الية العرض والطلب لا تعمل في سوق ابوجبيهه

عملت بالتجارة سنين كثيرة في سوق ابوجبيهه ولي معه ذكريات جميلة واليمة وهو سوق غريب وعجيب الاطوار ولا تحكمه اي اليه من الاليات التي تحكم الاسواق الاخري او حتي التي درسناها في علم الاقتصاد فهو نسيج نفسه وفيه عدد من الاخوة المرابين هدانا الله وهداهم
اول مادخلت السوق كان عن طريق كرتون المنقه اذكر اني ذهبت الي الخرطوم وعن طريق عمنا عثمان ابوكشوه زكاني الي اصحاب مصنع كرتون الخليج وهم ال شلقامي وتعرفت عليهم ورحبوا بي وبدات معهم التعامل وشحنت الكرتون وكان يسمي الكرتون الكويتي وهو افضل الانواع ذلك قبل ان امارس تجارته ولكن بعد ان اصبحت تاجر كرتون انقلبت الامور واصبح كرتون النيل الازرق هو المفضل لديهم طبعا من باب التبخيص وجلست شهور ابيع في الكرتون بالاجل حتي اتخلص منه وانتهي الامر الي ديون وخسارة وقفلت باب الكرتون وذهبت الي الخرطوم مرة اخري واخذت توكيل زيوت وشحوم من شركة تسمي elf وهي شركة كبيرة ولكن الاهل في ابوجبيهه قالوا ده زيت خفيف وبخرب ماكينات العربات وانتهي الامر البيع بالخسارة ذهبت مرة اخري الي الورق الذي يوضع فوق المنقة بعد تعبئتها في الكرتون وهنا حصلت طرفة حيث انني احضرت ورق الجرايد العربية لكن تجار المنقة من باب التبخيص قالوا ياخي كان تجيب لينا ورق الجرايد الانجليزية لانو احسن من ورقك ده يعني الفكرة السائدة في السوق عشان اشتري منك لازم ابخص بضاعتك واهريك واندمك علي اليوم الفكرته فيه بالتجارة
ذهبت مرة اخري واخذت توكيل من شركة تحسين للبذور والله نسيت اسمها واحضرت بذور محسنة للذرة والخضروات ولكن ضحك علي كثير من الاخوان وقالوا لي ياخي مين الحيشتري منك الحاجات دي وفعلا جلست تلك البضاعة شهور وشهور ولم تتصرف اخيرا ارجعتها الي اصحابها وجزاهم الله خيرا قبلوها
ياجماعة قصرت مع اهلي ناس ابوجبييه؟

السودان ياحيدر عموما لا يعترف بقوانين الإقتصاد والسوق وأسعار العملات والدهب .. خذ هذه الأمثلة

1/ الدولار يتدهور في كل بلاد العالم بينما يرتفع في السودان
2/ قال لي أحدهم اليوم من الخرطوم إن أسعارالدهب نازلة منذ رمضان ، أصبت بالصدمة والدهشة وقلت له ياأخي أنا مطلع على أسعار الدهب على مدار الساعة و online ودعني أقول لك انه وفي هذه اللحظة أن سعر أوقية الذهب هو 1061,39 $ وهو سعر لم يصله الذهب على الأطلاق منذ بدء الخليقة وأن سعر جرام الذهب عيار 24 pure gold هو ما يقارب 111 ريال سعودي ولقد ضحك عليك الجماعة وصرفوا ليك دهبك ب77 ريال ولعلمك أن الذهب منذ أكثر من شهر ونصف سعر الوقية فوق 1035 $.
3/ لا ترحب أي مجموعة بدخول أي فرد جديد وتستخدم سياسة الإغراق لطرده من السوق.
4/ تحقير البضاعة المعروضة لكسر أسعارها
5/ يعتمد السوق على إقتناص الفرصة لشراء البضاعة بأقل من تكلفتها
6/ عدم وجود المعلومة المهمة للبائع والمشتري عن قصد.
7/ إعدام البضاعة من السوق وتخرينها ومن ثم عرضها من خلال بائع وحيد

والقائمة تطول .. إنه سوق يعشق أهله الكذب والخيانه وأكل أموال الناس بينهم بالباطل.

اتفق معكم الاثنين السوق السوداني لاتحكمو اي قوانين اقتصاديه,يمكن اكبر عشوائية سوق في العالم في بلدنا,اكاد ان اجزم انه 75%او اكثر فيما يسمي برجال الاعمال هم من السماسره والجوكيه ودي هي اكبر عائق للسوق.

أسعار الذهب تواصل إرتفاعها بجنون
تجاوز سعر الأونصة من عيار 24 قيراط 4,050 ريال سعودي وهذا يعني أن عيار 21 المحبب للنساء تجاوز سعر جرامه ال 110ريالات وبشري للذين لديهم رصيد من المعدن الأصفر.

مواصلة لمتاهات اسواقنا وتحديدا هذه المرة من سوق ابوجهل بالابيض وصلنا صباحا علي ظهر لوريين محملتين بالدوم ووجدنا سوقا كاملا للدوم وسط سوق ابوجهل وعرضنا البضاعة لاحد التجار قال لينا عندكم شنو؟ قلنا ليهو عندنا دوم قال لينا: اي نوع من الدوم ؟عندها التفت كل منا للاخر متسائلين وهل للدوم انواع واصناف قال لينا طبعا شوفو وبدا يحدثنا عن انواع الدوم الجيد منها والردئ وهو يرفع بيده حبات من الدوم وواصل الرجل حديثه عن الدوم وسط ذهول مني ومن صاحبي الذي ورطني في هذه المصيبة وبدانا ندعو الله ان يكون دومنا من الصنف الجيد وننتصر علي هذا الرجل الذي بدا يقول شعرا في الدوم
وفي نهاية الحديث وصلنا لاتفاق ان ننزل شوال ونفتحه ونشوف هل دومنا من الصنف الجيد ام الردئ وفعلا انزلنا شوال وفتحناه وللاسف ظهر انو دومنا من الصنف الردئ علي حد قول المشتري وقال لينا الله معاكم يااخوان لانو دومكم ده دوم كعب والدوم السمح هو دوم كوجورية وهي منطقة قريبة من الدلنج وخرجنا من سوق ابوجهل ونحن نندب حظنا الذي رمانا في دوم الليري الكعب وسط جدل بيني وصاحبي كل منا يلوم الاخر انت ورطتني في المصيبة دي لا انت السبب في كل هذه البلاوي وسط هذا الجوء جاءتني فكرة ان اغادر الان وفورا الي ابوجبيهه وفعلا ذهبت للموقف واخذت لوري الي ابوجبيهه وتركت صاحبي مع الدوم الكعب .

صدق رسول الله الكريم . . صلي الله عليه وسلم حينما قال : شر البقاع الأسواق. في السودان لا تتاجر إلا مع من تعرفه وطلب منك السلعة ، أو أن تكون محتكرا وسيئ السمعة مثل صاحب دوم كوجورية وعساك تسلم .....

والله يا حيدرلو أعرف انك تاجرت فى الدوم كان هديتك لبروش أبجوقى وأنقر سنك لما كنت شغال مدرس فى كالوقى وتبيع لعبد الباقى فى سوق حلة شيخ هاشم لا أبجهل لا ود عكيفه ولا دوم والله كان كسبت دهب

اعتقد ان المنتجين والمزارعين والتجار محتاجين كورس بلغة بسيطة في علم التسويق وفي ادارة المنتج...الخ
ممكن الناس تشوف واحد من الطلاب الجامعيين او خريج يعد ورقة بالموضوع ويبسطه شويه ويلمو الناس في فصل و...
ولا رايكم شنو؟

لقد حاول الكثير يا دكتورة إحسان مقارعة هؤلاء الهوامير بتعيين وكلاء لهم عند مدن الإستهلاك فمنهم من أفُشل ومنهم من أفُسد. ولكن لربما تطير من العقال حمامة ويضئ في قلب الظلام شهاب.

أعتقد أن دومة ود خليل ذات الظل الظليل هي من النوع التقيل لكن ود خليل أنخدع بفهمو القليل عن علوم الدوم الأصيل وزاغ من صاحبو بالدرب الطويل .
مع تحياتي للأخ حيدر

أظنها دومة ود حامد الشهيرة.

اخى حيدر هذه اتكأة جديدة من الماضى كما سماها اخونا عثمان شاوش المختفى وماأحلى الذكريات حلوها ومرها اخونا ابو الزهور اضاف حقائق ووقائع..ولكن الأمر اخى حيدر حظوظ ..والظاهر رصيد حظك مدخر بس صدقنى اخى العزيز حيدر قد طالت السنيين بيننا ولكن ربما انت الآن فى قمة الثراء او فى الطريق إنشاء الله....لما تصل القمة عاوزين(( البياض))؟؟ قد ينقلب الأمر ويبتسم الحظ مثل قصة ثرى امريكى قراتها فى مجلة الكوثر ان رجلا ليس له دراية بالسوق اقحم نفسه بيد انك من اولاد السوق وودتجار فهذا الرجل يحكى سيرته مع السوق..مافيا السوق ارادوا ان يقصوه ويتسلوا به كما تتسلى القطة بضحيتها..فقالوا له اشحن كتب الإنجيل((المحرف)) لجنوب افريقيا وكانوا يدركون ان جنوب افريقيا بها مطابع للإنجيل(الحرف) تكفى العالم كله و توزع مجانا..بالفعل شحن كميات..وجد ان هناك طلب بسسب عطب ما فى المطابع وكثر المبشريين البيض فباع كتب الإنجيل باسعار خرافية..عندما علموا جماعة السوق جن جنونهم قالوا نضع له كمين محكم وهى القاضية..نصحوه بتصدير فحم حجرى لبريطانيا وجد ان هناك اضراب للعمال فى مناجم الفحم فى شتاء ذاك العام.. سلسلة طويلة واخيرا قالوا له بلح للعراق..وجد ان هناك آفة ببلح العراق..خلاصة القصة فى مثل ((قيراط حظ ولا قنطار شطارة))مثل مصرى.
اما اقتصادنا قائم على الإشــــــاعة..زى بوكـــــس موديل 1983م ..يلقبه بعض الجماعة ابوزيك..منهم اناس هاجروا للسعودية عشان يشتروا بوكسى ابوزيك..يقال ايام الصفوف امام السفارة السعودية للهجرة لو عمرة وزوغة..يقوم بتنظيم الصفوف بعض العساكر من نجمة الصباح بسياطهم ..احد الجمـــاعة وصل قرب الشباك نشـــــــأت فوضى قد تكون مفتعلة من البوليس المرتشى ..فهرب المسكين من جراء السياط التى انهمرت عليه..فكان معه ابن عمه لما راه هاربا قد له محفزا((فلان اطرى ابو زيك))يعنى استوحى شجاعتك وصبرك بإغتناءك بوكس موديل 1983م..وتحمل من اجله الضرب فإنه يستحق المهج والغالى..
والله اتذكر واحد عرض مبلغ خرافى على هيكل عظمى (لابو زيك )..اندهش الســـــــعودى متساءلا هل هناك سر فى هذا الموديل ...به زئبق احمر؟؟يعنى اقتصاد مبنى ليس على الدعاية بل عل الإشاعات وما اكبر الإشاعة حين تنتشر وتكبر تصير دانصورا او عنقاء تصدح..و حياتنا مبنية على الإنطباع الجماعى والسمعى قالوا..الركشة تتدخل قروش مطر كل الدنيا اشترت ركشة ؟؟امجاد كل العالم امجاد؟؟حافلة روزا؟؟كل القوم روزا..حتى المواسم تفشل بذاك السبب ..السنة الصمغ ..طار بالناس..الموسم التانى مافى زول ((بجنكب))عيش ..وبزرع حريق..النتيجة طار الذرة ونام الصمغ؟؟وآخر الأقاويل ذكر لى زميلى من المهتميين بالشمار الإقتصادى..الديانا..جامبو 10مسمار..تشيل بها بضاعة من الخرطوم الى نيالا ..ترجع محمل بالعسل والدخن لزوم((ابوجنكر))حيث تمازجت ثقافة المسميات فى سنة تصبح من المرفهيين...و اخر الاخبار تشيل معاك وانت نازل سيارة برادو..اذا ناس جنابو امين منقة الأنيق مشوها بجمارك مخفضة..كسبت دهب..السبب صارت موضة عند اعضاء الحزب الحاكم .. ضرورية زى شنطة تمكنا يوما.. (ما بلاش سياسة)..ودعاناكم الله..

والله يا عثمان يا ابن عمى انت رجل اسلوبك فى الكتابه خطير ومشوق
الفطاحله كترو فى المنتدى يا ابو الشوش
بالجد أثريت المنتدى يا ابو عفان

العزيز عثمان
إستمتعت بقصة صاحبنا بتاع الأناجيل والفحم والبلح وبالفعل عندما يأتيك الحظ أو يفتح عليك الرزاق الكريم .. ما في شي بوقّف حظك .. لكن هوامير السوق بدمروا كل طالب رزق حلال .. لكن ربك كبير

حقيقة ابن عمى ابراهيم عوض السيد..ماشاء الله انت كنار المنتدى المغرد ..فى كل دوحة ..بل فى كل فرع من المنتدى تعزف لحنا طروب اوخبرا سعيد اوطرفة تغتال حزن المهجريين..إن لم تكن هدهد سيدنا سليمان اذاغبت برهة اتيت لهم بدرة تثرى المنتدى..افتقدوك ((الربع))زى مابقولوا السعوديين..والله ياعوض فخر لى انت اخى الصغير..احبس دمعات اخاف عليها ان تسقط فى ارض سبخة يباب تضيع لانها غالية..وابو الزهور اعانك الله على المثابرة ..بين الاسرة والعمل وبين الاسرة الثانية المنتدى ((الدوام مجذر صباح ومساء كوصفة طبية دائمة لا بلغ المريض بها الشفاء ولا مل الطبيب من وصف الدواء))فانا مقصر حقيقة قياسا بإنتشاركم وخاصة الشباب ود المحلج وفيصل وحيدر وفضل واحسان وودنويه وود كمبال غريق ومداخلات عبدالرحمن وبقية العقد الفريد وكل الشباب يعذرونى اذا نسيت احد اما الشايب ابو عفان رقم(1)مختفى الظاهر مزنوق((زنقة الكديس فى بيت الحمام))والترزى يوم الوقفة..صراحةانا بتجول فى المنتدى ومانلحق..عموما انشاء الله اخوى عوض جهازك بلغ العافية..فى موضوع جانكرن ما قريت البوست..مامذكر عوض محمد حامد مكرفون صارع جانكرن؟.ودى لكم

صباح الخير اخي عثمان واشكرك كتير علي مداخلاتك الحلوه والله يبشرك ياعثمان وليك علي لو ضحكت لنا الدنيا حنتقاسمه معاك ففتي ففتي
وحقيقة زنقة الكديس في بيت الحمام اهون من زنقة الترزي يوم الوقفه وهنا ارجع الي الايام الجميلة والاعياد التي لا تنسي وانا منتظر جلابية العيد حتي الصباح وتخيل الترزي في دكانا وهو المرحوم ادم بيلو يعني مااعتقد انو تكون في زنقه اكتر من كده
شايفك بتسال عن الاخ عبدالرحمن فضل الله تيما اطمنك عنه الراجل معانا في ابها وهو بخير وصحة جيدة ومازال في مرحه ونكاتو الحلوه

صديقي عبدالرحمن تيمى موجود بالجنوب ومعي تلفونه.

لك ودى اخى حيدر واخى ابو الزهور المتفوق دوما بشهادة عوض السيد منقولا من زملاءكم ...يعنى نجر السبحة..زى مبقولو اهلنا ..وتضحك لك الدنيا إنشاء الله وكلنا وكل شباب ابوجبيهه ونخلى الحباك ترجع جنة..وذكرياتنا تظل تحفة ومتحف للاجيال ..وإلفتنا ومحبننا غنوة تهدهد الاطفال.. انتم فى ابها الجميلة..وعبدالرحمن تيمى..وكان يلقبه استاذنا حسن السيد يرحمه الله..بتيماء..بديار ليلى ..ليلى قيس..
وكان يقول :
حدثتمــانى ان تيماء منزل لليلى **حتى اذا ماالصيف القى المراسيا
فهذه شهر الصيف عنا قد إنقضت**فما للنوى ترمى بليلــى المراميا
يقول ابيات كثيرة هذا ماحفظناه ماشاء الله...منها:
ارانى اذا صليت يممت نحوها**بوجهى إن كان المصلى ورائيا
مابى إشراك ولكن حبها وعظم**الجوى اعيا الطبيب المداويا
وكان استاذنا حسن السيد غفر الله له..كل طالب له اسم..كان يسمى ازهرى دانكول بابى الأسود الدؤلى..حتى السوط الذى يجلد به له مسمى((عندو بسطونة))تسمى الحميراء..اذا مزاجهه رايق..اذا كان معكنن..قال هات الغراب..الغراب هذا عبارة عن سير مروحة..ربما اتى به من طاحونة السوق..ولكن..كان منظما ..وله علامات..فى الكراس..اذا وزعت كراسات الإملاء ..يقول اصطفوا ..هو حافظ كل صاحب كراسة كم عنده من عدد سياط((فكان علامة الزائد 3سوط والألف عشرة))اذا الكراسة بها اثنيين زائد فيعنى 6 يعرف بعض الغشاشيين عندما يقول عند تقول اقل يقول كذاب اشر..هل تصدقوا اخوى فالصححنى الزملاء هناك اعد لا يجلد..الخطأ فى الأخطاء التى لا تغتفر مثلا يوما جلد فى كلمة ذلك كتبتها ذالك اخذت علامة الف يعنى عشرة سوط..اذا واحد فرفر يقول هاتو الزبانية..هم الصف الأخير عتاه وطوال ..منهم الوسيلة..وحامد..وعبدالرحمن كاو..واخرون..لم تسعنى الذاكرة التى نحاول نرممها..عموما لكم الشكر اخوتى حيدر ..وازهرى العمدة الزعيم بس ابو الزهور قلت عندى تلفونه ..مامددت لى ارقامه..فإنى عاذرك..زحمة الثلاثى ..العمل+الاسرة+المنتدى...فلله دركم جميعا..ونسال الله ان يبلل قبر الاستاذ حسن السيد بالرحمة

نسأل الله الرحمة لأستاذنا حسن السيد البشير ............ شكرا أخي عثمان وهاتفي هو 05058046680 ولك مودتي .

كنت اعمل معلماً بمدرسة الجريف شرق المتوسطة .... اسكن بزوجتي وبناتي داخل المدرسة في منزل الحكومة ....بالجزء الشرقي ... وبالجزء الغربي يسكن زملائي المعلمين العذابه ... عند الإجازه سفرت اهلي ..ابوجبيهه ..وقلت ليهم انا عاوز استفيد من إجازة ال4 أشهر ... و(أتاجر ) ..سفرتهم ومعاي 50 جنيه ...وبدأت اتجول واتجول لكي اجد لي شغله بهذا المبلغ .. واخيراً دخلت سوق خضار الخرطوم العتيق ( قبل ما يفركشوه) ... ياربي اتاجر بالليمون ... سألت من وين بتجيبو الليمون ده ؟؟؟ قالوا لي من توتي أو بتري ...قلت ياولد لأ ... لقيت العجور ..نظرت ووقفت تحت شجرة نيم اراقب البيع ... والله حركة بيع ممتازه ... ياولد احسن ليك اقع العجور ... سألت من وين بتجيبوا العجور ده ؟؟ قالوا لي من بحري .. وبكم الشوال ؟ قالو لي ب45 جنيه وترحيله بجنيه ... لأ بالجد حلوة ...والخضار بيجي اي وقت ؟؟؟ قالوا لي بالعصر ... وقيلت في السوق قبلي وبالعصر على بحري .... ووجدت البكاسي محملة بالعجور ... والتجار يشترون بنهم ... وعلى طول إشتريت شوال ب 45 جنيه وحملته الخرطوم في بوكس ... ووضعته بكافتريا مطلة على ابو جنزير ... بعد الإستئذان على ان آخذه الصباح فجر ... وذهبت الجريف شرق وعدت مبكراً ... ووجدت عمال الكافتريا اكلو ربع الشوال .. وقلت خير وأخذته بحمال حتي السوق ...ولابس حلابيه بيضاء والعمة على الكتف ... ياولد إنت .... ولاحظت بفرشوا في نص الشوال من الخارج ... ووجدت مجموعة ... معظمهم من نيجيريا ... المهم فرشت بجوارهم ... وواقف ...واقف حتي الساعة 9ص ..لم يشتري احد مني ... ولا انسي الدنيا رمضان ...وهم فاطرييييييين ....وعند الساعة عشرة جات عربية الكشة ... ياساتر ... الناااس بتشيل وتجري ...ربك رب الخير خلفي واقف بوكسي كيف شلت هذا الشوال ووضعته بالبوكس حتي هذه اللحظة محتار ... المهم عربية الكشة كبيرة بحجم سيارات البلدية ... وواقفين تقريباً حتي الساعة 11ونصف ص ... ثم إنصرفوا ... وبدأنا في دا محلي ودا محلك ...وحكاية عجيبة ..وواحد نيجيري قال لي ده ...مهـــلي ...قلت ليه بلا مهـلي بلا الله اداني سمكة .... بلغتهم طبعاً ...المهم فرشت وجالس ...وفجأة اشوف احد تلامذتي ... وجد خجلت واديتو (ضهري ) وأدرت العمه على جزء من وجهي ... وبعد ما مشي ...قبلت علي بضاعتي .. والناااس بشتروا من كل الناس ما عدا انا ... سألت جاري ليه انا ما بشتروا مني ؟؟؟ قال لي إنت ما عارف ؟؟؟ قلت ليه لأ...قال لي إنت حاطط العجور الكبير كبير فوق ...ايواااه ..دخلت الكبير وطلعت العجور الرخص ... حتي تحركت ولحدي الساعة 3م بعت حوالي 12 جنيه ونص فقط .... وجد زهجت جنس زهج واحد ...الله يحرق ابوالعجور .... وعلي طول بديت انادي في الزمن الضايع وادي عجور بزياده ... بعت بهذه الطريقة بحوالي 4 جنيه ونص ...وصار كل المبلغ 17 جنيه تقريباً ... وحوالي الساعة 5م أخذت جزء من العجور في كيس ... وهديت الباقي لجاري ... وتوجهت نحو محل بيع الرووووب ... إشتريت روب ... وكوارع ... وخسارة ما بعدها خسارة .... وتوجهت بصات الجريف شرق ... وصلت ووقت شراب الماء قرب ... وتحركت بزملائي المعلمين المتبقين اللي ما مشوا إجازة ... توجهت بهم نحو منزلي ... وقطع ياسلطة روووب ... وظبطنا الكوارع على الناار ... وبسألوني بيقولوا لي الحاصل شنو الليلة ...وجبت العجور الكتير ده من وين ...؟؟؟!! المهم بعد ما عرفوا القصة ماتوا من الضحك ... قالوا لي يا بتاع العجور إنت ؟؟؟!! وقالوا لي لو قعدت لعبت معانا شطرنج ما كان احسن ليك وكان وفرت قروشك ؟؟؟ وصدقوني هذه الحكاية ظلت عالقة بذهني حتي تاريخ اليوم بس اوعه من تجارة الخضار وخاصة العجور ... واحسن ليكم وده كلااام إنسان مجرب ..... محبتي .....

والله ضحكتني يا عثمان ياخي في زول بتاجر بالعجور وفي الخرطوم كمان لا انت غلطان وتاني مرة ماتكرره
قلت لي قلبتوها صلطة روب

والله يا عثمان حكايتك حكايه ، ما خليت لينا دمعه كان ضحك كان بكا ... تقول ليّ عجور .. ذخيرتك من الحكاوي لن تنتهي أبدا ...

وين ابو عفان زغت من الإتكاءة..غطست ..وجتنا بالعجور..كان اخير ليك (تبش) اخوى عثمان.. حلوه العمة..خارجتك من تلميذك كان يسميك عثمان عجور ...اخونا عبدالرحمن فضل لله..تيماء بسلم عليك وعلى كل شباب المنتدى متصل عليه امس..مشكور اخونا ازهرى..منحنى رقم جواله..لك ودى ابوعفان