الترزي

كان نبي الله إدريس هو أول من خاط الثياب وكان يصنعها من نبات الكتان
وأول حداد كان نبي الله داوود عليه السلام فقد اختصه الله بقدرة عجيبة تجعل الحديد يلين في يديه فيشكله كما يشاء فيصنع منه الأسلحة والدروع
اذن الحياكة والحدادة مهن عظيمة امتهن بها الانبياء والمرسلين ولكن اهلنا البقارة لهم رأي اخر فهم يحتقرون هذه المهن الشريفة ومن الطريف انهم يسمون الترزي الجكاكي كلمة عجيبة وطريفة
وفي غرب السودان كذلك اهلنا ناس الغرب ينظرون للترزي الستاتي نظرة ريبة وشك فقد ذكر لي الاخ هشام ابوكشوة وهو رجل طريف وحكونجي قال لي في نيالا وهو من مواليد مدينة نيالا ونشأ وترعرع بها حكي لي قصة واحد مجذوب كان شغل الشاغل الترزية وخاصة الستاتية فكان يسبهم ويقول تزري ده مابخاف الله الله يلعني ترزي,ترزي بيعاني للنسوان,ترزي بياخودي مقاسات للنسوان,الله يلعني ترزي وهكذا هي نظرة ذلك المجذوب للترزي الستاتي الله يعين الترزية
اما قصتي انا مع الترزي الرجالي او ترزي الجلاليب فهي عجيبة سالت احد الاخوان من ترزي كويس فوصف لي ترزي في خميس مشيط ذهبت لذلك الترزي واخد المقاسات مني وقال لي تعالي لي بعد اسبوع المهم وتلاقي الجلاليب جاهزة وكان جاد جدا هذا الكلام مضي منه حتي الان قرابة الشهر وانا رايح جاي شنو يا اخونا لسع ما خلصته لا والله درسي قام علي والليل كلو مانمت عشان كده نمت بالنهار والساقية لسع مدورة ويظهر انو اخدنا معانا سواقينا حيثما حللنا.

اخونا الحيدر يديك العافية0والله موضوع جميل والحقيقة الترزى دائما برجعنا للزمن الجميل والطفولةالسعيدة وملابس العيد (جلابيه بيضاء------)والترزيه عندنا كانوا موسوعات ومحل ثقافة وتعلمنا منهم الكتير (ياحليل ناس عم احمد قمرالدين الرجل الرياضى*الدود* وودباسو *التحيه والاحترام لكل من ادخل السرور فى نفوسنا منهم وربنا يرحم من توفى منهم *** احسن زولك دا انا وقعت زمان فى واحد بنغالى عامل فيها معلم عمل لى شوال مش جلابيه0(غايتو بعد ده ممكن تصلى بيها العيد)تحياتى

ابوحسن لك التحية والمحبة وشكرا علي مرورك الجميل وانصحك لو عاوز جلابية امشي للمنير وهو عارف ليه واحد خطير والله الجلابية مسطرة وذكرتنا باحمد قمر الدين والدود ربنا يديهم العافية

مع خالص ودي لكمــا...

تحياتي حيدر ....وأنا اطالع موضوعك عادت بي الذاكرة وكنت حينها في اولى إبتدائي ..وفي تلك الفترة كانت بناطلين التيريفيرا طالعة موضة وألوان عجيبة خلاص شئ احمر وبممبي وأصفر ولبني .المهم في تلك الفترة كنا نقضي إجازة في أبوجبيهة وركبت ليك حكاية التيريفيرا دي في راسي وزنقت ليك العم عثمان إدريس" درجي" إلا يشتري لي بنطلون تيريفيرا المهم بعد لأي وجهد ونقة شديدة مني وافق وذهبنا إلى أحد الدكاكين لا أدري لمن المهم مجاور لدكان المرحوم خالد حنجاف وعلى ما أظن دكان عمنا عبدالرازق أبوعلي عليه الرحمة واخبر العم درجي الولد الذي يعمل في الدكان واظنه من اولاد رشاد وقال ليهو اقطع ليهو بنطلون تريفيرا وعزلت لون اخضر لون زينب.. شوف ليك بي جنس ذوق في الزمن الداك ..الولد البياع الله يطراهو بالخير قال لي إنت صغير نص متر بكفيك ..المهم شلت نص المتر وجري على الدود .عاين للقماش كدة وقال لي ده شنو يا زول نص متر والله دا إلا أفصلو ليك برجل واحدة..المهم في النهاية فصلوا لي رداء وإزداد حبي للبياع بتاع المحل وبقيت اشوفو ليك عشرة.. عشرة

اخوي الفاتح والاشرف وول نويه لك التحية والمحبة وشكرا علي مروركم الجميل
اشرف قلت لي بقيت تشوف الزول عشرة عشرة معاك حق من بنطلون الي رداء
ول نويه زولك مايطلع زي بنغالي ابوحسن المهم لو جيت الرياض معاك الحجل بالرجل للبطحة

اخي واللة رجعتونا لي ايام لها ايقاع ...ما تندهشو انا ما فصلت جلابية بيضة موكية ........بس اتزكرت العم محمد علي بشارة[الدبابة] الزحمة ايام العيد ودق العمود لي الجلايب ..نحن كنا بنودي وبنجيب الجلاليب منة الي الاخوات في الحي ربنا يديهن العافية وازا واحدة اتاخرت كانت الهرشة بجيك انت ..وغالبن ما كنت ببكي واحلف ما اودي ليهو اي جلاببة بس بعد التحانيس برجع تاني ....شقاوة طفولة ...ربنا يدك الصحة والعافية با عم الدبابة ....تسلمو

شكرا سهاد علي المرور الجميل وعمي محمد علي علم من اعلام الحباك ربنا يديه الصحةوالعافيه ويطول في عمره

أخواني الغاليين أبوعبدالله وول نوية وابني الفاتح محمد وكل الذين شاركو في موضوع الترزي ، طبعا أنا شخصيا كلمة ترزي تعني لي الكثير جدا والوالد رحمة الله عليه كان من ضمن العاملين بهذه المهنة العظيمة فلكن ياأبوعبدالله مش زي صاحبنا بتاع وجع الضرس الحاميهو النوم وحكايات الترزية كثيرة جدا فقبل فترة ليست بالقصيرة كنت واحد الاخوان من منطقة أبوحراز فجاب لي موضوع الترفيرا يااشرف فقال لي مشيت وأشتغلت في الحواشات جنس شغل يامعتصم وكان كل همي أن أحصل علي حق بنطلون الترفيرا فبعدما كملت المبلغ مشيت مدني مخصوص عشان أشتري القماش وبعدما أشتريتو جيت راكب ليك في البص والقماش ملفوف في ورقه ولسان حالي يقول للجميع في البص عمر ود عثمان اشتري ليهو بنطلون ترفيرا ( خلاص اليامشتري ليك برينسه ) المهم أخونا وصل الحلة وقال متين أتغدي وأودي البنطلون للترزي في الحلة ، صاحبنا مشي للترزي ويوصف في الفتحة كم سم والجيوب شكلها كيف ووا ووا الخ ... فالترزي قال ليهو خلاص بجيهو ليك تب وصاحبنا طبعا اتكبف جدا ففي العصرية راح التمرين فقال لي بعدما خلص التمرين جيت والشلة راجعين البيت فأسمع ليك صاحبنا يكورك لي ياودعثمان هوي ياود عثمان البتاع خالص .. البتاع خالص تجي تشيلو فقلت بسم الله الرحمن الرحيم متين كده فرحت لي عمك فطلع لي نفس ورقة الجريدة اللي جبتها من مدني ملفوفة وقال لي خد شوفو خلاص جاهز ، فأفتح ليك الورقة الملفوفة وألاقي عمك فصل لي البنطلون ( بلستك ) ولكن ماقصر تب عمل لي فتحات الرجول تحت واسعة فعاينت فيهو بي حرقه وزعل شديد ولكن ماقدرت اشتمو وقلت ليهو خلاص ياعم فلان خليهو معاك أنا مش عايزو خليتو ليك فقال لي من اليوم داك بقيت أشوف ليك عمك ده مش عشرة عشرة والله ميه ميه بعدين يا أبوعبدالله هناك ترزي جلاليب في الرياض - شارع الريل مشهور وممتاز جدا أسأل مجرب ( الرجوع للأخ عبدالباقي ابراهيم لمعرفة المكان )