كلااااااام سودااااانى جاااااكم ...... بنـات افكـار

برضو من بنات افكارنا الجميله كلام اماتنا وحبوبتنا هو حلو ولزيز وطاعم لكين محتاج لمترجم عديل كده اى والله

اديكم امثله

الجنى ده من قبيل يتجوقر فى المويه الحقوه

والله الليله فطرنا مع ناس فلانه ما قالوا عيانه شوف عينى تلقف الاكل جنس لقف وتفقوم وتلبع ساى قال عيانه قال

يا هنايه نادى ليا قاشره دى والقاشر الساجم المعاها ده

يا بت تعالى اعملى شاى والفى يديك ده ادمسيه


واقعدوا عافيه

صباح حسن عبد الرحيم كتب:والفي يدك ده أدمسية
هههههههههها
تسلمي ناهد

الله يسلمك صبوحه مشيتى وين نان المنتدى ما فاقدك
تحياتى

سلامات

اها جيتكم صاده تااااانى

قلنا كلامنا جميل فيهو وصف مبالغه للاشياء والله ما عارفه قاعدين يجيبو النضمى ده من وين .

مثلا :-
واحده تقول والله الليله مشيت ناس فلانه ولقيت

حالتها تحنن الطير فى السماء من جنس ده ابرى واستبرى

واقعدوا عافيه

يقول ليك

ضحكت جنس ضحك لمن موتى واتكومتا فى الواطه ورقتا سلطه .

انا قاااعده فى بطن البيت على صمة خشمى لفحن الخبر .

الراجل ولوف والولد مخلوف والاخو الكف المابتقوم صوف .

تحياتي للجميع
واحد يقول ليك ارحكاكا
صنقر في التراب
قام دنقر
اتكرفس
امي زمان كانت تحجينا و تقول في نهاية الحكاية انقطعت و انشتحت في صغيرنا و صغيرنا في الغالب كنت انا
فلان داك راجل السواد
عمل زغبير
كيفني في حناني
اخدا موزة

رمضان كريم اعاده على الامه الاسلاميه بالخير والبركات

من كلامنا السودانى :-

&&& يقولو ليكا فلان ده الفوله فى خشمو ما بتبلى ........ وفى ناس يقولو البليله فى خشمو ما تبلى

&&&&
تانى يقولو
فلانه دى قواله ودى جايه من القيل والقال (دى مفهومه )
وفلان سواط سواطه شديده اهاااااا دى جاءت من وين لكن بينى وبينكم السواطه دى شينه خالص لاحظوها فى الحله حمانا الله واياكم

واقعدوا عافيه بجيكم تانى

سلامات
من كلمتنا السودانيه مثلا الواحده تقول ليك

جارتى وناس الحله اكلو لحمى

ونبشونى نبش

واقعدوا عافيه

النسوان يقولوا ليك والله الحاجه السمحه دى انا ما مسويها لزول عاملاها لبت توم روحى دى .. انا زاتى بقولها لكين تعنى شنو ؟؟؟؟؟؟؟
سلامات واقعدوا عافيه

السلام عليكم ورحمه الله
اهاااااا جئتكم للكلام السودانى المن بنات افكارنا

يقولوا ليك فلان اديتو الحاجه الفلانيه ونكرنى حطب

الصوف له علاقة ياناهد لان الانسان لما يصيبه الخوف شعر جسمه بيقوم . والناس بيطلقوا كلمة صوف للشعر ايضا.

واحد قال في كلام كده داير ترجمة قال ليهو زي شنو قال
:
سال احدهم اخيه : اخي م كو
اجابه الاخر : كو يين ؟
الاول : كن كي كو وكن كي كو
تحياتي لناس الكلام السوداني

كو : من اصل لهجات البقارة كو تعنى يلا نمشى
يين : تعنى اين ( كلام الاد حميد
اما كى : ايضاتعنى الاتجاه مع الاشارة باليد او الايماء

كوْكَى (القاموس المحيط)

كوْكَى (القاموس المحيط)
كوْكَى كَوْكَوَةً: اهْتَزَّ في مِشْيَتِهِ وأسْرَعَ، أو هو عَدْوُ القَصيرِ.
والكُواكِيَةُ، بالضم،
والكَوْكاةُ: القَصيرُ.
والمُكَوْكى: مَنْ لا خَيْرَ فيه.
رجل كَوْكاةٌ وهو القصير، قال:ورأَيت فلاناً مُكَوْكياً؛ وهو الاهتزاز في المِشْية.

احلى من العسل اتنين عقر يجيبوا ليهم ولد دلدولى بمشى وبجى
الدلدولى وتَدَلْدَلَ: تَهَدَّلَ وتَحَرَّكَ مُتَدَلِّياً.
والدَّلْدَلَةُ: تَحْريكُ الرأسِ والأعْضاءِ في المَشْيِ،

ياسلام على الكلام
تشوا الجرن
استاذ يعقوب
المطلوب اعطاء نبذة عن هذا المثل
تحياتي

شكرا عزيزى الشازلى
وسوف احاول اشرح حسب قدرتى

التش معروف وهو الحرق
الجرن : هو كوم من قناديل المجمعة, او كوم لاى محصول
وف قاموس المعانى
والجُرْنَ والجَرين: موضع التمر الذي يُجَفَّف فيه.
وفي حديث الحدود: لا قَطْعَ في ثمر حتى يُؤْوِيَهُ الجَرينُ؛ هو موضع تجفيف الثمر، وهو له كالبَيدر للحنطة، وفي حديث أُبَيّ مع الغول: أَنه كان له جُرُنٌ من تمر.

جرى : وعرد

ناس البادية بيقولو
الناس جرو لحقو البار المسروقات, الحرامية من شافو الناس جارين عليهم, خلو البقر وعردوا. او يقولوا الحرامى عرد والجماعة طردوا وقبضوه.
التعريد تعنى بصريح العباره الجر من شيء خوفا.
الجرى : يعنى الجرى لاى سبب دون الخوف

قاموس المعانى:
وعَرِّدَ الرجلُ تَعْرِيداً أَي فَرَّ.
وعَرِدَ الرجلُ إِذا هَرَبَ؛ وفي قصيد كعب: ضَرْبٌ إِذا عَرَّدَ السُّودُ التَّنابيلُ أَي فَرُّوا وأَعْرَضُوا، ويروى بالغين المعجمة، من التَّغْرِيدِ التَّطْريب.

والله جنس بوست ... تفاتيح ... وماكلين سيخ

خدورة أم بشق كتب:والله جنس بوست ... تفاتيح ... وماكلين سيخ

          ههههههههههه  يلا ايديك معانا  سلام عمو خدوره زكرتنى بقولوا ليكا والله الناس اكلت وشى واللوم من الكراع بقى فى الوش