من روائع الشاعر بشري ابراهيم -------عيد ميلاد

من طرف **الحازمي** 3rd يونيو 2012, 22:42

من روائع الشاعر بشرى البطانة.........عيد ميلاد

من روائع الشاعر بشرى ابراهيم وبصور قصة عندما دعته زميلته الى عيد ميلادها قصيدة
جمييييييلة وفيها تسلسل احداث روعة

وانا من زمنا خدو مشلخ

وهى من ازمانا خدها ساده

اتعجبت سماحا مواتر

طبقات عالية وكلها ساده

وكانت بينا فوارق شاسعة

اتعارفنا

وكانت جاده

وقالت عيد ميلادى الشهر الجاى

ولازم تحضروا

قتلها خير

قتلها خيييييييييييييييييييييييييييير

ودخل فى اضافرى

تقصدى ايه بى عيد ميلاده؟

ايا ربى اتولدت يا دابا؟

يبقى الاعياد سوها زيادة؟

امكن ولدت وانا ما عارف؟

يمكن ميلاد عيسى واجدادها

يا ربى بدقوا الدلوكة؟؟؟؟؟؟؟؟؟

وبعزموا الحلال كالعاده

بس قتلها خير وانا جاييكم

وعديلة وزين

والشهر الجاى

مرق مركوبى من السحارة

داقاهو المطرة قبل شهرين

ونكت طاقيتى من العضاضة

سليتلى ثماد رقعتها زين

سديريتى ابوى مسويها لبد

فرتقت اللبده مرقتها طين

عراقى مغزوز فى الكوكار

كان سوهو وقاية وكت فازعين

سروال مدفون فى رهل العيش

ملفوف محشور بين شوالين

لميتن واديتن شطفة

شريتن فووووق فى زريبت الزين

والزين بقراتو مكوفرات تب

مدغن طاقيتى هرنها زييييييييييييييييييييييييييييين

شافتن السرة بت الهراف

طردتن وجابتن لتاف

وغضبت غضب

وعزمت اقوم

جفن ما جفن

اقوم فى الحين

مرقت ووشى مطوطو تب

وصتنى الحلة رجال وعوين

وصتنى ام نوفل لى كركار

كان تلقى ودك جيب لى رطلين

وقروشى حلف صرة وبى خيت

وصتنى حليمة بت العجبين

سروال لى محمد ورطلين بن

بنبيعلنا شي ونديك بعدين

وصانى الهابر لى مركوب

مخلوفة وسرج وكرباجين

عنقريب وموسر بى حبال قد

تيبار ومسلة وابريق طين

والناس بتوصى وغبيانة

والناس غبيانة وبتوصى

وانا ظرفى مكدر زى الطين

وبتوصى وزى بايعلى بعير

وانا بايع تيسى وعيش كيلتين

والتيس اعور ما جابلو سعر

والعيش بتاب ومسوس وشييييييييييييييييين

تتسود ختوة هالسفرة

انا ماشى لواجب اقوم بالدين؟؟؟؟

وركبت الباص مخلاتي دفس
كدوسي وحقتي وعود سكين
وانا راكب في الباص بتأمل
ياربي بجيبو الحكامات
بتسو دلوكة بيجوا الحلال
ضابحين تيران ام خرفان صر
مدققين كمين شوالات عيش
وانا مالي ومال عيد ميلادن
ان نقروا الدلوكة اولادن
انا بنزل حربي ومتعكز
وادارق اصقر في الدارات
وانا معروووووووووف خراب حفلا ت
وامسك صوتي المدهون قطران واركز واندق
شان السمحات ما يقولن ضيفنا قريزن ساكت
ووصل وسعل لامن جيتن
وهداك البيت يرقش لوحات
وصل ولقيت البيت مزرود لاحدو بنات سمحات

شايلات هديات
وحدات وردات
وحدات زهرات
شايلات رسمات في شكل ارنوب
واسودونمور سبحان الله زي الميتات
يضاحكو قر حايشين صينية تبق شمعات
ماف زول قالي انت منو مابعرفو الضيف زي الخواجات
لتيت عكازي وقفت طرف
ملص نعلاتي اتفرجختا
لي تفه خلالي مضنقلو تب سكيني ملسنه بالجمبات
تبماكي وحُقتي مزرودا ولعتا كدوسي واخد جبدات
وان بتأمل هذا العالم ياتو البنوت وياتو الجنيات
وبحرت عيني لامن برقن
كل البنوت زيها سمحات
والبقر اشابه لي ضمة
ما عرفت الراحن والفايتات
لي حسن الحظ هي النقرتني
ما شالت شك من شافتني
ساقتني وقامت بالواجب هي اصيلة وراسية وست حوبات
نادت صاحباتا بنتعارف
نانسي وناندى وشيماء ولمياء ْ وحوراء وكفا
من وين! من لندن جينا امس راجعين باكر زي ها الحظات
من الطايف والمنشية ومدينة النيل وبنوت راقيات
طيبات طيبة وكل كليمة معاها ضحيكة
ونضاااف ورهااااف زي اللعبات
واحدتاٌ فيهن سمحة سماح لكن مي طاعمة
وانا زول مستغرب في حاجات
ان زول اسراني سماحتاً كاسيا
بنت البلد الهاديه وراسية وضميرا الحي التب مامات
وقالت لي
عرف نفسك بي عبارات
عرف نفسك بي عبارات
قتليها : انا الاسد الحرس غابتو الضريا
وانا الساعة الكتال بختف حديا
وانا الدايرني مابجيب لي هديا
وسارح مدرج ام هبج التخيه
مراتع اللبل الضان السعيه
وادرج عاصفة اللقدة السخيه
وادرج عاصفة اللقدة السخيه

من طرف **الحازمي** 3rd يونيو 2012, 23:03

برنامج قهوتنا / الشاعرة نضال حسن الحاج - بشري ابراهيم شاعر البطانة ــ علي قناة قون
خلال شهر رمضان المعظم لعام 2011م 1432ه
البرنامج من إعداد وتقديم نصال ــ وبشري ــ موعده الساعة الثامنة مساء بعد الإفطار
هذا البوست بمثابة توثيق لكل الحلقات خلال شهر رمضان المعظم زمن البرنامج ربع ساعة
البرنامج رائع بكل المقاييس ويتاول فيه فنون شعر الرباعيات الذي يُعد من ضِمن جماليات اللغة العربية فهذا الفن من الشعر قد تطرق إليه العديد من الشعراء والقراء والمتذوقين فأبدع فيه الشعراء أيما إبداع ونظموا فيه رباعيات جميلة ذات معاني سامية وأهدف نبيلة ، وقد ذكر في هذا البرنامج شعر البطانة والدوباي الصلط بلغة دارجية بحتة ومن ثم مناقشة العديد من القضايا والمواضيع الإجتماعية الهادفة التي تخص مجتمع الريف البدوي وربط هذه المواضيع بالمجتمع المتحضر بقالب من الشعر والدوباي الرصين والأصيل مع العذف علي آلة الطنبور الربابة والعاذف احمد الصديق فهذا يضيف للبرنامج نكهة خاصة مع تناول القهوة ورائحة البن ، فأنا من المتابعين والمداومين علي حضور هذا البرنامج يومياً
نضال شاعرة معروفة من ريفي المناقل ــ وبشري ابراهيم من البطانة فالأثنان من عمالقة الشعر
♥♥ ♥♥ ♥♥ ♥♥ الحلقة الأولي ♥♥ ♥♥ ♥♥ ♥♥

من روائع الشاعر بشري ابراهيم -------عيد ميلاد

من روائع الشاعر بشري ابراهيم -------عيد ميلاد

رد: من روائع الشاعر بشري ابراهيم -------عيد ميلاد