نساء بلادي والتحية لكل الامهات

شكرا فيصل....شكرا اشرف على هذه الاطلالات الجميله

ياسلام ايها الرائعون فيصل واشرف
يا اخي غريق
قلنا الكشنة بتنشم لاكن الكهرباء نشمها وين؟
والموية المغرق الحلة دي نبل فيها عداد اخونا حسن ونشرب مويتو؟
قالو زمان صدام زار ليه منطقة لقى الموية مغرقة الشارع قام استدعى بتاع البلدية واعدمو في نص الميدان وعين واحد جديد قال ليه المرة الجاية خلينا نشوف موية في الشارع؟
بتاع البلدية قطع الموية من حدها وبقي بيسقى الناس بالتناكر

قلتولي شغالين عدادات ساااااااااااااااي هو انتو شفتو شنو؟

ما هو الفرق بين عداد المويه وعداد الفنان

يا بن عمي انت داير ليك خروف للعيد والله
جبت الكلام ده من وين فنان شنو العندو عداد
سمعنا عندو عود وانت خلط بين العيد والعود والعداد ديل تلاتة

هوى يا ابن عمى انت ما جايب خبر ساى الفنانين القروش البدوهم ليها فى الحفله بسموها عداد.
أرقدو طيبين انا ماشى السفاره اسجل نفسى للانتخابات الشباب منتظرينى نتلاقى باكر

الاخ غريق قراءت فى الاسبوع السابق اللقاء الكان معاك فى جريدة الوطن بخصوص ارتفاع اسعار الخضروات وتحدثتا عن امكانية استيراد الخضر بتكلفه اقل من الخارج ولاكن فضلتا الحل المحلى وحسب علمى الانتاج المحلى ياخذ فتره حتى يكون هنالك حل نهائى لماذ لايفتح الاستيراد ليخفف عن المواطن حتى تحل القضيه من جزوها تقبل فائق احترامى

الاخ غريق قراءت فى الاسبوع السابق اللقاء الكان معاك فى جريدة الوطن بخصوص ارتفاع اسعار الخضروات وتحدثتا عن امكانية استيراد الخضر بتكلفه اقل من الخارج ولاكن فضلتا الحل المحلى وحسب علمى الانتاج المحلى ياخذ فتره حتى يكون هنالك حل نهائى لماذ لايفتح الاستيراد ليخفف عن المواطن حتى تحل القضيه من جزوها تقبل فائق احترامى

السلام والتحيه للجميع
قرات في موقع مصري اسعار الخضار في مصر لهذا اليوم
واليكم الاسعارحتي تعم الفائده او المغصه
وهذه الاسعار بما يعادل الجنيه السواداني
والسعر للكيلو
الطماطم =1:25ج
البطاطس = 2ج
الاسود = 1:5ج
الليمون = 1:5 ج زي 20او25 ليمونه
هذه بعض الاسعار والباقي كله بالطريقه دي

شكرا اخى ياسر والاخوه على المرور ومتابعت هموم المواطن بخصوص الخضر بصوره عامه عيب اننا فى السودان نقوم باستيرادها من اى دوله مهما كانت ارخص فالاعتماد على منتجات الغير الرخيصه يؤدى بصوره مباشره لضرب الانتاج المحلى 00نحن فى السودان لنا امكانيات مهوله لانتاج معظم انواع الخضر والفاكهه لكن اعتمادنا على ماياتى من دول الجوار وهو رخيص لانه مدعوم من حكومة المنشأ00جعلنا متخلفين جدا فى الانتاج الزراعى عليه يمكننا النهوض بزراعة الخضر مثلا فى حالت وجود سوق محلى على القل خالص لهاومن بعد ذلك يملننا المنافسه على الصادر وهذا لا يتم الا بتطبيق حزمه اصلاحيه متكامله من تخزين مبرد وترحيل رخيص ومدخلات انتاج متوفره ورخيصه وتقاوى والقائمه طويله ومنها بل اهمها تشكيل حمايه للمنتجات الوطنيه حتى لا تخضع لمنافسه غير متكافئه مع منتجات عبرت فى دولها هذه الحواجز ونحن مازلنا فى بدايت الطريق (اقرأ اجراس الحريه اليوم)