(كديس)

هو صديقي المحبوب علي ابو زيد اخو عبد اللطيف ابو زيد رئيس النادي الاهلي بالحبَاك.جاءت تسميته نحن تيمي وعلي وعبد الكريم القديل.شركاء في الهمِ. جيبنا واحد حتى المدمساية بنقسمها مع بعض.ذات يو م خرجنا من المدرسة ونحن في المتوسط ولمَا قاربنا النيمة مقابل بيت ناس عثمان شاويش.اقترح لناان نعمل ثلاثي نغنِي مع بعض حتى يذيع صيطنا في الحبَاك.قاطعه القديل وهو يضحك وانا استغربت!يا علي انت مسطول ولا راميك جمل.سمعنا بثنائي النغم وثنائي الجيل وثنائي العاصمة وثنائي الجزيرة.كيف بالله يكون ثلاثي انت مجنون ضحكنا وودَعنا بعض.عند العصر قابلت القديل جاي يدقِق العيش في طاحونة ود الخليفة.قاطعني عبد الكريم ماتأخرني ود الخليفة هسَ بقفِل والدقيق دا مهم لغذاء بكرة انتظرته حتى فرغ واخذ الجردل وبه الدقيق وبينما نحن في طريقنا:سألته(يافوب ريل )وفوب ريل هذه سأله استاذ حسن ذات مرَة عن شهر ابريل فيه كم يوم وما أدري السنة كبيسة ام بسيطة .فمن شدَة ماهو خايف قال افندي فوبريل فيه على ما اعتقد 28 يوما استاذ حسن جنَ جنونه واغتاظ منه قال ليه اطلع برَه جاي فنادى فينا ياولد :آتيني بالحميراء والحميراء (عصا)اختار لها هذا الاسم لتكون شيئا ملازما له داخل الفصل فضرب بها عبدالكريم ضرب غرائب الابل.فمن هنا جاءت التسمية (فوبريل).المهم واصلنا الطريق وسألته عن اقتراح علي االقبيل :قال لي ياتيمي انت مجنون ثلاثي ايه.تحاورنا مليَا في هذا الموضوع بس المشكلة كيف نتحصل على الرق لنغنِي به .ذهبنا الى نجَار يدعى (حمدت الله) فكانت نجارته تحت شجرة ذات الوان صفراء جميلة وزاهية الوحيدة في ابو جبيهه قلنا ليه ياعم:عاوزين نعمل رق .قال:انا مافاضي.الراجل كان شالح مزاج معكَر اتخارجنا طوالي لكن علي تاخر شوية وحك راسه.وقال:لقيتها ماعليكم منو نمشي نجيب لينا غربال دقيق ونفك السلك منه ونجلِدو.صحنا فيه .اممممممممممممك عبدالكريم مات من الضحك قل لي ياتيمي:انا ماقلت ليك ده مسطول ابن كلب فرحنا ووجدنا ضالَتنا في الغربال لتتمَ الفكرة كيف يكون رقاً.وجاء دور تيمي.الصمغ والورق هما الحل طيران .جريت الى دكَان العم (مصطفى الشفيع )وفانامي في غفلة مشغول مع الباعة وأسرق كعكول صمغ من الشوال واحضره .تمَ تحليل الصمغ بالنار ومع الورق جلَدنا الرق اتحلت المشكلة.اصبح لدينا رقًا من هو الفنان؟ عشان نعمل بروفا فكان عبدالكريم فوبريل صاحب الصوت الرخيم هو الفنَان تيمي المذيع المقدم.بدأت الدندنة وشدا عبد الكريم :طير ياحمام بي فوق ...ودِي السلام بالذوق.وقد الرق لانه من ورق.ياجماعة ده كلام شنو.فاجأنا ابو زيد بالمثير الخطر وده البسأل عنه (nashi).قال علي :جلد الكديس هو الحل وبدأنا نطارد الكدايس في الكوش لنصطادها للحصول على جلد.الكدايس بدات تهابنا لأنو معنا النبلة.المهم في الأمر فشلنا فشلا ذريعا في ان نصطاد كديس واحد.عبدالكريم قال:ياتيمي ماعندك مخ ؟ تتبع علي ده زول مسطول انسى.المهم الثلاثي المرح طرشق.لكن الترشيحات الاولية .سعدالدين للبنقز والشيخ (كرنكة)من ضمن الكورس.فازوا.انا كنت في غاية الزعل فقلت له:حقو يسموك كديسة فوجه اليَ لكمة في وجهي حجزونا الجماعة عاودنا النقاش ثانية فقام عبدالكريم بظرفه المعهود انت انَثت الراجل ياخي افضل تسمِه كديس.وتيمي لا يخلو من ذكاء قلت ليه(كديس ابودرقات)فبدت اسارير وجهه تتفتح وضحك علي.ياكديس انا عارف نقطة ضعفك وعارف كديستك لمَا تكون مبسوط معانا(ميه الميه) تكون هي هادئة ولطيفة.وعندما تبوِز وتنفخ شدوقق الشينات ديل تكون هي اي الكديسة غغير آبهه في ان تكشر انيابها ومخالبها للخدش.قال:علي وبصوت عالي .العن ابووووووووووووك انت السنة دي بتجي الاول على الدفعة.ود الكلب ياتيمي استاهل انا البمشي معاك.وعبدالكريم انفقع بالضحك .
شوفوا ياجماعة الزمن دوار وصاحبي علي ولج طريقا آخر الناس ببقوا ضبَاط بوليس وضبَاط جيش وضبَاط اداريين امَا علي انتهى به المطاف ضابطا للصيد.والتفسير الوحيد لذلك انه من زمان مولع بالكدايس وما عارف اصطاد كم حتى الان لكن اوعدكم واطمئن الجمهور في الحبَاك سأبحث عنه مهما كلَفني واينما كان لاجعل منه كديسا فتيا قادر على تسلٌق الحيط.ويربأ بنفسه ان يداني الكوش خشية ان يصطاد او تقتاده ايدي آثمة الى مجاهل مظلمة يسجن فيها فيموت جوعا
(ياغائب عن عيني ...مع انك في بالي ياكديس)
(عبدالرحمن:تيمي)





>

اخى ودفعتى..عبدالرحمن فضل الله ..لقد كنت انيقا حتى منديلك لا يفارق اللياقة حتى لا تتسخ اللياقة صاحب نكتة ..خير وصف قلته وقاله كديس على ابوزيد صاحب كديسة كنت جريئا وصريحا وشفافا ..اخى هذه الذكريات الجميلة الثمينة ملكنا وغالية كحلى العذارى ولكن نهديها الى ابناءنا بكل ارايحية وطيب خاطر..كنتم خير ثلاثى كنت تستلم الاثنيين حتى مفترق الطريق نيمة ناس عثمان جاويش طبعا سعدالدين اخوه الاصغر كان دفعة ..عند النيمة يستلم ابوزيد عبد الكريم ((فوبريل).كان يختصر الكلمة بفوب..حتى لا يفهمها الاخرون ..تجده يشطاط غضبا ويشبع ابو زيد ضربا ولكما حقيقة ضرب وبعد خمس دقائق تجد الجميع ماتوا من ضحك ..كما ذكر عوض السيد كنت وسطهم هادئا ولكن الذاكرة تسجل والاستغراق فى ذاك الجو كان يثملنى لدرجة السكون..ابوزيد كان متمكن فى اللغة العربية ومجود للقرآن قليل مايخطأ فى وقت التلاوة..صوته مشروع لفنان ولكن عدم قدرتهم على صيد كديسة ضيع الحكاية..عبدالكريم كان لا يتكلم فى المدرسة على ابو زيد وتيمى يخرجان شخصيته المرحة من صياصيها فينقلب لشخص اخر مرحا ومشاغبا..كرنكة كان ذكاءا مظلوما كان شقيقه كرنكة الكبير من نوابغ السودان مرة اتانا بصورة اخيه مع متفوقى العالم..وكان كرنكة الصغير كثيرا ما سرق لنا كتب تعجبنا منظرها ونتشوق للوصول لمراقى كرنكة الكبير..اخى تيمى سوف يحفل هذا البوست بالكثير وخاصة اول دفعتنا ابراهيم اليريميس ..نهديه لجيل ابنائنا..عمكم عثمان موسى ود موسى آدم الممرض بالحلة البيضاء وقتها ثم حي المصالح.. لله دركم جميعا

المهم شوفوا ضابط الصيد بتاعكم ده جيبوا لينا كديسة نعمل ليكم من جلده رق ... بدل رق الورق بتاع تيمي ... تحياتي

الله يجازي محنك ياتيمي رجعتنا لزمن بعيد كان الاحبة فيهو كتر ومايعدي يوم الا وهناك طرفة وياحليل زمن المذاكرة الليلية وحمودي والرتينة وعبدالمنعم ضو البيت ورويبة وعبدالرحمن سليمان ياتيمي ووين ( أوري ) ويا أبوعفان وينك أنت والظاهر المنطقة الشرقية أخدتكم خالص مننا وشفت تيمي ده كيفن بنكت ليهو في جنس حفر ومن هنا التحية لكل لأساتذة ولكل زملاء الدراسة