غصن الرياض المايد

غصن الرياض

يا غصن الرياض المايد
يا الناحِلني هجرك وانت ناضر وزايد
تهجرني ليه.. وأنا ليك رايد؟
...
يا غصن الرياض المايد
ما أظن عن غرامك لو أموت ما حايد
سهران ليلي طال والعينين صِحن ما هجايد
تعبان قصدي ليمك، وإنت ناضر وزايد
...

في الجيل يا الجمالك سايد
عينيك ليك جنود وانت ليهن قايد
يا الهاجر جفيتني بنظرة لي ماك عايد
شوفتك زي هلال العيد، وفيهو بعايد
...
أنا وحبك ترعرعنا ونشأنا ندايد
من زمنا قِبيل، أيام قُلال وعدايد
ما خلِص القديم، وتبين مصايبو جدايد؟
حِن يا حبيب .. كفاي مُر العذاب وشدايد
....
يا خُلاصة الحواري الـ من جِنان وخوالد
حُسنك ليك يدوم، لا أم تلِد لا والد
راسخ في ظلال مجدو الطريف التالد
يا الـ لابس العفاف حلية وعقود وقلايد
….
عانيت في ليالي هواك صنوف وشدايد
ما بين هواي وجفاك وانت محايد
بس ما ذنبي غير صوت النشيد ونشايد
في مدحك بنيت قصر الرشيد الشايد

أطرب بها أسبوعيا بصوت الراحل رمضان زايد
لهذا الرمضان فلتات عجيبة منها هذا الغصن المايد

أزهرى الحاج البشير كتب:أطرب بها أسبوعيا بصوت الراحل رمضان زايد
لهذا الرمضان فلتات عجيبة منها هذا الغصن المايد

وأيضا لو سمعتها عند أبوداؤود والكورس فيهم عوض الكريم عبدالله وكمال ترباس بموسيقى وترية

غنتها تقريبا كما هي ، لم تغير فيها ويمكنكم الإستماع لها على هذا الرابط:
www.youtube.com/watch?v=x-zKcRtlpWc

العم ازهري انا كم استمع لهذه الاغنية امكن انا بتفق معاك في الزوق الفني لهذه الاغنية بالجد انا لم يمر يوم والا رددت هذه الاغنية واطربت بها

رغم سيطرة الغناء الهابط الان في الساحة الغنائية السودانية وصار مطلب الزوق العام خاصة في المنسابات الاجتماعية، مثل راجل المرة واضربني بيي مسدسك وقنبلة والخ ... . لكن عندما سمعت هذه الواعدة افراح عصام حفظها الله واتمني لها التوفيق . حينها تيقنت تمامآ ان الفن الاصيل والصوت الشجي لن يندثرمهما كانت الظروف