الدلوكة

يا جماعة طبعا زمان الحفلات في أبوجبيهة كانت بالدلوكة
سباتا وبروش البنات على الأرض النسوان الكبار والعجايز في العناقريب خلف الكواليس ن الإضاءة لمبات (فانوس عادي) ثم تطورت للرتينة يعني كان حتت الشاشة ولا الجاز كمل الله معاكم حفلة وإنتهت والله الا تصحوا عمك (لم تسعفني الذاكرة بإسمه بس كان عندو كنتين جوار بيت ناس حواره)او طبلية ضامن وخضر، المهم تبدأ الحفلة الفنانة الخالة رقية الضبابية تخصص دلوكة أوكلتوم العميانة 0 دور دور محمد القصاري سواق العربية ن وطبعا محمد ده هومحمد ياسين مدرع شقيق المرحوم علي ياسين لنه كان من السائقين القلائل في البلد ، بعد داك الحفلة تسخن وهجيج شديد 0 ياحاجه قصري الجبون دة ياحاجة لا اله الاالله ـــ ومامني حبيبي ما مني من العجوز أمي العكرت دمي ,جر الطوق حبيبي جر الطوق البسي الميني جوب حبيبي جر التوب كل هذه الأغنيات الجميلة والجماعة آخر توستي وكاروشة ثم تمرحل للجيركي وأسالوا ناس الشاويش والروك وطبعا الشارلستون الفتحة نص متر من تفصيل الدود أو عبد الباقي سحنون وكذلك أخونا أبكر باسو بس ده تخصص ستاتي يقص ليك دهباية الفتحة للنهاية ، طبعا بعد داك ياجماعة جاءت رقصة المنديل تقوم واحده من البنات وتلقي المنديل على واحد من الشباب ويقوم يرقص معها وأكيد أي واحد عاوز يكون في الصف القدام عشان يعزلو بعد ذلك تطور الوضع شوية طبعا بقى في فنانين أمثال قدوره والماحي وعوض عبد الرزاق وغيرهم ثم جاء عهد الجالوة ودقل أبوشريط ( صاحب الأستديو )ففي هذه الحقبة كانت الحفلات بالمسجلات إستريو سماعتين وشريط وربه شديدة ففي احدى المرات الحفلة مدورة والمسجل باظ فتمت الإستعانة بمسل من أحد الإخوة وكان أسطى بلي وأثناء الحفلة والرقيص فاذا بالأسطي بلي يفاجئ الجماعة يا جماعة هوي شيلو حجاركم وأدونا رادينا فاستغرب الجماعة لهذا التصرف ولكن أخيرا اتضح انو فاصلين أو ثلاثة ومافي بنت عزلتو عشان يرقص معاها عشان كده أخونا زعل وعاوز يفرتق الحفلة .

كانت أحلي أيام لمن الناس تنتظر أختنا كلتوم ( العميانة ) حتي تاتي لإحياء الحفل ، والناس كانت تستمتع بصوتها الشجي ، والغالية أختنا الضبابية كانت ترقص بأبدع مايكون وهي كانت سيدة الساحة ـ والناس تتعامل بكل عفوية وذوق ، والشايب الذي بحوش البقر إسمو أبقد ... والله ياسيف رجعتنا ورا بعيد ... وزكرتني الراقص رحال بسفنجته المشهورة وجد كانت أيام جميلة ولي معك عودة ... محبتي .

ابو اسراء/لك الود
والله ايام الحفلات ديك كانت اجمل الايام واحلى من حفلات الزمن دا(ولعبةالمنديل على فكرة كانت ياجماعة الخير تخصص اخونا حيدر خليل )وكنتوا مرضانين حفلات انت ومولانا حيدر(صاح)

غنى وشكريهو الليلة يا سلكوكة
وجرى النم عليه كدى خنّقى الدلوكة
إنت يا الأصم
يا المابحرشوكا
يا ضريب يومين تنزل فوق عدوكا .... وبّرد دار ابوه

الشايب هذا إسمه الحقيقى عبد الله وإسم أب قد كما أذكر وإن لم تخنى الذاكرة لحفرة فى رأسه وحسب إفادة الأخ بشير قبل أكثر من أربعين سنة هى آثار طلق نارى رغم شكى فى مصداقية بشير ذلك الوقت وهو نفس الوقت الذى أطار فيه صواب حمار عبدالرازق فقضى عليه ، ولولا إفادة ود الشاويش التى أكدت أن الحمار المذكور أسلم الروح بعد وجبة عيش دسمة لم تستحملها ولم تجترها إمعائه لكان منتهى علمنا أن الحمار مات مخلوعا والله أعلم.
وممول السيد أبو قد هو الأخ حسن غربال ، ولا أدرى ما العائد المادى المجزى الذى دفع بغربال وما أدراك ما غربال أيام الصبا وبليهنية العيش آنذاك أن يستثمر حفنة من الدراهم فى ذاك الزمان والمكان ؟ كان إضافة إلى الحلاوة والسجائر الذى يبيعه حلاوة يصنعها هو بنفسه وكان الود بيننا كبير ، تجدنى دائما حيث المصلحة الشخصية .... شكرا سيف وعثمان وأنتم توقظون تلك الذكريات البهيجة.

تحياتي اخي سيف لسردك الرائع لهذه الذكريات الجميلة ، ولكن فاتك ان تشير إلي أشهر فناني تلك الفترة ألا وهو "سكسبلى" وآلته الموسيقية العجيبة ذات الوتر الواحد.

لكم جميعا التحية وسيف رجعنا فعلا للزمن الجميل مع انو خرج قليلا عن السياق ولكن ماشي وهنا اذكر انو كنا في حفلة في حي الانجل وطبعا شباب واذا ببنت تتجه نحونا بخطي ثابتة وواثقة من نفسها وعندما اقتربت توجهت نحو اخونا محمد سعيد واذا باخونا يكب الزوغة وينحاش وتتعقبه البنت ولكن دون جدوي وهي تحمل منديل وما كان من اخوكم فارس الحوبه الا ان يتحمل مسؤلياته ويرقص مع الاخت وينقذ الموقف

خلاص يا المنقذ العام ، تصورت محمد سعيد كابى الزوغة ... أظنه إلى الآن جاريا يلهث. ونسى أشرف أن يقول أن مدير أعماله هو أخونا الجوكر عبد الباسط محجوب أسأله الله له العافيه والمعافاة ، لقد كان عبدالباسط زينة الشباب فى بواكير الصبا ليته أعاد لنا ذلك الزمن الجميل ، وعاد له صفاءه وسالف أيامه وظنى فى الله كبير فالبذرة الطيبة حتما لا تأتى إلا بكل طيب.
كان عبدالباسط يسألنى بجدية عن رأيي فى سكسيبلى وأن هذا الرجل يمكن أن يكون له شأو فى الغناء إن أراد ذلك .. آه منك يا زمان النزوح.

لم تنج اليوم من مقص الرقيب ..... معذرة ولك العتبى حتى ترضى ... ويكفى أنك حركت عصب سكون العشاق أمثال حيدر والشايب عثمان.

أبوفراس ليك التحية والتقدير وكل الأخوان الذين تداخلو ، بس كنت عايز أضيف حاجة بصيته ألا وهي بالأضافة للفنات البارعات الراائعات في ذاك الزمان فكانت حبوبتنا ( سواكن ) بدلوكتها وصوتها الحماسي البيخلي أخونا ( الزين سيس والضوء والشفيع محمد الحسن وعمنا عمر السيد وجماعة كتار فى الزمن داك) يعرضوا عرضا يقول لي ناس الشارلستونات ( ده حق الرجال وبس) لأنو كان هناك رأيا للكثير من شياب البلد في موضوع البناطلين خليك من لبس الشارلستون والعرف السائد أنو الحفلة لازم تنتهي بشكلة قوية ، أما عن عمك عبدالله (أب قد ) فكما ذكر ليك أخونا الكبير أبو الزهور فكانت لينا معاهو طرائف كثيرة جدا ففي كل مرة تلقاهو يطردنا ليك من طبليتو فيالها من أيام ومراسيل خريف بعد المغرب ضفاضع تكورك ومجاري عربات مليانة موية وتلاقي الناس ماشة جنب الصرفان ماسكة فى الغزازات وهنا وهنااااااك نور بطارية وياحليلك يازمن

أخونا / أبو محمد الرجل الهمام ؛؛؛؛؛ لك التحية ولأفراد أسرتك الكرام وكل ناس السلطنة
طبعا انت دائما إضافاتك رائعة لأنك إنسان ضليع ومواكب وأكيد ليك صولات وجولات في تلك الحقبة وقد كنت أحد اعمدتها الأساسية ( يا هيثم كما يقول أخونا جعفر كمبال ( الناظر) دائما ويا جماعة الزول ده وين ؟ جعفر ده سوف يكون إضافة حقيقية لهذا المنتدى لأنه عاصر كل الأجيال وعندو حاجات حلوة جدا لازم يجئ

الناظر جعفر بخير قابلتة فى فبراير الماضى شبه مستقر بكادقلى وحملّنى بالمناسبة تحياته لكم وهو مسئول عن الإستثمار فى الولاية وطلب منى وقصّرت فى المهمة أن أبلغ الجميع بأنه حاضر لسماعكم ومساعدتكم فى الإستثمار فى الولاية ومن هنا أعتذر لكم جميعا ولكم الآن رجل فى الولاية يسره ويسعده مساعدتكم .... سلام أخى جعفر وليتك تلتحق بالركب.

شكرا أبو الزهور
دائما حاضر وملبي لكل الطلبات متعك الله بالصحة والعافية وتعجبني جاهزيتك وردودك السريعة الشافية
لك كل الود والإحترام