شفته العجب في حلة الشلك

حلة الشلك تقع جنوب قرية فجغ النوم في الطريق المؤدي الي جديد وكاكا التجارية لا تتعدي القطاطي فيها عدد اليدين يسكنها الشلك ورجل من اولاد حميد يدعي عبدالرحمن الفران وهو التاجر وراس الحلةجلست في تلك الحلة شهر كامل في خلوة العم عبدالرحمن الفران وقد كان كريما معنا ولم يقصر في ضيافتنا وكنا نتحرك الصباح للمشروع ونشتغل حتي المساءء ونعود للحلة وهكذا دواليك
وفي يوم من الايام لاحظت ان احدي نساء الشلك تجلس امام قطية في الشمس وهي باركة علي رجليها في وضع غريب المهم مشيت المشروع وجيت وفي اليوم التاني نفس المراة اجدها جالسة في الشمس وفي نفس المكان فسالت عمنا عبدالرحمن الفران قلتو ليهو المراة دي عندها شنو يومين باركة في الشمس فقال لي ده السبر عندهم امراة في حالة ولادة متعسرة وستظل علي هذه الحالة حتي تضع المراة المتعسرة ومضيت في طريقي للمشروع وجيت في المساء كالعادة وفي اليوم الثالث والمراة جالسة في الشمس ومشيت المشروع ورجعت في المساء وحوالي الساعة العاشرة مساءا سمعت صوت امراة ايقظني من النوم وكانت المراة المتعسرة المسكينة فجاءني عم عبدالرحمن الفران ولقاني صحيت من النوم وقال يا ولدي عاوزين التراكتور نمشي ام نوارة نجيب الدكتور للمراة دي لانها تعبانة ويظهر انو عم عبدالرحمن اقنع الشلك بعد تعب شديد المهم اخذوا التراكتور وذهبوا الي ام نوارة ونحن منتظرين يارب يجو بالسلامة لانو في خور خطير خور فجغ النوم كل سنة شايل ليهو تراكتور المهم بعد ساعتين وصلوا ومهم الدكتور كما يسمونه في تلك المناطق جادكريم الدودو وهو رجل متخصص في الولادة ونزل الرجل من التراكتور ودخل القطية والله يااخوان مافي دقايق وسمعنا صوت الطفل يعني سرعة عجيبة وفي هذه الاثناء كان عبدالرحمن الفران بيقول لي الزول ده نجيض وشاطر اسع حيولد الشلكاوية دي وفعلا وضعت المراة وخرج جادكريم الدودو وفرح الشلك واقاموا حفلة ومرايس وضبحوا ليهو وجلس معاهم جادكريم الدودو حتي الصباح وبعد طلوع الشمس اخدناه الي ام نوارة
هذا الرجل مشهور في تلك المنطقة من ام نوارة والسراجية كل تلك المناطق تعتمد عليه في الولادة وسبحان الله يضع سرو في اضعف خلقو.