قعدة الشاي والقهوة في بلدنا

قعدة الضهرية ولمة الامهات في شجرة النيمة ؛هي اجمل قعدة في بلدنا حيث الونسة الحلوة ومناقشة جميع مشاكل الحياة اليومية ؛اليوم نتطرق لواحدة من اجمل ادبياتنا الاجتماعية وهي قعدة الضهرية لامهاتنا العظيمات؛
!!هذه القعدة طبعاً خاصة بالامهات انشاء في المرة القادمة نتحدث عن الاباء والحديث سوف يطول معهم!!
حيث يلم (ناس ست المني وهفصة(ح) وعاشِي بفتح (العين) وكسر (الشين) وخديجي بكسر (الدال) كلهن دييل امهاتي العظيمات0
نبداء بقعدة ناس بت المني حيث اللمة الحلوة اللية القعدة في بيت ناس منو يا ست البنات : ترد ست البنات لمنال : الليلة القعدة في بيت خالتو سلمي ؛ من بعيد تجيك ريحة بخور ام التيمان عندها يعرف الكل الليلة القعدة في بيت خالتو سلمي حيث يبدأنّ بقلي البن في الغلاية والجمر مولع كانو نار جهنم والكانون الجميل حيث ترد تسابيح لخاتو سلمي والله كانونك مبالغة ياخلة ؛ترد ليها شكراً ابنتي ؛ وتقول للجميع خالتو نعمات دي قهوة اولاد حتيلة يايّمة دييل بجيبو حاجة كعبة ؟(مشهورين بالصنف الممتاز) وبعداك اي واحدة من الجمع تمسك فنجالها الجميل وبمسكة حريفة ويبدأنّ في الشراب ؛طبعاً العملت الجبنة دي تسابيح تقوم خالتو سلمي والله جبنتك مبالغة يا سبوحة ! شكراً خالتو هذا رد سبوحة( اسم الدلع) وتقوم خالتو نعمات شفتي امبارح الحلقة كانت كيف في المسلسل يا مروة؟ ترد ليها مروة مبالغة كانت؛ وبعد شوية يجي حسام لخالتو نعمات في محل القعدة ماما عاوز لي جنيه! تعمل بيهو شنو يا ولد ؟ ماشي احضر مصارعة في اليسنما ياماما مع عادل ود خالتو تقوي ؛ طبعا خالتو نعمات ملمة بكل شي ؛مصارعة في ياتو بطولة في ال(wwe ولا ecw ولاs mack down ) يرد ليها حسام في الwwe ترد ليهو خالتو نعمات لكن الاسبوع الماضي ماجون سينا شال حزام wwe من راندي اورتن تاني ماشي لي شنو ؟ يرد ليها حسام لا ياما دي حزام الريسنميليا بين بيغشو كين ؛طيب امشي لكن ماتتاخر عشان تجي بعدين العصر تمشي تجيب اللبن؛ حسام حاضر ماما؛ وتقول خالتو عزيزة لنعمات انتي عصام خلص ؟ ترد ليها لسة فضل ليهو سمستر واحد ؛ وبعد شوية يرن التلفون ترفعو خالتو (000) ام ابو حمودي ؛ الجميع يسالها ده منو ؟ ترد ليهم ده ولدي ابو حمودي هي طبعا ملمة بالاحداث وزارت دول الخليج وتبدا في سؤال ابوحمودي ازيك ياخي وكيف الاولاد لسة الامير سلمان امير الرياض ؟يرد اخينا اي؛ وكيف ناس الشرقية وناس الدرعية كلهم تمام وبعدا تخش ليهو في الكورة لسة انت مع الهلال؟ اي ههههههه! انت ياولدي ماعندك شغلة تغضيها :كيف هسي ميدان ماعندكم تلعبو فيهو؟ طوالي اخينا يقول ليها هو المريخ ده انتي قايلة استادو ده بنو ناسو مابنتو ليهم الدولة ؛ اخينا الكلام بحرقو بقوم بضرب لناس الشرقية بكلام خالتنا وعمنا الكبير بقول ليهو كدة ادينا تلفونا بالله :العم يضرب لخالتنا تقول ليهو نفس الكلام القالتو لولدا اخيراً عمنا يقتنع بمنطقية كلامها ويسكت!بعد شوية تقول ست البنات خلاص الزمن جا وبعدا عامر بجي من الشغل نجهز ليهو الغدا 0والليلة المرقة (طلعة العصرية)علي وين يا سمر :اللية نمشي حي القمارة 0
وبعدا نجي لخالتنا هفصة تال يا ابكر امشي دكان موسي جيب لينا قهوة ويلمو في الشجرة الضليلة تقوم آشة تقول لهفصة ياهي دي جبنة ولا زيت رجوء(رجوع) شوفي هوي كما دايراة تشربي مافي زول جابرك انتو الليلة كيلو البافرة بي كم ؟لو دايرة تارفيهو امشي السوق !
ونجي لخالتنا عاشي ؛ هاي عزيزي كلمي خالتك ام شوايل تجيب معاها البطّرن سمح ايّ وتجي خالتنا عالية ويتلمو في ضُل الهجليجاية ؛هاي الوطة دي اليوم ده مالا حاري كي تقوم خالتنا ام شوايل تقول للجميع الخريف خلاص دخل- وتسمع صوت اليّد من بعيد وتقول عزيزي خاي القهوة دي جبتيها من دكان الجلابي محجوب؟ واي جبتها من الجلابي محجوب ؛شفتي البارح الفتوة فتوة ول علي ؟مالا داوس عيال ولاد غبوش وعرّد امبّ الورمة علي - هاي كي ريحينا من الهوان ده! كبي لي التِني - بعد شوية بجي ياقوب ايّ انا ماشي اكج امشي لاكين ماتاخر عشان تجي بدري ترّط العجال
وبعدا نجي لخالتنا خديجي - اشي (عائشة) كلمي هلوم تجيب لينا الجبني الكبيري ويتلمو في ضل الهبيلايّ وتسمع صوت الجرس في الفندق مربوط فيهو اشي الليلي ملوة الايش بي كم؟ بي الِفْ والله خِلِتْ ادييل كدِي ؛اتيني التني وحات ابيّ ابشملِي جبنتك دي مُري زي القرا(ع) وحيات الله امباره اب جبيهي محل تخي كُرائك ماتلقيها يا ابشرة
هذه قعدة قصيرة مع امهاتنا الحنونات في بلدنا الجميلة وتعرفنا علي ونسة وشربت قهوة كل من هنّ
تحياتي

معي اني ما من محبي القهوة الا انني استمتع بالونسة في قعدة القهوة مع الحجات متعهم الله بالصحة والعافية كانت لدي صور كتيرة لقعدة الامهات في الجبنة مني مع هم الغربة

وفنجان جبنة بشمالو يسوى الدينا بحالو

وجبنات يا بنات هريوا قامن وجنّو

وناس أوشيك يخنّقوا فى الربابة يغنو
وأوهاج سّل شوتالوا وبركلو يسّنو
تمباك أب دمك جوه الكدوس حا شنّو
جبنات يا بنات هريوا قامن وجنّو
دبايوا عوجات كيها يا أدروب أبوك كيفّنو
روّح تندلاى ولا الصهب فاتنّو
قالو الليله هباباي بركة زايد جنّو
وناس باكاش وحامد فى أروما إستنو

متع الله الاحياء منهن بالصحه ورحم من رحلن ........ لك التحيه ول نويه

البرامكة وجلسات الشاي...
لي صديقة من المسيرية كانت تحكي عن الشعر المصاحب لشرب الشاي وذكرت انهم يطلقون علي هولاء الشعراء البرامكة....إلا اني لم احفظ، أتمني ان تمدونا بهذا الضرب من الفنون

قومي يا حليمة
اوقدي نارك خليها تكون جامورة
وسوي فيها جبنتك المذكورة
في فنجانها زي عين الدباز محكورة
فنجان من جبنتك بيسكن في الدماغ لي دورة

ابداع ما فى كلام

لكن جبنة حليمة ما مباااااااااااااااالغة !!!!
فنجان من جبنتك بيسكن في الدماغ لي دورة

ارجوك اخ طارق في اجازتك دي تسأل الناس الكبار وشيل معاك مفكرة وبعد العيد ننتظر نفحات و نفحات

لنقارة دقوها * والخيل شدوها * والحربه شكوها* والحكامة البنات زغردوا ليها* اليوم الصبيان ركبوا المسروجات * الخيل بنات سعدان *مركوبات الصحابه * ماهن حمير جلابه * بنات سعدان عمدان الصهب * البخاف من الموت فيهن ما بركب * البخاف من الحرب فيهن مابركب* بالخاف من الدواس فيهن مابركب*ياناس هووووى الخيل لسيدنا عزرائيل صادقن * ولجرن العيش دقن وضرن * اليوم ياناس الخواف يطلع بره* الفارس من الجواد حلف ما بدله * الحكامة مابتخلى المشكار عشان عبادة الله * ياخونا يا على الوافى أنت تابعك غضب من الله * يامرفعين الكدادة خليل سواك لجهنم سداده ماعندك صلاة ولاعباده
هذه قصاصات صغيرة ولكن لها تاثير كبير فى حياة الانسان البدوى والبدائى فى زمن كان فيه العز والشموخ والكبرياء هى صفات من رمزيات الانسان الكريم والبطل والشجاع والانسان المتعفف عن الصغائر الجارحه لمكنون الادب والاحترام بين المجتمع الانسانى يبدو أن الاخ / الجنرال بدأ يفقد عرشه اأو يتنازل عن أرث الجدود الذى ساد ردحا من الزمان ولايزال مستمرا من خلال عنفوان تيار جارف يلفظ على جنبيه كل من طأطأ الرأس خجلا وانهزاما أمام طموحات الافراد الذين يؤمنون بالمصالح العرقيه والانتمائيه والعمل على تحقيقها من خلال محاولات التسلق عبر رغبات الحصول على مفاتيح مفاصل السلطة التى ركبت حصان أبيض مجهول الفارس
In fact, there were a few posts in this section of the forum, and will continuously

Affection

شكرا اخي بالجد كلام جميل ومعبر واصل في هذا الابداع وبالتوفيق انشاء الله

ننتظر اضافاتك بعد العيد يا أخ حسن

كل عام وانتِ بخير دكتورة احسان بس اخوك مضغوط كدة مع الجامعة الحاجات دي متبحّر فيها اخوكي الوجيه ول نوية لكن البنعرفو بندلي بيهو وانقل ليك من هنا سلام كل الاهل كلهم بخير وانا الان في الحباك جنس لحم بكرة وشئيري ماتتيك الدرب
مودتي

ربنا يوفقك وينصرك ونشوفك علامة كبيييييييييييييييييير ....
لاتحزن من الضغط في الجامعه هي مرحلة تعدي وتبقي الذكريات..
اللحمة والشئيرية ينفعنك

شكراً اخي الفاتح علي هذه الاريحية الرائعة - الشاي ده لكن مافلفلتو فلفلة عجيبة خلاص والاخت زهور صالح دي عندي معها علاقة وطيدة اخت صحبي وزميلي في الجامعة ولي معرفة كبيرة مع اسرتها وهي ابنة خالتنا الظريفة حواء البيضة أمرأة حكامة ولها وزنها الاجتماعي ولاخت زهور ربنا يديها الصحة والعافية انسانة راقية وظريفة وزولة اخت اخوان
تحياتي

الاخ الفاتح
يا راجل انت كنت وين من زمان والله قريفتنا للشاى الفي البراد

شكرا فاتح.
نعم زهور صالح انسانه فى قمة الروعه كانت زميلتى فى جامعة النيلين كلية التربيه بعد عودتها من العراق وكذلك اشتغلنا معلمين فى مدرسة ابو جبيهه الثانويه بنات .
وأظنك انت زميل اخوها عبد الباقى يا ول نويه

أحبائي ( محمد نويه , عوض , طارق )
وللحديث بقية

يا اخي انت زائع تجيد السرد وتصلح قاص من الدرجة الاولي

أخي الطيب : لك الود والتحية يالطيب مشكور على الإطراء ,,, بس أنا خايف تكون بداية خرف !!!!