الشجون و الجنون _ تباريح خريفية

(1)
الدعاش

خوفي الشجون و الجنون _ تباريح خريفية Post-1424-1270328684_thumb

من حزن الدعاش
وشْ المرايا
موت
حنين الإندهاش.
........
خوفي
من مطراً نزيف
صوم البذور
من رشفه
من مطر الخريفْ
وتضيعي
في رمل الزمان
واركب أنا
سفر الطناش
........

خوفي
من هَبَة نسيم
يعلن
على الدنيا الخريف
عارف أنا
وفاهم أنا
جنس العلاقة
بين سحابو
وذكريات
زمن النزيف
........
هل كان وَحَل
ولاّ انْقطاع
شريان حنين
قبّال يصل ؟!!........يمكن صيام
من جمره
في برْد القُبل
أو السلالم للسقوف
المافي حُضناً
مال عليها
ولا أمل
فيها اْنتكل.
........
ولاّ انتحار
نَفَس الكلام
نص النهار
والوحشة
في حضن العسل
أم اٌنكسارات المسافة
بين رمالك
والخريف
والرَجّه
في وهم السكون
والخجّه
في السفر العنيف؟!
........
شجن الدُعاش
(حُزن الحقايب
والرصيف)
جِنّ القطارات
لاَ بْتَسافر
لا بْتَقيف.
حلم الجعان
وكتين يسبِّح
للرغيف .
بَلل المناديل
من مسامات الحنين.
وَرْد المناسج
بي إبَر كفّاً شفيف.
المحبه
تستقيل من فيضا
تبقى
رماد وحبه.
المحكات
الدواير
المحاور
الخناجر والنزيف
........
خوفي
من حزن الدعاش
وشّ المرايا
موت
حنين الإندهاش
خوفي
من مطراً عنيف
يعمي العيون
والرؤيا تَقْصَر
في الغباش.

(2)
سحابة سمرا
لو يوم أشوفك
الباب يقول
-الدنيا عيد
........
ومتين تجي؟!
عليك هواي
يانجمه ما تتأخري
جَهّزت ليك
فرح الكمان
ونَقَشت
في الأبواب نشيد
وفتحت جدول
وشُرفتين .
........
إرصاد هواي
راجي المطر
والخوف كمان
النيل يزيد
........
أنا بسري بيكْ
في كلِ ليل
بين السبايب
والسهر
بين المجاهل
والبحر
بين المدارج
والخطر
بين المراكب
والضفاف .
........
أنده نسايمك
كلو صيف
واْدلف لسقفك
في الخريف
وادفن في شَعرِك
مُر أساي
وأقصد حواكْ
وكت النزيف
واحيا بْنَداكْ
عِزّ الكفاف .
........
الحب صبح
في الدنيا
زي ( راحل مقيم)
بس في ضراك
بنقع شذى
الألق القديم.

(3)
سحابه رماديه
الزمن اتْدوّر (1)
الزمن اتكوّر
إتماص
إتناقص
قَلّ وخَفّ.
حَتّل روحو
كرفس روحو
واصبح لفّه.
........
الفقرا الكانو
بِقِسمو النبقه
الجوع الكافر
أصبح شكلو
حديث ومعاصر
خلّي النبقه
اتبدّل دينا
وصبحت منقة.
........
الحب الكان
مربوع ومصدّق
إتهلهل ساسو
وتوبو إتلفّق
صوتو اتشقق
نَشّز وعشرق
مات بالسكتة
وكف الخنقة .
........
مجنونه مَغَاوْر
الزمن المارّي
الجوفها مدبب
وطافحه مجاري .
مسكينة مآثْر
العصر الجاري
الطولها مَغَتا
و(عرضها) عاري.
........
غَطّانا وكالنا
رماد الكلمه.
حاصرنا وطالنا
جراد اللّمه
حلوقنا اتعثر
شوفها وقَلّ .
بكّانا الحاضر
غَشّانا رمانا
في بطن السله.
........
سرقتنا النِقّه
دقتنا النِقّة
بيناتنا اتمادى
محيط الشِقّة.
صدورنا اتْقلّت
وصومها حَرَقْنا
وأحلامنا انداست
وسط الزنقه .

(4)
سحابه سودا
إتّكيت
في دمعه حَرّي
واقفه في رمش
المجرة
........
جيت ألوك
المُرّة حلوه
لُكتَ
طعم الحلوه
مُرّة
........
إنتظرت الشمْس
تشرق
من سواد
شَعَر المسره
إنسجن نورا
في سبيبه
نام تحت أقدام
غريبه.
خاصم الدنيا
القريبه.
إنكسر
من برّه جوّه
وانتحر من جوّة
برّة
........
إنشطرتَ
في لحظه ذرّه
من أسف
وخزة غبينه
ومن قلق
رهبة سكينه.
انعزلت رماد
في جمره
خجلت
من سُترة عَرايا
غطست
في قعر الدوايه
انجرحت
(بشوله) عايمه
وانبهطت
(بشدّه) حايمه
واْنشرقت
(بِنُقطه) حُره
........
إتسقيت مُراً
أمرّ
جيت على غابة
قوافي
شُفت كل الغابة
مافي.
نجعت لي سطرين
كتابه
إنجلدت من الغرابة.
مالي طششتَ
ونِشِفتَ؟!
كلو غابه
أخُم سرابا
وكلْ (كتابه)
أشوفا (طُره).
.......
النقيح جَرّ
استمرّ
الضحك
أصبح بُكايا
النضم
ما بتم رواية
الحريق
عِزّ السقايا
الليل مشتّت
في الحنايا
الصباحات
مَرّه .. مَرّه
.......
القَدَم نايمه
وتعاين
البطل
في السينما خاين
الأمير
عاس في الجناين
الجراد خلاّها
فَرّ .
........
السباليق
بالعة بوزها
السبايل
بايعه كوزها
البعوض
أصبح حكومة
البنات جادعات
هُدوما
الضلام قَرَش
الرتاين
الوهم رسم
السفاين
في بحر خلاّها
مَرّ .
........
يا عفاريت الأصيل
غُشوني
(بالصبر الجميل)
الزمن
من صدري فَرّ
القَطَر
من فوقي مَرّ
الغباش
ياهو الطشاش
المراجع
بين عساكر
وبين مقابر.
.......
ولا مَفَرّ
لا مفرّ.(5)
سحابه بيضا
إبتسمي (2)
الدَغَش البدري
يلالي ويسطع
العشم المحَري
في عِرْق الشارع
يناغم ويجري
الصوت من ليلنا
يتاوق ويطلع
عيون الفرح
الكِتٌلَت مره
وضاقْت المُره
تَفَتِّح وتلمع .
........
إبتسمي
البذره تفتِّق
وتصبح فِكرة
تسامر وترْفع.
الوجع الطاغي
يفارق غادي
يهاجر ويرجع.
الأمل الغامر
يسوق الحاضر
يحاور ويدفع
حروف الشُعرا
في صدر الضَلْمه
تولع جمره
وترفض تركع .
.......
إبتسمي
الشمس الغامْره
تنادي خيوطها
تطرّز وتجمع
الأرض السمرا
تمد إيدينا
تَقِلْد الفقرا
تبارْك الشُفّع.
المدن النايمه
تكبِّر قايمة
ويجلجل صوتها
في وش المدفع

(6)
الفواصل
(أ)
القمره
ساكنة الشجره
البذرة
عاشقة المطره
خليك دوام
غيمة
بتشاوري (للنيمة)
ضُلك معاي ديمة .

(ب)
صباحاتك
صباح الوردة
والريحان.
صباح الضحكة
والألحان
صباح الساقية
والنخلة
صباح الروقة
والمهله
صباح المطره
والسهله
صباح البسمه
والانجاز
........
صباح الخير
علي ناساً
علينا عُزاز .

(ت)
احبك وبس
حب مغسول
بي نور الشمس
حب بالكلمة
حب بالضمه
حب بالفتحه
حب باللمس
........
بكره يكون
حب صرّاحي
حب صبّاحي
وما بالدس .

(ث)
اتْذكرتك (3)
كُت فتران
مهدود الجته
فجأه لقيت
أقدامي اتْصابن
عيوني انفتحن
عِرْفو السكه
كنت مشوّش
وعاشق لِكّه
بقيت تلميذِك
عديل أتهجّا
واعرف أقرا
كمان اتفاصح
طول الحصه .

(ج)
اشتقت ليكْ
شوقاً صباحي
نُص النهار
الشوق طفر
أصبح بحر
عالي وخرافي
فجأة رنّ
وحنّ جَرَسِك
وجاني صوتِك
زي تقول يابت
ندهتِك
ياسلام....
لما الشِعر
بي صوتك
يصدح
تبقى مجنونه
القوافي . .
........
أنا بي رسايلك
زول كُتُر
إِستنا
بس زي التقول
راميني
(كيف) شاي العَصٌر
أرجاكي
زي برق الصَبُر
الشوق رياح
والغيم يمٌر
.........
.........
مطرك متين
يروي العُمُر؟!

يا سلااااام يا فيصل . روعتك كروعة الفنان الاصيل هاشم صديق الشاعر الكبير العملاق المسرحي صاحب ( الوجع الخرافي) و (ضلفة البت الرتينة)’’’ه

ياوريف هذا الصّديق
يلملم الأحلام حين يغفو ليلاً ... قصائده .. روائعة تولد مساء
يمشط جدائلها بعطر الجنون... ويهديها لنــــا..
هاشم إنساااااان متفرد
ذكرني نظمه الأنيق ... في هذا البوست بــــ أحجية الجحيم
لــــ بت القاسمي
********
لا شيء في القلب
سوى الرماد
ذكرى تبوح بسرّها
لمراكب الأحلام
لمدينة غرقى بعتمة أهلها
تمتد في الساحات
رائحة من العطر الكسيح
أغوي مناماتي
ليصهل بعض هذا الفجر في أرقِ
فأنعس كالهشيم
رأيت يا أبتِ
جبال المزن تلفظ نورها
في قعر غيمتنا
تثور على دساتير المجرة
تحشر النجمات في فلك أسير
وملائك حيرى
على بسط التسابيح الحزينة
تنأى
تذود لظى المعاني
**************
شكراً عزيزي فيصل صّديق !!!

ما اروع هذه الكلمات الرنانه
تسلم كتير يا اخ فيصل

هاشم صديق ؛ كما هو عما محجوب شريف نفس الكلمات الحياتية اليومية ؛ نفس النسق
مع اختلاف اللونية ؛ بسيط ككل السودانين لو جلست اليه ؛ عميق النظره ؛ حبوب

شكرا فيصل ؛؛؛
ما قلنا ليك نلملم الحاجات الحلوه في منتدي سمح كده
محجوب؛القدال ؛ هاشم؛عاطف خيري؛ الصادق ؛ عبدالله ؛ وآخرين

سلام ياناس ياروعة

كتاب الجانى يا ناس انتو كويسين كواسه شديده

شكرا على الروعه يا سلاااااااام اشراقاتكم انبثقت انبثقات شديييييييده

شكرا لككم جميعا

ههههههههههههههههههههههههههههها

غايتو يا شهاب ضحكتنى شديد

تحياتى

واخر قولي مثلما قلت اولا::
كم انتم رائعون عندما تلتقون في ساحات الوغى الشعري الاصيل النبيل
ابني فيصل
الاستاذه ناهد عبيد
الاستاذ النقر
شكرا على الابداع وشكرا على روعة المداخلات

احبك وبس
حب مغسول
بي نور الشمس
حب بالكلمة
حب بالضمه
حب بالفتحه
حب باللمس
........
بكره يكون
حب صرّاحي
حب صبّاحي
وما بالدس .
.......
هو ده الجنون
حقيقى ابداع
تسلم ابو احمد
ويسلم شاعرنا العظيم
هاشم صديق
ولكم منى
احدى جنونه لعلها تنال اعجابكم

حروف اسمِك
جمال الفال
وراحة البال
وهجعة زول بعد ترحال
وتنّية حلوة للشبال
ودنيتنا ومشاويرنا
وغنواتنا الى ما بتِنقال
حروف اسمِك
نجوم ركّت على الياسمين
فرح فى عين جمالها حزين
أساور فى إيدين طفلة
بتحفظ فى كتاب الدين
زَفَافَ عاشقين بعد فرقه
وسط باقات دُعَا الطيبين
حروف إسمِك
عقد منضوم بخيط النور
وطلة وردة من السور
ونغمة تنادى من طمبور
وشُعلة فرحة فى الوادى
تَشِع جَذلانه ليها شهور
حروف إسمِك
وَكِت أشتاق وأرحل ليك
وأسرح فى عسل عينيك
بِتَحضِنّىِ......
قَبُل ألمسَ حرير إيديك
تأرجِحنى..وتَفَرحنى..وتخلينى
أدُق سدرى
وأقيف وسط البلد واهتف
بريدك يا صَباح عمرى
تحياتى

وكيفن ما تضحك ياوريــف ...
ما انت ما الزول المن عرفتو
طرفي ما اظن مـــــــرة دمّع !!!!!

سلالالالالالالالام
يا اهلنا الناس الرائعين
تسلمو علي هدا الجمال

سلامات يا ناس يا رايعين

شكرا على مروركم و بالجد اضفتوا الكثير

تحياتى

الشجون و الجنون _ تباريح خريفية

الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية

رد: الشجون و الجنون _ تباريح خريفية