خواطر في دفاتر يناير ... يا بت يانيل ..

***منقووول

للطنابير والمسادير واللسة في رحم القصيد والدابو حسة
إسمي إمكن " يا بت يا نيل ... أو لحد ما بنية من خبز الفنادك ..أو يا سمراء يا واضحة ... أو يا شمس رغم الشمس اديني لون ايديكي .... سميني زي ما يكون فرحان وبيك بحلم ... مشتاق وفيك مسجون... أبحر وفيك أنجم.."
تأوبني طيف من مصطفى في ليلة شاتية من ليالي يناير الدافئ الممطر شتاءاً.. وما الطيف إلا ما تريه الخواطر.

يااااااااااااااه ... يا مصطفى ....
يا حبيب المغطية بالتعب ...
ومسقية بي عرق الجعانين والمسافـرين
... يا جمة حشا المغبون.....
والسِلعـتُمْ الضُراع ..
والعرق اليخُر ...
عمال المدن ....
كلاّت الموانى...
الغُبُش التعانى...
بحّارة السُفُن
حشّاشة القصوب...
لقاطّة القطن(وحليل القطن)...
الجالبة الحبال....
الفِطن الفرُن... الشغلانتو نار....
والبيناتم عشم في الفرج القريب ......
يا زول يانيل ...
يااااااااااه ...
دا كتير علينا والله ...
وغلبني تب والله يا مصطفى !!!؟؟؟
************
حليلك ... يا حشاي ..
يا النخلة ..
ياالتبلدية ..
يا الأبنوسة ...
يا الباباي ...
وحليل جنى الباباي يامصطفى..
آه و آه ..
وكل يوم من المدفع خازوق جديد........
وبين غناك وخيل دماي و قول ود خيري:
نقرأ لهم التاريخ ونقاوم
ونسأل جبين الفجر لهم ...
ولكنهم أدمنوا طعن الفجر في القفا ؟؟؟ ..
غدروا بالمليون ميل يا مصطفي
وتبعثرنا في كل وادي....
بين جدلية
العاربة والهاربة....
.......
تصدّق بكل بساطة ... قالوا ما بشبهونا !!!
و ضيّعوا وطن ؟؟؟؟؟؟؟؟؟؟؟
حليلك يازول يانيل .....

*********
حالنا الهرد لهاتك و لهاتنا بالغنوات..
لا صبح حالاً زين..
ولا حتى تكل .. تكلين..
ويا حشا المريود أمونة الصباح ..
أمونة بت الضهاري ..
بت العرب النوبية..
لسه بتقول للعيال
شيلوهن يالحبان
غشوهّن النقلتي والترزي القريب
... وصامدة بين جرح السحاب
وشهقة الأرض البكر
وكضاب البقول ليك شاف ماعونا يساسق !!!
دا حالنا الحرن ...
لسه لا مويتاً نضيفة
ولا شارعاً بوصلك
من غير نفس طورية ضامي الطين ..
إلا ناس البندر ديل
ماني خابرة عيشتم كيف ؟؟
و سمعتهم بقولوا لسه ياها عيشة هاك وكف ؟؟؟
*************
. لسه والله واقفين برانا
والهم شدة ما عصف بينا يا مصطفى
لمّن فتر مننا وقال لينا:
بلا يخمكم
إنتو بعد دا يا "تسونامي" حلاكم
يا عصف بيكم
ومن ديك يالحبيب لسه واقفين ؟؟؟
لكن بالذي رسم الأرض معبد
حنقعد ولو بعد حين !! .
وتاني شن قلت يا حشاي ...؟؟؟
حيكومة الفقر الدمار الكضبن!!
لسة قاعدين
ولسه بكضبوا كضباً حبلو طويل بالحيل !!
إلا بنقصّروا !!!
بس صابرين مع حزن الغنا الطول
ولابدين ليهو في أقرب لفة فرح قريبة.

*************
يا بنية من خبز الفنادك غابة الأبنوس عيونك ؟؟
وحليل غابة الأبنوس
قطعولنا منها عود
لا هشا لينا غنم
ولا إتكينا عليهو !! ...
حليل غابة الأبنوس شوف البنية !!
البقت زي درع الأميرة
الإنسرق و ما جمع
بالرغم من أننا نسمع
صوت حوافرهم بوضوح
ونرتوي من بواقي السيل؟؟؟
إلا بنياتك الخابرن زين
حالفات
لا يتضارن ورا الدعوات
ولا يتلبسن الفرح الفات
ومنتبهات شديد للشارع
وقدر ما هزّو نخلاتن
حالفات ما يفارقن السبيط ،
والغيمة اللئيمة
لسه محاصرنها بالقوسين ..
بس ربنا يدينا الصبر ؟؟

**************
وشوف الناس قنديل لو مانور
يحرق كوخ وباقي الحلة تنور ...
حصل حدانا بي جاي يا حشاي ..
وحاتك في تونس القريبة دي
حرق كوخ.. والخضراء نورت...!!
وطار عصفور النار من صدرها
وعدا بي فوق ليبيا المعمّر
وحمّر ليهو زين
وقال ليهو بجيك صادي ،
وركّ فوق ميدان تحرير المحروسة
بسلام آمن..
وعينك ماتشوف إلا النور ...
كل زولاً جاهو جاري
وفوق إيدو هبابتو
وحاتك لا خراطيش موية ولا غاز
قادر إطفيها
وضربوهو رصاصاً زادو لهيب
... ويا شعباً لهبك ثوريتك تلقى مرادك والفي نيتك ؟؟؟.
وسلام مربع لي ود مريم ....ً
وأهو غايتو
الناس بدت تلحس في كيعانا وترتاح ؟؟؟
وإنتشينا مع نزار...
ياتونس الخضراء
جئتك عاشقاً
وعلى جبيني وردة وكتاب ..
وكانت وردة الياسمين حاضرة ...
يا ود أمي لحسان الكوع
المخوفنا بيهو دا أتاريهو ما صعب؟؟
وزي ماك خابرنا
لحسان الكوع مجربنو مرتين
وكان قمنا بنقول للغافل
هوي يا زول وفي ود عينو...!!!
في منحنى الدرب الطويل
بنعرف نفلت من الجراب..... !!!
وتاني سلام لي ود مريم ...

************
معليش يا مصطفى...
كلامي دا شايفاهو كده
بقى زي ما مرتب وجايط
والنعاس يكاد أن يصرعني ...
سلام ياصديقي الأول ...
يا .........
الحرف عصياً و يعاندني يا مصطفى...
ماعارفة ....
أحححححححح... أحي عليك...
يااااه ........يا........
و طارت دمعتين ..
وإنشايح وتر ...
سلام يا مصطفي ..
سلام يا كمين بشر ..
صحي الموت سلام ..
ما يغشاك شر ..
سلام يا مصطفي...
نم هانئاً ...
وأنتم كذلك...
تصبحون
على خير ووطن ...
أما أنا ...
فقد صرعت عينايّ النعاس دمعاً ...
فأتركوني في ليل العشيات هذا
أهيم مع نقرشات عود يا زول يا نيل ...
المعتق بالطمي....
و أتوسل النعاس
عله يسامح عينايّ...
فـ للفجر قسمات بدأت تلوح......!!!
سلام ......تصبحون على وطن؟؟؟؟

متخبية و الناس شايفنك باباى و نخيل

اشرف كيف حالك يا زول

الخال ازهري ..
الفاتح ..فيصل شكراً على المرور
ويالفاتح يا أنيق .. زي ما قلت لفة ..لفة.. زنقة..زنقة..الزولة دي لابدة.. وحيرتني هذه المتخبية في الزنقات والناس شايفاها باباي ونخيل .. كما قال فيصل ..بس يا فيصل زي ما قالت صابرة مع حزن الغنا الطول ولابدة ليهو في أقرب لفة فرح قريبة

وبشرى الفاضل يحاول كشفها:

متخبية والناس شايفنك
باباى ونخيل
متخفية والناس عارفنك
وشقانا معاكى هو إنـّك
طاويك الليل
لكن واردنك ورويانة
لا عيون تحزن
لا دموع بتسيل
يوم بكرة جميل
ضوّاى .. ووسيم
يوم بكرة جميل
باكر .. دافـِر
يوم بكرة جميل
ابيض نورو
يوم بكرة جميل
باكر داكر
أبداً لا أتغرّب لا مسافر
باكر ضوّاى
وجميلتو الليل الما سوّاى
كان حاول يطمس أقمارو
ابيض ريحو يوم بكرة جميل
من فالو النيل يطمح طوفان
وتخاف من موجو تماسيحو
باكر ضوّاى
كلمات وأناشيد وقيامة
باكر ضوّاى
وغناهو الحادى الهدّاى
يوم بكرة جميل000

قصيدة حلوة يا أيها الأشرف الأظرف وعنوانها خدعني قبل أن أقرأ القصيدة فافتكرت يناير الثورة المصرية وبت النيل هي مصر بهية البهية وكمان أسأل فيصل عندنا بت النيل في الحباك كما عاجبك

بت النيل وليست النيل بالكسر

الاستاذ المبدع المرهف الرقيق اشرف
المتداخلون ازهري والفاتح التوم وفضل الحاج وفيصل؟؟؟
ارجوكم شوية شوية علينا!!! خليتونا مرابطين في منتدى الشعر والخواطر على طول
هذا الكلام الجميل وهذا الادب الراقي وهذه الدرر المكنونة تجعلنا نضحك ونبكي ونحزن في ساعة واحدة...
عفارم عليك الاستاذ اشرف فانت مشروع وطن مسكون بالشجن الاليم والحزن النبيل والفرح الطفولي والامل الخرافي الف تحية

الخال فضل ...الأستاذ محمود تحياتي لكم مروركم زاد البوست ألقاً
وياخال يا بت يانيل في كل مكان ... ورسمت بوجيه بسيمة ضوء... وجرحنا عتابا تلك الباكية ...

يا بت يا نيل ...
العاشقك عاشق كل الفيك ..
غنايك في كـل ظروفك ..
في الفرح البيدق وعد.. وفال ..
والحزن الـودر ضي شوفك ..
في السجن القهرك في خوفك ..
في النبض الصامد في البركان ...
الساعدو يرمرم في جوفك ..
يا بت يا نيل ...
جرحـنا عتابك ياباكيــه ..
وعايزانا نغني غنى الأفراح ..
ما الغنوة الناشفة لبن ضرعك ..
والفرح الفيـك خلانا وراح ..
ولقينا فرحنــا وإنتي حزينة …
يكون أشتر ويزيدنا جراح ..
خلينا من الفــرح الكاذب ..
بتعود أفراحنا وتبقى براح ..
رسمت بوجيه..بسيم الضوء ..

هي من رشاد واسمها زهرا بت النِّيل والجوكر موجود ومنصور سكوني موجود بس اليدخلهم لينا المنتدى شنو

خلينا من الفرح الكادب...
بتعود افراحنا وتبقي براح...
رسمت بوجيه..بسيم الضوء...
تسلم يا استاد اشرف
تحيااااااااتي

تحياتي صباح على المرور الزاهي ...ومصطفى دا غايتو ما قصّر مع أي زول وهاك دي:

يا صباحات الموانئ
حتى لو دربك ترنح
فى مشاوير الأغانى
والجرح إرتد بينا
لى زمان الآهة تانى
يانا لا بنتحاشى صدك
لا بتموت فينا الأغانى
يا غنانا المشتهنو
يانى موعود بى زمانك
بى مواقيتو البِرنو
بإرتعاش صرخة وجودك
يوم يطل ميلادى منو
لما إتوسد صباحك
ياتو ليل يفصلنى عنو

بارتعاش صرخة وجودك
يوم يطل ميلادي منو
لما اتوسد صباحك
ياتو ليل يفصلني عنو
يا سلالالالالالالالام يا اشرف
كم هو جميل مصطفي سيد احمد
الله يرحمة ويغفر له

بالأمس وعلى ما أظن لأول مرة قدم تلفزيون السودان سهرة توثيقية لمصطفى سيد أحمد بعنوان "يا سلام عليك" وتشوا عين الظلام ببقعة ضوء طال إنتظارها كثيراً وكانت المادة الغنائية المقدمة للأسف شحيحة جداً ويا خسارة ، ويبدو أنهم إستحوا من حميد عندما قال في لقاء العيد على قناة النيل الأزرق: ((ما داير أقول حقو ناس الحكومة يعتذروا لمصطفى )).
مصطفى لديه أكثر من 470 عمل والمسجل لدى الإذاعة والتلفزيون لا يتعدى أصابع اليد ؟؟؟

يا سلام عليك
لو مني مستني الملام
ياسلام عليك يا سلام
ياحلو دا السكوت مرات كلام
وعدم الكلام هو كمان ملام
يا سلام عليك يا سلام
انا يا غرامي وصلت بيك
في الدنيا لي حد الغرام
ولقيت ملامي في عينيك
يا سيدي زي الما ملام
يا سلام عليك يا سلام
الوردة لو فاتها الفراش
ما أظن تلومو مع الندى
ما بتجرح احساسو الجميل
والريدة يا حنين كده
يا سلام عليك يا سلام

يا سلام عليك أنت يالفاتح تحياتي لك وشكراً ...
هذااللقاء الذي تم بثه على السهرة مع مصطفى وقدمه الراحل الإنسان محجوب عبد الحفيظ ،وهو من أرشيف التلفزيون و تم تسجيله منتصف الثمانينات عقب أبريل 85م ، يومها كان تلفزيون السودان مفتوح لكل مبدعي بلادي قبل أن يستولى عليه أولئك الأدعياءالمفتقرين لكل موهبة سوى في التقديم أو الإبداع والفن عموماً.