ضيف الأسبوع .. طارق كمبال

بسم الله الرحمن الرحيم
أحبتى الكرام أحباب منتدانا العامر......لكم التحيه والاحترام.
أحييكم وأطل عليكم من جديد بضيف جديد عبر نافذة ضيف الأسبوع.
ضيفنا هذه المرهغاب عنّا كثيرا واشتقنا له شوقا جزيلا.....فضلنا استضافته ومحاورته عشان على الأقل(نبل الشوق).
رحبوا معى بالعزيز النضيف/طارق كمبال.
الى الحوار:--------------------------------

1- الاسم بالكامل:-
2-الحاله الاجتماعيه:-
3-المراحل الدراسيه:-
4-العمل:-
5-الاقامه الحاليه:-
6-أرقام للتواصل:-


*** باختصار***
*(سكيت الدهب).....(لقيت القروش)....وبعت أحبابك فى المنتدى أكثر من نصف سنه........(الكلام دا صحى؟)
*العرس(متين؟)......والعروس (من وين؟)
*يا طارق حتى بعد ما جيت من الدهب نشاطك فى المنتدى مش ولابد(ليش؟)


***فى سطور***
*موقف طريف.......(ياريت يكون من موقع الدهب)
*شخصيه فى الذاكره.
*جيت لقيت المنتدى كيف؟


***رياضه***
*الهلال والصفاقسى.......هل تذكرنا باحترافية الهلال الذى ظل فى الاونه الأخيره يهوى الخروج من دورى الأربعه فى البطولات الافريقيه؟
هل تذكرنا بسيناريو الدرس البليغ الذى قدّمه فرسان مازيمبى الكنغولى فى نفس المرحله العام الماضى؟ أهل مكه أدرى بشعابها


***شوية سياسه***
*سمعنا أن الحركه الشعبيه نشرت حشودا عسكريه حوالى بعض قرى أولاد حميد.
هل يمكن أن يؤدى هذا الى اغواء بعض الأهالى للانضمام الى الحركه الشعبيه ربما على الأقل لحماية مصالحهم.


*** كلمه أخيره ***

طارق الروح أهلا

في إنتظارك

مرحب بالحبيب طارق في الكرسي الساخن بارد ؛وبرضو ياعوض السيد اخينا ذواق للفن الاصيل ممكن تخليني اقول ليهو (فنان او فنانة مفضلة )عشان في العرس نجبيو(ه)ليهو ؛هاك ياود لندن دا
فاهلاً بيك يامرح

هسه كان حايم فى المنتدى لكن شايفو كبه الزوغه(سيك سيك معلق فيك يا ابن عمى)
طبعا يا ول نويه اتصلت عليهو امبارح عشان أهيئوا لهذه الاستضافه لقيتو فى البنك بيورد فى ملايين الدهب(هاك الكشكوش دا).....الأدّاك بالكوريك يا ابن عمى يدينا بالملعقه.(أفتح القزاز دا)ما تعمل فيها ما شايفنا

مرحب بيك اخونا طارق في انتظارك وما تنسانا من الدهب انشاالله خوتيم..

الف مرحب بالاخ طارق يلا خلينا نعرفك اكتر واكتر.

بسم الله الرحمن الرحيم
الاهل الكرام احباب المنتدى العامر
السلام عليكم جميعا ورحمته تعالى وبركاته
الحبيب ابو ابراهيم
والله انا اسعد ما اكون ان يقدمني شخص مثلك لاحباب ابوجبيهة عبر برنامجنا ضيف الاسبوع

1- الاسم بالكامل:-
طارق كمبال ادم غريق
2-الحاله الاجتماعيه:-
فرح يا فرح يا العزابة.
3-المراحل الدراسيه:-
طبعا في الباديا ما عندنا روضة يعني من الفريق للمدرسة على طول
مدرسة ابو نوارة الابتدائية ثم دبيبة جمعة ثم ابو جبيهة الجنوبية ثم ابو جبيهة الثانوية السنة الاولى ثم الكلاكلة الوحدة الصف الثاني والثالث جامعة النيلين كلية التجارة والدراسات الاقتصادية والاجتماعية قسم علم الاجتماع بكلاريوس علم اجتماع وانثرو بولوجيا
4-العمل:-
موظف ب شركة رصائف للتجارة والاستثمار
5-الاقامه الحاليه:-
الخرطوم جبرة مدينة طه الماحي جوار حديقة الدوحة
6-أرقام للتواصل:-
00249912375182ـــ001249122552550


*** باختصار***
*(سكيت الدهب).....(لقيت القروش)....وبعت أحبابك فى المنتدى أكثر من نصف سنه........(الكلام دا صحى؟)

يا الدهب النفيس الباهي لونك وغالي
شارد فكري فوقك وفيك سارح بالي
جيتك والعشم فوقك تتم امالي
يا خي اديني منك بالحجار وتسالي
لم ولن يكون الدهب بديلا عندي لاحباب المنتدى اصلا ولكن هي سنة الحياة نفترق كي نشتاق لبعضنا ثم نلتقي ونحن كثر ودا وحبا

*العرس(متين؟)......والعروس (من وين؟)

العرس سيكون انشاء الله سادس ايام عيد الاضحى
والعروس من مدني.

*يا طارق حتى بعد ما جيت من الدهب نشاطك فى المنتدى مش ولابد(ليش؟)

اما نشاطي في المنتدي والله لم يشغلني شاغل غير القراءة لما فاتني من ما خطته اقلامكم في المنتدى


***فى سطور***
*موقف طريف.......(ياريت يكون من موقع الدهب)
الذهب سرعان ما يفرق بين الناس بين عشية او ضحاها
كان معنا عامل يلغب ب ابو شرمة نسبة لسقوط اسنانه العليا من فمه وفجأة فتح الله علية بي بئر درت عليه مالا انطبق عليه القول سبحانه من يحي العظام وهي رميم. ما بين غمدة عين وانتباهتها اصبح من الاعيان والاسرياء الجدد والناس كلها بقت تنظر له بعين الرضى ومن يومها اصبح ينادى بي ابو فليجة بدلا من ابو شرمة

*شخصيه فى الذاكره.
المرحوم هيثم هاشم عثمان تعلمنا منه انصاف الاخر حتى لو كان خصمك واسالكم جميعا ان تدعو له ب الرحمة والمغفرة

*جيت لقيت المنتدى كيف؟
والله المنتدى ادهشني بعضويته الجديده ماشاء الله وقد حوى افزاز و الذي اسعدني اكثر الروح السمحة بين اعضائة والله الحمد


***رياضه***
*الهلال والصفاقسى.......هل تذكرنا باحترافية الهلال الذى ظل فى الاونه الأخيره يهوى الخروج من دورى الأربعه فى البطولات الافريقيه؟
هاهاهاهاهاهاهاهاهاهاي انت يا ابن عمي بتقصد المريخ والصفاقص قبل عامين
في الحقيقة انا كنت غائب عن احداث الملاعب الفترة الماضية والله لا استطيع الخوض في موضوع وانا به جاهل فأعذرني

هل تذكرنا بسيناريو الدرس البليغ الذى قدّمه فرسان مازيمبى الكنغولى فى نفس المرحله العام الماضى؟ أهل مكه أدرى بشعابها

الحبيب ابو ابراهيم ده الكلام البجنن بوبي
لا استطيع ان انكر ما وقع على الهلال من مازمبي حقيقة كانت صدمة عنيفة جدا كون الهلال يدفن في مقبرة خمس مرات لكن استطاعت جماهيره القوية ان تثبت للعالم انها متماسكة والهلال سينتصر على مازمبي في يوم من الايام واستطاع الهلال تحقيق ذلك ورصع جماعة بي تلاتة بره الحدودفي نفس الموسم
مع اكيد حبي


***شوية سياسه***
*سمعنا أن الحركه الشعبيه نشرت حشودا عسكريه حوالى بعض قرى أولاد حميد.
هل يمكن أن يؤدى هذا الى اغواء بعض الأهالى للانضمام الى الحركه الشعبيه ربما على الأقل لحماية مصالحهم.

صحيح ان الحركة بدات مشروع معسكرات تسليح لبعض الافراد من اولاد حميد وكنانه والنوبة والغرض واضح ليس ل اغواء الاهالي للنضمام للحركة بل هو تسليح افراد ضد افراد الدفاع الشعبي المعروف وهذا ان لم يضع له حد من قبل الحكومة سيقود الى مواجة بين اليمين واليسار وستكون حرب بالوكالة عن طرفي الصراع والله المستعان


*** كلمه أخيره ***
كل الحب والود لاهلي واحبابي في احباب الحباك ونساله سبحانه ان يجعلنا اخوة فيه التقينا فيه وافترقنا عليه
كما اشكر الاستاذ الجليل ابو ابراهيم على اتحاته لنا هذه الفرصة الثمينة
فلكم مني الف شكر وتقدير والسلام عليكم ورحمة الله وبركاته

شكرا طارق على هذه الاستجابه السريعه وهذا عشمنا فيك
بس ول نوي طرح عليك سؤال ما رديت عليه.
شيل شيلتك مع ابوعلياء شايف مداخلتو تأخرت ربما بحثا عن أعيره ثقيله(الله يستر)

شكراً ياحبيب علي علي التجاوب الجميل كنت ضيفا خفيف الظل علينا -وليه مشيت لمدني ماكنت في ابوجبيهة؟ دا كلام داير ليهو قعده وليه مارديت علي سؤالي
دمت بكل الود

يا ابن عمي الله يخت محنك بنك شنو الانا فيه والكشكوش ما هناك في السلطنة والمملك

ول نوية سؤالك عن الفنان انت عارفو ومافي غيرو الله يرحمة ابراهيم عوض وبيتنا نور

ابنت عمي دولة خاتمك وغويشات دكتورة احسان ماناسينهن بس الدهب لسع خام ما صنعناهو اصبرو لي شوية
بت اخوي الباش مهندز مروة ربنا يحفظك انت عندك حلق برضو اصبري شوية
الحبي العمدة ذكرتنا باغرودة حمد الريح ياليت قلبي كان سهلا
وانا بفتش لابو علياء عشان نهديه لحن من لندن
لكم حبي جميعا ايها الرائعون

شكرآ كتير طارق دمت ودام الاخاء والتواصل بين اهلك في الحباك.وربنا يتم علي خير وعقبال كل الشباب..

شكرا يا ابنت عمي دلولة وانشاء الله انتم او المعازيم
يا ول نوية ابو جبيهة ومدني بقى الحال واحد على قول جون قرن

تسلم عزيزنا عوض
على الاستضافه
لاخونا طارق كمبال
الضيف الظريف
الما مهجوم بسلم ويقوم
والله كنت ضيف رائع
بروعة الدهب (بتاعكو ده)
وبمناسبة الدهب
ما تنسانى انا فى الصف
وعايزه حقى خااااااام
بصنعو براى
وربنا يهون عليك
ويتم ليك بيت الحلال
وعقبال العزابه
ود نويه حكايتك شنو
عايزين نفرح بيك كمان

برضو مكسب ياعم يكفي مدني أنجبت ود اللمين ؛ بس قول لأبوإبراهيم يوصف لينا شارعم

شكراً ليك كتير اخ طارق و لو ماجبت لينا اي حاجه كلامك دا براهوا بالدنيا ربنا يوفقك ويذيدك من عندوا والف الف مبرووووووووك.

Suhad Abduelgfaar كتب:تسلم عزيزنا عوض
على الاستضافه
لاخونا طارق كمبال
الضيف الظريف
الما مهجوم بسلم ويقوم
والله كنت ضيف رائع
بروعة الدهب (بتاعكو ده)
وبمناسبة الدهب
ما تنسانى انا فى الصف
وعايزه حقى خااااااام
بصنعو براى
وربنا يهون عليك
ويتم ليك بيت الحلال
وعقبال العزابه
ود نويه حكايتك شنو
عايزين نفرح بيك كمان

شكرا اختي سهاد وربنا يخليك وحمدا لله على سلامتك
تخريمة
انت بتتنسي كيف؟ لكن بس بي خام دي ما عصرتي علي شوية؟
للعلم الدهب الخام اغلى من المصنع واسأل به خبير

شكرا مروة ربنا يبارك فيك وعقبال كل الباقيين

يا ول نويه يا حبيب ابن عمى شايفو مكبّر اللفه زى ما قال جنابو منقه لكن أنا بجهجهو ليك وبجيب الأخبار طازجه من الزعيم(غريق).
يقعد يقول لينامن مدنى بكره نلقاها ود الحداد (خلّى عنك حركات يا ود يا دهبنجى انت).
البنيات ديل راجيات دهيباتن وقالن ليك حولو ليهن رصيد(قلت شنو؟؟؟؟؟

هاهاهاهاهاهاهاهاها
ايا ابن عمي انت مالك بتزيد النار حطب البنيات قالن بصبرن شوية انت تجيب ليهن فكرة تانية بتاعت رصيد وشي من دا
اما الزعيم غريق ماشي مدني يوم الاثنين عشان يتم اللعب ويكمل باقي المشوار مع اهل العروس يعنس تاني مافي ود حداد ولا كاملين

مشكور اخي عوض علي الاستضافة البهية
كنت رائع اخي طارق وخفيف الظل
وبالتوفيق انشاء الله وبالرفاء و البنين [[بس كمان ما تنسانا من الدهبات]]

هوى يا محمد نويه خلى الحركات وقول النصيحه....هسه امكن سهاد دى دايره تديك بتها.
أنا جيت من السودان قريب وقعدت مع أمك وأبوك وعرفت انك لسه قاعد(عنقالى)....لا خطبت ولا خطبوك.......لا حبيت ولا داير تحب.....عارفنك لسه فى عمر الزهور ما تتزاوغ.
تخريمه(1):-
تعرفى يا سهاد محمد نويه مشكلتو أخوهو الأكبر قافل ليهو السكه وهو ما لاقى ليهو (بريه)لأن (البريات) كلها حفر.
تخريمه(2):-
ابن عمى ياخى ألف مبروك وربنا يتم بألف خير وسيكون ذلك اليوم غاية حبورنا.

لالا ده شمار كبير
شكلى كده ادخل ليك
فى الماسنجر
يا ود نويه
والله عايزنك تستعجل
والمفاجاة ما كوبسه معاى
عشان
عايزه اجهز ليك الشبكه
من دهبى الخام
يعنى
بتاخد زمن
لقايت ما نصنع
وكده

طارق كمبال
اخيتك عارفه اللعب
عشان كده
لبتا ليك
فى الهشابايه
وعايزه حقى خاااام
واحسن نمسك بدر بدرى
قبل ما تجى بنت مدنى دى
وتسوى
كيزان وحجول
تحياتى ليها
وقول ليها
جبنا ليك ود بيت النقاره
العينو حمره وشراره
ود سيد البقاره

والله يا عوض السيد يا اخوى
ود نويه
يستاهل كل الخير
بس هو يقول
بس شكله كده
لابدلو فوق راى

كلام يا ود كمبال 000وصف لى انا محل شروم اقصد ابوفلجه دى نمشى ناخز منه حصة دهب

صباح: صباح الخير يا اختي اها اوعك تقولي لي برضو خااام كفاية سهاد القنصت لي في الهشاباية ودي اخر مرة تاني مافي زول يقول لي داير دهب خام كان بيصبر نصنعو خلاص وما بيصبر يورينا عرض اكتافو
يا غريق ابو فلجة دا كان راعي بيسرح لاولاد عساكر الطالب والان هو مستعد يعمل قطيع من الابقار

الاخ | طارق سلامات

أهلا مرحبتين بالضيف العزيز والله نورت
وحقيقي حريف وعريف

طبعا أنت عارف العزيز عوض السيد بتاع مطبات وفى جماعه مشركين ولأبدين وواحدين مصنتين ليكن بيني بينك اعمل حسابك كويس وما تنسى ( بالمناسبة الدهب فقا ذكاه ) الحق يا عوض السيد طارق قلبو انقطع
يالله طلع الذكاه وإنا أول واحده ح تبدى بيها عشان قريبه هنا باقي دوله في كاد قلى ومروه في ابوجبيهه وسهاد بعيد خالص وصباح ما قالت حاجه


طارق شكر ليك كتير على خفة الدم والذوق ونتمنى ليك التوفيق وربنا يتم على خير

شكرا اخى طارق الرجل العصامى الجاد المجتهد والله نحن نشيد بيك كثيرا لمثابرتك وقد كنت حقيقة خفيف الظل واهم مافى الامر زكرتنا برجل لم يبارح ازهاننا المرحوم هيثم هاشم عثمان الشجاع الصبور الذى ابتلى بالمرض وصبر عليه والله عندما تزورة لتخفف علية تجده هو الذى يخفف عليك وهو صامد وما انكسر ابدا وتجده باشا ومبتسما ويتفقداحوالك واهلك وكل الذين زارو الاخ المرحوم هيثم يعلموا ذلك .

ان القلب ليحزن والعين تدمع وانا لفراقه لمحزونون ولا نقول الا ما يرضى الله انا لله وانا اليه راجعون .

اللهم اغفرله وارحمه واعفو عنه واجعل الفردوس مسكنه .

شكرا ول كومبال ...علي الاريحية والسرد الجميل ...وحلوه فرح فرح يالعزابة دي
ومليار مبروك مقدما وان شاء الله تكون المليار دا جبتوا دهب ...ومدني ماتعبت معانا ...نسوق الجماعة وهرما دايرنها هناك
تحياتي واشواقي وكدي شوف ليك بتاع رصيد ماكن للبنيات ديل

وعقبالك ول نوية ...
نفك الشمار للجماعة ولانخليه شوية

الوريفة ناهد عبيد والله امس كنت محتج على الاستاذ عوض السيد ان كيف تأتي بي ضيفا بعد ناهد التى بهرت جمهور المنتدى برصانة لغتها ورقة اسلوبها الذي يحاكي الحرير في لين ملمسه وشفافة منظره
اما مايخص ذكاة الدهب انا قلت الروب عديل كي والله يخت محن عوض السيد اكان لماني في بلاوة الدهب دي وهو عارف البنات كترن في المنتدى زمان كانت الا احسان براها وبعد دا كلو يذكرهن بتحويل الرصيد

الحبيب الاستاذ ابو هريرة والله سعدت جدا بانضمامك للمنتدى وكيف اخبارك واخبار الحبيب عبد السلام ماشايفو في المنتدى
اشكرك جدا ايها الغالي

زهير حسن اخليكم جاهزين لهرمة والدعوة موجة للوجيه يهاب يوسف عبرك
اما ما يخص الرصيد فانت حول وبعدين نتحاسب والحساب ولدوانتو لو عارفين الدهب النجيط عند الفاتح السر عامل فيها نايم وما جايب خبر
اشكركم جدا ايها الاحباب

---------------------------------

العزيز طارق مساء الخير
عاد كيفن ما دايراهوا خااااااااااااام احسن بدري بدري عشان تاني مع ناس مدني ديل ما بنلم فيه لا مصنع و لا خام

أشرقت انوار المنتدي بعودة الفارس الازرق/طارق
حبابك الف ويعلم الله ليك وحشة
وربنا يوفقك في النية ونتمني نحضر الحنة والسيرة لي مدني
والجماعة ديل دايرين غلب الهلال بالحيل وان شاء الله
الله ما يديهم الفي مرادهم قول آمين

فتح الله عليك ايها الفاتح
واضاء الله عليك كما اضئتاهذه الغرفة
والله اكثر ما اسعدني حضورك الدائم ومواضيعك الثرة وردردك المتزنة
دمت ايها الاخ الودود والصديق الحميم

الاخت صباح صباح الخير امرك مجاب وناس مدني عاد البخليهم ياخدو حق ابو جبيهة منو؟ ناس ابو جبيهة حقهم محفوظ وخام كمان
دمتي اخية

اخيتي الدكتورة بركة الشفناك طيبة وكيف مع الغربة اسأل ربنا ان يعينك والله لكم وحشة
الشواطين الحمر بيفتشو على اغراق الموج الازرق ونسو انه غمرهم لمن زعلو
افتقدت الاحبة النقر والفاضل وفلس ارجو ان يكونوا بخير وعلى خير

هوى يا دكتوره احسان وطارق خلّو (البلبصه )حقتكم دى هسى الشواطين الحمر الجابهم هنا شنو(الليله اليوم دا كلو أزرق من هنا لتونس)......سمعتو بشمار الفتح الرباطى المغربى(الطقطق) الاتحاد الليبى فى عقر داره

انا لله وانا اليه راجعون ولا حوله ولا قوه الا بالله

اللهم نسألك المغفره والرحمه والجنه لفقيدنا الراحل المقيم المغفور له بأذن الله طارق كمبال ونسأل الله سبحانه وتعالى ان يبدل شبابه بالجنه وان يتقبله قبولا حسنا وان يبدله دارا خيرا من داره واهل خير من اهله

اللهم انا نسألك المغفره للمرحوم
اللهم اجعل قبره روضه من رياض الجنه
اللهم انسه فى وحدته
اللهم ثبته على دينك الحق وسؤال القبر
اللهم توله برحمتك واغفر له ذنوبه وتجاوز عن سيئاته يا رب العالمين
امييييييييين

والله لفراقك مفجعون وصبرا جميلا يا الهى ارحمه ياالله يالله يا كريم

ان الموت حق ولكن فقدنا اخ ورفيق عزيز علينا هى الدنيا ونسأل الله ان يجمعنا به فى الجنات العلى

لا حوله ولا قوه الابالله
ان العين لتدمع والقلب ليحزن والله فراقك عظيم وفقدك كبير ولكن لا نقول الا ما يرضى الله
لك الرحمه والمغفره

انا لله وانا اليه راجعون
اللهم عوض شبابة الجنة
اللهم اجعل قبرة روضة من رياض الجنة
امييييييييييييييين

نقلب المواجع شويه وشوفو كلام الراحل طارق هنا كان كيف

طارق كمبال كتب:فتح الله عليك ايها الفاتح
واضاء الله عليك كما اضئتاهذه الغرفة
والله اكثر ما اسعدني حضورك الدائم ومواضيعك الثرة وردردك المتزنة
دمت ايها الاخ الودود والصديق الحميم

الاخت صباح صباح الخير امرك مجاب وناس مدني عاد البخليهم ياخدو حق ابو جبيهة منو؟ ناس ابو جبيهة حقهم محفوظ وخام كمان
دمتي اخية

اخيتي الدكتورة بركة الشفناك طيبة وكيف مع الغربة اسأل ربنا ان يعينك والله لكم وحشة
الشواطين الحمر بيفتشو على اغراق الموج الازرق ونسو انه غمرهم لمن زعلو
افتقدت الاحبة النقر والفاضل وفلس ارجو ان يكونوا بخير وعلى خير

*******************************
لا حول ولا قوة الا بالله العلي العظيم
اللهم إنا لا نسألك رد القضاء ولكنا نسألك اللطف فيه
رحمك الله اخي طارق فرحمته وسعت كل شئ

اللهم ارحم طارق

فى حوار طارق وقفت فى اختياره للمرحوم هيثم هاشم كشخصية فى الذاكرة وده يؤكد لينا بان طارق محله ما معانا
ربنا يرحمهم جميعا