أوبريت الهجرة والاغتراب للشريف زين العابدين الهندي

اوبريت سودانية (الهجرة والاغتراب)
كلمات : الشريف زين العابدين الهندى

مساهر ليلك الطول نجومه هجوع
وغرقان قمره في جوه السحاب مصروع
بصارع فيك ضلام تمن سنينه سبوع
واراقب فجرك الآذن زمانه سطوع
وشايلك سيف نصر لا يطيش ولاهو بزوغ
ورابطك في حشاي من العطش والجوع
واسقيك مني دم ودموع
واوقد لك جحيم وشموع
واقش منك دموع الضيم على خدودك بتتحدر
واقبل فيك جبين مرفوع كراية النصر
وبيرق عزة رفرف في ركاب فاتحين
واغسل لك تراب الهجرة باليدين
راجيك المجد مدخور لك سنين ودنين
من حبوبتك الوقفت ترد الدين
وتطرد حملة الباشا ومع الغازين
حليله مهيرة كاسرة التوب وحد الزين
**
ومن جدك بكبرفوق جبل سرغام
ودافن ضهره في كرري ومتكنتل ركاب ولجام
وسال في ايده سيف العود
ببعج بيهو كبدة وهام
وقبال دمه ما إرشح مع البارود
اكون شتت عليك اجسام
**
أجسام من غزاة ماقدروا اسبوك
ولاكشفولك المقنع ولا في الشينة ختوك
ولا حلولك احداقهم ولاهم قدروا ادنوك
ومما فاتوا لي هسع بدوروا رضاك واطروك
**
وكيف انساك وذكراك لي دما هو عروق
ومما الهجرة حلت ليهو لابسك انتي عمة وطوق
وعايشك جوه وجدانه معايشة الحنين لي الشوق
وممزوجة فيك ممازجة اللسان لي الضوق
**
بشوفك في عيون النيل وفي الاطفال
وفي تاريخك الاخضر على الاجيال
وفي بحر الدمي اللسع بجم سيال
وفي مستقبلا واعد كبار وعيال
بشوفك بشري فيك شقق جبال ورمال
بترسم لي طريق نجم العشا الولوال
وتكشف فيك اسرارا كتار واهوال
**
والقاك حتى في رمش الغريب الضال
مهوم في اليمن لا الحامدي لا السلال
والاقيك في الخليج مشرورة حالك حال
واثكل فيك يبيعوك بي الدهب والمال
**
فلذاتك مبعثرة في البلاد مأجورة
تبني على الرمال احلامها ثم قصورها
خلوك سايبة في ايد الطغاة ماسورة
شان ما اسلموك الحلبي روب في كورة
**
ابشري نحن لسع في الخلا مرابطين
ونحن عقاب عهود انصار مع مهاجرين
ونحن سهارى ما بنعرف غمضة العين
ونحن فداك نذود عنك بقالنا سنين
حالفين بيك قسم غالي وعزيز ويمين
مانضوق راحة لانشوف زوجة لا والدين
ولا ندفن رؤوسنا على الرمال خايفين
حتى نوقي من اشلانا اعلامك على القصرين
وحتى نسوي لي القصفوك مقبرتين
زي ما صنعنا تاره على الالف الفين
وحتى انكسر القيد وانقسم نصين
واكون عيدنا الكبير في مقرن النيلين
**
ومابننساك عشان اطراك في الازمان
قريب منك قرابة الحدقة لي الانسان
وجايل فيك جولة الدم على الوردان
وقيمتك عنده زي قيمتك معاهو زمان
**
بعيشك هضة بتشارف تلال قيسان
ويحياك موية في دارفور تبل عشطان
واديم فيك من سنار ترع خزان
وادفق خيره بي عند الرهد بستان
واقول لي الدندر الغاضب كفاك جيشان
واسهر لي وليداتك اعشى الحاري والجيعان
**
منو الزيك ولد واستالد الاولاد
منو الزيك يجيبهم ديمة عشرة انداد
منو الزيك ببز الدنيا موية وزاد
منو الزيك ضروع وزروع ونيل مداد
منو الزيك بطان وغابة دون حداد
منو الزيك سهول وادي وجبال اوتاد
منو الزيك اصل موروث من الاجداد
منو الزيك جراتق دم قدام وجداد
قشى الدمعة يابت الرجال مابحكموك اولاد
**
بت الحر وام الحر واخت الحر
وست الضنبة مردوم بي وراهو بجر
ست الفي الخشش من العصير بنتر
ست الخيل وست الفي القلوب بنقر
وام الحلفو بيك وبي العذاب المر
مابختولك الشينة ومناحة كر
**
اولادك فضلة الموت وبتلجوبو
ودائماً سيرته في لسانهم ويتسلوبو
وزرعك من زمان المهدي طارح دوبو
واحدين بحصدوا وواحدين بكفو دروبو
**
تيلادك مسكر في الخزن محروس
هجليج واندراب ومهوقني وابنوس
ومن صمغ الهشاب سوي السنط ترتوس
ومن شدر التبلدي الموية كوس في كوس
ومن ضل النخيل الشمس دايرة تكوس
ومن حرب المطر فرع الحراز مدروس
ومن شوك السدر جيش السلم هكسوس
ومن زهر التبر البادية باقية عروس
وبي توب البرم سوي الطلح مبلوس
ومن شدر الاراك عطر الرعاش مبثوث
ومن سيف العشر جيش هكس صار مهروس
والدوام واج بقيف الابتراوي خروس
**
فيك الفيل وفيك العنزة والجاموس
وفيك التيتل اللبات قرونه تروس
وفيك الاصلة والدابي اب درق وجروس
وفيك ريل الودي البي ناله راتع اجوس
وفيك صقر الكواهلة العينو كالفانوس
وفيك فهود وفيك نور وفيك طاؤوس
وفي نيلك عشاري اشيل من الجاقوس
**
فيك الازرق البي عرفه هد القيف
وفيك الابيض الماش منطرح مابقيف
وفيك زهد المفازة الوعدو ماخليف
وفيك الاتبراوي اللي الشواطيء مخيف
وفيك الدندر البهجم هجمة السيف
وفيك الباسلام في الفشقة عامل هيف
وفيك سيتيت منبت من قناهو صريف
وفيك القاش بوري الرعدة
والصاعقة الداودو كيف
**
وفيك بحر الجبل حاقب عري الرجاف
وفيك بحر الغزال والجور وبحر زراف
وفيك سوباط ملولو زي دبيبا خاف
وفيك بحر العرب مليان نعام وزراف
وفيك بحيرة قال (نو) سيده ما الاسلاف
وفيك خور اب حبل شاقي البلد كشاف
وفيك تمت العظيم شايل الكليت والشاف
وفيك خور الدهب ذو الذكرى والاعراف
وعندك مقرناً حرم سواك ما انشاف
**
وعندك الف خور في الوادي والفين رافد
وحسبان الجزائر والجروف ماوارد
والنبرو الحبيب لي عودو سيدو اقالد
والساقية الحنين توريقها باكي وساهد
والبلدات ونجاضات حليلة فايد
وسمسم وام صقور وسهل قبوب ود زايد
وصقيعة ام بليل براقها قايم وقاعد
والمطر البكب اربع شهور ويدارد
وفيك قنبلية كمبو سته الوارد
وام سنات تغازل دوكة ماشه تحادد
اسفاي بقول لي الفشقة بهمك شارد
كونه الفار بقت ترع وجناين وموارد
**

في غروبك ربوع خصبة وتبر مبهول
ووديان من عقيق مغسول مطر وسيول
وكثبان تابه بتطرز حواشي سهول
تجود بي الكركدي وصمغ الهشاب والفول
وتدي القنقليس طول الشهور والحول
فيك حفرة نحاس والصمغ والكول
والتور والخروف والناقة والكاتول
علي دينار كسب ليها الشرف والطول
ابو زكريا اداب العصاة زول زول
من وداي بكريت في ربوعها واجول
لي الكفرة وصحاريها العجاف الهول
**
وجبل مرة الشمخ جايب مناخ لبنان
وفجر من ينابيعه العجاب بستان
طارح عنبه والزيتون مع الرمان
وجاب من يافا تفاحا كبار ومكان
**
ومن مليط مكربت شاقي دار الريح
نازل بارا ام فتنة بتسر وتريح
واتياسر على التيارة صوتها بصيح
ونوخ تقلي في السهل الكبير وفسيح
**
ومن تقلي ام برم شايل جبال النوبة
عامر بي برشم عريس الحوبة
جلجال والاحيمر نارهم ادفوبه
وين كجذوب وشامي الحارة بتسلوبه
**
وفي شروقك ربي العنافي قاطع تيهو
في ضهره الدغم دوباي حرارته وتيهو
وفي الشبرية راكبة حمامة بتغنيهو
مسدار اب شوارب ياخدو ويوديهو
**
امانة عليك بطانة اب سن بتسنى الكاعة
يوم اكلت كباد ساكت رخم وضباعه
يوم محمود وناس عوض الكريم سمساعة
واقفين في الشمش دايرين اغطوا شعاعه
في ضحوة عجاج وسيوفهم اللماعة
ياكلن في التراقي واقطعن في ضراعه
**
يا المعزوزة بي دمان وعضام ابواتنا
عارفنك مقريفة لي شراب قهواتنا
زغرتي يا ام شيوم خلي الندق نحساتنا
ونحاسب عقاب الجاتنا والما جاتنا
**
هسع قومي سوي السيرة جري النم
خلينا النهشك فيك ونملاك دم
ندفن لك شقوقك شور عضام ولحم
ندفق لك نحيرا لا وقف لاجم
نشبع فيك صقور وضباع وطير ورخم
لامن ترضي كيفك ودور هناك انتم
**
شوفي معزتك كيفن عزيزة علينا
وشوفي عزمنا لي الحمل الوقف راجينا
شوفينا بنتر ولابنكف الشينه
شوفينا بندكدك ولاما هامينا
شوفينا بنبشر فيك طوال ايدينا
ولا نغطي بي الطين والعجين اضنينا
**
وفي شروقك ارض مليانة خير ومعادن
فيها السارح الناشق وفيها الساكن
وفيها المن حلايب جاي غاشي سواكن
وفيها الاركويت نسام اراك وجناين
وفيها غزال جبيت وقل قصاد الشادن
ومن صمد اتطرح لي اربعات بيعاين
**
وناس اوشيك اخنقوا في الربابة واغنوا
واوهاج سل شوتالو وبركلو اسنو
تمباك الدمك جوة الكدوس حاشنو
***
جبنات يابنات هريو قامن وجنو
دبايو اوجات كيها يا ادروب ابوك كيفنو
روح تندلاي ولا الصهب فاتنو
قالوا الليلة هبباي بركة زايد جنو
ناس باكاش وحامد في اروما استنو
**
الكور دلو والمربيت بتمشي الوادي
خت الدرقة والهاري السنين بي غادي
وادني الانقلت قرب علينا ينادي
والهو شاب برد بروي الغيل لي الصادي
**
وفي شمالك نخيل باسق يداعب الريح
بقول لي البركل الشامخ كفاك تبريح
انت عارف كلامي وراي بي التلميح
جيب رايا قديم بيهو بتفيد وتريح
قش دمع السواقي البي العذاب بتنيح
واتطري العضام تحتك تئن وتصيح
**
اتطري السناجك وواقعة الخشخان
واتطري النحاس وكتين ازم بطران
ونادي اولاد جعل والنجمجم القرمان
والخيل عركسن واتروقن ريقان
وصقر الجو بحلق في السما جيعان
يالكدك بدور كبدة وكلي ومصران
نادي الملك نمر معلم اباة الضيم
شاوي الباشا شي خلاي جناهو يتيم
ودفتردار بجك عند المتم زميم
ارفع صوت لعل الناسي ابقى فهيم
ارفع صوتك خلاص شرطنا شرب الهيم
وكاد عاقلنا اصبح من سكاته بهيم
**
مربي الدامر البي ذكره عز وجل
واتنوخ فسيح وادي المجاذيب طله
شوف النار متلعبة في المساجد ولا
مات نور الضيا وجات بعده نار الجله
شوف المصحف الاربع قرون بدله
ماسك ورده ام سحرته عين خلق الله
**
حبابك عشرة يابت مقرن النيلين
حبابك يا ام عجن بعد العديل والزين
حبابك يالمحكرة في المشاعر والفؤاد والعين
حبابك يا المغسلة بي طهور مويتين
حباب اهلك بلاعبو الموج مع البردين
حبابهم كتفوا ابوطليح على اللقنين
حباب قصرك ضبح غرودون من الاضنين
حباب الخندق العجن الجلود بي الطين
**
حباب المهدي فيك كبر حرارة ودين
حباب اسد العرين عبدالله ودتورشين
حباب النور عقيد الخيل عقود الشين
عنقرة المعزة الاصلو مابتلين
حباب الزاكي اداب النقز في الحين
حباب ود النجومي القبره في توشكين
حباب عثمان سواكن دقنه في الدورين
حباب يعقوب حباب محمود وشيخ الدين
**
سلام يالبقعة مبروكة الاله والدين
حباب الحرورك لا انتماء لادين
حباب السودنوك خلوك سمارة وزين
حباب الازهري النكس ذرا العلمين
حباب الراية هفهافة وتكيل العين
قولوا معاي تبارك اقول دقر ياعين
وزغرتي يا ام رشوم قولي البطان وين وين
بركز لما سيطانهم تبيد وتلين
ولما اشوفوا قطع ايدي بي السكين
ولما تقول حمامة كفاك دقر يا عين
**
سلام يالقلعة بي دورها وجواهر تاجه
سلام يا اب عنجة خورك لاقا نيله وناجه
سلام يا اب روف وود نوباوي ضوى سراجها
سلام ديم اب سعد نار الخيم وجاجه
سلام الله اكبر في الفتح دجاجه
بي سيوفها ورماحها ولي الحمد سجاجه
بحرابيض فتح ابوابها وقت الحاجة
زي ما موسى عد ولا تعب لا حاجة
كلك ادباء من عشاق وفنانين
شالوك في عيونهم وصوروك تلوين
وشاشوبك شعر مطبوع جزيل ورصين
فيهم ام در وفيهو الاسكله وستين
وعازة الفي هواك نحن الجبال ثابتين
ويافلق الصباح قول لي نهارك وين
ونرعاك في الفؤاد بي عناية الحارسين
وياكروان كرومة خليل فرح مابلين
وياود الرضى القلبه انقطع نصين
ترى العباديماسك الدابي بالايدين
مع ابوصلاح ونور الكهربائي الزين
وفيك الحاج سرور غنى الفراق لي متين
وماعارف المفارق قدمه ماش لي وين
وياعازة الفراق طال بي وكله حنين
**
مطروحت الجبين من سوبا لي سنار
نيليك من غرامهم لبسوك سوار
اكتفاك موطأة فيها ماء وخضار
ولي عزاز القبايل صرت احسن دار
محصولك دهب مابكيلو بي العبار
مواسمك عدة محسوبات طوال وكتار
ارضك في الجمال محسوبة بي الاشبار
مشكلة بي التراب لكن لجين ونضار
**
ترعك زي بحار لبنان طوال وعدال
واب عشرين افوق ناس بردى في الامثال
لياليك بي القمر رويانه نور وظلال
مطرزة بي النجوم في احتفال وجمال
**
قرآنك بزيم من كنت انتي بلاد
تقايبك تضوي الليل زناد في زناد
ماشقاك ضلال الا انشج وانحاد
وما حال فيك ظلوم الا انكبح وانقاد
عزك من قديم محسوب جدود واحفاد
عمروك الرجال تيلاد قصاد تيلاد
زرعوك بي السلاليك ومنجل الحصاد
جرنك في التقي تمتم قرافة وزاد
**
مبسوطة ومحكرة لاهبك لاتبوب
وقطنك زي لتيب الحقنة خاطي عيوب
معلاق منتنى ولوزا عفى ومكروب
وتيلته طويلة زي خيط الحرير في التوب
**
دواوينك مفتحة لي الضيوف مفروشة
وحلالك مجندرة لاوسخ لاكوشه
شاربة الهمبريب بي الساريات مرشوشة
والعجب الاماسي تقول ليالي الروشة
**
في مدني الكبير نشأة لك الحيثية
فجرتي المواهب ومنبع الوطنية
بذرة مقدسة اتربت على الحرية
من المؤتمر لي الليلة نامية قوية
من يومك كسبتي الكاس وشلتي الراية
وافكار المحافل باقية ليهم تاية
بي التعليم سقوك وشبعوك قراية
وادوك من شبابهم كل حب ورعاية
**
حليل قلب الجزيرة المستقيد النابض
حليل جمعة رجالها وجيل شبابها الناهض
حليل جمع السراة زي الهزبر الرابض
كل واحد على وطنيته عاضي وقابض
**
يا ام الزهور ماتسوي قبض الريح
كان رايك زمان بشفي وبفيد وبريح
قضي لنا السواكب وامسحي التبريح
فاتوك الرجال لسع جناك بصيح
**
مابرضاك الخوف والضياع والحيرة
مابرضاك ليوم تبقى انتي اسيرة
مابرضاك اكلتي الحلوة تنسى مريرة
والتاريخ رهيب مابنسى ليك تسيطرة
**
حاشاك الملامة وما بتسوي العيب
وايدك لسه تجدع من بعيد وتصيب
ويومك في المحاص شايفنو جاي قريب
ودورك بتلعب قبل الشمش ماتغيب
**
اكسري الماين كنار خلي الاراضي تعوم
سويهن بحر من ريبا لي الخرطوم
ولعي في الفبارك غيظ ونار وسموم
خلي الهايفة تنقد والنصيحة قوم
سوي الترعة ساتروالمصارف كوم
سلي سيوفك الجبابه مثلوم
**
اعقب سنجة طوفي بي الدالي والمزموم
روح لي القرابين والسماسم كوم
شوفك كرمك شرف قال لي الردوك ماتلوم
انسى الفاتت ايامك بيجيهن يوم
**
ارفع ساعدك ربك العظيمة بتشوفها
حي ابا القديم وجديد بقت معروفة
قولي لي الشهداء نارنا متلعبة ومكلوفة
لا ماتت ولا غمضوا البقيدو ظروفها
**
ارجينا بنجيك موحدين صادقين
شايلين المدافع وبي السماء طايرين
صواريخنا بتثكل تطرش الاضنين
وفي الجاسر نقيف ليك بي النصر هازين
**
ديل اولاد حشاك لا ارتزاق لا زيف
وديل الكلهم صنديد واصله شريف
وديل دخريك لي سنين الجفاف والحيف
وديل دفقة ينابيعك شهور الصيف
ديل نيلك وقت قطع البرك والقيق
وديل ديم السواري الاصلو ما بتقيف
ديل الرضعوا حر لبنك بدون تحريف
وديل البقعوا في نارك بدون تكليف
ديل اتباشروبك انتي درقة وسيف
وديل اخوان صدق في الله دون تحريف
وديل يا ام عيونك وقلبك الوليف
**
خايضين فيك صحاري تقيد لهيب وشرار
وطالعين فيك جبال عاليات على الطيار
ونعرف ارضك المحبوبة بي الاشبار
وننزل في ربوعك ضحي ونمرق مع الاسحار
ماحجروك علينا حيارى او اغرار
نارك ما انطفأت من يوم رماك الغادر
وسجنك مافضي واهلك عليه تدافر
ولي الموت كمبلو اولادك مغني وشاعر
وكل عام ليك عيد بالدم موشح وظافر
خلي عدوك مجهجه في حكومته وحائر
وقيدك هسه بنكسره ونجدله ضفائر
**
نحن اولادك العارفانه دون تذكار
ونحن الجينا في نسلك من الابكار
ونحن الليلة سمعك في الضلام سهار
ونحن الفجر لي الليل كان قعد كان طار
ونحن نضري ورتابته ونشيلها عصار
ونحن بلابل الحرية تصدح حتى في الاوكار
**
اقول فيك تاني ياست الشرف والطول
وعزك في الارض تريان فروع واصول
ارقدي قفى بنجيك مهما زمانا يطول
ومهما الدهر يردم في حمولنا حمول
ومهما نموت فداك نترامي زول في زول
برضه منيعة انتي على القدر والصول
**
وانتي كبيرة اكبر من صغارة العسكر
وانتي عظيمة مابذلك سلاح البقهر
وانتي قوية لا بتلين ولا بتتكسر
وانتي انوف اشم من بيلا مابتتعفر
قودي لنا الرسنة وخلفي الاشتام
وخنقي لي دلاليكك وصحي النام
ارقصي الفاشر الهضليمه كب ونام
وقولي الليلة شبالكم علي حرام
لما تكسروا القيد اب عشرة اعوام
ولما تقعنوا الكاشفات ورا وقدام
ولما تجيبوا سجانكم خزي ومنضام
ولما اولادي ابقوا جنود ومش خدام
***
هذي الاراجز يا أماه من كبد السماء
من حيث يتعب بالشموس الغر
سير الكبرياء
من حيث يحتصد الرصاص
صدور كل الابرياء
من حيث يسخر بالمشانق اعتناق الشرفاء
من حيث يعصف بالزلازل احتشاد الاتقياء
من حيث تحتشد السجون جحافل للاوفياء
من حيث يلتقط الرسالة قلب كل الانبياء
من حيث كل الكون حق وسلام وضياء
من حيث ماكذب الفؤاد
ولا ألم به الرياء

هذه من الروائع و الدرر الذى انتجتها العقلية السودانية الفذة.

شكرا جزيلا استاذنا فضل و مزيد من الابداع.


فلذاتك مبعثرة في البلاد مأجورة
تبني على الرمال احلامها ثم قصورها
خلوك سايبة في ايد الطغاة ماسورة
شان ما اسلموك الحلبي روب في كورة
**
ابشري نحن لسع في الخلا مرابطين
ونحن عقاب عهود انصار مع مهاجرين
ونحن سهارى ما بنعرف غمضة العين
ونحن فداك نذود عنك بقالنا سنين
حالفين بيك قسم غالي وعزيز ويمين
مانضوق راحة لانشوف زوجة لا والدين
ولا ندفن رؤوسنا على الرمال خايفين
حتى نوقي من اشلانا اعلامك على القصرين
وحتى نسوي لي القصفوك مقبرتين
زي ما صنعنا تاره على الالف الفين
وحتى انكسر القيد وانقسم نصين
واكون عيدنا الكبير في مقرن النيلين

يا أستاذ : نعم الإختيار ,,, وطبعاً الاستاذ عبدالكريم الكابلي ماقصر فيها" والعمم في الإحتفال داك ماتديك الدرب...."

تسلم..

طبعاً القصيدة قيلت بعد فشل محاولة الشهيد محمد نور سعد في 2 يوليو 1976 ومايو عمرها سبع سنين
وعشان كدا الشريف قال بصارع فيك ضلاماً تمن سنينو سبوع ويو جد تعديل في كلمة سمعك والصاح شمعك
نحن اولادك العارفانه دون تذكار
ونحن الجينا في نسلك من الابكار
ونحن الليلة شمعك في الضلام سهار
ونحن الفجر لي الليل كان قعد كان طار
ونحن نضري ورتابته ونشيلها عصار
ونحن بلابل الحرية تصدح حتى في الاوكار

في عام 1987 اعتقل عدد من تجار أبوجبيهة إعتقالاً تعسفياً ومن ضمن من اعتقلوا المرحوم عمنا سيد مصطفى غيث وعبدالمجيد عثمان حتيلةومجموعة من التجار ولقد آلمني ذلك كثيراً فالتقيت أنا وأخي مبارك حامد فضل الله في الخرطوم وذهبنا في زيارة لعمنا المرحوم الاتحادي الكبير الحاج مضوي محمد أحمد وحكيت للعم مضوي قصة تجار أبوجبيهة وهزته القصة وقلت لازم نمشي للشريف زين العابدين الهندي وكان يومها وزيراً للخارجية وتواعدنا أن نتقابل معه الساعة واحدة في محل نسيبه محي الدين بعد أن فطرنا معه بعصيدة وملاح شرموط أخدر وبشطة خضراء والتقينا وذهبنا للشريف في منزل نسابته بنمرة تلاته بالخرطوم فقابلنا بترحاب كبير وأصر أن نتغدى ونصلي العصر حتى نتكلم في الموضوع .. وبعد أن شربنا الموية الباردة في حر شهر أغسطس جلسنا نتونس جميعاً فأتى المرحوم عبدالوهاب خوجلي (نائب برلماني في نفس الحكومة) ثم حضر المرحوم السد محمد السيد اسماعيل الأزهري ثم كمال نصرالدين السيد والدارة كبرت ولحبي للشعر أصريت علي السيد الشريف أن يقول لينا مقاطع من الأوبريت وبالمناسبة القصيدة اسمها الملحمة وأسمعنا وأطربنا بصوته حتى وصل الغداء وكان مبارك حامد شبه حافظ القصيدة وذكره بمقاطع كثيرة منها وبعد الغداء والتحلية صلينا العصر جماعة وبدأ عمنا مضوي الموضوع وقال سمح القول من خشم سيده وذكرت للجمع أنني حضرت لهذا الموضوع بصفة شخصية أي لم يوكلني أحد وقلت ليهم أن الأشخاص الذين هم بالسجن هم أولئك الذين أسهموا بمالهم وعرقهم في أن يمنحوا الحزب 4 دوائر من 5 بشرق الجبال لا جزاءً ولا شكوراً والآن هم رهن الاعتقال وما من سائل عنهم هل هذا يرضيكم؟ والله إذغ تجاهلتوهم بهذا الشكل سوف لن تنالوا ولا دائرة واحدة في أي مرة قادمة والحق يقال أن الشريف قال لي قبل أيام في عشاء بمنزل عمنا فتح الرحمن طه سر تجار السوق العربي وأداني راس الموضوع ولكنني ماكنت فاكر أن المسألة بهذه الخطورة وقال الآن سأتصل بنقد الله وسيطلق صراحهم وقد كان.

في عام 1987 اعتقل عدد من تجار أبوجبيهة إعتقالاً تعسفياً ومن ضمن من اعتقلوا المرحوم عمنا سيد مصطفى غيث وعبدالمجيد عثمان حتيلةومجموعة من التجار ولقد آلمني ذلك كثيراً فالتقيت أنا وأخي مبارك حامد فضل الله في الخرطوم وذهبنا في زيارة لعمنا المرحوم الاتحادي الكبير الحاج مضوي محمد أحمد وحكيت للعم مضوي قصة تجار أبوجبيهة وهزته القصة وقلت لازم نمشي للشريف زين العابدين الهندي وكان يومها وزيراً للخارجية وتواعدنا أن نتقابل معه الساعة واحدة في محل نسيبه محي الدين بعد أن فطرنا معه بعصيدة وملاح شرموط أخدر وبشطة خضراء والتقينا وذهبنا للشريف في منزل نسابته بنمرة تلاته بالخرطوم فقابلنا بترحاب كبير وأصر أن نتغدى ونصلي العصر حتى نتكلم في الموضوع .. وبعد أن شربنا الموية الباردة في حر شهر أغسطس جلسنا نتونس جميعاً فأتى المرحوم عبدالوهاب خوجلي (نائب برلماني في نفس الحكومة) ثم حضر المرحوم السد محمد السيد اسماعيل الأزهري ثم كمال نصرالدين السيد والدارة كبرت ولحبي للشعر أصريت علي السيد الشريف أن يقول لينا مقاطع من الأوبريت وبالمناسبة القصيدة اسمها الملحمة وأسمعنا وأطربنا بصوته حتى وصل الغداء وكان مبارك حامد شبه حافظ القصيدة وذكره بمقاطع كثيرة منها وبعد الغداء والتحلية صلينا العصر جماعة وبدأ عمنا مضوي الموضوع وقال سمح القول من خشم سيده وذكرت للجمع أنني حضرت لهذا الموضوع بصفة شخصية أي لم يوكلني أحد وقلت ليهم أن الأشخاص الذين هم بالسجن هم أولئك الذين أسهموا بمالهم وعرقهم في أن يمنحوا الحزب 4 دوائر من 5 بشرق الجبال لا جزاءً ولا شكوراً والآن هم رهن الاعتقال وما من سائل عنهم هل هذا يرضيكم؟ والله إذغ تجاهلتوهم بهذا الشكل سوف لن تنالوا ولا دائرة واحدة في أي مرة قادمة والحق يقال أن الشريف قال لي قبل أيام في عشاء بمنزل عمنا فتح الرحمن طه سر تجار السوق العربي وأداني راس الموضوع ولكنني ماكنت فاكر أن المسألة بهذه الخطورة وقال الآن سأتصل بنقد الله وسيطلق صراحهم وقد كان.

بارك الله فيك يا مبدع

نشرت هذا الأوبريت من قبل وكنت أظن أن يجد رواجا شديدا لأنه بالفعل تاريخ وجغرافية السودان لقد حفظته من شريط أتى بك به الزعيم مبارك من لندن أيام حياة الشريف حسين ومعة رسالته الشهيرة للأمير نايف في ورقة من كراس حساب لمنح مبارك إقامة وقد كان بالرغم من إستحالة تغيير الزيارة لإقامة في ذلك الوقت . مايو 1980

توفي بعدها الشريف حسين في يناير1981 وشهاداتي في جيبه ولم أنسى قوله لي لو عاوز تقرأ الماجستير في ليبيا أو العراق أركب تعال لي في المدينة المنورة وتسافر معاي ولو عاوز تدرس في بريطانيا أرسل لي شهاداتك وموافقة من جامعة بريطانية وكانت جامعة إستراثكلايد بأسكتلندا .... وسافر الشريف الشريف في رحلته الأبدية إلى الخلود وعالى الجنان إن شاء الله ..

شكرا خدوره امبشق
والله قد اهديتنا درة ادبيه بتدور لها قعدة خاصة..دا الكلام وكتر لينا من زى دا..زى دا اصلو ما شفنا

عمل رائع بمعتى الكلمة يصعب وصفه الكلمات والأداء
يكفي انها شذي بها فنانا الكبير عبد الكريم الكابلي
التحية لنقال هذا الاوبريت