أكون كضاب ...عبد العزيز العميري ...

هذه المساحة اليومية مخصصة للكلمة الرصينة والحرف البهي ...
وهى نافذه للإطلاع على كل ماتيسر من الشعر والبوح عودة طيبه بالقصيدة إلى موطنها الأول وجسرا" من المحبه والتواصل والإحترام ..

أكون كضاب ...

لو إترددت شان أستقبلك جواي!!

ولو قاومت حد السيف

بريقو بلخبط الهداي!!

صحيح قبلك شراع الدهشة ماصفق

ولا كان العلم وداي

دي حتى الأغنيات قبلك

حروف أبياته كانت ساي

بس الحاصل بدورك تسمعي شوية..

فترت من السواحل ديل

وغشوني المراكبية..

كنت بلملم الضحكات

وحاجز في البياض نية..

و لما غلبني ريح الليل

قلت براي اعود واهي.

غلبني أساوم الرجعه

وده ليل الغربه متناهي ..

فيهو الغربه...

...

قبلو الغربه...

بعدو الغربه...

و الأفق الرقد ساهي ..

أمد إيديا بس لي وين

أقاوم كيف زمن لاهي.

لا نفع التودد فيهو

لاجاياهو حنيه..

شتت أملي في الموجات

كسر في العشم جيه..

ده كلو من السواحل ديل

و من ظلم المعديه..

أنا البعت الفرح لليل

وغشوني المراكبيه..