اعملو ا ليكم ساتر

الغناء الهابط في السودان اصبح عادة مالوفة لكتير ولو جينا لتعريفه هوغناء دون المستوى الاجتماعي السوي، ولا يمكن ان نحكم عليه بمعايير الغناء الذي يتميز بأسلوب الوزن والقافية، ونقل الصورة الجمالية لعدم معرفة مؤلف معين للكلمات التي تردد فيه، هناك أبعاد اقتصادية واجتماعية أسهمت مساهمة إيجابية في ازدهار الغناء حتي وإن كان فيه خلل، والآن حدث العكس، فهناك دوافع مجتمعية أدت الى انتشار الغناء الهابط في المجتمعات المدنية ذلك على خلاف المجتمعات الريفية.التي مازالت متمسكة بغنائها الشعبي الموروث منذ مئات السنين
الذي شد انتباهي لهذا الموضوع سمعت اغنية يرددها نفر من الشباب بعنوان:
جا فيها الاتي:
قنبله : لطه سليمان
قنبله سماحه الزول في الطول والعلا
الايدين كلاشنكوف
والقوام يشهي الشوف
بعد هذه الاغنيه الهابطه جدا وبالصدفه برضوا سمعت الفنان شكر الله
يردد اغنيه ( مسدس) وهذه كلماتها

لو مصدقك الحدسك مصدق قول الناس اضربني بي مسدسك املاني انا رصاص
لو خنتك استاهل رصاص الطبنجه لو ما مته سيبني انا ما عايز انجه
لو غشيتك مره لي الله بترجي ابقي عبره للعشاق ابقي ليهم فرجه
املاني انا رصاص
الاغنيه الجايه حتكون دبابه.ولا شنو ......
يعني الواحد لو دايريسمع اغنيه الا يعمل ساترفاعملوا حسابكم من الجاي----

فعلا الواحد يعمل ليه ساتر ويملا اضنينوا قطن ويتوكل علي الله
اعجبني واضحكني تناولك لهذا الموضوع ويا محمد الناس كلها عاوزه تغني وبنشوف حاجات غريبة عجيبة والله ماعرفناه ده شنو ده غنا ولبكا ولمناحات والواحد قبل ما يخت رجله في الواطه كويس يطلعوا عشرين واحد يقلدوه وقنوات تبث كلام فارغ هارموني وزول شغلايين تدمير في الغناء السوداني واكتر شئ رافع ضغطي محاولات تصوير اغاني التراث الجميلة بطريقة رديئة جدا ويجب ان يوقفوا الناس ديل عند حدهم وده تراث بلد مش لعب .كل واحد لم ليه عشرين زول وشيلم عصي وسيوف وقال داير يصور ليه اغنية طبعا مع الملكية الفكرية دي مافي ليهم طريقة الا اغاني التراث ويجب ان تؤؤل ملكية هذه الاغنيات لوزارة الثقافة والاعلام او اذاعة امدرمان المهم يحموا هذه الاغنيات من الناس ديل وكلوا قردا يطلع جبلوا الغسال يرجع لغسيلوا والمكوجي يرجع لمكوتوا

قنبله سماحه الزول في الطول والعلا

قنبلة لما تطرشق وتريَحنا من هذا الغثاء . ليه نحن نعمل ساتر نحن زى نقوم نقبض عليهم ونوديهم الدروة ونخلص منهم .
رحمك الله يا أبا سامر لو كنت بيننا لأقمت مأتما على مشروعك الغنائي ....