قصائد الشاعر الاشتاذ هاشم صديق

ست الشاي

الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن
-أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر
(بالعرقي) الداشر
والليل مصبوغ
بي رحية (المزة)
...
الرادي يكورك
وسط الحوش
-افغانستان
موت أفغان
-مستر بوش
وخواجة بيصرخ
وصوته مرخرخ
زي (حنكوش)
-القصف يدك
أركان (كابول)
...
ووالدة (صابر)
حاجة (بتول)
مشدوهة تقطع
عيش الفتة
تكب سرحانة
في موية الفول.
-يوماتي عشاهم

(فتة بوش)
والرادي يساسق
بين (بن لادن)
ومستر (بوش)
وصابر يطنطن
-الصاح مقلوع
السيف مرفوع
الكلمة غموض
والمغنى فروع
الدنيا خراب
والأقوى مهاب
والعدل رهاب
...
الليل مشروق
بي فتة فول
وصوت (الحاجة)
الوالدة (بتول)
يناغم صابر
-شنو الإرهاب؟
ويتمتم صابر

قلـ...قلتي
شنو؟
وترد (الحاجة)
-مالك مرعوب؟
تتلفت ليش؟!
تقول مـزرور
بي عسكر وديش؟!
سـألتك بس
شنو الإرهاب؟!
واتنحنح (صابر)
صنقع ودنقر
حك رويسو
اتمدد وصنقر
وقال للحاجة
-سؤالك يمة
جوابو كتاب
لكن....
لكن يا (حاجة)
زي ما تقولي
طلع ربّاط
في الليل
لي زول
بي سيف مسلول
وشال من جيبو
قروش العيش
وحق الفول
أو زول آمن
يقع في مكيدة
يموت مكتول
وزي تغيان
على الفقران
على المسكين
على الأعزل
على المشلول
...
وتتدقق
غبينة (الحاجة)
زي راجمة
وتصبح ناغمة
-وحسع نان
منو الرباط؟
امريكا؟
(بن لادن)؟
ولا الأفغان؟
من التغيان
منو المسكين؟
من المظلوم
(مستر بوش
ولا فلسطين؟
شنو الـ......
منو الـ....
...
ضحك (صابر)
وحك رويسو
واتنحنح
وقال للحاجة
-يمة اتعشي
أكلي البوش
لو عارف ردود
لي ديل
ما كان الرويس
مدووش
...
سكت صابر
رقد معبور
وصوت الرادي
لا في الدنيا
لسة بيدور
سرح صابر
ودمو يفور
نكش حزنو
وقال لي نفسو
من قلبو
أريت الدنيا
حسه تغور
...
سمع صوت أمو
تاني يلح
-دحين يا وليد
بدور أسأل؟
ويرد صابر وضيق العبرة
طعمو ملح
نعم يمة
قايلك نمتى
وترد الحاجة
أنوم كيفن
وصوت الرادي
في أضني
زي مكنة؟!
بدور أسأل
دحين أمريكا-
ما ياها
العذابا دنا؟؟!
...
ويرد صابر
وضحكو علا
-عذاب أمريكا
ولا هنا؟؟!
عذاب أمريكا
ولا أنا؟
ويصن لحظات
-دحين يمة
-ورمضان جاي
هم أمريكا
ولا اللقمة
والويكة الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر...
ترد الحاجة تفتش لكيس
تمباكا
في الكراب
نقول همين
عذاب وعذاب
تخت السفة
وتبرطم
-دحين يا وليد
ده مو الإرهاب؟!!
...
ويصن الليل
ورأس صابر
يدقدق ساي
يشرق جاي
يغرب جاي
- كراتشي
- أباتشي
- أنقرة
- عنقرة
- ربع الويكة
- صوت أمريكا
- جمرة خبيثة
- مكيدة دسيسة
- بي. بي . سي
- أي. أن. تي
- سي. أن. أن
- توني بلير
- كلام الطير
- خبر وحواشي
- إبراهومة
- أموكاشي...
ويقع صابر
في بير النوم
ويشوف روحو
بدل (أمجاد)
ركب بعشوم
وشاف الناس
توسوس ساي
خبر يا هناي
ست الشاي
أف. بي آي
وأحمد بيه
سي . أي. أيه
ووسط الموز
لقينا (كروز)
-برج كلتوم
ملان بحمام
وقع صاروخ
شق حشاهو
سكن جواهو
سوا حطام ويغوص صابر
غرق أكتر
في بير النوم ويشوف الحاجة
امو (بتول)
وسط الزحمة
رافعة أيدها
بي قندول
تكورك وتهتف
- لا أمريكا
- بل فتريته)
(أنحنا الساس)
رافعين رأس
ما ببنتراجع
ما بنتهان
ما بنخاف
الأمريكان
...
ويشوف صابر
بيوت الحلة
تتغامز
وتتريق
على الحاجة
وتتلامز
ووسط اللمة
صوت الحاجة
عالي فصيح
(تشيلو الريح)
...
صوت الرادي
مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم
الليل مفضوح
والنجم كتوم
الدينا تصن
لقيامة تقوم
صابر مجروح
في نومو
يئن
وفي الرادي تجن
بالتار
(بيق بن)
والنشرة تجيب
أخبار الشوم
كابوس صابر
قفة خضار
سوت جنحين
طارت لي فوق
والفاقة مطار
...
كابوس صابر
يعلم أيه والدنيا مصالح
وسي. آي. أيه
...
كابوس صابر
الناس بتوسوس
وتنضم ساس
ست الشاي
أف بي آي
...
كابوس صابر
الدنيا مغازي
يموت الحب
ترمي أخوك
في بطن الجب
وتترتر غادي
تناصر الغازي
...
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
...
كابوس صابر
الناس (بالقرجة)
تقيف للفرجة
تغير لونها
ميتين درجة
...
كابوس صابر
هم الويكة
والفتريتة
ونار أحزانو
ونار أمريكا
...
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
الرادي يلغلغ
وسط الحوش
بين (بن لادن)
و(عمر الملا)
ومستر بوش
- أفغانستان
- موت أفغان
- القايمة تطول
- عراق.. سوريا
- جنوب لبنان
- وما معروف
- تاني كمان!
تجي الحملة
عقاب جملة
(على الإرهاب)
...
على الإنسان؟!
القصف يدك
أركان كابول
ووالدة (صابر)
حاجة (بتول)
حلمانة تقطع
عيش الفتة
تكب سرحانة
في موية الفول
يوماتي عشاهم
فتة (بوش)
والرادي يساسق
بين (بن لادن)
ومستر (بوش)
...
صوت الرادي
مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
...
كابوس صابر
قفة خضار
سوت جنحين
طارت لي فوق
والدنيا مطار
...
كابوس صابر
صوت مبلوع
حق مقلوع
والموت بالجوع كابوس صابر
يعلم أيه
والدنيا مصالح
وسي. آي. أيه
...
كابوس صابر
الناس بتوسوس
وتنضم ساي
ست الشاي
أف. بي. آي

شمار سعدية بت جبريل
«شهادة بحث» في حمد النيل..تراجيكوميديا من ثلاثة فصول

شعر / هاشم صديق
«الفصل الأول»
- ناس البيت
هوووي يا ناس.
يا عشمانة.
يا إخلاص.
بنات كلتوم
يا فوزية
كيف حالكن
مشتااااقيين
سلاااام بالكوم
..........
جات سعدية
شايله شمار
معاهو «التُوم»
مشت شهرين
تَنَفِّس بتها
«الخمجانه»
في الخرتوم
........
تمام شهرين
بيوت الحله
لا سمعت خبار
لا شَمار
ولا قرقر ضحك
حلقوم.
ولا طقطق لبان
هيمان
في مُبْخر
بخور تيمان
ولا شالن حريم
فنجان
وسيرة زول
على قدوم.
لا ضحكو الصغار
في حجوة
لا سهروا الكبار
في حكوه
واتمحّن وطار
النوم.
......
نان سعدية
بت جبريل
كان عارفين؟!
رويحة الحِلة
والطلّة.
لا قِدْمت
ولا هِمْلت
لا مسخت
لخلق الله
لا عِرْفَت
بيوت الحله
ليها متيل.
.....
كان غابت
تقول نامت
عيون القمره
أو ترتر
وفات النيل.
.......
هي المشاطه
والحنانه
والدلاّكه
والدبّاره
والشمشاره
والسمساره.
والطهاره
بي موسا
ما خلت
في هذا الشان
لِبت في الحله
شي مطلوق.
......
هي الجهّازه
للعرسان
ما بتقعد عروس
في حُفره
لو سعدية
ما وقدت
طلح دخان.
هي ديمه الراس.
القيدومه.
دق الريحه.
ست الشوره
والطايوق.
مرسال النَقَص
للسوق
عَرَق الهِمّه
للحبان
خبيرة الخُمره
بي ميزان
لو شم العريس
عوسا
تسيل دمعاتو
ويتجرّس
تقول ولّع
عديل بمبان.
........
كان دقّت
إيدين سعديه
في التعليمه
دلوكه
تلاقي النخله
تِتْفَنّس
وعودها يميل
تبوس سعفاتا
موج النيل.
وكان شالن
بنات الحله
غنوه معاها
تِتْقَطّع عديل
قمصان
ويتكشّف
ضهر شبان
يولول في الجلود
السوط
يرْكز في البُطان
عاشق
تزغرد ليهو
زولتو السمحه
«ست الفوت»
يفور عِشقو
ويقول
- يا سوط
اريدك موت
تهز فوقو الايدين
طايرات
تولع نار
في وسط الدار
تَجِن زغرودة
من سعدية
ويتلهلب
غنا البنوت.
........
- ناس البيت
هوووي يا ناس.
يا عشمانه
يا فوزيه
يا إخلاص
بنات كلتوم
كيف حالكن
مشتااااقين
سلاااام بالكوم
...
إنفتحن
عيون البيت
وانجدعن
ايدين الاوضه
والراكوبه
واتسرّح
شَعَر لالوبه
رجعت شابه
فاتا الشيب.
وركّت رشّه
فوق صفقات
شديرة الحنه
واتمسّح
غَباش الصنّه
واتجمّع
حمام الحله
واتراصص
تقول «قرقول»
صَدَح «قوقايو»
بي تهذيب
.....
- جات سعديه
- جات سعديه
.....
جَرَت عشمانه
لي سعديه
حفيانه
وجات إخلاص
تَنَقِّز
زي وليد الريل
وطربانه.
ضحك قرقار
ودمع الشوق
نزل سرسار
وصار شَهَقى
السلام
دوبيت
...
- جات سعديه
- جات سعديه
....
سباليق البيوت
رفعت عديل
تعظيمها
بالترتيب.
وشوفو الشامه
بت كلتوم
وكت سمعت
سلام سعديه
- بالدهشه-
قدّ الإبره
اتغاتت
واتسمّر رويس
الخيت
وإتنخَجَت
تقول راجياله
بس هبشه
....
ومن بين إيدين
فوزيه بت كلتوم
وبالهجمه
كمان طارت
عديل كمشه.
ونُص السهله
«بت الريله»
إتنفَضَت
واتْنَفَشَت
وجات زغروده
إنبهلت
إتْقَسّم
ضِليل شَدَره
واتبسَّم
خشيم مُفراكه
في حَلة مُلاح
خُدْره
واتشرشر
في نُص الطوه
واتْطاير
حنين الزيت.
.....
- جات سعديه
- جات سعديه
...
اتعنكش
في عود سعديه
كل الناس.
الشُفَع
حريم البيت
الجيران
تقول نخله
سبايط خيرها
إتدْلّت
وتِقلو خلاص.
وهاك يا سلام
وهاك يا شوق
وهاك يا كلام
إتجمّع
في رمش العين
هوى الأرحام
واتجدّع
وطال الضُل
فَرش لي بِرشو
لي قِدّام
واتردّت
رويحة البيت
قلع توب زهجو
بالايدين
...
اتْفَرشت
في غمضة عين
عناقريب الأهل
صفين
وكم سجاده
كم بنبر.
ومن مبخر
مستّف
بي بخور تيمان
طلع صَفّق
سحاب دخان
واتحكّر
في نص تربيزه
جك ليمون
مندِّي قزازو
زي حتّل
دموع مكنون.
ووسط الرجّه
والضحكه
إتماسك تمام
الكون
صِبِح موزون.
....
جات قُراصه
بي دمعه
واتراجف
صحن لقمه
وكت دلقن
إيدين نعمه
عليهو ملاح
نعيميه
واترصت
صحون الفول
تقول لمه
وبالفرحه
ضحك سرويس
وكت رَدَمَن
إيدين الشامه
بت كلتوم
تلات مرات
تل من نارو
طعميه
...
وهاك يا ونسه
يا قرقار
ويا سعديه
ست القعده
إنفتحي
تقول رادي
وهاك يا نشرة
الشهرين
من الخرتوم
جِنس أخبار؟!
تُوم وشمار
حتى الضُل
وقف شمشار
....
صواني تفوت
صواني تجي
قصص بالكوم
ضحك وحكي
ويا سعديه
ما خلت
نَفَس يتشال
ولا إيداً
تحك الراس
جِنِس قصصاً
تجيب هلواس
....
راس البيت
وقف مشطوب.
في عين النخله
كان الزير
خروف دبدوب
وبالهجمه
إنزلقن
من الايدين
كبابي الشوب
واتلخبط
حمار مربوط
نهق في الخُلعه
بالمقلوب.
صهل
ضحك الحريم
كورس
وكت فرقع
تقول في الحته
نُص القصه
كان مكتوب.
.....
يا سعديه
هاك الرص
وراهو الرص
وتتجادع
حريم البيت
سؤال وسؤال
تقول دوبيت
....
- سجم خشمي
مسك إيدينها
جوه البص؟!
...
- أجي يا يمه؟!
كمان قلعن
عديل التوب؟!
....
- سجم أُماتن
الخايبات
شن راجيات؟!
...
- أخير واحسن
يقولن روووب
.....
- قلتي شنو؟!
واحدات شربن
عديل الـ......
شنو؟!
الشيشه
ولاّ حشيش؟!!
....
- سجم أمي
يا سعديه
قلتي الشي الورا
داك
سموهو برضو
شنو؟
الدِش؟!
...
يا سعديه
بت جبريل
تقول حاوي
اتحكرتي
شلتي الجو
حريم البيت
بضحكه طويله
سَوّن شوووو
وكت سعديه
إتفَنَست
وقالت
- أيّا
اسمو الدِش
وحاة الله
شفت بنيّه
نُص السوق
وبالفستان
تَقَلِّب ليها
في دِشّاً
تقول عتالي
شايل ليهو
قنطار عيش
جوه الخيش
...
ويا سعديه
بت جبريل
وكت كِتْر
الطَعِن في الضُل
إتعدلت
في نص الداره
زي ملْكه
وخَشّت توووش
عديل في الفيل
....
- هي يا يمه
نان ما نسيت
أقول ليكن
حكاية الزاكي
ود قنديل
- الزاكي منو؟
- ود قنديل
جار التوم
- التوم
راجل بتك
«الخمجانه»
في الخرتوم؟
- أيّا
...
وانعصرن
حريم البيت
على سعديه
جايى شمار
كبار مردوم
معاهو التُوم
وشِيهن رارا
للاخبار
...
يا سعديه
خُشي عديل
طَعِن في الفيل
....
- هو زول سمسار
قروشو كُتار
وخالو وزير
- سمسار سوق
ولاّ بيوت؟!
- في شيتاً
ما بسمسر فيهو
ود قنديل؟!
من الخرفان
لحدي الخُرده
والعربية والتلاجه
والدكان.
سواقي
لواري
طيارات.
بيوت للبيع
بيوت تأجير
حصين
وحمير
كمان أكشاك
تجارْة الشنطة
والتمباك.
جزم
قمصان
ورق
أقلام
كمان دخان.
....
وكت دقّت سديرها
الشامه
بت كلتوم
كمان
كل الحريم تبعوها
في ذا الشان
....
- سجم خشمي
سجم خشمي
وا خجيلتي
وا خجيلتي
يا نسوان
- كمان دخان؟!
....
سعديه غمزت
ليها
غمزه طَرَف
وزي حاوي
وبي حركة صوابْع
الإيد
سوّت ليها
ورقة لف
ومطّت للحروف
تبيان
- دخاااااان
ما دخااااان
فهمتن حسه
يا نسوان؟!
- سجم خشمي
حتى البنقو
باعو كمان؟!
- أصُبْرَن
أصُبْرَن
وقالوا الساترو
وساندو
خالو وفاهمو.
وسمعت شمار
قالوا استوردو
البمبان
.....
الشامة شهقت
وصوتها عشرق
والريله نَفّت
دموعها سالت
وفوزيه قَحّت.
عشمانة عطست.
....
وسعديه ضحكت
- سجمكن
مالكن حسه
يا نسوان؟!
شان قلت بس
بمبان؟!!
....
- وخالو وزير
- أيّا
مكنكش
في الكراسي عديل
لا شالوهو
في تعديل
لا نقلوهو
بره سفير.
ولو ساط البلد
بي حالها
ما سألوهو
من تفسير
- مساخْر الدنيا
في ناس ديل
- ناس مدفوره
يوت لي فوق
وناس بنيانها
درب السيل.
....
ويا سعديه
زيدي شمار
لسه الرادي
فيهو خبار
....
- أها اتذكرت
حاجة كمان
والله لو حجُّونا
ما بتدخل
عَقُل وأضان
...
اتفتحت
عيون شباك
وصَنُّو اتصّنتُو
البيبان
واتمدّت
إضين نسوان
ويا سعديه
اتشمرتي
واتحكرتي
واتمهلتي
واتوكلتي بالرحمن
شمارا الجاي
صنفو تقيل
عديل يكسر
رقيبة الفيل.
...
- قالو الزاكي
خَشّ عديل
يسمسر
في مقابْر البكري
وأحمد شرفي
وحمد النيل
...
في تربيزه
نص القعده
منّ الخلعه
انكسرت كبابي
الشُوب
وطارت ليك
صواني الشاي
وقعت رُب.
....
- عشان الموت
صبح بالكوم
وموت الجُمله
صار معلوم
ناس الزاكي
شان ما يبقوا
يوم في لوم
قالوا الناس
تقدم لي قَبُر
بدري
وما تْسهِّى
ويشيلك نوم
تخُت دمغات
في طلب التُربه
تدفع للحجز
ورسوم
ويدوك....
ويدوك....
شن سموها يا سعديه
بت جبريل
شن سموها يا سعديه
بت جبريل....
أيّا
«شهادة بحث»
مكان عايز.
تُرب فاروق
ود البكري
أحمد شرفي
حمد النيل
....
إنْقَلَدن
حريم البيت
وانفقعن
دموع وعويل
...
صوت النخله
بالمليان
زِعِل كورك
- يا نسوان
بدل تبكن
على الخرتوم
بدل تبكن
على امدرمان
أخير تبكن
على السوداااان
«و...تتوالى الفصول»
الفصل الثاني قريباً
شمار سعدية بت جبريل
«كضبة ناس.. في شهر ابريل»[center]

شعر / هاشم صديق

لماذا؟.. وكيف؟

أَصْبَحتْ
أسماءُ الموتى
تكتبُ على (سبورة)
القبور
أرقاماً عربية.


أصبح الثلجُ
-في وطني-
مِدفعاً
تُطلقُ زخاتُه
على تظاهرات
المواقد
صبحاً وعشية.


صار خفقُ الوهمِ
شعراً
يدفع الشعراءَ للابتذالِ
على شفاه المغنينَ
بؤساً
من فتات الأرزقية.


وصار نحرُ الورد
مثل ذل اليد
على باب المساجد
.. مرجعية.


يا ظلي صديقي
كرهتُ حمى الوقارِ
فقد أرهقتني
وعذبتني
سهامُ العصورِ
الدنيئة.


مزقني
لجامُ لساني
يكبلُ انفجاري
ويكبحُ انفلات
الحروف البذيئة.


لماذا عليَّ
أن أكون
-بحجة أني نجم-
رصيفاً للافتعال
وللعيون مطية..؟


وكيف عليَّ
-لأني شاعر-
أن أقول شعراً
رقيقاً
في زقاق (العصبجية).
وأن تُحاكم
خطواتي بسن الحذاء
وبصق العنجهية..؟

لماذا يكرهون
وميض غضبي
وجنوني
والليلُ قد يضاءُ
من سراج المدفعية..؟


وكيف يتطفلُ
حزني على انبهاري
وتُحصي الصراصيرُ
أنفاسي
ويزلقني
قشرُ موز يأسي
على زناد البندقية..؟


لماذا لا أكون
نفسي
بحجة أنِّي
من أمهر الحواة
عليَّ أن أُخرج
من قعر رأسي
ملفاً رهيباً
بطول الجروح
وعرض المنية..؟


وكيف لا أستطيع
أن أتحسس أعضائي
إن عضني
نملٌ خبيثٌ
وأنا أتحدث
-في ندوة-
عن عذاب الجماهير
وحجم القضية..؟

لماذا يبعدونني
للفراغ المقيت
كلما صرت قريباً
من باب حلمي
ويضعون على رأسي
قبعةً أجنبية..؟
تدحرجتُ كثيراً
-بقضاء (زيوس) –(1)
من صهوة الفجر
إلى رماد العشية..؟
كلما أوشكتُ
أن أغرس
حد حزني
على ذروة (الأوراس)
وأمهر صدقي
على سطور الرياح
أسقطوني من فوق
خيل وهمي
وأرهبوني
باتهام النرجسية
رغم أن ذرةَ كِبْرى
هي بؤسي
وإن كان حزني
أغلبية.

كيف يريدون مني
أن أكون (قيساً)
مرةً واحدةً
في حياتي
وعلى بستان
خفقي
مليون ليلى عامرية؟
تفتح النساءُ
-خلسةً-
غُرف قلبي
بمفتاح الموسيقى
ثم يرسمن
على الجدران
جرحي المكرر
مثل جرح الطائفية.
.........
لم أرفع
-في حياتي-
رايةً بيضاء
لآخر جرحٍ
لأني أعلمُ
أن لا زال في العمر

(ليلى عامرية).

لماذا يحسدونني
على هذا البعير
وسيفٍ صغير
وخبزٍ قديم
و(بُقة) ماء
في شفاه (الزمزمية)..؟


وكيف عليَّ
أن لا أقول
إني سيف وحيد
ومن حولي
أشرع الحداد
(كير) انتظاره
(لكوتة) من سيوف
وطنية...؟

أخرج من جُب
عزلتي في كل مرة
أهتف
من أجل هَمٍ جماعي
فيشد أزري
الفراغُ العريض
وانتحارُ الهموم
الأبجدية.
أكتب الشعر
على جلد الأفاعي
وأعتلي
-رغم كهولة صبري-
منصاتٍ عصية.

أبحثُ عن جمرة
تعانق لهبي
فأرى حيناً
انتصابات موسمية
أو شقشقاتٍ
على درب السلامة
وخوف القيامة
وبيع القضية.
أو أسمع شعراً
يحث الجماهير
على انفعالها
بلغات أمهرية.
لكل (كوم) بلاغة
لكل حزب شفاعة
لكل انسحابٍ
قناعة
لكل سقوطٍ
(بتاعة)
ولكل انكسارٍ
ثرثراتٌ منطقية.


تموت الجسور
بسم الصقور
ويصبح النهر
عارياً
مثل فخذ العنترية
ويعود قوم
ذاك النبي

لاغتصاب الضيوف
في ثياب (عولمية).


كيف انفلت
النخلُ من شط
نهره
وحط رحله
وسط سوق
النخاسة؟
ولماذا
كلما أسرف الماءُ
في طهرِهِ
أسرف الحوت
في ابتداع النجاسة
والتهام السلام
و(صير) السرية..؟

(أنحرثُ البحر)؟
قد سمئنا
كل أمثال الرواة
وكل عورات الحواة
وانشطار المذهبية.
ليس (شارون) وحده
يحرث حلم المطار
على أرض (غزة)
يزرع عاراً
يحرق نخلة
ويمحو الهوية.
ففي كل الديار
(شارون) آخر
يحرث حلماً
يهتك طفلة
يشنق وردة
يلسع نحلة
يحرق فجراً
بنار سخية.

لماذا كلما كتبتُ
حرفاً
صادروا أقلامي
ومزقوا كلامي
وركلوا مزماري
لأرض قصية.

كيف أنا ممنوعٌ
مثل قندول الحشيش
وقناني الخمور
وأقراص (الهلاويس)
واقتناء البندقية؟
ومن يحول بيني
وبرق وطني
ورعد الأماني
سوى
أبناء الأفاعي
وأحقاد خصية..؟


صارت الأوراقُ
جبلاً
في مخازن بيتي
وهم يشكون
لطوب الوزارة
نُدرة الأوراق
والفنون الفتية
.....
ليس شارون
وحده
يصادر أوراق
الهوية
ويحرث بالصواريخ
مطار غزة
فبين (غزة)
و(عزة)
جروح المودة
ونار القضية.

لماذا

يرسلون خلفي
شرنقات (الصحافة)
وملوك السخافة
ليسبُّوا كتابي
ويسرقوا عذابي؟
كلُ قلمٍ رخيص
يأخذ من لحمي
برقاً وقطعة
وكل جرذٍ خصي
(يخربشُ) ظهري
ويصير قُطة.
هم يدفعون
لأرقام عدم
ثمن البذاءة
(شيك) الألم
وقرش الأذية.
....
ليس شارون
وحده
صعلوكاً وفاجر
وباغيةً وعاهر
إذ

ليس هناك
في (سوق الهوى)
-من حدود الأرض
حتى المشترى-
من لا يُباع ويشترى
فالعهرُ أصبح
مرجعية.
......
كيف عليَّ
أن أكون
لأني شاعر
أن أقول شعراً
رقيقاً
في زقاق (العصبجية)
وأن تحاكم خطواتي
بسن الحذاء
وبصق العنجهية؟
ولماذا يكرهون
وميض غضبي
وجنوني
والليلُ قد يضاءُ
من سِراج المدفعية..؟
......
لماذا عليّ
أن لا أكون
بذيئاً
وهذا زمان (العنترية)؟
وكيف عليَّ
أن أكون
جرحاً خجولاً
وأن أكون مسكيناً
ومطية..؟


لماذا لا أبصق
من نافذة سجني
على وجه
حارسي
وأغتال نقطة
ضعفي
خوف تُهم
النرجسية.
......
لماذا...؟!
وكيف...؟!
لماذا...؟!
وكيف...؟!
....
لماذا عليّ
أن لا اتلو
في وجه
ابناء الافاعي
سطور دفاعي
- قلم واحد
جرحٌ واحد
صوتٌ واحد
رجلٌ واحد
نعم.
عودي مصادم
وفجريّ قادم
نعم
ولكني لم اقُل
أنيّ سرية
ذرة ِكبْرى
هي بؤسي
وإن كان حزني
اغلبية.

*من مجموعة(على باب الخروج) الشعرية

-------------------------------------------------------------
يا اخوانا نزار مشي وين؟يا الخوجلاب عموم افتونا.