مرارة الغربه

قصيدة لسان الحال للرائع جعفر السقيد فى حقيقة لما تعانيه الام والاولاد جراء هجرة الاب

لكاتما فى جواى كتير متملك الجوف والعصـب... وما كت دايرة أقولو ليـك لكن لسان الحال غلـب

ما بنسى يـوم ودعتـنا وسافـرت فى غـرة رجـب. خلـيت وراك الـدار حـزين يتباكـا والدمع انسكـب

أعذرنى والله العظيـم لو ما الضـرورة أنا ما كـتب. وأنا خايفـة فى بعـدك يكون الضاع هو ضعف المكتسـب

اليومـة داك ناس البلـــد هنونى شايقيــــــى وعرب. قالو لى مبروك خير وجاك يكتب سلامـتو الإغــترب

قالو لى دوب نجم السعد طلاكى من بعـــــد إحتجــب.. يا دوبا بالك يستريح وتنسى العــذابات والتعــــب

فضّلت أحسب فى الشهور قاعدالى فوق نيران لهــب.. صابرة وحريصة على العيال لا بيقو للريح فى المهـب

سديت خانتك مــن مشيت قايمـابو واجبــــى كأم وأب.والأســــرة يضنيها المسير .. وتتهاوى لو ما فيها رب

والله ما بنــــكر جميلك برضـــــــــو لينا ثناك وجب.. موكب هداياك ما انقطع .. كان سترة فى الزمـن الصعب

لابسين وماكلين والنعيم كايلنا فى يوم ما نضب ..وعايشين معيشــــــــــــة المترفين .. طولنا والطبع إتخرب

البيت مفرش بالحرير ومليانة إيدى بالدهب. لكن خسارة على محل .. عاش سيدو خمســــــــــة سنين عزب

الشى المهم ما قلتو ليك وليهو إنت ما ظنيت حسب.كبرو الصغيرونين خلاص .. خايفالم الطبــــــــــع الكعب

وصولوها مرحلة الخطر .. والأمن ما زال مستتب. وانا كتّ قادراهم زمان لكــن بعد كبــــــرو اتغلب

حصلنى قبل الجد يفوت .. دوبنهم فوق العتب. قبال نحصـــد الخير ندم .. ومابيجدى لو لمت وعتب

خايفالم الطيش فى الدروس .. ومابرضى لو واحد رسب.... خوفنى المتعبنى الكبيـــــــــر بعدين يمرقو بلا أدب

وريتك الحاصل على لا فيهو ثورة ولا غضب .شان الحديث مايبقى نى والواحــــــــــــــــــة يكتنفا الجدب

أنا قلبى مازال لسة حى .. ونجمو الملاهج ماغرب. وآخر كلامى ترد على لا أبقة بكـــــــــــــرة أنا السبب

رد لسان الحال
انا ما كنت داير الاغتراب .. لكنى مجبور ابتعدت
حسيت متل غمز الحراب .. وفى انة الصبر النكد
ارجع واقول انتى السبب
قلتيها لى ما بترضى بى عيشة وسط دايرها فوق عيشة رغد
قاريهو فى عيون الصغار .. طلباتم الما ليها حد
حسيتو فى عينك سوال احترت ما لا قليلو رد
نظراتك الحادة النبال .. سيطان بتلهب فى الجسد
وانا كنت صابر زى بلال كان ردى ليها احد احد
***
الكاتمو فى جواى كتير من حرقتو الجوف اتهرد
ماكنت قاصد اقولو ليك لكن لسان الحال سرد
ما بنسى يوم ودعتكم وبى حسرة غادرت البلد
ختيت على جرح الفؤاد .. فرق البنيات والولد
ما اعتدت افارق للصغار .. والوجعه فرق الفى المهد
زفر القليب اهات واحزان .. حسيتو جواى ارتعدات
كان انتى شوقك لى بحر .. كيفنى انا المكتول كمد
خليت لك الروح والقلب.. وسافرت بى باقى الجسد
عارفك حريصه على العيال .. فوقك بعد الله اعتمدت
فى الحارة تسوى ليك رجال .. للمايله والمحتاج سند
اتغشن القالن وراى .. هلن نجمات السعد
ما اتغربن وضاقن معاى .. مر عيشة الهم والنكد
لو عنى كررتى السؤال .. انا بينى وبين الفرحه سد
سهيت وغايتو على حال .. يعلمو الفرد الصمد
عزابى فى قاطوع صغير .. فى ضيقو زى ود الاحد
فى السوق صباحات الله خير .. حايم ازازى بلا غرض
الزى بيهو الليل يطول .. يتقلى فوق جمرو الوقد
اتوقعى البجى ليك يقول .. فى الغربه محبوبك فقد
البى ده ما بيغاباهو زول .. يحكيهو طرفى الما غمد
سنتين افتش فى كفيل .. لى حالى فد زول مانشد
فى التالته رب العزه قال .. حامدنو حلال العقد
مكتب ولا كان فى الخيال .. فى الفاره والدور قعدت
عربيه والراتب كبير .. ورابطلى خرزة من الحسد
بليت عروق قلبى المرير .. عزه ورفاهية وسعد
لكن يا حظى التعيس .. تميتلى شهرين واترفدت
قالو الوظيفه اتعممت .. محجوزة لاهل البلد
شوفى الضرائب فوقى كم .. كان جيت افكر فى البلد
وزى الكلام ده يزيدنى هم .. ويرفع لى افراز الغدد

قوليها لا تهابى الحروف .. كان فى غيابى الشوق برد
البى ده كلو من الظروف .. والله ما لى فيهو يد
اليبقى فى فرش الحرير .. ما خدنو من فك الاسد
بى ضحكة فى ابواب الجحيم .. لى دمعه اتبلابه خد
انا شان رضاك ارحل بعيد .. لى غربه لى دمعة وسهد
وانا فيها ساهى البال شريد .. افكارى فيكم وفى البلد

سامحينى لا تابعى الظنون .. ما زلنا بيناتنا الوعد
والغربة من اجلك تهون .. وطعم العذاب يصبح شهد

جوابك الظاهروا الوداد .. كاتباهو بى دمع الحرد
يجى ردو فى نفس المعاد .. نتلاقى طيارة الاحد

الكاتموه فى جواى كتير من حرقتو الجوف انهرد
ما كنت قاصد اقولو ليكى لكن لسان الحال سرد

وشكرا

ايا صفاء اخيتي مالك عليي

ليك التحية مروة(ويارب ماتشوفى غربة وفراق اهل

الجمره بتحرق الواطيها............. شكرا بتنا صفاء كمال