محمود درويش في قصيدة وطني

تحية صباحية للاستاذ العظيم فضل الحاج
انا بحلم اني في اكوان بترحل من مرافيها
بالله عليك يا استاذ اتحفنا بهذه القصيدة طالما انك ذكرتنا لها.. الا رحم الله شاعرنا الفذ عمر الدوش هذا الرجل القامة المسكون بحب الوطن وحب البساطة فقد كان بسيطا في ماكله ومسكنه ومع عامة الناس يتالم لانينهم ويتحسس مشاكلهم اليومية من قرب ويترجمها لنا نصوص شعرية بسيطة تحمل معاني كبيرة وقوية تفعل فعلتها في النفس والروح كالترياق في البدن السقيم والجسم العليل..
الف تحية

استاذنا فضل شكرا ياخى

أغمدتُ في لحمِ الظلامِ هزيمتي

وغرزتُ في شَعَر الشموس أناملي


محمود فضل و الفاتح يا اخوان الدوش ظاهرة يصعب ان تتكرر فى هذا الزمن الكعب.

هاك يا محمود مرثية هاشم

عزيزى الدوش

******************

عزيزي الدوش
طرف (شاهد)
في مليون ميل
في مجرى السيل
طرف سدره
في قاع تربة
مبلل بي مطر
غربة
طرف وادي
رقد هادي
في حضن (أم در)
طرق شارع
مولع وحر
طرف عالم
رجع سالم
صوابع اليد
بعد كمل
سنين العد.
طرف وجعه
بقت شمعه.
طرق خاطر
ومض لمحة
في بال سمحة
طرف حافر
في درب الخيل.
طرف شاهد
في مليون ميل:-
زمان كنا
وزمان يا حليل
(نشيل الود)
فرح مطلوق
(همس الشوق)
عمار السوق
دخول ومروق
على الشارع
وكان الشارع
طويل فارع
وحسع كيف
غشانا الصيف
صباح دخري العمر
مسروق
عزيز الدوش
مساء الخير
صباح النور:-
شدرنا نشف
بيوتنا قبور
حلم العافية
بات مطمور
بلد بي حالها
صبحت سور
سقتنا الريح
غبار عتمور
زمناً كضب
جوع وكجور
شرقنا الخوف
غلبنا الشوف
في عز النور
عزيزي الدوش
طرف شاهد
في مليون ميل:-
زمان يا زول
بلدنا جميل
نقول الحق
(في عين الفيل)
وحسع كيف
وسيف شرف الكلام
مكسور
عزيزي الدوش:-
قريت يا زول
حروف نعيك؟!
قريت يا زول؟!
قريت يا زول؟!
جاك ورد الشكر
مفروش
وسيل الخُطبا
رج الحوش.
بقيت يا دوش
أمير شعرا
دحين يا خوي
-وقبل الموت-
كان صوت الشعر
مقروش؟!!
أخير تضحك
هناك ياخي الضحك
بقروش؟!
عزيزي الدوش
يا أغبر.. ويا أشعث
من الحرقة
وزمان الغش
زمن مجنون
وجنو فنون
حتى الضل
يدخل القش
يقولك كش
بقت أمثال
برسم الحال
ده حال بطال
نحك الرأس
وفوق الرأس
نلاقي الفاس
زمن دفار
ملان بالعار
صوت مكتوم
في بطن الغار
زمن مجزوم
كبارو.. صغار
وغيظ محموم
وبارده النار
آه يا دوش
ده زمن (البوش)
ورأس مدووش
أخير يا زول
تنوم ترتاح
دحين يا أخوي
في وادي الموت
في زول مظلوم
وحقاً راح؟
دحين يا أخوي
في ناس ناعمين
جعاص وسمان
وناس ضامرين
تقول أشباح؟
عزيزي الدوش
تشد الخيل
تموت عدمان
وخيرنا حِكِر
على الكيمان.
وفي الآخر
كمان بتشوف
مرتب كم شهر
موقوف.
مسرح وين
بحل الدين؟!
دراما شنو؟
تحوق في منو؟
شعر مردوم
ونقحي الجوع
بحاحي النوم.
وكل الخير
في أيد الغير
وأسياد البلد
بالكوم.
يفوت (كسرى)
يجونا (الروم)
يفوتو الروم
يعود كسرى.
نبيت نحلم.
صباح بكره
يبل الريق
طرق كسره
ويضيق الحال
خرم أبره
ومن حالنا
الأمير يبرا
وشوف يا دوش
محبوس الجعان
في العيش
وأسراب الصقور
حره.
أخوي الدوش
أخط فقدك
أغمس حرفو
جوه الدم
يدقدق في الرويس
ينتح
شقا المشوار
وقطر الهم.
أعاين في الزمن
لافتات
حروفها كضب
ولونها عدم.
أشعار من رماد
وسواد
جرايد للمديح
والذم
بنوك لملوك
ناس صايمة
وناس بتلوك
وتسهيل للقريب
والعم.
دحين يا دوش
قبل ما تموت
كان في البنك
حسابك كم؟
هو مسرح وين
بحل الدين؟
دراما شنو
تحوق في منو؟
معاهد أية؟
تدخل (حاج)
وتمرق (بيه)
شنو (التلفاز)
هو يا أستاذ
و(مافيا) الحوش
بتطرد ناس
وتدخل تووش؟!
ده عصر المصر
منو المحتاج
دروس العصر
عشان يفهم
في ناس بتبيع
ذمم في السوق
عشان تطلع
تنطط فوق
شبك للحش
ومليون وش
وحبل المكر
صار مطلوق
عمر يا خوي
متين (عبده البلد)
حيروق
متين دنيتنا
تبقي شروق؟؟!!
متين دنيتنا
تبقي شروق

متين دنيتنا
تبقي شروق؟؟!!

متين يا عمر

فيصل خليل.. ياراجل ؟؟؟
والله العظيم اتاريك زول ما ساهل
انت فن وادب وشعر ونثر لكنه يمشي على قدمين
تحية لك على هذا الابداع المنقطع النظير وطالبين منكم قصيدة بناديها . الف شكر

ومرس ليك الطلب يا محمود

بناديها عمر الطيب
الدوش

بناديها
وبعْزِم كُلّ زول يرتاح
على ضحكَة عيون فيهَا
وأحْلم اني في أكوان
بتْرحَل من مراسيها
عصافير
نبّتَت جِنْحات
وطارت
للغيوم بيهَا
مسافرِ من فرح لشوق
ونازِل
في حنان ليهاَ
أغنّي مع مراكب جات
وراها بلاد حتمْشيهَا
واحزَن لي سُفُن جايات
وما بْتلقَى البِلاقيها
بنادِيــــــهَا
***********
ولمّا تغيب عن الميعاد
بفتِّش ليهَا في التاريخ
واسأل عنَّها الاجداد
واسأل عنّها المستقبل
اللسّع سنينو بُعاد
بفتِّش ليها في اللوحات
مَحَل الخاتر الما عاد
وفي الأعياد
في شهقَة لون وتكيَة خط
وفي أحزان عيون الناس
وفي الضُّل الوقَف ما زاد
بناديهَـا
*********
بناديهَـا
والاقيهَا
واحِس بالُلقيا زي أحلام
حتصْدِق يوم
والاقيهَا
واحْلًم في ليالي الصيف
بَسَاهر الليل
واحجِّيهَا
ادوبي ليهَا ماضيهَا
واطنْبِر ليها جاييـهَا
وارسِّل ليها غنوَة شوق
واقيف مرات واْلُوليهَا
وانادِيهَا
وبناديهــا
وبناديهــا

عووووووووووووووووووووووووووووووك

شكلو البوست واعد

مسافرِ من فرح لشوق
ونازِل
في حنان ليهاَ
أغنّي مع مراكب جات
وراها بلاد حتمْشيهَا
واحزَن لي سُفُن جايات
وما بْتلقَى البِلاقيها

والله يا فضل زخم من المفردات و المعانى غير مسبوقة.

مسافر من فرح لشوق و نازل فى حنان ليها ( كلام )

الحقو يا فاتح و الجنيد

فاتح سلامات يا عزيزى

بتطْلَعِى إنتِ من غابات
ومن وديان...
ومنى أنا..

قلت زخم من المفردات و المعانى ( حصرية ) يا فاتح

حزنك خرافى يا دوش

الفاتح اخوى تسلم ياخى

وباقات النجوم الجن
يعزن فى المطر..
فاتن عزاك .. رجعن
وشوق رؤياك زمان.. مشدود
على أكتاف خيول... هجعن

الرسم بالكلمات يا فاتح ( صورة ) غاية الجمال و الروعة . سبحان الله تقرأ و تشوف.

بالله يا فاتح ارجع لنص بناديها عليك الله.

فضل الف شكر يا استاذنا و يا ريت لو تكتب لينا عن تلك الايام

تحياتى لكم جميعا

بوست رائع وممتع شعراً عذباً وأعمال ستظل خالدة ، وهذه لمحة بسيطة عن حياة الدوش وقصة زواجه بالإستاذه سعاد محمد الحسن، عله يشكل إضافة لهذا البوست الشيق والرائع..وتحياتي لكم.


***منقووووول
- **بقلم بكري محمد

ولد عمر الطيب الدوش في مدينة شندي 1948م تخرج في معهد الـموسيقي الـمسرح قسم الـمسرح - وهي أول دفعه تتخرج في الـمعهد ومن زملائه بالمعهد هاشم صديق وإسحاق الحلنقي وصلاح الدين الفاضل وناصر الشيخ . وفي قسم الـموسيقي كان محمد وردي وانس العاقب وعثمان مصطفي.. ورائعة الحلنقي (عصافير الخريف) في افادة من صلاح الفاضل يقول فيها إن الدوش قد كتب الـمقطع الأول لأغنية (عصافير الخريف) علي السبورة(..ليه يا عصافير الخريف ) ثـم قام الحلنقي وعلي ذات السبورة مجاوباً.
وسعاد محمد الحسن زميلة فاضلة جمع بيننا العمل في الإدارة العامة للشئون المالية والإدارية بوزارة الدفاع كانت هي في شعبة الحسابات وكنت أنا في شعبة المراجعة وتمتاز بالهدوء وطيب المعشر والأحترام وكانت تحظى بالأحترام والتقدير من جميع زملائها وهي زوجة الشاعر المبدع عمر الطيب الدوش (طيب الله ثراه) وشاعرنا غني عن التعريف فهو من أعلام الشعر في السودان وصاحب الروائع الخالدات ـ الساقية للفنان حمد الريح ـ بناديها والود وتأجوج والحزن القديم للأستاذ محمد وردي ـ وسعاد للأستاذ الكابلي وهذه القصيدة سعاد لا علاقة لها بالأستاذه سعاد فهي قصيدة قديمة كتبها قبل أن يلتقيها.
وقد تحدثت الأستاذه/ سعاد محمد الحسن عن الأستاذ المبدع الدوش وعن قصة الزواج ومواقف آخرى في حوار لها ذكرت الأستاذة سعاد:
((كنا ندرس في معهد الدراسات الاضافية بجامعة الخرطوم آنذاك، في فترة حكم مايو 1983، خرج أساتذة المعهد لإستقبال شخص ما لا نعرفه نحن الطلبة وكانوا (متكتمين) عليه، كنا ننتظر هذا القادم بشغف بعد أن عرفنا من الأساتذة أنه صديق عزيز لديهم، فجاءنا شخص أشعث أغبر يحمل كمية من الكتب لا يستهان بها، وكنت أول من أصدر تعليقاً عليه وصحت سجم أمو واخواتو بدل مايجيب ليهم شنطة هدوم جاب ليهم شنطة كتب)،وقام بتدريسنا تاريخ المسرح وبعد شهر على بقاء هذا الأستاذ معنا عرفنا أنه (عمر الدوش).
وعن سر لقب (الأستاذ أبوحجاب) الذي أطلقناه عليه تروي الأستاذه سعاد:عندما جاء الدوش لتدريسنا كان يعلق حجاباً قديماً على عنقه (ضحكت وأردفت بطريقتها المسرحية (أظنو مما سافر كان لابسو)، وأطلقت عليه الأستاذ أبو حجاب، في أثناء المحاضرة إنقطع حجابه وهوى على الأرض فتناوله مسرعاً ومده إليّ ووسط دهشتي قال الدوشأمشي أعملي لي خيط للحجاب دا) ، خرجت احتج بين زملائي وأقول( ليه قال لي صلحي الحجاب الأستاذ دا عذبني) ومن الحجاب بدت الحكاية.
وتحكي الأستاذه سعاد حكاية زواجها من الأستاذ الدوش (كان زواج مخالف للعادات السودانية كان في شهر سبتمبر 1986 ) : أنا أول فتاة تتزوج بلا مهر ودون شبكة، الدوش دفع لأهلي خمسة عشر جنيهاً وقال لي(إنت اغلى من إني إشتريك)، خالاتي زعلو شديد وقالوا لي( الترابة في خشمك إنت ناقصة من البنات شنو)!، كنت مقتنعة بالفكرة ووقتها كنا نناهض المظاهر الفارغة في المجتمع السوداني لذلك قررنا أن نبدا بانفسنا، تم الزواج دون حفلة ولم أرتدي الزفاف، عند المساء إشترينا (جردل) فول وذهبنا الي منزل أخت عمر، والوحيدة التي حضرت عقد القرآن من أصدقائي هي سهير عثمان قوليب، في المساء تجمع أصدقاءنا في بيت أختو . حسب الرسول كمال الدين شال العود وغنى وأصحابي غنوا لي ، وانا ذاتي غنيت فاصل في العرس، وناس بيتنا ذاتهم إشتروا عشاهم من الدكان!
وتقول الأستاذه سعاد:عمر كتاب مفتوح للجميع،بسيط،واضح وساخر جداً للدرجة التي كانت تغضبني منه، سهل ممتنع يمكن لاي شخص أن يتعايش معه، لا يعيش في دور الأستاذ والشاعر، كسول جداً (الموية دي الإ أديها ليه) لا يساعدني في المطبخ لكن كان عنده(حلة) بيعملها كل شهر، عمر ما كان بيرضى أنظف غرفته لأنه كان يكتب الشعر على الأرض ، يكتب في صندوق السجائر وعلى قصاصات الجرائد، كان يكتب تحت شجرة ظليلة في البيت وعندما الحظ أنه إنصرف عني إليها أدرك أنه يكتب في قصيدة أو رواية.

فاتح ، فيصل ، محمود منصور آمل الاضطلاع

طبعا يا عزيزنا الفاتح الحزن القديم تجربة صوفية واضحة .. وأوضح ما فيها مذهب وحدة الوجود الذي نادى به بعض الصوفيين كابن الفارض ومحي الدين بن عربي وعندنا في السودان التجاني يوسف بشير وحتى عند الفرنجة عند الشاعر الانجليزي وليم وودزوورث ...ومجمل هذا المذهب هو إتحاد الذات الدنية بالذات العلية بعد السلوك الدائم المتناغم والمتوافق مع كل المخلوقات التي هي في النهاية أصلها واحد هو الله الأحد وهو طريق يؤدي إلى الجذب الروحي الذي يجعل الفرد هائماً لا يحفل بما حوله من العالم الدنيوي حين يرتقي إتحاداً بالذات العلية وتتلخص في :-
1- عدم الكينونة
2- التناغم
3- الاتحاد
وانظر لعمر حين يقول
ولا الحزن القديم
إنتِ
ولا لون الفرح
إنتِ
ولا الشوق المشيتْ بيهو
وغلبْنى أقيف
وما بِنْتِ
ولا التذكار ولا كُنْتِ
هذا المقطع يبين عدم الكينونة واستخدم كلمة و لا كنت ولا التذكار ومابنت
ثم أتى للتناغم في هذا المقطع
بتطْلَعِى إنتِ من غابات
ومن وديان...
ومنى أنا..
ومِن صحْيَة جروف النيل
مع الموجَهْ الصباحيَّه
ومن شهقَة زهور عطشانَهْ
فوق أحزانهْا
متْكَّيهْ
بتَطْلَعى إنتِ من صوت طِفلَهْ
وسط اللمَّهْ منْسيَّهْ
وعمر يود أن يقول أن الأشياء أصلها واحد برغم تعدد الصور فهذا الشيء يخرج منه ومن صوت طفلة ومن غابات ومن وديان من الموجة ومن شهقة الجروف وهو شيئ واحد ومضى أكثر حين يبين هذا التناغم والتوافق( كل هذه الأشياء لها نفس الهارموني)
تَجينى
معاكْ يجينى زمن
أمتِّع نفسى بالدهشَهْ
طبول بتْدُق
وساحات لى فرح نَوّر
وجمّل للحُزن..ممْشى
وأما الآتي لخص به التجربة وفسرها في إطار رائع هو منتهى التناغم والتوافق:
وتمشي معاي
خُطانا الإلفَهْ والوحشَهْ
وتمشى معاي... وتْرُوحى
وتمشى معاي وسط روحى
فالإلفة تمثلت عند الدوش في (وتمشى معاي... وتْرُوحى وتمشى معاي وسط روحى) فأي إلفة أكبر من مرافقة الروح أما الوحشة عند الدوش تأخذ شكل ولون الجذب الهائل لاتحاد الذات الدنية في الذات العلية وبالتالي يصبح عالمنا نحن عالم الجسد يصبح غريباً عليه حيث قال الدوش :-
((((((ولا البلْقاهو بِعْرِفنى ولا بعرِف معاكْ ..روحى ))))) جان كرن بس
نفس هذا الإحساس وصل له الشاعر الإنجليزي وليم وودزوورث وقد تطرقت لذلك في بوست سابق.

الف شكر استاذنا فضل على الاضافة الرائعة.

الجنييييييييييييييييييييييييييييد وينك ؟

الفاتح لم تمر على بناديها

ادوبي ليهَا ماضيهَا
واطنْبِر ليها جاييـهَا
وارسِّل ليها غنوَة شوق
واقيف مرات واْلُوليهَا

الفاتح ............................................................

مداخلتك بطعم الهالوق و فول ابنقوى.

تسلمى يا سهاد

لا يا سهاد احسن ليكى ( ام دقوقه ) من عريض

تسلمى اخيتى على النص ( بس كان الافضل للنص اللون الازرق )

مشتاقين

القصيدة تبين ماساة الريف الذي نزح كل شبابه إلى المدن

ضُل الضحى مشوار
تَزِح وتزِح
زحيح الشمْسِ من وكَن الشروق
زحيحهْا لىْ نُص النهار
الوَنسَه بالسفَّه الكبيرَه
وبالكتاتيح والغُبار
الفاقَه
والعُمْر الهِظار
والزمن البروِّح
((سمْبهار))
واحِد شردَ
قال المدينَه
قروشهْا تَبْ ماليها حَد
واحِد سرَق
كُل الهُدوم الفي البيوت
راح باعا في سوق الأحد
رسّل جواب
قال أصلو مابِنْسَى البلد
وكتين هدومو يَمَلِّصاَ
جَرّبت عصايتي
مشيت أَنَقِّر في الحَصى
آه يا ولد
ضاقت عليك كُل البلد
والدنيا ليل
سمعتَ زي نقْر الكمان
حِس زول بِمش
تاوقتَ من تحت الكِفيف
عاينْتَلا
والحقِّ لله العظيم شاغلْتَها
أيوه عارِف إنِّو عيب
لكن شنوالفى الدنيا
!!أصبح ماهو عيب
المَطْوحَه من كلَّ زول
مطلوب قروش
وللأّض القُعاد تحت الأسى
!وضُل الضحى
جرّيت عصايتي
مشيت أنقِّر في الحَصى
الحِلَّه ما بين يوم
وليلَه
إتْشلَّعَت

تذييل : فضل
نعم اتشلعت يا عمر وكمان سكنها البوم

نعم استاذى فضل اتشلعت

هذه حكاية أخرى يا فضل

حكاية

في الزمن الموشّح بي سكين
وحربَهْ
والغيم المسافر
لَمّ دموعي خَبَّ
طلَّ الخوف ملفّح
بى حُزن الغلابَهْ
خلَّى الشوق مهاجِر
بين صمتي و
عذابْها
اتْلاشَت مسافَهْ
مابين سيل وغابَهْ
مابين ضُل سحابَهْ
وبين وتر الربابَهْ
اتلاشت مسافَهْ
بين صمتي وعذابْها
فوق ايام حنيِنَهْ
مالتْ بي ضفيرَهْ
صَحّتْ موجَهْ نايمَهْ
زاد النيل دميرَهْ
مالت نخلَهْ
تهمس
لي موجات حسيرَهْ
عن أشواق أسيرَه
مامعروف مصيرهْا
يا غيـــم وين مسافــر؟

الله ياسهاد جللت لينا البوست بصورة الأخت العزيزة التومة بت الطيب بت مريم العقيدة ... إنت عارفة أيه مريم العقيدة ... مافي عريس من عرسان ناس أبوجبيهة خاصة الجيل الأكبر مننا إلا وربطت خالتنا العزيزة مريم حريرتة وجرتقه وختت ضريرته وصوت قراءة يسن والفخر بأهل بيته... رحمها الله رحمة واسعة ولا أنسى كسرتها بشرموط الغزال ومعنا الطيب محمد جبرالدار وأخوه مراهد ولوعايزة تعرفي أكثر أسألي عنها آمنة الحاج البشير إذا خايفة أن تكون شهادة التومة مجروحة فهي زميلة رابحة عليهما جميعاً الرحمة وأيضاً ليلى محجوب وحواء عبدالرحيم راضي والمرحومة فاطمة عبدالكريم جادالسيد... أيام .. وين الآن الحباك وأهل الحباك الزمان.

والله ايام يا زمان ابكى و اتحسر عليك

تعرف يا فضل اصابتنى الدهشة عندما نظرت الى الصورة قلت حاجة مدينة دى الجاب صورتها

هنا منو؟ وبعد ان تأكدت من اسم المتداخل حتى تزكرت انها التومة الطيب ناصر.

والله يا فضل العبره خنقتنى

اواه عليك يا ابوجبيهه

تحيتى

الله يديك الصحه والعافيه
خالى الغالى
وربنا يرحم حبوبه العقيده
ويجعلها من الشهداء والصالحين
ويرحم ويغفر حبوبتنا (بت السره )
التى صوتها لم يفارقنى ابدا .
لك التحيه والشكر خالى العزيز خدوره
وربنا يديم الحب بيناتنا ويخليك لينا .

اخى فيصل
والله ادمعتنى
وكما قلت
نعم ماما مدينه وماما التومه
اخوات
ولذلك
الشبه هو شبه الاخوات ولا غرابة فى ذلك.
خالص حبى لهن وربنا يحفظهن من كل بلاء
تحياتى