شعر عن مدينتي أبوجبيهة الرائعة

بحبك يا أبــــو جــــــــبيهة!!

بحبــــــك يا أبو جبيــــهة زي عيـــــني وبل أكــتر

وبحبك بكـــــل صدق ولفراقك والله ما بقـــــــــدر



ولو سافرت بعيد عنك وحاتك لحظة ما بصــــــبر

ويرجعني الحنين تاني وأعود لحضنك مستبشـــــر



بريـــــد فيك طبيعتك الدومــاً شكلــها بسحـــــــــــر

وبريد فيك جبل العمدة بسامق شجره الأخضـــــــر



وبريـــــــــــد فيك منقتنا بجميل لونــها الأصـفـــــر

بريد فيك زول هــــــــاديء عشانو حافارق البنــدر



بحبك كتـــــير يا أبوجبيهة وعن حبك محال أفـــــتر

وشيلك في رموش عيني و ماأظن لغيرك هواي أظهر



تأليف:علي أحمد علي شرف الدين

يا سلام عليك يا ابوعلوه ويا سلام على احساسك الجميل.
القصيده جد رائعه وكلنا بنحب ابوجبيهتنا.
تحياتى عبرك لزميلى شقيقك الأستاذ/الشيخ أحمد على شرف الدين(أبودلامه)

ريد فيك جبل العمدة بسامق شجره الأخضـــــــر

والله كلنا بنحبك يا الحباك
كلام جميل جدا
وربنا ما يحرمك منها ولا يحرمنا منها
تسلم يا اخوى على
ومنتظرين اكتر اكتر
ربنا يوفقك

علي أحمد علي :
حقيقة نحن على موعد مع مشاعر مقتدر جداً ..
- و دا تقييم جادي جداً - بعيد عن المجاملات ..
كونك تقدر ( تصيغ ) المفردة العامية في قالب شعري (تفعيلي) بالشكل دا ؛ و تصبر معاها حتى تحفظ ( القافية ) بالسهولة دي : دا معناه ميلاد شاعر ..
النوع دا بعض الظريفين من الحداثيين سموه ( السهل الممتنع ) ..
شوف بساطة المفردات ؛ تحديداً في قافيتها ؛ و السلاسة اللي جات بيها ..
بالمناسبة ليس من السهل أن يكتبها أي حد ..
أحييك على الوزنة دي ..
لأنو القصيدة ما مالت لا يمين و لا يسار ..
ماشة بنمرة خمسة في طريق مسفلت و مستقيم ..
أحييك يا ابني ..
و مزيد من المحاولات الناجحة ..

هكذا الحباك...خصبة دوما...ودودا..ولود...
كل نطفة حب بتنبت فينا شاعر
وكل دفقة ريد ..تهيج كم مشاعر...
وكل قطعة منقه تصفر..تخدر فينا يافع..
وكل كعكول صمغه يكبر...بيكبر فينا شافع...
وكل حجر من جبلنا واقع..تحته خيرنا كتير وناقع...
الى الامام على احمد...والقصيده تنبئ بمولد شاعر أصيل.....

وبريد فيك منقتنا بجميل لونها الاصفر,,,,,,,,,,,,,,,,,
يا لك من مبدع .......شعر جميل
مشكور جدا الاخ علي احمد علي
ونحنا في انتظار الجديد الممتع
يديك العافيه