الرائع هاشم صديق

حروف إسمِك

جمال الفال

وراحة البال

وهجعة زول بعد ترحال

وتنّية حلوة للشبّال

ودنيتنا ومشاويرنا

وغنواتنا الما بتِنقال



حروف اسمِك

نجوم ركّت على الياسمين

فرح فى عين جمالها حزين

أساور فى إيدين طفلة

بتحفظ فى كتاب الدين

زَفَافَ عاشقين بعد فرقه

وسط باقات دُعَا الطيبين

حروف إسمِك

عقد منضوم بخيط النور

وطلة وردة من السور

ونغمة تنادى من طمبور

وشُعلة فرحة فى الوادى

تَشِع جَذلانه ليها شهور



حروف إسمِك

وَكِت أشتاق وأرحل ليك

وأسرح فى عسل عينيك

بِتَحضِنّىِ......

قَبُل ألمسَ حرير إيديك

تأرجِحنى..وتَفَرحنى..وتخلينى

أدُق صدرى

وأقيف وسط البلد واهتف

بريدك يا صَباح عمرى

لا موجوع ولا خايف
أموت زي الشِدر
واقف .

الزعيم وين أيامك ؟؟
هاشم صديق ! !

الفين سلام

يا يمه يا شتل المحَنّه

الشَّبَّ فى وسط الجروف

ويا يابا يالدرع المتين

الليهو كم سجدت سيوف

ويا جده يا اْم صوتاً حَنِين

حجواتها بالوادى بتَطوف

ست الشاي

الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن
-أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر
(بالعرقي) الداشر
والليل مصبوغ
بي رحية (المزة)
...
الرادي يكورك
وسط الحوش
-افغانستان
موت أفغان
-مستر بوش
وخواجة بيصرخ
وصوته مرخرخ
زي (حنكوش)
-القصف يدك
أركان (كابول)
...
ووالدة (صابر)
حاجة (بتول)
مشدوهة تقطع
عيش الفتة
تكب سرحانة
في موية الفول.
-يوماتي عشاهم

(فتة بوش)
والرادي يساسق
بين (بن لادن)
ومستر (بوش)
وصابر يطنطن
-الصاح مقلوع
السيف مرفوع
الكلمة غموض
والمغنى فروع
الدنيا خراب
والأقوى مهاب
والعدل رهاب
...
الليل مشروق
بي فتة فول
وصوت (الحاجة)
الوالدة (بتول)
يناغم صابر
-شنو الإرهاب؟
ويتمتم صابر

قلـ...قلتي
شنو؟
وترد (الحاجة)
-مالك مرعوب؟
تتلفت ليش؟!
تقول مـزرور
بي عسكر وديش؟!
سـألتك بس
شنو الإرهاب؟!
واتنحنح (صابر)
صنقع ودنقر
حك رويسو
اتمدد وصنقر
وقال للحاجة
-سؤالك يمة
جوابو كتاب
لكن....
لكن يا (حاجة)
زي ما تقولي
طلع ربّاط
في الليل
لي زول
بي سيف مسلول
وشال من جيبو
قروش العيش
وحق الفول
أو زول آمن
يقع في مكيدة
يموت مكتول
وزي تغيان
على الفقران
على المسكين
على الأعزل
على المشلول
...
وتتدقق
غبينة (الحاجة)
زي راجمة
وتصبح ناغمة
-وحسع نان
منو الرباط؟
امريكا؟
(بن لادن)؟
ولا الأفغان؟
من التغيان
منو المسكين؟
من المظلوم
(مستر بوش
ولا فلسطين؟
شنو الـ......
منو الـ....
...
ضحك (صابر)
وحك رويسو
واتنحنح
وقال للحاجة
-يمة اتعشي
أكلي البوش
لو عارف ردود
لي ديل
ما كان الرويس
مدووش
...
سكت صابر
رقد معبور
وصوت الرادي
لا في الدنيا
لسة بيدور
سرح صابر
ودمو يفور
نكش حزنو
وقال لي نفسو
من قلبو
أريت الدنيا
حسه تغور
...
سمع صوت أمو
تاني يلح
-دحين يا وليد
بدور أسأل؟
ويرد صابر وضيق العبرة
طعمو ملح
نعم يمة
قايلك نمتى
وترد الحاجة
أنوم كيفن
وصوت الرادي
في أضني
زي مكنة؟!
بدور أسأل
دحين أمريكا-
ما ياها
العذابا دنا؟؟!
...
ويرد صابر
وضحكو علا
-عذاب أمريكا
ولا هنا؟؟!
عذاب أمريكا
ولا أنا؟
ويصن لحظات
-دحين يمة
-ورمضان جاي
هم أمريكا
ولا اللقمة
والويكة الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر...
ترد الحاجة تفتش لكيس
تمباكا
في الكراب
نقول همين
عذاب وعذاب
تخت السفة
وتبرطم
-دحين يا وليد
ده مو الإرهاب؟!!
...
ويصن الليل
ورأس صابر
يدقدق ساي
يشرق جاي
يغرب جاي
- كراتشي
- أباتشي
- أنقرة
- عنقرة
- ربع الويكة
- صوت أمريكا
- جمرة خبيثة
- مكيدة دسيسة
- بي. بي . سي
- أي. أن. تي
- سي. أن. أن
- توني بلير
- كلام الطير
- خبر وحواشي
- إبراهومة
- أموكاشي...
ويقع صابر
في بير النوم
ويشوف روحو
بدل (أمجاد)
ركب بعشوم
وشاف الناس
توسوس ساي
خبر يا هناي
ست الشاي
أف. بي آي
وأحمد بيه
سي . أي. أيه
ووسط الموز
لقينا (كروز)
-برج كلتوم
ملان بحمام
وقع صاروخ
شق حشاهو
سكن جواهو
سوا حطام ويغوص صابر
غرق أكتر
في بير النوم ويشوف الحاجة
امو (بتول)
وسط الزحمة
رافعة أيدها
بي قندول
تكورك وتهتف
- لا أمريكا
- بل فتريته)
(أنحنا الساس)
رافعين رأس
ما ببنتراجع
ما بنتهان
ما بنخاف
الأمريكان
...
ويشوف صابر
بيوت الحلة
تتغامز
وتتريق
على الحاجة
وتتلامز
ووسط اللمة
صوت الحاجة
عالي فصيح
(تشيلو الريح)
...
صوت الرادي
مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم
الليل مفضوح
والنجم كتوم
الدينا تصن
لقيامة تقوم
صابر مجروح
في نومو
يئن
وفي الرادي تجن
بالتار
(بيق بن)
والنشرة تجيب
أخبار الشوم
كابوس صابر
قفة خضار
سوت جنحين
طارت لي فوق
والفاقة مطار
...
كابوس صابر
يعلم أيه والدنيا مصالح
وسي. آي. أيه
...
كابوس صابر
الناس بتوسوس
وتنضم ساس
ست الشاي
أف بي آي
...
كابوس صابر
الدنيا مغازي
يموت الحب
ترمي أخوك
في بطن الجب
وتترتر غادي
تناصر الغازي
...
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
...
كابوس صابر
الناس (بالقرجة)
تقيف للفرجة
تغير لونها
ميتين درجة
...
كابوس صابر
هم الويكة
والفتريتة
ونار أحزانو
ونار أمريكا
...
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
الرادي يلغلغ
وسط الحوش
بين (بن لادن)
و(عمر الملا)
ومستر بوش
- أفغانستان
- موت أفغان
- القايمة تطول
- عراق.. سوريا
- جنوب لبنان
- وما معروف
- تاني كمان!
تجي الحملة
عقاب جملة
(على الإرهاب)
...
على الإنسان؟!
القصف يدك
أركان كابول
ووالدة (صابر)
حاجة (بتول)
حلمانة تقطع
عيش الفتة
تكب سرحانة
في موية الفول
يوماتي عشاهم
فتة (بوش)
والرادي يساسق
بين (بن لادن)
ومستر (بوش)
...
صوت الرادي
مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
...
كابوس صابر
قفة خضار
سوت جنحين
طارت لي فوق
والدنيا مطار
...
كابوس صابر
صوت مبلوع
حق مقلوع
والموت بالجوع كابوس صابر
يعلم أيه
والدنيا مصالح
وسي. آي. أيه
...
كابوس صابر
الناس بتوسوس
وتنضم ساي
ست الشاي
أف. بي. آي

زول بحبك


وماكا خابرو.

ياما لاقيتو وبسالمك

وداسِّي منك

حال دواخلو.

جُوّه فيها

الموج يدافر

وانت يا محبوبو

فاكر

انو رايق

وقلبو شاغر.




أصلو زول

بِتْدَّس ملامحو.

يَا ما لاقيتو

وبصافحك

موت بجيك

وما كا عارفو.



زول بحبك

وما كا شايف

يا ما سالَم

وصوتو غالَب

رجفه

فس همس الشفايف.

مره شَدّ

على ايديكا

وقلبو جنّح

ورقّ ليكا

ركّ

في شُفة عينيكا

وقرّب يشرح

جنو بيكا.

إلا حلّق

في المخاوف

أصلو جرّب

وحلمو نازف

موت بريدك

وما كا عارف.



زول بحبك

وفيهو ساكن

يا ما دسّاكْ

في ملامحو

وفيها ليكْ

سوَّر مساكن.

كم لقاك

حياك وصبَّح.

وفي ابتسامتك

قرَّب يسرح

كان مناهو

يقيف ويشْرح

إلا خاف

من "بس" و"لكن"

وينكسر خاتر

مشاعرو

ويبقى صبح الدنيا

داكن.
أصلو زول

ممكون وصابر

جوه فيهو

الموج يدافر

وبره

في قسمات وجيهو

تلقى

موج البحرِ ساكن.


زول بحبك

وما كا خابرو.

يا ما لا قاكا

وبسالمك

وداسِّي منك

حال دواخلو

الوجــَــــــعْ الخُرافـِــــــى

شعر هاشم صديق الحان و غناء أبوعركي البخيت

.

ﻣﻤﺪﻭﺩﺓ ﺍﻟﺴﻜﺔ
ﻫﺠﻴﺮ ﻭﺣﺠﺎﺭﺓ
ﺧﻴﻮﻟﻚ ﺯﺍﺣﻔﺔ
ﺗﻌﺎﻓﺮ ﻭﺗطﻠﻊ
ﺗﻄﻠﻊ .. ﺗﻨﺰﻝ
ﺗﻨﺰﻝ ﺗﻄﻠﻊ
ﺯﻯ ﺃﻳﺎﻣﻚ
ﻭﺣﺎﻝ ﺃﺣﻼﻣﻬﺎ
ﺣﺼﺎﺩ..ﻭﺭﻣﺎﺩ
ﺳﻮﺍﺩ .. ﻭﺑﺸﺎﺭﺓ

ﻋﻴﻮﻧﻚ ﺻﺎﻳﻤﺔ
ﻭﺭَﻗﺮَﻕ ﻓﻴﻬﺎ
ﺍﻟﺰﻣﻦ ﺍﻟﻤﺎﻓﻰ
ﺃﺣﺰﺍﻧﻚ ﺻﺎﺣيه
ﻭﺩَﺟّﺖ ﻓﻴﻬﺎ
ﺣَﻮﺍﻓﺮ ﺍﻟﺬﻛﺮﻯ
ﺍﻟﻨﺼْﻠﻬﺎ ﺣﺎﻓﻰ
ﻣﻌذﻭﺭ ﺍﻟﻔﺮﺡ
ﺍﻟﻠﻤْﻠﻢ ﻧﻔْﺴﻮ
ﻭﻗﺒَّـﻞ ﻭﺷﻮ
ﻭﺍﺻﺒﺢ ﺟﺎﻓﻰ
ﻟﻤﺘﻴﻦ ﻳﺮﺟﺎﻧﺎ
ﻭﻧﺤﻨﺎ ﻧﻜﺎﺑﺮ
ﻭﻟﻴﻠﻨﺎ ﻣﺸﺎﺗِﺮ
ﻭﻭﺟﻌﻮ ﺧﺮﺍﻓﻰ

ﺃﻳﺎﻣﻚ ﻣِﺴْﺨﻦ
ﻣﺎﺹ ﺃﻟﻮﺍﻧﻬﺎ
ﺍﻟﻤﻄﺮ ﺍﻟﺸﺎﺣﺐ
ﺟﺴﻮﺭﻙ ﻫﺸﻪ
ﺧﻮﺍﻃﺮﻙ ﻃﺎﻣﺤﻪ
ﻭﻃﻮﻓﻚ ﻗﺸّﻪ
ﻣﺴﺎﺭﺑﻚ ﺟﺎﻓﻠﻪ
ﻭﺧﻴﻠﻚ ﻏﺎﻓﻠﻪ
ﺟﺮﻭﺣﻚ ﺩﻫﺸﻪ
ﺗﻤُﺮ ﻣُتﺪْﺍﺧﻠﻪ
ﻓﺼﻮﻝ ﻭﻣﺬﺍﻫﺐ

ﻣﺮﻛﻮﻥ ﻓﻰ ﺍﻟﻮﺣﺪﻩ
ﻭﻧﺒﻀﻚ ﻳﻨﺎﺟﻰ
ﺍﻟﻘﻤﺮ ﺍﻟﻐﺎﻳﺐ
ﻟﻠﺤﺐ ﺗﺘﺸﺎﺑﺎ
ﻭﺗﻐﺮﺱ ﻭﺭﺩﻙ
ﻭﺗﺤﺼﺪ ﺣﻠﻤﻚ
ﺷﻮﻙ ﻭﻏﺮﺍﻳﺐ
ﻻ ﺍﻟﺤﺐ ﻳﺪّﻳﻜﺎ
ﺳﻼﻡ ﺍﻟﺮِﻓﻘﻪ
ﻻ ﻋﻴﻮﻧﻚ ﺗﻘﺮﺍ
ﺳﺮﻳﺮﺓ ﺻﺎﺣﺐ

ﺃﺳﻮﺍﺭﻙ ﻃﺎﻟﺖ
ﺗﻤﻴﻤﺘﻚ ﺿﺎﻋﺖ
ﻭﺳﻂ ﺍﻟﺰﺣﻤﻪ
ﻭﺭﺍﻛﺎ ﺍﻟﺤِﻜَﻢ
ﺇﻧﺪﻓﻨﺖ ﻭﻋِﺪْﻣﺖ
ﻏﺎﺑﺖ ﻗﻤﺮﺓ
ﻓﺎﻃﻨﺔ ﺍﻟﺴﻤﺤﻪ
ﻭﻗﺪﺍﻣﻚ ﺯﺍﺣﻔﻪ
ﻫﻮﺍﺟﺲ ﺯﻣﻨﻚ
ﻭﻣﻨﻚ ﺷﺎﺭﺩﻩ
ﻣﺮﺍﻓﻰﺀ ﺍﻟﺮﺣﻤﻪ

ﺍﻟﺸﻴﻦ ﻳﺎ ﻋﻴﻦ
ﺇﺗﺠﻤَّﻞ ﻭﻏﺶَّ
ﻋﻴﻮﻥ ﺍﻟﻮﺍﻗِﻊ
ﺍﻟﺠُﻤَﻞ ﺍﻟﺼﺎﺩْﺣﻪ
ﺣﺮﻭﻓﻬﺎ ﺇﻧﺴﺠﻨﺖ
ﻭﺷدّ ﺧُﻄﺎﻫﺎ
ﺍﻟﺰﻣﻦ ﺍﻟﻮﺍﻗﻊ
ﻓﻰ ﻗﺪ ﺍﻹﺑﺮﺓ
ﺍﻟﻜﻮﻥ ﺇﺗﺠﻤَّﻊ
ﺿِﻘﻨﺎ ﻭﺿﺎﻕ
ﺍﻟﺼﺒُﺮ ﺍﻟﺸﺎﺳِﻊ
ﺑﻰ ﺇﻳﺪ ﺭﺣﻠﺘﻨﺎ
ﺣَﻔﺮْﻧﺎ ﺟﺮِﺣْﻨﺎ
ﻓﻰ ﻏﺎﺭ ﺭﺣﻠﺘﻨﺎ
ﻣﺴﻴﻨﺎ ﺻِﺒﺤْﻨﺎ
ﻭﺗﺎﺭﻳﺨﻨﺎ ﻣﻜﺘَّـﻒ
ﻭﻓﻮﻗﻮ ﻳﺤﻠـَّﻖ
ﺻﻘﺮ ﺍﻟﻤِﺤْﻨﻪ
ﻣﻌﺬﻭﺭ ﺍﻟﻔﺮﺡ
ﺍﻟﻠﻤْﻠﻢ ﻧﻔﺴﻮ
ﻭﻗﺒَّـﻞ ﻭﺷﻮ
ﻭﺍﺻﺒﺢ ﺟﺎﻓﻰ
ﻟﻤﺘﻴﻦ ﻳﺮﺟﺎﻧﺎ
ﻭﻧﺤﻨﺎ ﻧﻜﺎﺑﺮ
ﻭﻟﻴﻠﻨﺎ ﻣﺸﺎﺗﺮ
ﻭﻭﺟﻌﻮ ﺧﺮﺍﻓﻰ

رسالــــــــــــــــة
.
كلمات هاشم صديق و الحان و غناء يوسف الموصلي
.
أكتب ليك
رسالة طويلة بي دمي
أقالدك فيها يا أمي
وأضمك ساعة في حضني

.
,
وحاتك لا بخط عنوان
وما بكتب إسم إنسان
وما برمي الجواب في بريد
وما بديهو لي زولاً
كمان في الإيد
كفاية أقيف
وأنقش في جناح الريح
كلامي الدايرو يوصل ليك
وأزيدك في الكلام تسبيح
يخلي الريح تَتَرْتر
في المسافة عروس
تحيل كل الصحارى بروش
مَضَفَّرة بي سعف بلدي
وملونة بي مشاعري إليك
يا أمي

يا بلد
اسمعيني وهاك كل البيعه
كامله
اسمي هاشم .. امي آمنه
ابويا ميت وكان خضرجي
ومره صاحب قهوه
في ركن الوزاره
بيتنا طين مشرم
ولما حال الطين يحنن
نشقى شان يلقى الزباله
خلي ألقاب الجرايد
من ممثل ولا شاعر
ولا كاتب ولا ناقد
كلو زي يفط الدكاكين
والمطاعم
كلو زينه و ماهو شاهد
تلقى مكتوب "ترزي احلام العرايس" وجوه
فستان مرمي واحد
أو "مطعم الجنه الفريده" وجوه
قدرة فول وحله
ومويه للعطشان في قله
وزي كلام شاعر بقدر
في بلدنا الحاله واحده
المطار ياهو المحطه
والكوميت يوم يبقى كارو
والزمن بيروح أوانطه

يابــــــــــلد
هاك ايديا ووحاتك
انتي زادي وقصري والمال
والكتابـــه
منك إتعلمت أصبر
وكيف أحس الم الغلابه
واتحدى بيك تعب الطريق
وشقا الزمان وكتين يضيق
وإتملى بيك
واحس بيك
واغني ليك من الصغر
حتى القبر
واحلف عليك
ترجف عروقي من المهابه

يــا بـــــــلد
والله طول كل السفر
جرحك معاي صاحي وحزين
وبليون نجم.. بليون نجم
في كل ليل
اسمك يشع فيهن ويبين
خاتيك في صدري النفس
وتحت الجلد نص القلب
جوه العروق
حاضنك ثبات
ما ظن يلين
ارجف وكت تعكس
عيون كل البنات
زرقة سماك
وانتز واطير
لامن ريزم كل الغنا
القاهو من طبلك وغناك
والله لا بدلت جلدي
قلعت شارتك في المراقص
ولا شان رفضت وقلت لا لا
رفعت راسي وقلت فارس
ولسع بقــــــــول: ما بستريح
لو ما يطل فجر الخلاص
لو بالحروف ..لو بالهتاف
لو بالسلام ..لو بالرصلص
ما بستريح
لو ما اموت ليك وعليك
ولو ما اكون منك وليك
معناي شنو؟
واصبح منو؟
معقول أسيبك يا بلد
زي ما بتقول خدم الامير؟
معقول انا؟؟
ملعون ابو السفر السنه
لو كان يقيف بينا ويحول
اتحدى بيك
كل المتاريس والكضب
وحتى الافول
وحبل الكضب زي ما بنقول
دايما قصير لوحول يطول
ويا الفي بلاط حاكم البلد
عايشين خدم وسط حشم
وشايلين ختم وتصنفوا
او زيفوا او الفوا
والحق بيجي
قسما يمين والدنيا نار
ويوم الحساب والدنيا نار
ويوم الحساب غدر الخدم
زيف الحشم
ظلم الامير
نحنا النقيف ونصنفوا
بالفكر ما حقد الصغار
نحنا الشقينا عشان بلدنا
ونحنا يا دنيا الكبار
يوم المجازر
ما رجف رمش الشهيد
وقدام عدد كل البنادق
كانوا صادين بالنشيد

:
كنت واقف فى الرصيف
مصلوب تقول ساق الحراز
مغروز على الزمن البضيع
و فرحت بيك
قايلك عيون اخر قطار
جايينى من زمن الربيع
و كتبت فى قمر الزفاف
اتحدى بيك زمن الهموم و الاغتراب
اتحدى بيك زمن المخاوف و الصقيع
لكنى عميان فى الهوى
و صحانى جرح الفرقة و الامل الصريع
فى يوم صحيت لا حاسى بيك
بابى المبشر بالطريق
لا ماشى بيك تحت المطر
همسك دفا و لمسك حريق
مع السلامة
لا مت من جمر الاماسى
لا سبت ترنيم الحروف
و سجدت لى ملح التباريح و المراثى
لو غبت ما يتسقط شمش
و الزمن قدامى مترمى و بمش
لا بنتهى العالم و يقيف
و لا يتبدا بى فقدك قيامة
علمنى دمع الرحلة اقوى على الظروف
و ارسم على الليل ابتسامة
علمنى كل الضقتو تاريخ الكرامة
كل التجارب للقلم
اغلى الحروف بت الالم
اعتى الرياح تضغى و تفوت
و يرجع عماد الدنيا و تقوم البيوت
حتى الحزن يزهر و يشيل
و يفرد غصون الفرحة للناس اليتامى
ارتاحى من شوقى و هواى
ماتت مشاعر الالفة و انتحر الهوى
و رجعت للزمن الجديد
اقدامى ثابتات فى الارض
و الجبهة بتبوس السما
ارتاحى
بيناتنا قام المستحيل
و انتهى الامل الجميل
انتهى الوهم الجميل

الغريب

جيت على موج البحر معبور.
مغبر بى رماد النار
مجرح من حصا المشوار
مشقق من لظا العتمور.


أيا موج البحر بالذات
أيا موج البحر تحديد
أجيك مجبور

أجيك قرفان
أجيك حزنان
وصوت نبض الضحك
محظور.

أجيك نشفان
أجيك حفيان
وخيل درب السفر
مكتول
وسيف وهج العُمر
مكسور.
أجيك مدفور
بايد الريح
أواجه لفّة التاريخ
وأحس طرف اللسان
مشلول
طعم كل العشقتو
مسيخ .

أيا موج البحر بالذات
أيا موج البحر تحديد
زبد غُبنك
مكث فى النور
زبد غُبنى أنسجن
فى السور
زبد غُبنك سطع
للناس
زبد غُبنى إتخنق
وإنداس
طلع فى حلمى
قمر الزيف.

أتقطع
سلام الروح
بهت سر الشِعر
فى البوح
وبات سمر الأماسى
مخيف.

أجيك يا موج
من الأصقاع
أدق باب الصدف
فى القاع.
يهد حيل الصدى
الإيقاع .
وأخوض فى لجتك
مهووس
تقالد الزُرقه
فى الأبنوس
ومن غابة المرجان
يهل فى عتمة الأركان
نجم منقوش
فى بال فانوس.



ويزيد شبق العطش
لى زول
يوشوش نبضك
المشلول.

أموت لى ونسه
نص الليل .
لى حضناً يشد الحيل
لى نقرة حوافر
الخيل .
لى رعداً يعدل الميل
ولى ضحكة
مليون ميل.
.
أموت فى همسه
ما تنذاع .
ولى رفة نسيم
فى شراع
مسافر لى مرافى
عروس.
أموت فى صُحبه
ما بتخون.
أموت فى طعنه
ما بتكون
أموت فى بيت شِعر
مسكون .
أموت فى بوح
فصاحتو سكون.
أموت فى صك غرام
مضمون
أموت فى حق
جسارتو جنون .
أموت ...
وأموت ....
فى شيتاً يعيد الكون.

تسيل يا موج
- دموع فى خاطرى -

من عبره
أسامر " كاسر الأمواج "
وأتب من فكره
لى فكره .
أيا موج البحر أشهد
مساسق عمرى
فى المغسه
نفس تعب الغبن
قايم
من أمبارح
ولى حسه.
وأحس فى أيدى
باقى حريق
ألاقى صوابعى
فى الجمره
ولسع شاقى
ظلم الريح
ولسع داجى
فى اللُجه
وما وشوش فنار
لشراع
ولا أتنفس
صباح بُكره.

أيا موج البحر
بالذات .
أيا موج البحر تحديد
جدعت شباكى
شان أقبض
وميض من دره
فى المحار.
صبرت
حبست نفس الشوق
عشان أحصد
شقا المشوار.
ظهر فى شبكى
قرش الموت .
إتمرعف على الحوت.
إنفجر البرق
أمطار
إتجاسر على الريح
وإتحاصرت بالأخطار .

وفى عرض البحر
والموت
عزفت من الهلع
مسدار.
سبح فى الجو
رفيف الصوت
وإتهدج صدى القيثار
رجع بال البحر
ساكن
وإتمكن هوى المحار
بقيت "أورفى ""1"
فى وش الموت
بكايا ضحك
غُنايا هسيس
أبارز بالنغم أشباح
وأكاتل بالشعر
إبليس .

وأخش فى ليل
مداين الموت
أرجع للشمس
" يوريديس " "2"

أيا موج البحر بالذات
أيا موج البحر تحديد
مشيت جمر العُمر
مجبور
مشيت نص العمر
مدفور .
مشيت صحرا العُمر
بالأيد .

فترت من السبق
للتار
ومن مرجيحة الأشرار
ومن حسكنة الأسرار
ومن شبق الخيال
للتار.

فترت من الطعن
والظن
ومن نحر الجميل
بالمن
ومن رجية غرام وأنيس
أيا موج البحر أشهد
نفس غُبن العُمر
قايم
ولسع ما وصلت
الميس .


أموت يا موج
على دقسة نعاس
فى سلام.
ولى نمة فرح جايى
ولى خاطرة
مدن أحلام .
ولى آخر نضم
يتقال
ولى آخر بياناً هام
ولى صُبحاً مزركش
نار
ولى ضُلاً يمش
قدام .
أموت وأموت
لى يقظة جرحنا
النام
ولى خجلة
خجلنا العام .

أيا موج البحر بالذات
أيا موج البحر تحديد
بصقت على المثل
مّره
عشان قال : ـ
( الأمل حُفره )

رسمت هواى
بالشفرة
عشان آمن
عدا الخُفرا .
طلبت " جواز سفر"
تمديد
ختموا جروحى للتجديد
لقيت تأشيرة للمُره
ورماد
حازمنو فى صره.

أيا قابض هوى
السكين
ويا غبيان
ويا صحيان
ويافالح
ويا مسكين
أخير سفرك
يخيب مره
أكان تبقى
الجروح حره.
أخير تختار
تكون مُحتار
بدل تهبط
حلم واطى
أخير تغرق
فى شبق الموج
بدل تلمس
وهم شاطى.
أخير تنجم
فى نار الهم
بدل تحلم
حلم واهى.
أخير تصبح
عديل مظلوم
بدل تصبح
عديل خاتى.
أخير تصرخ
فى وش الجن
بدل تتعدّ
متواطى

أيا موج البحر بالذات
أيا موج البحر تحديد
قريت سر الطريق
فى كتاب
مغبر فى رفوف دكان
نفخت غبارو
بى روحى
وتليت تعويذة
العنوان.
لقيت فصل الفجور
واسع
وضيق مدخل الإيمان.
نبشت الفكره
بى ضفرى
وبحّتّ الفصول
أزمان.
سرق من عمرى
لُغز الخير
وإتقاسم هوايا الغير
وإنكسر الفهم
خجلان.
.............

وإتحيرت فى حيرتى
ومن تخريفة الميزان
أيا موج البحر
أضحك
لقيت الحق
صدر " مرسوم "
من " هيئة الأركان "
وإترفع أمير الجن
صبح فى غفله

سيد الشان
وقام فى عين
شمسنا السد
أتقطع غنا الشُفع
وإتقلع الضُفر
فى اليد.
ومن شبكة
مسام الليل
قام شوك الظُلم
فرهد
وغاب قمر الأمل
خجلان
من ظلمة المشهد.

أيا موج البحر بالذات
أيا موج البحر تحديد
أيا موج البحر
أشهد
كمل دمع الوتر
فى البوح
وإتباقص شعاع
الروح
ومن بين صوابع
الأيد
أتسرب شعاع
الروح
وما معروف
متين يا موج
جروحنا تروح.

أسف يا موج
على طعم الضحا
الحنضل.
على المحرات
وكت عصلج
على غصة
أسى المنجل.



أسف موج
على "الحيران "
على الميزان
على القاضى
على الطاغى
على الظُلم
الرقد قيّل.
أسف يا موج
على الإنسان
وكت يصبح
من الفيران
على طاولة
فكى المعمل.
أسف يا موج
على الموصول
وما واصل
أسف يا موج
على القرش
الصبح فاصل.
أسف يا موج
على المداح
على الزفه.
أسف يا موج
على تجريحنا باللفة.
أسف يا موج
على نار الغتا
الناصل.
أسف يا موج
على حالنا
على الحاصل.


أيا موج البحر بالذات
أيا موج البحر تحديد
أقرالك تُراث
" الرمه والحراس "
" وتغنيلو بت عباس

عينى أنا
فى القهوة ما جلاس
عينى أنا "
وأحكيلك
حكاية " الغول "
مع " السمحه "
سباق النمله
والقمحه
..........

يصفق
موجك المدهوش
ويضحك
صوتك المقروش
وتطول ضحكتك
" صارى "
تجارى المولد الجارى

وشوف يا موج
تحجى القمره بالفقرا
وكت " إتقاسمو
النبقه "
تكشر
بسمتها الصافيه
وتحلب دمعه
فى قافيه.
تقول يا موج
أنا الشاهده
وأنا الشايفه
حكاية الدنيا
من قامت
وعارفه الناس
متين شبعت
متين صامت.
ومندهشه
من الأمثال
وكت تصبح
خدر ... غشه
كتير بضحك
وكت أسمع :ـ
" قصم ظهر البعير
قشه ".

كتير بسمع
حُجا التاريخ
حكم أمثال.
ألاقى الحكمه

وش القول

وضهر الحكمة
فى الأفعال.
كتير شفت
" السبح " تنجر.
وجوه فى الحق
تتب تنصر
دموع ورّاع
وأيدينا ترد الصاع.
كتير نسمع
عن " الدنيا أم نعيماً
غش"
وعن " فضل الضهر"
فى الحر
وعن نورة
صلاح الوش
وعن غض النظر
إيمان.
وعن بركة صحانا
دغش.
...........

ونلقى الحكمه
مليون لون
والفجار
نجوم الكون.
نلقى الكلمه
مليون وش
ونلقى الغش
مبارى الغش.
متين يا موج
أسفنا يغيب
دغشنا يجى
...........

عصور يا موج
نضمنا شكى
شعرنا شكى
غنانا شكى
فعلنا شكى.
و " تحت القُبه "
- مما قُمنا -
" مافى فكى "


أيا موج البحر بالذات
أيا موج البحر تحديد
أحاول بى صوابع
الخوف
أدق باب الهوى
المعزول
أحس بى رهبة
الأحلام
وبى حنضل
زمان وفصول.
وأشد حيل العشم
من ميل.
أقوم جنة الأحلام
تجى الأحلام
فى درب السيل.
تعافر فى مسالك
الموت وتتجرح
حوافر الخيل.
أيا " سيزيف ""3"
زمان الجن
متين قدرك
يسامح يحن
متين توصل
بحجر الشيل
أيا قابض
هوى السكين
ويا غبيان
ويا صحيان
ويا مسكين
وحيد رغم الورق
والصوت.

وحيد بين النفس

والموت
وحيد بين القرش
والحوت.
وحيد رغم الشدر
والطير.
وحيد وسط الصحاب
والغير.
وحيد زى خاطره
فى عتمور
وحيد زى عتمه
وسط النور.
كفاك يا زول
مضايق السور
تجابد فى الزمن
معبور
تصفر فى سماك
الريح
تلف بيكا المدن
وتدور
وراكب العاصفه
زى عصفور
معلق فى المطر
والغيب
ومرق الدنيا
فوق مكسور.


أجيك يا موج
وتر معبور
تقبل زُرقتك منى.
أحكيلك شقا المشوار
يخاف ملحك
ملح همى.
أقول ليكا
الكلام مكشوف
وأرافع شان
تحس وتشوف
يطلع من جبينك
نور
يجُبر الخاتر المكسور.
وتنده لى بنات الحور
يفجن من عيونى
السور.
وأشوف ُحضن
الوطن مفتوح
وأقيف
فى " كاسر الأمواج "
أشم طيناً
قريب للروح.
ويهوم فى الشرق
فانوس
محلق بى جناح
" فينوس "
وأسيل حنيه
من دمعه
وأقطع
دفتر الفجعه
وأحس من فرحه
من عبره
تدق تأشيرة
للرجعه

أجيك يا موج
من الاصقاع
أدق باب الصدف
فى القاع
يهد حيل الصدى
الإيقاع
وأخوض فى لجتك
مهووس
تغيب الزُرقه
فى الأبنوس
ومن غابة المرجان
يهل فى عتمة الأركان
وطن مرسوم
بنور فانوس
وطن منقوش
فى بال فانوس

التقويم السنوي الشعبي

الى
لينة هاشم
خلي ثغر الشِّدَّة باسم
كففي الدمعة البقت موسوعة
في خد المواسم
خلي جيلك شوفو حاسم
عندي إحساس
- رغم أحزان المراسم-
( إنو باكر بيكي أجمل
وانو باقي الرحلة أسهل
والأماسي الشارقة
من ضلفة عيونك
شوفا أنبل)
(1)
صورة الغلاف
صباحات الوطن
غُمه
عصر كف الحُزُن
أُمة
يتيم قلب البحس
يمه
مات خيل الفرح
مسكين
حَزّ وريدو
حد سكين
وكِت لا ضحكة
لا لمّه
.........
كسر سيف الحنان
نصلو
ونبضات الأمان
كملو
تقول وجع البلد
جَنّ
ومن كل الخشوم
طلعت
مع شايي الصباح
أنّه
(2)
رمضان
رمضان كريم
الصام يصوم
القام يقوم
سمح الصيام
تقوى القيام
ومن دون
تصاديق أو رسوم
الحال كعب
السوق صعب
الزيت غِلا
والعيش تِغا
وجانا البلا
(الفقري) ده.
ناساً تصوم
كل يوم تعوم
فوق الفواكه
والفطاير واللحوم
لازّه الكروش
نافخه الجضوم
وناساً عضام
لابسين هدوم
ورِجلين حفا
وساعة الفطور
(لُقمه) وملاح
حبة تمُر
(جك) للعذاب
(جك) للهموم
(جك) للأسى
وموية وكفا.
... ... ... ...
رمضان كريم
قول يارحيم.
(3)
الفطر
ياتو عيداً
جانا قادل
والحلق ما فيهو
غَصّه
وكلو دمعه
وكلو وحّه
وكلو قرصه
ليها قصه .

كم (خليفة)
دسّ من عينّا
الرغيفة ؟!
وكم إمام
باع وجعنا الغالي
في سوق الكلام ؟!
وكم (غُلام)
ساقنا زي زفّة هوام
وطاش وكضّب
في منصه ؟!
وكم (شريك)
باس جرحنا
في أي مِحْنه
وضاق عَرَقنا
وتفّ حسه.
... ... ... ...
كلو عيداً
زار ولفّ
والفرح مسكين
وهاجد في محّفه
(السادة) سادرين
في النعيم
والشعب دايخ
وراسو لفّ.
... ... ... ...
إلا عيدنا
أكيد وجاي
ماكان عذابنا
رخيص وساي.
الأمل زاد المسارب
الشمس ترجع
تبارز في المغارب
الجموع تصحا وتْصارع
الوطن مربوع
وفارع
الفعل ما بيبقى
ماضي
ديمه بتْنفّس
(مضارع)
راسو مرفوع
في المنصة .
(4)
الأضحى
ضحيتّ
وكان كبش الضحية
خروف وهم
جركانة زيت
من رف خَبَل
ورسمْت في ورقه
البصل
ودبّرت في الأحلام
فحم.
عيدين وانا (الحاج)
المهرول
بين (صفا) الكعك
المحال
و(مروة) الشوق
للحم .
كلو عيد وانا زفّه
في الغيظ والأذية
راجي عيداً
ألقى فيهو الفرحه
واقع
والمباهج أبجدية.
حُرية في شفق
الصباح
وسُترة في الأيام
هدية
...
كلو عام
وانتو (شاهد)
ما ضحية .
(5)
اكتوبر
يا اكتوبر
جيت مشتاق
حضنك رقراق
ذكّرت الناس
الألم العام
الغضب النام
الحق ينضام
الصوت معبور
السيف مكسور
والساقية تدور
... ... ... ...
وانحنا زمان
(للشمس النايره
قطعنا بحور
حلفنا نموت
أو نلقى النور
وكان في الخطوة
بنلقى شهيد
بي دمو بيرسم
فجر العيد
وما اتراجعنا )
... ... ... ...
يا أكتوبر
هلّيت فِي اللّيل
نقّرت وترنا
تبّيت حفيان
بي غبني فتحت
لقيتك خيل
سلامك حار
وغناك بِندار
في الحال صَحْصَحْت
واتذكرت
القسم الغالي
وصية وذِمّة
وهموم الناس
وعذاب الكلمة.

اتهجيت
من لفحة لهبك
اسم الشارع
ومعنى الشارع
واتعلمت دروسك
(ماضي)
(مضارع)
يا نبض أمبارح
وراجع فارع .
اتعلمت أدوس
الجمرة
واعيش بالحسرة
وافك الشفرة.
واتوترت
جروح وصدام
من كل مسام
الشجن العام
لا نَقْنَقْتَ
ولا اتجرّسْت
ولا اتفكيتْ
من ريد الأمه
ولا اتبريت
من شرف الذمه
وِلبِستَ الريح
طاقية وعمه.
وأصبحت كبير
بهوية وهمه .
(6)
رجب – أبريل
ضُفرك محنن
بالسكن
نومك مقطّع
بالمحن
غيظك كِبر
جرحك رطن
ويبست شفايفك
يا وطن .
في عيونك
إندلع الشقا
وسرح الجفاف
ضِهْب الفرح
من دمعتك
وأنْشقّ
من غيظك
شِدَر نخل الضفاف
فلّوكا في لهب
الظروف
مدّوكا في إبر
الكفاف
كل البيوت
صبحت سجون
كل الحدود
قامت جدار .
وراها معزول
الزمن
ومن فوقها
مكتوف النهار
وزي كلو ليل
لو طال وجال
تتململ الشمس
العظيمة
وبكره الفَجُر
إنتظار
دمدم هديرك
ياوطن
صحّا العباد
قلعت شوارْع
الحِلّه
تيبان الأسى
نفضت غُبار
زمن الحداد
ورفعنا
صيوان الأسف
وطلينا
بالشمس السواد
وعَبَرْنا
فوق موج الغبينة
وفينا مات
زمن (التصحر
والجفاف)
إتْفتّح القلب
النعس
واتفجّر الصوت
البخاف
واتشقق الأسفلت
وقام فرح الشوارع
ومن مسام كل الأرِض
طلع الهتاف
طلع الهتاف
طلع الهتاف.
(7)
رأس السنة
أشتل
على الحجر الورِد
واخدع أناملك يا برد
بي غُنيه
عن ريداً بجي
وأسرح
مع العام الجديد
مستني (للخضر النبي)
يبكي الأسف
من وهمي
ويرتج الجدار
ويمشي الملح
بي دمعي للزمن البوار.
واهبط
من الزمن الجميل
متدلّي
في بير الغبار
واعزف
على الوتر الجريح
شجن المعارف
ووحّة الريح
في المدار.
... ... ... ...
رأس السنه
ويبدأ الزمن
نفس الزمن
زايف لزِج
يعتب جواد الرحلة
في شوك الصخور
ويتْهدّ حيل
عصب السرج
واسمع
صدى العام القديم
مترامي في الزمن
الجديد
- الحب مجرّح بالكذب
- نهر الصِدّق
جف ونضب
- عِشْق السلام
شجن الحرب
- مات الشرف
والسيف رجف
... ... ... ...
آخر السنة
ضاعت حروف كلمة فرض
وغابت شمس معنى العرِضْ
... ... ... ...



الهوامش:
1/ اختصرت القصة
في ورد الكآبة
واستويت بي فرسي
في جبل الغلابة
أستظل بالريح سقف
وانقش على (الهبباي)
حرف
واحصد عجاج الرحلة
واتوسد ترابا
.........
صدقيني الليل جواد
والدنيا غابة.
2/ أتجاهل حنيني إليك
أخاف يمكن يجيبني إليك
وأنا الضايق جمر غيرك
أشوف
شيتاً عصرني عليك
تقول مطراً هطل
دقّاني في السكة
جريت بي حيلي لي بابك
أقول أتضارى وادفا
أقول يمكن بنية اصيلة
زي خيلاً دفر بي زفة للفّة
وجيت كايس أمان حضنك
ودار عينيك
أخاف منك، وأنا العاشقك
وباقي عليك.
3/ الصاباحات والمسرة
النسايم سابحة حرة
الرسايل كلو مرة
الأماني صبية خضرا
الورود زاهيات وحمْرا
الشوارع ليها نظرة
الحُزُن بقطارو مرَّ
وإنتِ أسمع ألف مرة.
الغلاف الخلفي
سمعت الرادي
قال الشعب
قلت الرادي
حسه يقول
- حال الشعب
عسير وصعب
... ... ... ...
لقيت الدنيا
قايمة قيامه :-
الشتّامه
الحّكامه
الفهّامه
النضّامه
اللملالمه
الجضّامه
والكوراك.
... ... ... ...
ناس (مولانا)
ناس (سارتانا)
ناس (سيّدنا)
ناس (ديجانقو)
و(الله معانا)
ناس ( كللمبو)
ناس (كوجاك).
حتى (إمامنا)
صار (رأس حربة)
و(البهلوله)
لا عب (باك).
سيجار (هافانا)
كيف (الورطه)
اصبح زانه
(كيف) الشعب
صار (تمباك)
وكان فكرت
أو صنقعت
أو حللت
قبل المرقه
تبقى عميل
يحابي دخيل.
وكان ذاكرت
جرح الناس
وقلت الجايه
تبقى (خلاص)
لا (أوكامبو)
لا (حجاج)
ولا (رجراج)
أنحنا القاضي
بس للوالي
والداسونا
والحُراس
يكنكشو فيك
نياب واليك
من مغرب
شَمِس بلدك
وحتى بزوغ
صياح الديك.
... ... ... ...
وانت شنو؟!
في (نظرة) ديكا
أو عين ديل
غير انك
(ضعيف صوتك)
(صغير اسمك)
يسير موتك
فطورك عك
عشاكا هوان
... ... ... ...
وإنت منو ؟!
لا في (العير)
ولا الإمكان
ساعة الأزمة
تصبح (في)
بعد الأزمة
تصبح (كان)
... ... ... ...
وانت عجيب
نبيل وغريب
ما بتخون
عروق عزمك
شرف بلدك
تفتش نجده
من (لاهاي)
ولا نصروك
كبار بلدك
وكت باعو
البشاير ساي
أخير تختار
بدل تحتار
يا جبار
رغم الوعسة
والإعصار
بدل تبقى
خانة (كان)
أبقى دوام
تمام في (صار)
... ... ... ...
إنت (الواعي
ما بوصوك)
ولا بملوك
ولا بْغُشُوك
ولا بقودوك.
................
يا جبار
يا إعصااااااااار.
رقم الإيداع
ألفين وعشرة
أبقو عشرة
على الوطن
رغم المحن
الطابعون
دار صابرين
الطبعة الألف
القرن الواحد وعشرين