فيصل حتيلة ... عودة الروح

نعم فيصل ظهر متصفحا وفى كل مره أحاول الاتصال به وكذا بالأخ حيدر بعد اتصالى الأول للعزاء الا أننى أجد نفسى غير متماسك فأصرف النظر.
حتما سأزور أخى فيصل عند وصولى السودان باذن الله

سلامات ازهرى ول ابا نوبيه عزيزى ابوابراهيم و اخى الفاتح.

نحن نحتاجكم كثيرا ايها الاخوة و بالطبع لا نستطيع ان نواصل الغيابات.

**********************

في هذي المدينة الفاضلة

لبس الشعراء تيجان غار وهجوا

مع النشيد .. والبوح وغنوا للغربة المتلتة

في الزمن المكان الروح

وما بين الرماد والنار

فضا الكلمات ومعناهم

بيمرقوا من هطيل النوح ومغناهم

يشقشق للحياة والموت

يغرد للمدائن الفاضلة جواهم

جزاير دوح

قدر يوتوبي

ترحل في مداين الناس ... مدينة

يندلق حسك حداهم

قطرة قطرة تعبي صوتك بي نداهم

مشدود وتر صوتك ربابة

مسنود عليك صوت الغلابة

مفرود من الزمن المفتق والمرتق بالرتابة

مولود مع الجدة المعتقة والمجرتقة بالرحابة

ينسدل من شدوه انشاد المزامير

ينسمع في شجوه ترتيل الصحابة

زمن يوتوبي ترحل في العتامير والمغاسل

والغنى المندلي من شطر السحابة

من عنا الأطفال وأولاد المسادير

السنينهم فوق جوازات العصافير

الحنينهم بحة الليل الطنابير

الحزينهم حزنه في الجوف المطامير

نبله يطلع زي شعاع

لا ولولة لا شيل ندابة
***
(يامطر عز الحريق)

(كمّل الناقص وفرضو)

(يامشاوير الطريق)

شوفي لي قرنك وأرضو

يا بلد ليلك غريق

طولو زي طولك .. وعرضو

إن ضلامك حر طليق

أو سلامك أهلو قِرضو

آه من هذا السليق

يشتري الراجل وعرضو

الفرج باقيلي ضيق

والصحاح العندي مرضو

كم إديريجاً حليق

شان يعيش بي دقنو برضو

يا مدد قشة غريق

(يامشاوير الطريق)

(ياوليدات الفريق)

لملموا الصابرين تعالوا

(رقصوا البنوت أعرضوا)

***
يا نخلة الحباك ظلالك

واصلة الشموس بي حريرة

ومجدولة من طيب شمالك

مروية عز الجزيرة

من همي همك سمالك

كسر همومي الجبيرة

لحن الوليد الرمالك

مشرق يجبر كسيرة

طينك مقالد رمالك

تحتك مياهك خريرة

شعرك جريدك حلالك نمة غُناه الضريرة

غنوة بتقرب منالك

رعشة جروفي الخضيرة

غنوة حبيباً شكالك

هجر البنية الأميرة

عند الترابلة القبالك

ضليلة صهد الهجيرة

يا نخلة الحباك جمالك

في الناس غناوي المسيرة

لوجيدك الفارع بكالك

موّال دموعي العسيرة

أو نيلك السالك أمالك

جيهة المشاوير الحسيرة

أو قبلك المفجوع دنالك

روح الأناشيد المنيرة

شيليلي عِب وأمليلي شالك

من غناويهُ السميرة

شدي من صوتك حبالك

نشفي العرق الدميرة

قولي للجنيات سوالك

يا نخلة بس متكية مالك؟

بطنة سبايطك عضيرة؟

جدلة سبايبك ممالك

محصورة في فد ضفيرة؟

ولا السلام البدالك

سراب الأماني الكبيرة؟

لو صبري بيهدم جبالك

شن تبقى غير عيني الهميرة؟
***
قدر يوتوبي ترحل ياصديق

زمن يوتوبي ترحل في البريق

والمدينة الفاضلة نامت في العتامة

والعتامة تهاتي بالشعر الهيافة

والشعر متغطي بالكلمة السلامة

والسلام متداري في الولد الشليق

والوليد مندسّي في الحرف القيافة

والحروف الوردة تحلم بالرحيق

والحلم يتجاوز المعنى الرهافة

والمعاني تعاند الزمن الرحيل

والزمن يوتوبي يرحل في السحيق

والرحيل يوتوبي

ترحل ياصديق؟

الرحيل الشفتو للناس العلامة

الرحيل الشفتو للمتلك قيامة