تتمة قصيدة الملحمة للشريف زين العابدين الهندي

وفيك بحرالجبل ، حاقب عرى الرجاف ..
وفيك بحر غزال ، والجور وبحر زراف ..
وفيك سوباط ، ملولو زي دبيباً خاف ..
وفيك بحرالعرب ، مليان نعام وزراف ..
وفيك بحيرة قال نو، سيدها ماالأسلاف ..
وفيك خور أب حبل ، شاقي البلد كشاف ..
وفيك تمت العظيم ، شايل الكليت والشاف ..
وعندك مقرنا .. حرّم سواك ما إنشاف .
وعندك ألف خورفي الوادي ، والفين رافد ..
وحسبان الجزاير والجروف ، ما وارد ..
والنبروالحبيب ، لي عودو سيدو يقالد ..
والساقية الحنين توريقها ، باكي وساهد ..
والبلدات .. ونجاضات حليلة فايد ..
وسمسم ، وام صقور، وسهل قبوب ود زايد ..
وصقيعة ام بليل ، براقها قايم وقاعد ..
والمطرالبكب ، أربع شهور ودارد ..
وفيك قدمبلية ، وكمبو ستة الوارد ..
وأم سينات ، تغازل دوكة ماشه تحادد ..
الكفاي بقول للفشقة ، بهمك شارد ..
كونو الفاو بقت .. ترع ، وجناين ، وموارد .

في غروبك ؛ ربوع خصبة وتبر مبهول ..
وديان من عقيق ، مغسولة مطر وسيول ..
وكثبان تابة ، بطرز حواشي سهول ..
تجود بالكركدي ، وصمغ الهشاب والفول ..
وتدى القنقليس ، طول الشهور والحول ..
وفيك حفرة نحاس ، وأبوتولو غير مصقول ..
والعيش ، والسماسم ، والصمغ ، والكول ..
والتور ، والخروف .. والناقة ، والكاتول ..
علي دينار، كسب ليها الشرف والطول ..
أبو زكريا أداب العصاة ، زول زول ..
من وداي مكربت في ربوعها وجول ..
لي الكفرة وصحاريها العجاف والفول .

وجبل مرة الشمخ جايب مناخ لبنان ..
فجر من ينابيعه العجاف بستان ..
طارح عنب والزيتون مع الرمان ..
وجاب من يافا تفاحا كبار ومكان .
من مليط مكربت شاقي دار الريح ..
نازل بارا وام فتنه بتسر وتريح ..
وتياسرعلى التياره ، وصوتها بيصيح ..
ونوخ تقلي ، في السهل الكبير وفسيح .

ومن تقلي ، امبرم شايل جبال النوبه ..
عامــــر قلبه ، بي برشم عريس الحوبه ..
جلجال واللحيمر النارم إدفوبها ..
وين مجدوب وشامبي ، الحارة بتسلوبها ..
وفي شروقك ؛ في شروقك ربا العنافي قاطع تيهو ..
وفي ضهرو الدوم ، دوباي حرارتو وتيهو ..
وفي الشبرية ، راكبة حمامة بتغنيهو ..
مسدارابشوارب .. ياخدو ووديهو .
أمانة عليك بطانة أب سن ، بتنسي الكاعه ..
يوم أكلت كباد ســـــاكت ، رخم وضباعه ..
يوم محمود وناس عوض الكريم سمساعه ..
واقفين في الشمش دايرين يغطوا شعاعها ..
في ضحوة عجاج وسيوفم اللماعه ..
ياكلن في التراقي .. ويقطعن في ضراعه .

يا المعزوزة بي دمانا وعضام ابواتنا ..
عارفنك مقريفة لي شراب قهواتنا ..
زغرتي يا ام شيوم ، خلي الندق نحساتنا ..
ونحاسب عقاب الجاتنا والماجاتنا .

هسع قومي ، سوي السيرة جري النم ..
خلينا النهشك فيك ونملاك دم ..
ندفنلك شقوقك ، شور عضام ولحم ..
ندفق ليك نحيراً لا وقف لا جم ..
نشبع فيك صقور، وضباع ، وطير، ورخم ..
لامن ترضي ضيفك .. ودور هناك انتم .

كيفن عاد ؛ كيفن عاد بتــــعادينا ..
وشوفي عزيمة للحمل ، الوقف راجينا ..
شوفينا بنتر، ولا بنكف الشينه ..
شوفينا بندكدك ، ولا ما هامينا ..
شوفينا بنبشر فيك ، طوال إيدينا ..
ولا نغطي بالطين والعجين إضنينا.

وفي شروقك ؛ في شروقك ، أرض مليانة خير ومعادن ..
وفيها السارح الناشق وفيها الساكن ..
وفيها المن حلايب جايي غاشي سواكن ..
وفيها الأركويت نسام أراك وجناين ..
وفيها غزال جبيت وقل قصاد الشادن ..
ومن صمت إنطرح لي أربعات .. بعاين .
وناس أوشيك إخنقو في الربابة وغنو ..
وأوهاج سل شوتالو وبركلو يسنو ..
تمباك الدمك جو الكدوس حاشنو ..
جبنات يابنات ، هريوا .. قامن وجنو.
دبايوا؛ دبايوا أوجات كيها يا أدروب ، أبوك كيفنو ..
روح تندلاي ، ولا الصهب فاتنو..
قالوا الليله هبباي بركة زايد جنو ..
ناس باكاش وحامد .. في أروما استنو.

الكور دلو والمربيت بتمشي الوادي ..
خت الدرقة والهاري السنين بي غادي ..
وادني اللي انقلب قرب علينا ينادي ..
والهوشاب برد .. بروي الغليل لي الصادي .

وفي شمالك ؛ في شمالك نخيل بازخ ، يداعب الريح ..
بقول للبركل الشامخ كفاك تبريح ..
إت عارف كلامي ورايي بالتلميح ..
جيب رايا قديــــم ، بيهو بتفيد وتريح ..
قش دمع السواقي البي العذاب بتبيح ..
واطرى العضام .. تحتك تنين وتصيح .

أطرى السناجك ووقعة الخشخان ..
واطرى النحاس وكتين إزم بطران ..
ونادي أولاد جعل والينم ينم القرمان ..
والخيل عركسن واتروقن ريقان ..
وصقر الجو بحلق في السماء جيعان ..
يا الكدك بدور.. كبدة ، وكلى ، ومصران.

نادي المك نمر؛ نادي المك نمر، معلم أباة الضيم ..
شاي الباشا شي ، خلاي جناهو يتيم ..
ودفتردار بدك عند المتمة زميم ..
أرفع صوت ، لعل الناسي يبقى فهيم ..
أرفع صوت خلاص ، شرطنا شرب الهيم ..
وكاد عاقلنا يصبح .. من سكاته بهيم .

مر بالدامر البي ذكرو عز وجل ..
واتنوخ فســيح ، وادي المجاذيب طلة ..
شوف النارمتلعبه في المساجد ، ولا ..
مات نورالضيا ، وجات بعده نار الجلة ..
شوف المصحف ، الأربع قرون بدله ..
ماسك وردو.. أم سحرتو عين خلق الله .

حبابك عشرة يا بت مقرن النيلين ..
حبابك ياأم عجن ، بعد العديل والزين ..
حبابك يا المحكرة في المشاعر، والفؤاد ، والعين ..
حبابك يا المغسلة ، بي طهور مويتين ..
حباب أهلك بلاعبوا الموج ، مع البردين ..
حبابن كتفوا بوطليح ، علي اللضنين ..
حباب قصرك ضبح غردون من اللضنين ..
حباب الخندق .. العجن الجلود بالطين .
حباب المهدي فيك ، كبر حرارة ودين ..
حباب أسد العرين ، عبد الله ود تورشين ..
حباب النور، عقيد الخيل ، عقود الشين ..
عنقرة المعزة .. الأصلو ما بتلين .
حباب الزاكي أداب النقز في الحين ..
حباب ود النجومي القبرو في توشكين ..
حباب عثمان سواكن دقنه في الدورين ..
حباب يعقوب ؛ حباب يعقوب ، حباب محمود ، وشيخ الدين ..
سلام يا البقعة ، مبروكة الإله والدين ..
حباب الحرروك ، لا إنتماء لادين ..
حباب السودنوك ، خلوك سماره وزين ..
حباب الأزهري ، النكس ذرى العلمين ..
حباب الراية ، هفهافه وتكيل العين ..
قولوا معاي تبارك ، أقول دقر ياعين ..
وزغرتي ياام رشوم ، وقولي البطان وين وين ..
بركزلما سيطانم تبيد وتلين ..
ولما يشوفوا قطع إيدي بالسكين ..
ولما تقول حمامة ، كفاك .. دقرياعين .