حرامي القلوب لن يتلب

دعا الأستاذ الشاعر أزهري محمد علي الشعراء الشباب للاهتمام بالأغنية باعتبارها تمثل أهمية كبيرة لقطاع واسع من الناس وقال إن الاهتمام بها وإحكام أسوارها يمنع حرامي القلوب من أن (يتلب) جاء هذا قبل تقديمه لقراءات من أشعاره يختتم بها الليلة الشعرية الكبرى التي نظمتها مؤسسة أروقة للثقافة والعلوم بالتعاون مع معرض الخرطوم الدولي للكتاب في دورته السابعة والتي احتضنتها قاعة اتحاد المصارف مساء الأربعاء 12أكتوبر ... ابتدر الليلة الشاعر الشاب أسامة تاج السر أحد فرسان أروقة والذي قرأ من أشعاره الفصيحة واختتم قراءاته بقصيدته (بعيداً عن الحرب قريباً من الحبيبة) تلته الشاعرة الشابة إحدى نجمات مسابقة أروقة (سحر القوافي) الشاعرة ماجدولين سعد والتي أبدى الأستاذ الشاعر سعدالدين إبراهيم إعجابه بها وبقوافيها ... مفاجأة الليلة كانت في الشاعر الشاب عبدالقادر مكي والذي أدهش حضور الليلة وهو يقرأ (فغني إذن والريح عارية وليس لديك باب) شكرته مذيعة الحفل الشاعرة ابتهال مصطفى على جميل ماقدم وقالت له عرفنا سر كبرياء الشعر معك ... صعد بعدهم الشاعر السوداني القُح عزمي أحمد حمد ( ولايهمك حساب التنكي والشوق الببق بنزين ) وقاطعوه بالتصفيق عدة مرات ... هيام الأسد أحدى الأصوات الواعدة بخير كثيف في عالم الشعر وهي أحدى المنتقلات للمرحلة التالية من مسابقة سحر القوافي ... أبوبكر الجنيد مزج في قصيدته بين الفصيح والعامي وأجاد في كليهما وأهدى آخر نصوصه للراحل المقيم الطيب صالح قصيدته عرس الزين والتي يقول فيها : ( آناس الحلة أنا مكتول وأظل أركض في شوارع غربتي ... للناس ضحكاتي ولي وحدي ضياعي والعذاب) ... إحدى نجمات الليلة نضال حسن الحاج قرأت بمزاج رائق وأمتعت الحضور بأدائها وحسن اختيارها لتؤكد ( وطن مبدع .. وطن فنان وطن بي قامة الإنسان .. وطن كفت خدود الجوع وعا وكان الفقر سكران) ... ثم الواعد والقادم بقوة الشاعر محمد محمود المظلي الذي احتفى بهذه الليلة وجمهورها الذي يتقدمه والده لأول مرة يتابع في لقاء مباشر وقدم ثلاثة نصوص مدهشة تؤكد على أنه يجيء بقوة ... تم تركت أروقة ختام الليلة للشعراء الفحول عثمان أحمد سعيد الذي أشاد بالشعراء الشباب وشكرهم على ماقدموه وقال إنه يحبهم ... ثم الشاعر الكبير محي الدين الفاتح الذي أمتع الناس بكسلا مرتين رددها معه الحضور ثم ختم الليلة الشاعر المرهف أزهري محمد علي الذي شكر أروقة على أنها تفتح لهم دوما إضاءات على الجميل في عالم الثقافة وشكر وزارة الثقافة على تنظيمها لهذا المعرض في دورته السابعة وقرأ لزوجته الراحلة (ياصالحة) وتفاصيل لصديقه معتصم (وأنا في انتظار وش الصباح يمرق من الفج العميق) وخرج جمهور الليلة منتشياً بجملة الأشعار التي تناوب على قراءتها هذه الكوكبة من الشباب والكبار ... الجمهور كان بينه رئيس اتحاد الأدباء السودانيين ومعتمد محلية سنار الأستاذ/ فخر الدين يعقوب الزين وعدد من الإعلاميين والصحفيين وحظيت بتغطية واسعة من القنوات الفضائية والتي ستبثها قريباً ...

الاحداث

حقيقةً محتاجين لتنقية لآذاننا.. جراء هذا الغناء الهابط الذي يجتاحنا كل صباح ومساء والذي يحمل كلمات خاوية من أي مدلول
وليت يعلم هؤلاء الذين يدعون شعراء.. بأن الشعر يمثل إرث وثقافة للشعب السوداني

أخي محمود كل ســـنة و إنتا طيب ......... يارايع
تحياتي الى كل أفراد العائلة ...... وليداتي العزاز
وعزيزتي أختهم المدللة...............
نعم كان مســاء شفيفاً ..... استدعى كل جوامع الكلم الشعري الطيب .......وقد أعجبتني مداخلات الشاعر الهرم أزهري .... وقفشاته عن " حرامي القلوب " الذي لا طعم له ولا لون بل هدد الحرامي بالتراجع في ظل شعراء نضموا الكلام الجميل ....أعقب هذا المدخل مرثية لرفيقة دربه ونضاله ... إمتثال (صالحة) ..............
دخلتى زى ختة نفس
دخلتى زى ختة نفس
ومرقتى فى لمحة بصر
مرقتى لا حس لا خبر
لا لوحت ايديك تلويحة وداع ..
لا سبتى جمب الباب اثر
هشيتى اسراب الحمام
وافشيتى فى الارض السلام
وكانك انتى المنتظر..
وكانك انتى المنتهى ..
واول تصاريف القدر..
نحن ادخرناك .. لليالى الحالكات
للزمان المر
وساعات الخطر
ادينى فرضك والنوافل
والباقيات الصالحات .. يا طيبة وانتى على سفر
يا الله ..من هذا السفر ....
يا الله ..من هذا اللهيب....
من ..وجهها الطلق الخصيب
من كفها دعاش المطرمن ضحكتا
ورقة صباحاتنا الحليب
من وشها المليان بطر
انا خفتها تفتح شبابيك النحيب
وتشُر على روحى الفتر
وانا شفتها فى لحظة الحلم الغريب
تتوالى فى الخاطر صور
كانت حكايات كلها
واضحت مواجع كلها
ادمنا وجع الاجترار
واحتجنا لى لحظة مقيل.. فى ضلها
احتجنا نكتب ليك قصيد
ونغنى (بنحبك بحر)
واحتجنا لى لحظة زمانا المترعة
زمن الامانى الطيبة .. والريد .. والدعة
والفلب فاتح والخلايا ابواب كلها مشرعة
العاديات.. عدت على تعب الجسد
وركضت خيولك مسرعة
ليه راقدة فى ضيق اللحد
والدنيا بي هذى السعة ..
الغيم فى متناول ايديك
والفلب بور
والمطر زى ما تشتهى
ارمينى فى ارضك بذور
لمينى من وجع الغياب
تلقينى فى دمك حضور
وادينى مفتاح السحاب
ترسم مسارات الطيور ..
يا مترعة..
مفتوحة شارات المرور
ما بين غيابك و(مشرع الحلم الفسيح)
ضاعت محطات الوصول
من حيلة الخطو الكسيح
قدرك..
تباريك المناحات
تعيش سنين العمر من قفص التباريح
والذكريات فى كل ليل
تفتح حنينك بيت بكا
وتعصف رياح الفرقة
لى حلم المراجيح
قدرك ..
تلاقى الدنبا فى باب الخروج
وتفتح حنين القلب للراحلين..
ضريح
قدرك..
تدارى الحزن فى القلب الذبيح
لا انت فى حلم المسيح
ويا صالحة.. وينو ضلك..
فى الطريق.. وين خطوتك.. فى الرملة
صريها فى منديل علق..
ومديها فى حق السنين
والعشرة والدم.. العرق..
ايديك فى ايدى سوا سوا..
من الصباح حتى الشفق
من الشفق حتى الزوال
والقمر اذا اتسق
وكما اتفق..
نجلس على ضل المزاج
نتعاطى ضحكات الحبيبة
ونحتسى كاسين من الحب الرحيم
نفراها بسم الذى خلق
ونفراها حرف حرف
نسكب صهيل الروح
فى صمت الورق
ونلقاها فى الريح العصف
خضرة سنينا اليانعة
واتحتحتت صفق
ونلقاها فى ضهر الخيول
البتفزع من حوافرها فى السبق..
وتهرع كلما اشتد الرهان
وبانت ملامح اللفة فى آخر النفق
نلقاها..
فى جية الضيوف
والفرحة كل ما الباب طرق
تلقاها فى ختة الراس والحلم
فى الهجعة وان طال الارق
نلقاها فى ضل الصباح
والونسة..ضحكات الصغار..
وطقطقة الاصابع .. طق .. طرق
نلقاها بآخر رمق
وقفت عى حد الكفاف
رمت السناسن فى الطبق
فجت ضلامات السنين..
قامت على ذات النسق..
ومدت ايديها على الحنين
ورشت المشاغبين بالنبق
يا صالحة
لمينى على ثراك
واعفينى من هذا الرهق
وسلميلى على المعاك
السابقين .. الطيبين.. الصادقين
الجملو العالم هناك
طفلة وملامحها من رؤاك
موءودة كانت فى حشاك
انا شفتها بتضمدى احزانك براك
وانا شفتها..
فى البعث فى هيئة ملاك..
فى جيدها باقات النجوم
وفى ايدها اغصان الاراك
انا شفتها..
فى ذلك اليوم العظيم
فى نشوة بتردد غناك
بى حسها الرطب الرخيم
فتحت عليك فى الكتمة
شباك النسيم..
حضروها كل الاولياء الصالحين
فى الطور مع موسى الكليم
مرقت بواطن الارض دون رحم الاليم
وفتحت مصابيح الخلاص
فى عتمة الليل البهيم
وانا شفتها
عبرت معاك.. حبل الصراط المستقيم
ومرقتى اجمل ما يكون
انسان على كف النعش
مرقن معاك بنات كتار
وغابت وراك بنات نعش..
ركّن على دم الغروب
فرّن مع وش الدغش
ردحن على حسب الهبوب
وانا حسى
يبقالن طرش
غشنى بى موية الرهاب
وشنقنى بى حبل العطش
واعدتهن..
ما تواعدن..
واعدتهن
ما تواعدن
ضحكاتن اللبن الحليب
والقمرة مرة مرة بتشبهن..
ما شفتهن .. شافنى هن
ما بين طشاش السكة الشوف البصيص
..شبهتهن..
حزنن على
وحزنت اكتر منهن..
وبكينا كلنا من دواعى الخيبة
والحظ التعيس..
سرقن صهيل الجرح من خلف الكواليس
وكتبن تراجيديا الصراع الجب
وامراة العزيز
النسوة والدم.. والقميص..
مديتى ايدك للحريق
بقن اصابعينك شموع
والقلب فى حنة عريس
وبكيتى والوش منطرح
وضحكنا والايد فى الجرح..
لمعت دياجى الارض فى ضوء الفوانيس
ما تلبسى تياب العطش
اتلفحى النيل قرمصيص
وادخلينى على عجل
يا صالحة من باب السلام
مفتوحة ابواب الفراديس
اتفضلى..
+++++++++++++++++++++++++++++++++++++++++++++++

محمد قادم نويــة ..... كل سنة و إنتا طيب .... أيها الهمام ...... نعم يا ول نوية حقيقةً محتاجين لتنقية لآذاننا.. جراء هذا الغناء الهابط الذي يجتاحنا كل صباح ومساء والذي يحمل كلمات خاوية من أي مدلول
وليتهم يعلمونء.. بأن الشعر يمثل إرث وثقافة للشعب السوداني
جسد هذا المعنى الذي أوردته يا محمد وفي نفس الأمســية ..... الشاعر المأصــل السودانية ...... الأستاذ /عثمان أحمد سعيد بقصيدتــه ....
جننتونا..........
كل زول عامل عزه حبيبتو
وياهو براهو البيغنيله
وياهو العارف سر اوجاعه
وعارف كل اوزان ترتيله
بس ما عرفنا
عزة منو البيغنو ليها
وقادين راسنا بكل وسيله
دي عازه البحتت بى كرعينا
تراب السوق ودروب الليل
أم عازه التانيه الكانت هانيه
وكانت اسمها عازه خليل
ياخ جننتونا
لو بتغنو لعازة السمحه
البت القمحه
ست الناس المافى مثيله
عازه الكانت لمن تعشق
تعشق راجل عندو خسيله
وكان الشوق لما يفيض بيها
كانت تغزلو وفى منديله
طيره و ورده وحرف صغيِّر
يمكن بعض الشوق يهديله
عزه الكانت صوتا مخبّى
زي داساهو وبيهو بخيله
وهسع شاقِّى الصوت الحِته
كان فى الرادى وكان فى ليله
والصبيان الكانو بحرسو
آخر الليل يبقوله دليله
زى ما شايف انت بعينك
الصبيان دايرين توصيله
عزه دى تاهت ما لقيناها
جينا نكوس لى عزة بديله
جينا نفتِّش لى أُمّاته
أُمها قالت عزة حليله
قلنا هى ماتت ؟؟؟؟
لا ما ما ماتت
بس دى طباعه بقت ما هيله
عازة الكان متْقَنِّعَة دايماً
ما شافوها الناس فى جيله
هسع ماشه وناسيه هدومه
او متلفحة بى منديله
*****.....*****
يمكن ديل قاصدين العازه
الغنّاله حبيبه خليل
عازه الحارب ود حبوبه
شان فى ترابه لَمَحْلُو دخيل
الإتْمَرْدَغ فيها تجانى
مَجَّد فيها السحر النيل
خليفة المهدى إتمدد فيها
ودلق الركوه قصاد السيل
ناس إتسجنت
وناس إتشنقت
وناس فى المدفع ماتو عديل
*****.....*****
وينو شفيعا
وين قرشيها
وين الكتبو كفاح الجيل
وين تاريخنا المن ترهاقا
هل دا حقيقة ام تضليل
وهل الناس الهسي بغنُّو
بعرفو عازه بتعنى شنو
ولّا بغنو عشان ما يقبضو
وما هماهم عازة منو
غايتو بقول بصراحه شديده
فتشو عازه الدايره غناكم
عازه اللتنا دى ما هماكم
عازه اللتنا تراب ممتدى
حلفا تلودى جنينه وشندى
عازة اللتنا النيل والمطره
والجمام الرملو مندِّى
عازه اللتنا دى حاجه براها
دوم ونخيل لالوب وتبلدى
دوم ونخيل لالوب وتبلدى
*****.....*****
كل سنة و إنتا طيب وانشاء تلقاك عزّة
" البنعرفــا" يا محمد ونفرح بيك
تـلقـــاها
أصيلة سودانية تتسارق فيك
بعطر الصندل.... تغتال لعيونك
في عسجد ومخمل
بغنج تتبختر .... تويبــا يداعب
...نسام عصرية...ورشة مطره .. في يوم نعسان
دعاشو يغازلك ...توادعك شمســو بطعم البن000

علي ناسا بتاكل اللقمة واسوق الانين الحان ،،،،،،
وراضية عشان تبيع الفرحة في اسواق شقا الاحزان ،،،،،،، بتستخسر مروق الروح بدونك وتشتهي الحرمان ،،،،،،،،
وطن مبدع وطن فنان وطن بي قامة الانسان ،،،،،،
وطن كفت خدود الجوع وعا وكان الفقر سكران ،،،،،،
وطن ايمان فما قولك ..)))
الغـــالي العزيز...... محمود وأجمل ما قرأت وسمعت من نضال الحاج القصيدة......تمنيت لوقرأتها في تلك الأمسية
ولا تهتم يا يابا
ولا يهمك كتير يابا
بناكلا كسره بي مويه
وبنحمد ربنا الجابا
وهي زاتا كتيره اصلا جات
قبيلك ما حلم نابا
مدام العيش في ما بِنْجُوع
ودي المقسومه نرضابا
وسُعًاد والله في جنبك
جُرُعْة المويه نهنابا
دحين لا تزعل آيابا
بتتذكّر زمان يابا
بنتقلْقل من البندر
عشان في الحله نَقْضي العيد
ونفرح يا با حد الفرحه
ما تلحق دروبا تصيد
ونتوكل علي الحله
ونسافر في طريقا بعيد
وناصَلْ مهرجان اعياد
أحس الفرحه صوتا يزيد
ونلقى الحله راجيه نجي
سرامْس الشاي
قعاد الضل
فرح حبوبه بالجيه
وبِدْخُلو ناس وبِمْرُقو ناس
كتار بالحيل و ماشويه
وترَضّي منو وتخلي منو
هو دا يقول ليك تعال لا جاي
ودا يقول ليك تعال لا جاي
هدا الويكاب
ودي امْ تَكَشُو
وهدي الكِسره
وهدي الشيه
وهنا الحروم
ونَسْة البن
رمي الودعات
بنية الصرّه والويحيد
واجِبْدي عليكي دي الطيه
وتحتار انت تاكل كيف
قبيل جوك سبعه نفس الحال
وقدّامك كتار آيابا
مُرْضاتُن دروبا طوال
ويبقى الحال هو ياهو الحال
شِجَرة الضل
وريحة الفل
ويبقى الكل أهل طيبين
بِسُتْرو الحاله
كان بقّ الزمن نيران
وتقابة الفكي امْحُمد
ضيوف الخلوه والحيران
وصوتك يابا لامن تقرا
لما ترتل القرآن
وكضاب البقول بحبس دموعو حداك
ملان شيطان
صباح العيد يجو الشفّع
ونحن الدهشه ما خالانا نفهم حاجه حتى الآن
بسوقونا الصلاه ونمرق
نبارك العيد علي الجيران
تصحح انت معلوماتنا
ديلا أهلنا ما جيران
هناك حبوبه أسكت ساي
دي فرحانابنا يايابا ومسويه فوقنا كم دوباي
بجيبو عليها عيديه
وتشيل وتلم
وبستغرب
دا كلو دحين بياكلو منو
أتاري بلمو في صندوق
بجو الحِبّان يخشو الدار
وكل زول خشّ لازم يضوق
وامي الولَّعت صاجا
ومع المعراكه والطايوق
وأولاد عمي من يوم داكا
شالو قروش وفاتو السوق
دا كلو تمام
ولكن ما هو الصندوق
وجاطت فيني حبوبه
ها دي السحّاره
واتعجّبْ كتير يا يابا
فجأه سمعت صوت طمباره
فرحة عيد مبادي بشاره
بالعرس القريب بالحيل
وكل الناس تقوم تتجاري
أو تتبارى
ترقص في غنا الطبماره
يا حبوبه
مالك لابسه ليك سلسل طويل وجِلِدْ
دي يا المبروكه مُفْحَضْتِي
وهناك الجو ولا هو سخانه لا هو برد
تقول حبوبه جدك يا السميحه وِلِدْ
وِلِدْ راجلا بخود الحارّه ساعة الحارّه نارا تلد
أبوك يا بنيّه
واسكت ساي
واهبّش مفحضة حبّوبه
كان ألقالي فيها قروش
أشيل ميتين
واجِر بره
والاقي البيت غزوهو جيوش
يفضُّو الحوش
ويملو الحوش
كأنو تقولو لمو الدنيا
ناس نبته وحضارة كوش
سعف حبوبه كان منكوش
قطن حبوبه كان منفوش
وأقول أفزع مع البنوت
وتحلف أمي بي أيمانا
بتها ما ها زي غيرا
أحنّس أبويا دايره أرد
أرد بالسرقه من أمي
وأسك عربية السيره
وتشيل حبوبه جركانتي السغْيره
تديرا فوق زيرا
وتقول أنا اكتشفت الذره
يبقى وُرودي هو السيره
وأبويا يقول حصاد العيش
ونقعد لي حصاد العيش
ونركب كارّو للحواشه
لازم نمشي من مافيش
ونمشي نشوف حصاد العيش
وكان يوم امتحن في زرعو
واثقه تمام بكون الطيش
وناكل لقمه بي ملحايه
طاااااااااااااااااعمه
وما بِتَطْعَمْ ليييييييش ؟
إذا كانت سواة حبوبه
وكتين ولّعت حطباته
عاستا بره في الراكوبه
كوجنت العجين في الصاج
وقَضّت بي سراع الحوبه
وَدّتا عاشه بت الخير
ولِي منبوذه لِي معيوبه
نفس الحاله ها يابا
باكر يجي الدرت يا بوي
وتملا هدومنا بُتّابه
ومقسم بي يمين الدنيا
كان غرتنا كضابه
قّدُرْ ما ادّتنا أدتنا
ولا في يوم سرحنا با
وباكر يجي الدرت يا بوي
ولا هامّينا عسر الحال
ومهما طال ضلام الليل
صباحو بجيهو مهما طال
ولا خاب العشم يا يابا
لا خيّب إلهنا سؤال
ولا فارق هواك الروح
ولا كسر احتمالي محال
وحاجه ام سلمه لا كلت
ولا صاب اصطبارا زوال
ولا ملّينا عسر الحاله
لسه عشمنا فاتح فال
ولا تهتم يا يابا
++++++++++++....................++++++++++

أما الشاعر الشاب اللبق محمد محمود المظلي .... فقد أدهش الجميع بقراءاته الشعرية وكانت القصيدة الثالثة .....
مظلومة أعمارنا تستنزف
وذليلة ومهانة تستضعف
أحزاننا في الروح تطحن كالرحى
خبازها كف الزمان المجحف
فإذا أطل دقيقها وطحينها
شبع الزمان وكل شيئ ينسف
للموت أكبر كعكة في عيد مولده تضج بلحمنا وتزخرف
يتهافت الموت العجوز وظله
من فوقها حتى تحاط فتخسف
فإذا انقضى الكعك المعد بلحمنا
غدت الدماء له خمورا ترشف
جمع من الأرواح ضجت تشتكي
وتساءلت عن أي ذنب نقصف
لله موت مؤمنون بخيره
وبشره، لكن ذا لا نعرف
أو هذه الأرض التي جئنا لنخلف ربها صرنا بها نتخلف
لو كان للديدان نصف عقولنا
أدى الخلافة دودنا المتخلف
لكنه تحت التراب مكرم
أمد الحياة وفوقه نتخطف
نمشي كأن رفاتنا تسري وتعرج للردى ببساط حزن يعصف
فإذا أتته توضأت من بؤسها
من ثم صلت والردى يتلهف
يمتص منها أمنها وخشوعها
ويردها في نعشها تتخوف
تتقاسم اللحد الصغير وبؤسها
كحبيبة وحبيبها تتناصف
اليوم تبنى للمنية قلعة
ومصارع الإنسان فينا ترصف
وضياء آخر شعلة في مؤمن
بصق الزمان بوجهها والموقف
ما كان فينا من جسارة أمة
نفقت تعفن حلمها المتعفف
سيقت لقبر العار أبشع جثة
والموميات بقبرها تتافف
تشكو روائح أمتي وفواحها
في كل قبر بالمقابر تدلف
والكل يكره ريحنا وهراءنا
لكننا جهلا بهم نتشرف
لبس الخضوع جلودنا وثيابنا حتى تمطى فوقنا يتقشف
لو تمعن الزرقاء فيه لأعجزت
هل ذا الخضوع بشحمهم أم معطف
ديست كرامة أمتي ورؤوسها
وغدا يداس الدين ثم المصحف
لو كان للقرآن بعد محمد متنزل
لرأيته يتأسف
تستبرئ الآيات منا أو غدت
للأعجمية حينها تتحرف
+++++.....+++++
وكل عام وجميع أحباب المنتدى بخير وعافية

حرامي القلوب لن يتلب

حرامي القلوب لن يتلب

رد: حرامي القلوب لن يتلب

رد: حرامي القلوب لن يتلب

رد: حرامي القلوب لن يتلب

رد: حرامي القلوب لن يتلب

رد: حرامي القلوب لن يتلب