محمد الحسن سالم حميد - لقاء - المشاهد

لاحقتني المضايقات في قريتي «نوري» وأنا مجرد «تربال
»
خرجت من السودان بوصية من مصطفي سيد احمد واحلف بالله أنني لم تكن لي رغبة في الخروج لكن

كنت اريد ان اكون قريباً منه لأعيش معه لحظات المرض
مصطفي سيد أحمد لم يمت .. بل تم اغتياله
**********
الغربة مضاد حيوي للإحساس بالوطن وها هو حميد يعود لهذه الأرض الطيبة هل يمكن أن تعكس لنا إحساسك وانت الآن في السودان؟
ـ مثلي ومثل أي«زول» طوّل من اهله وجاء راجعاً لهم ويمكن أقول ان الاختلاف وزيادة الخير اني اعود لأهل ولبلد بحالها والاحساس هنا وبعيداً عن الصورة الخاصة يجب ان يكون احساساً بالمسؤولية بمعني أنك اذا كنت غائباً لفترة طويلة عن أُناس يشتهونك وانت تشتهيهم بعد ان رافقتهم لفترة وانقطعت عنهم وان كانوا هم يجدونك من حين لآخر عبر الكاسيت أو بالاخبار المحمولة ولكنك لاتجد أخبارهم وانا عدت لارتبط من جديد بهؤلاء الناس واقول لكم ان معظم الناس الذين يسمعون شعري هم أصحاب اكثر من كونهم مستمعين أو معجبين وصحيح اننا خرجنا من وسط هؤلاء الناس لكنهم بقوا في دواخلنا وخرجنا من وسطهم لندخل فيه من جديد والظروف هي التي فرضت علينا الخروج فانا لست مغترباً وعندما خرجت من هنا عام 96 وكان من المفترض ان يكون الخروج قبل ذلك بعدة سنوات ايام حياة المرحوم مصطفي سيد احمد حيث كنت اريد ان اكون قريباً منه وليس من اجل ان نغني مع بعض فقط بل لأعيش معه لحظات المرض ولأستطيع ومن خلال مصطفي ان اغني الغناء الذي يمكن ان يصل للناس واقول ان مسألة الغناء هذه ليست مسألة اساسية فالشئ الاساسي هو العلاقة التي تربطني بمصطفي باعتبار اني اريد ان اتفقده وامارضه وأكون معه وبعد ذلك تأتي هذه الاشياء واقول إنه وبعد تلك المضايقات التي حدثت ابان وجودي في نوري وتواجدت هناك طوعاً واختياراً ولم يكن هناك نشاط أو ليالي شعرية بل انسان تربال وسط اهله وتخيل هذا التربال وهو يحمل الطورية ويخرج للزراعة وهو يحمل في رأسه هم انه سيلقي القبض عليه ويتم اقتياده الى اي جهة من الجهات ونحن بالرغم من وجودنا في البلد الا وانهم لم يريحونا ومنعونا من التواصل مع أهلنا واقول لكم سراً ولناس المشاهد كلهم فأنا في البلد نوري الصغيرة الضيقة التي يمكن ان ادخلها بيت بيت واتلو عليهم قصائدي بدون اي تحفظات فنحن في نوري عائلة كبيرة فيتم منعك من ان تقرأ الشعر في النادي وبخطاب رسمي هذا شئ .. والشئ الاخر انك تكون مدعواً لوجبة عشاء أو اي مناسبة في اي مكان فيأتوا لاقتيادك وكأنك كنت تجمع الناس لتحريضهم باسقاط الحكومة وانا اقول لم تكن هناك حكومة تم اسقاطها من نوري ولا أظن ان هناك حكومة سيتم اسقاطها من هناك ولكن كل ماكان يحدث في السنوات الماضية لم يتم لأسباب جديدة ولكنهم تعاملوا معنا وفقاً للفهم والاحداث القديمة وهذه «حكوى» مملة و«حكوى» سمجة عندما نجلس لنحكي عن كل ماكان يحدث منهم في حق شخص اختار طوعاً ان يستقر مع اهله ويحمل الطورية ولكن الشعر في الدواخل لا يموت وغصباً عني وهذا قدري أن اقول الشعر والغناء ولكن وكما قلت قبل ذلك عبر هذه الصحيفة فهؤلاء الناس ينظرون للقصيدة بالمفهوم والنظرة الأمنية حيث كان من المفترض أن يطلقوا النقاد على القصيدة بدلاً من ان يطلقوا الاجهزة الامنية ولا توجد قصيدة في هذه الدنيا اسقطت حكومة وغير ذلك فان أي قصيدة ومهما كان اطارها وكاتبها فانها تحمل في داخلها معني سياسي وهناك سر أقوله لأول مرّة ففي نفس اليوم الذي استلمت فيه حكومة الانقاذ مقاعد السلطة جاءني أحد الاشخاص المتابعين لشعري والمهتمين به جاءني جارياً وقال لي ياحميد الليلة جات حكومة كأنها قرأت قصائدك وجاءت تنقذ البلد.. فاذا بالأمور تسير بطريقة اخرى ويتعاملوا معنا وكأننا سياسيون .. فيا جماعة والله نحن شعراء وشعراء بسيطين ومساكين ومانعرفه هو الغناء، فلسنا معارضين فالسياسة والمعارضة لها ناسها القادرين عليها ومتفرغين ليها ، لكن في كل الدنيا وفي كل الكون دائماً وليس في السودان فحسب نجد أن المغني الشعبي تلتف الناس حوله وبالذات في ايام المحن حيث يتحول الى رمز بالنسبة لهؤلاء الناس وكان قدرنا أن نكون نغني لبلدنا ولناسنا وما واجهناه لم يواجهه السياسي وأعود وأقول أنني عندما خرجت بوصية من مصطفي سيد احمد واحلف بالله أنني لم تكن لي رغبة في الخروج لكن تعاملت مع الامر باعتبار انها «وصية ميت» بحديث أهلنا البلدي وعندما خرجت توجهت الى قطر وليس لأي مكان اخر والشئ الجيد الذي واكبته هو أنني رأيت كيف مات مصطفي وهذا حديث وملف كبير يمكن ان ينفتح لتظهر الحقيقة التي سكت عنها الناس لزمن طويل ويمكن ان ينفتح هذا الملف بشدة وهذه هي الظروف التي خرجت فيها ولا أريد ان اقول أنني خرجت مغترباً ولا أريد ان اقول انني خرجت مهاجراً.


هل يمكن ان تشرح لنا ماحدث لمصطفي في قطر وتزيح الستار عن عناوين الملف الذي اقترحته؟


ـ انا يمكن ان اعطيك عنواناً كبيراً جداً وعنوان واحد تأتي التفاصيل تحته فمصطفي لم يمت .. مصطفي قُتل .. أما كيف قُتل فهنا يمكن أن نقوم بسردها وهذا الملف دعوه لوقته، ونحن عندما نقول إن مصطفي قُتل فإننا لا نريد أن نزعج أهله في ود سلفاب، فنحن نتحدث عنه كمبدع وليس كإنسان يعاني من المرض فما حدث لمصطفي هو اغتيال معنوي وغير الاغتيال المعنوي هناك الاشياء التي قصّرت عمره وبعد ذلك يمكن أن نفصِّل هذه الحقيقة وكل الناس القريبين والمحيطين بمصطفي يعرفون الطريقة التي رحل بها هذا المصطفي ومن هنا احييه وأحيي ذكراه وأهله..

***********
الشعر واحد من تكويناتي الخلقية
***********
وأنت تعيش محاصراً كما قلت كيف كان ينبت الشعر فيك ومن أي المنابع يرتوي؟
ـ لماذا تريد ان تحول الكلام من ونسة لكلام تاني.. عموماً وفي وجود الشاعر ازهري محمد علي وكل الحضور أعتقد أنكم ملمين بمسألة الشعر ومداخلاته وأنا لا أدري من أين ابدأ الحديث في هذا الموضوع لكن اختصر لك كل الأمر في شئ واحد ومحدد فأنا بالنسبة لي يبدو الشعر واحداً من تكويناتي الخلقية وبعد ذلك دعني أقول ان الله خلقني شاعراً وفي اسرتي الشاعر الاساسي هو شقيقي إبراهيم وهو الذي تفتحنا على يديه وعرفنا الشعر قبل ان نعرف بقية الشعراء ونسمع عنهم ولا أريد ان اقول لك إن البيئة والمناخ جعلاني شاعراً أو انّي ورثت هذه الخاصية بل أقول لك إن شعري خلقه الناس المحبوبون وما أكثر الشعراء في السودان لكن الشعراء خشوم بيوت واذا كنت تريد الحديث عن ما يكتب من شعر في الفترة الاخيرة فالأمر يحتاج لحديث طويل جداً ونحن خرجنا الى هذه الدنيا ولم يكن الشعر غريباً علينا بكل كان متأصلاً فينا ثم بعد ذلك جاء دور اولئك الذين ساعدونا ووفروا لنا الكتب والدواوين اضف الى ذلك اولئك الذين سبقونا وهؤلاء جميعاً شربنا منهم الكثير وتأثرنا بهم وبعد ذلك بدأ الشعر في دواخلنا ينمو وحتي اليوم ظل ينمو وقصيدتنا لا أدري ماذا اقول عنها لكن وبالله ما زلت اخجل من الكثير من قصائدي واتمني ان اقوم بكتابتها غداً ولا أدعها بإعتبار أنها كتبت وبدليل أنني دخلت في ورطة لاحظها الكثيرون حيث تجد النصوص غير ثابتة فأنت تقرأ نصاً اليوم وغداً تجده ذهب في طريق آخر والقصيدة في جوانا لاتنتهي، وحكاية الشعر ينبت والكلام الكبير ده أنا ما بعرفو بل كل الذي اعرفه أنني خلقت لأقول الشعر..


**********
شاهدت اليساريين يؤدون فريضة الحج أكثر من الاسلاميين
غناؤنا لايتناقض الا مع جهة «فيها إنّ» ولسنا واجهات سياسية
***********
أراك صوفياً في شعرك بالرغم من أنك مصنف من اليساريين فماذا تري في هذا الامر؟
ـ كوني مصنف يساري أو أي اتجاه لاتعني لي شيئاً ولكن دعني اسألك متى استقرت الاوضاع في السودان حتى يصنف هذا باليسار وذاك باليمين، فهذا التصنيف منقولاً من قاموس ليس لنا، ففي بريطانيا والدول التي استقرت فيها الديمقراطية لأمد طويل يمكن ان تصنف الاشياء ومثل هذا التصنيف لا يُمكن أنَّ يقال الا في الايام التي شهدت نشاط السياسية، اما عن الصوفية فدعني أقول لك إن معظم السودانيين صوفية وهذا هو الوضع السائد والموجود أما الاسلام الجديد أو الاسلام السياسي دخل عبر جهات أخري وأقول لك انني شاهدت بعض الناس الذي يطرحون افكاراً اسلامية حركية دخلوا المسايد ونقزوا فيها وانا لم أدخل مسيد لأنقز فيه واقول لك ان المسيد جواي فأنا ختمي واسمي ختمي وعلاقتي بالختمية قديمة جداً ومنذ نشأتي والبلد هناك كلها ختمية وغير ذلك فإن أصدقائي من الصوفيين كثيرون جداً ويوم ليلتكم فإن ناس الصائم ديمه كانوا يودون حضور هذه الليلة وأتمني ان تكون الصوفية في جواي طالما أنها تعني الصدق والاريحية ولكن ان تقول لي رغم اليسار أو مصنف يسار فما الذي يمنعك من أن تقول وبوضوح أنت ياحميد مصنف شيوعي وانتم تقولون ذلك وكأن هؤلاء «الشيوعية» يحملون سيفاً ضد الصوفية ودعني أقول ان تصنيفك الذي وضعته مربوط بصندوق الانتخابات وحكاية انت صوفي برغم اليسار ،فهذا الوصف غير لائق لأنه يوحي بأن اهل اليسار هم الكفار أو ما شابه ذلك وبشكل اليسار الذي قلته دعني اقول انني كنت مقيماً بمكة لمدة خمسة اعوام وكل عام اؤدي فريضة الحج واليساريون الذين تتحدث عنهم جاءوا للحج أكثر من هؤلاء الناس..
***********

الشيوعيون ومن خلال الممارسة أكثر إلتزاماً بالاسلام وفيهم حفظة للقرآن الكريم فهل بدأت مسألة التواصل
هذه من أبو ذر الغفاري؟
ـ قدتني الى درب ما كنتُ أريد السير فيه وهذا الحديث والرأي يمكن أن تتناولوه مع نقد أو مع التجاني الطيب ومع الشيوعيين، ابحثو عنهم وتناولوا معهم هذا الامر، ولكن فلنتحدث معك في ما قلته عني، فأنا اغني غنائي الاخضر هذا وغنائي الذي يعبر عني وبالتالي يعبر عن أناس كثيرين جداً يتلاقى مع الشيوعيين فهم اهلي ويتلاقي مع انصار السنة فهم اهلي، ودعني اقول لك إن غناءنا هذا لايتناقض الا مع جهة فيها «انّ» لأنه في اطار الانسانية الواسعة ونحن لسنا ابواق لجهات ولسنا واجهات سياسية لجهات اخرى وتبقي الصوفية واليسار وماتحدثت عنه من وضع غير مقبول ابداً.. ودعني اقول لك إن اي شاعر صوفي والا يبقي شاعر اشياء أخرى..
**********
ميلاد القصيدة مثل «شوكة طعنت»مزارع ومجاري الري تضايقه
**********
هل القصيدة عندك تجديد للذات وانعكاس لما يجري في دواخلك أم هي تاريخ يعيد نفسه؟

ـ اقول لك وفي خلفية «مصابيح السماء الثامن طشيش» كلام مكتوب ولكني أقوله بالعامية، فالقصيدة مثل الشوكة التي تطعن المزارع ورجل المزارع وطوال ما هو مزارع يستحيل ان تغيب عنها الشوكة وطالما أنت خلقك الله شاعر يستحيل ان تغيب عنك القصيدة وبمثلما ذاك المزارع طعنته شوكة وضايقته مجاري الري فهو يتجاهل ويسعي لتنظيم مسألة الري ويضغط على الشوكة ويتحملها الى ان يجد له وقت لاستخراجها وهو يستمتع بهذا الامر ولكن بعد ذلك هناك ما يذوب في اللحم الحي، القصائد تبدو بهذا الواقع واي قصيدة جادة كتبت لها ما تريد ان تقوله.
اين وصل مشروعك لاصدار ديوان شعري؟
ـ عندي «حجر الدغش» وافسحوا له المجال ولنبحث لنا عن جهة لتطبعه لنا وينشر ونتمني بعد نشره الا يُمس وغير ذلك فإن انجع طريقة تتوافق مع عاميتنا هي الديوان المسموع ولي أعمال عندما قدمتها في الامارات أفسحوا لها واجازوا طباعتها ولو ذهبت للامارات لأخرجت مجموعة «نوره» و«تفاصيل ماحدث» لكن اتمني ان انجزها في بلدي بدلاً من ان انجزها في الخارج وهذه الاشعار لو طبعت في «سقط لقط» لابد لها من أن تدخل السودان فأحسن للدولة أن تستفيد من هذه المسائل وتبيض وجهها حتى تنتهي هذه الهالة المحيطة بها.
***********
لست مع هاشم صديق في طريقة منع تداول اغنياته
***********
دعني اخرج بك الى قبيلة الشعراء المستضعفة في حقوقها المادية والمعنوية وأنت اول من اوقف غناءه من التداول وجاء بعدك هاشم صديق وسار في نفس الدرب فماذا تقول في هذا الامر؟

ـ دعني اقول لك شيئاً فانا لم اتابع قضية هاشم صديق متابعة تامة لكني تفاجأت بالشئ الذي اعرفه فأنا لست مع الطريقة التي استعملها هاشم في طرح اموره وهاشم ظلم نفسه قبل ان يظلم الآخرين والحقوق المادية والفكرية من حقه لكن كل المغنيين اصحابه ومن حقه ان يأخذ حقوقه بمطالبتهم وهاشم صديق وحده غير قادر على تنفيذ هذه السياسة وتمنيت لو أن الامر خرج من مجموعة من الشعراء بعد أن تفاكروا في الامر وطرحوه لحماية حقوقهم فكان يمكن للأمور ان تسير للامام لكن الامر أخذ الطابع الشخصي وصادر حقوق الآخرين والمتلقين وأنا مقتنع بحق هاشم لكن الطريقة غير مناسبة.
***********
ادعو المغنين للإطلاع على السيرة الانسانية لمصطفى سيد أحمد
السلطة لا تخشي الشعر الهتافي بل تخشي شعر البشارة
***********
نص حميد وماصاحبه من شعراء يمثلون ابناء جيل واحد وهم واحد ونص واحد وبوجود مصطفي سيد أحمد استطاع الناس ان يقيموا منبراً مباشراً للتواصل مع الجمهور عبر هذه القصيدة وبرحيل مصطفي تعرت القصيدة وأصبحت محاصرة فماهو السبيل لايصال هذه القصيدة.. وسؤال آخر هل اللغة هي المدافع الوحيد عن القصيدة فيما اُثير حول العامية ام ماذا؟

ـ في مسألة مصطفي اقول ان ماحمله وتحمّله مصطفي لا يوجد مغني حمله لكن هذا لايعني انه ليس هناك مغنون غير مصطفي فهم موجودون واولئك يحملون ذات الهم الذي يحمله مصطفي وبمثلما التقي الناس بمصطفي يفترض ان يلتقوهم ومن ضمن اسرار نجاح مصطفي انه كان ورشة وعندما أقول إنه كان ورشة فانا أعني ان علاقته لم تكن بالنص وحسب بل كانت علاقته مع النص ومع صاحب النص ومع اهل صاحب النص نفسه وهذه هي الصفة غير الموجودة الان وانا أتمني وهذا الامر متروك للاخوة المغنيين ان يطلعوا علي السيرة الانسانية لمصطفي سيد احمد ولو فعلوا ذلك لاستطاعوا السير في نفس الدرب واكمال المشروع مشروع مصطفي.. قبل قليل قلت لك انني جئت لاغني ولكن اغني لمن؟ اغني للناس الذين اشتم فيهم رائحة مصطفي .. الناس الذين يستطيعون ايصال هذا الغناء سواء ان كانوا «طمباره» او فناني الغناء الحديث .. وكل هذا لايصال مشروع مصطفي ورسالته والتقدم بها للامام حتي يأتي شخص اخر غير مصطفي يشيل الشيلة.. اضف الي ذلك فإن هناك مجموعة كبيرة جداً من قبيلة مصطفي كشعراء ولو احصيناهم لتعدوا العشرات وانا جئت لاطالع نصهم من جديد واتواصل معهم حتي نستطيع ان نغني لباكر ونغني لبلدنا ولمصطفي نفسه الذي غني لنا قبل ذلك وهذا فيما يختص بمصطفي اما في حديثك عن ان العامية تهدد العربية فهذا حديث يجب ان تُخرجه من رأسك تماماً والعامية وطوال عمرها لم تكن في يوم من الايام مهدداً للغه العربية ومثل هذا الحديث يذكرني بحدث في السعودية حيث أنني ذهبت لأنشر الاعمال التي ذكرتها لك فقالوا لي ان العامية السعودية نفسها ممنوعة ولكن انظر للسعودية التي منعت عاميتها تجد أن كل الشعراء عاميون من بندر وكل الشعراء الموجودين بدري بن عبد المحسن وغيره وغيره وكلهم عاميون وغير ذلك انتم رحبتم بمسألة القوميين اليس كذلك والناس وفي بلدهم كيف يتحدثون عندما يلتقوا؟
انا اقول لك ان الاماكن التي زرتها قطر والامارات والسعودية وفي كل هذه الاماكن قابلت اجناس من كل العالم العربي فلم يحدث ان قال لي احدهم هذا الطريق يؤدي الي الحرم.. وحكاية ان العامية مهدده للعربية فهذه مساءل تخلقها السلطات ولايمكن حماية اللغة باعتبار ان العامية مهدد بل يجب تطويرها والعامية تصبح مهدداً لجهة اخري باعتبارها لغة شعبية لغة الجماهير ولغة الغلابة ولأن العامية هي التي تسقط الحكومات في كل الدنيا وعندما يخرج الجمهور الى الشارع ويهتف تجد هتافاته بعيده عن قوالب النحو والتشكيل لذلك هم يخافون منها..
مثلما كانوا يتعاطون غناء مصطفي سراً فإن نفس الناس الذين منعوا الليلة واوقفوها جاءوني مطالبين باشرطة تحمل قصائدي واقول لهم ان قصائدى خالية تماماً مما يسمي بأسلحة الدمار الشامل وياريت مليون
عامية حميد محظورة من التجول في دروب الوطن واصبحت مقتصرة علي قطاع ضيق جداً ماذا تقول؟!
ـ انت تحدثت عن نقطة واحدة ومحددة فبالنسبة للعامية السودانية فالسودان فيه مئات القبائل وبالتالي مئات الالسن غير العربية لكن وبهذه اللهجة السودانية فانهم يفهمون بعضهم والامر ليس عامية عربية بل هي سودانية والسائد في لغة التخاطب لو وقفنا ضده نبقي قد وقفنا ضد رغبتنا اما عن حديث عبدالله الطيب بان العامية هنا اقرب للعربية فدعني اقول لك نحن«لبط» ونبقي ملكيين اكثر من الملك ونبقي عرب اكثر من العرب انفسهم وعندما ياتي الحديث افريقياً تجدنا افارقة اكثر من الافارقه انفسهم فيجب ان نبحث عن سودانيتنا ونسير بها والعامية عمرها لم تكن مهدداً للعربيه وماذكرته عن قصيدتي فهم الذين ارادوا لها ذلك حاربوها ولم يتركوها لتنطلق واعترف لك بان القصيدة غير منتشرة لانها ممنوعة والسلطة لاتخشي الشعر الهتافي لكنها تخشي الشعر البشاره ونحن مع بعضنا نظل نبشر وهي ليست بشارة كذب واشاعة فنحن نبشر ببشارة نعلم انها قادمة وهي التي سوف تسود ولكن لأنها بشارة فهم لايريدون لها الانتشار، لكن دعني اقول وحتي نكون عمليين اكثر ومن خلال صحيفة المشاهد وطوال وجودي استطيع ان انشر ما اقدر عليه وان لم استطع فليحيينا الله حتي ذلك العام الذي ستكون فيه الخرطوم عاصمة للثقافة ولو انتظرنا ذلك الزمن فسنأتي ببضاعتنا هذه ونعرضها مثلنا مثل غيرنا وان لم يتركوها فهي واصله وهم يتعاطونها مثل ما كانوا يتعاطون غناء مصطفي سراً واقول لك سراً لأن نفس الناس الذين منعوا الليلة واوقفوها جاءوني مطالبين باشرطة تحمل قصائدي واقول لهم دعوا الوطن يأخذ براحه كما الخميل ودعوا الناس يغنون، وصدقوني ان هذه القصائد خالية تماماً مما يسمي بأسلحة الدمار الشامل وياريت وياريت مليون مره أن يسمع السياسيون القصيدة أي سياسي والمؤسف ان السياسيين لايسمعون قصيدتنا ولو كانوا يسمعون قصائدنا او قل يسمعون حتي المدائح بسمع حقيقي لطار هذا البلد الي السماء ولكنهم مستعدون لسماع اي لغة اخري ماعدا لغة الباطن ولغة القلب ولغة الوجدان وهذه هي اللغة الصحيحة التي من المفترض ان يسمعوها وفي بلدان كثيرة استمعت السياسة لشعرائها وحولت احلامهم الي واقع لكن مثلنا مثل العالم الثالث نحن مقموعون وكأننا نحن المعنيين باسقاط الانظمة الشمولية والامر ليس كذلك فنحن مع شعبنا في كل حوائجه نغني له ونبشره ونغني له غناء «بالصح» ونحن لا نستاهل ان يلاحقونا ويلغوا لنا حفلاتنا وهؤلاء السياسيونصوتهم ومنذ الاستقلال يملأ الاركان عبر الاجهزة الاعلامية فلماذا لايعطوا غناءنا الفرصة.. امنحوا الشاعر حقه ليقود مسيرة المجتمع وغير ذلك فالبلد مقبلة على سلام وانا حزين جداً ـ واعوذ بالله من اناـ فكل قبيلة الشعراء وكل الشعب السوداني حزين بأن ياتينا السلام عبر الامريكان فكان من الممكن ان نأتي نحن بالسلام وعبر الغناء كان يمكن ان نملأ هذه البلد سلام حتى تدفق لأن غناءنا لا يعزل احد لكن الخطاب السياسي يعزل «كوم» ويقرب«كوم».
وبمثلما ترتفع بعض الاصوات منادية بفصل الدين عن الدولة فأنا انادي وبصوت عالٍ بفصل الثقافة عن السياسة ولكن ليس بالمعني اياه بل بمعني ان تأخذ حقها الذي سلبه السياسي على مر الزمن تاخذه وتسير به لأنه هو الذي سيسود وأي سياسي له عمر محدد وينتهي لكن الثقافي لاينتهي..

****************
انا مع القصيدة التي تحمل مقومات الصمود ولاتسقط
لوتركنا هؤلاء الناس في حالنا لكان ذلك في مصلحة البلد
**********
الرمز في القصيدة يعود لاكراهات اجتماعية وضعوط سياسية هل توافق على هذا المبدأ ومارأيك فيه؟
ـ انت تقول في كلام صعب جداً وأنا لا أعرف ولكن تبقى لي القصيدة والشعر السوداني من بدايته وبالذات في مجال الأغنيه قام الخليل ورمز بعازة ليغني و«عزه» أخرجها الخليل بالرمز قبل أكثر من اربعين عاماً ظل هذا الرمز مشكلة حتي اليوم ولو كتبت اي قصيدة حتي ولو لابنتك واسمها «عزه» يقولون عنك انك تقصد «عزه» الخليل ولكن اريد ان اقول لك ان الشاعر بني ادم وهو «زول» ومن حقه ان يحمي نفسه وانا لا اريد ان اقول لك ان الرمز ستار للشخص بل لا يكون ضرورة ما لم يكن من مقومات القصيدة وانا عندما اتحدث عن الرمز فلا أعني الرمز المتعارف عليه مثل «عزه» وكذا وكذا ولكني اتكلم عن الرمز الغامض البعيد وانا مع كل الرموز الشعبية حتى النهاية وانا مع القصيدة الواصلة التي يحتفي بها الناس بما فيها من رمزية ومباشرة وأي شكل من الاشكال طالما احتفى به المتلقون واصبحت قصيدتهم فأنا معها طالما انها تحمل كل المقومات التي تجعلها تصمد للغد ولا تسقط وان شاء الله القصيدة السودانية لن تسقط في يوم من الايام وفي تقديري انها سوف لن تسقط لكن فلنعطيها البراحة حتي نتطور ونخطو للامام ونحن شعراء عاميين ولو تركنا هؤلاء الناس في حالنا فإنه من مصلحة البلد ان يسمع الاخرون هذه العامية وبمثلما نتحدث اليوم بالعامية المصرية فدعوني اسألكم جميعاً فالسودانيون يعرفون «نيرودا» بكل تفاصيله وبكل اشيائه، الابنودي مثلاً لو جاء لقراءة شعر فهل سيمنعونه .. ابداً سيتركونه يقرأ الشعر ويصفقون له والابنودي وصل اماكن كثيرة وبعيدة وهو يستحق لكن هذا الابنودي لم توصله قصيدته فحسب بل تمت مساعدته بالثقافة الموجودة والاعلام الموجود والطرح في الساحة باعتبار ان المفردة العامية يجب ان تسود وهناك بعض الشعراء العاميين الذين استطاعوا وبقدرة قادر ان يقرأو اشعارهم في الخارج ولكنهم لم يكونوا يعلمون ان في السودان اشياء بهذا الشكل ونحن وحتي يوم الدين سيبقي غناؤنا ولن يتغير.
وعموماً نتمني ان يأتي اليوم الذي يكون فيه الوطن متعافي وشديد وسليم وطيب وخالي من كل الاشياء التي تنسق كل اشكال القبح هذه حتي نغني للزمن الجميل والا نبشر الناس بمسألة خيالية وغير موجودة..

***************
سعدت عندما وجدت صوت «النصري» القادر على الغناء
***************
الاغنية القضية بالتحديد هل هي صدفة أم وجدتم انفسكم مع بعض انت ومحمد النصري ام انك تري ان محمد النصري امتداد لحميد وتجديد لمصطفي سيد احمد؟
ـ بالنسبة لمحمد النصري لابد من كلام طيب وكثير جداً يقال في هذا المخلوق الرائع القوي الشجاع لكن كل هذا التراث هو تراث المرحوم يسن عبدالعظيم مثل«العرب النوبية» وانا سعدت جداً عندما وجدت صوتاً مثل صوت محمد النصري قادراً علي الغناء بقوة وهو اضافة لغناء الطنبور ولكن للاسف الشديد ومثل ماقلت لك سابقاً هذا المسكين كان يعاني من ان الاغنيات لاتجاز او يتم تقطيعها ويبقي من الاغنية القليل ومحمد النصري وغيره من الاصوات الجاده سأجلس معهم ونغني مع بعض وسنتواصل وفي تقديري ان محمد النصري اضافة لاغنية الطمبور والاغنية السودانية بصفة عامة ومع بعض سنستطيع ان نخرج مايرضي الناس ان شاء الله.
*********************
سبحان الله .. السلطة تخاف من مصطفي حياً وميتاً
حزين لموقف المصنفات من رفض اشعار تتناول مصطفي
يبدو لهم ان العود الذي كان يحمله مصطفي كأنه«طبنجة» او كأنه مروحية اباتشي
ربحت بعودتي الى اهلي وهم الخاسرون بهذا الحصار الثقافي
************
كتبت لمصطفي «يوت تنادي وطن .. وطن.. مع انو اداك الغربة واستكثر عليك كفن» وعاد مصطفي ولم يمنحه كفن كما ذكرت وعدت انت تردد «اغني لشعبي ومين يمنعني .. اغني لقلبي اذا لوعني» ومع ذلك استكثر عليك الوطن المنبر وفرصة اللقاء مع الاحبة .. فهل الحرية التي «تحندكنا» بها السلطة انكرتك ام انت انكرتها؟!

ـ اقول انه عندما تأتي ذكري مصطفي وسبحان الله فهذا مخلوق تخاف منه السلطة بحالها تخاف منه حياً وميتاً ويمكن وحتي اليوم انهم لم يصدقوا ان مصطفي قد رحل وهنا لابد من أن اطمئنهم تماماً واطمئن كل الناغمين ان مصطفي مات ولاقى ربه مطمئن القلب مطمئن البال لكن هذا المصطفي سيظل حياً حتى يوم القيامة وليس لمشروعه الغنائي ولكن لاشياء بسيطة وماتركه من غناء سيظل خالداً رغم وجود كل الانظمة وكل انظمة القبح ويبقي الحزن عندما يحتشد احباب وعشاق مصطفى لاحياء ذكراه فقط فيتم منعهم وكأن مصطفي سيخرج من وسط هؤلاء الناس حاملاً عوده ليغني وعندما اقول ذلك فلابد من ان اقول ان غناء مصطفي يشد الناس ويرتاحون إليه لكن يبدو ان العود الذي يحمله مصطفي كأنه«طبنجة» او كأنه اباتشي وغير ذلك، فمصابيح السماء التي ذكرت من خلالها كل هذه الاشياء فأنا حزين جداً عندما تكون هناك لجنة لما يسمي بالمصنفات حينما يرفضون نصاً كتب عن مصطفي باعتبار ان الشئ السياسي فيه كثير ومن هنا اقول ما لكم والسياسة وهل تم تكليفكم بالبحث في الامور السياسية حيث كان يجب ان تتم المناقشة من ناحية نص وليس من ناحية سياسة ولقد قمت بتقديم نصين«مصابيح السماء الثامن» و«حجر الدغش» فقاموا باجازة «حجر الدغش» وكتبوا عنه كلاماً جميلاً جداً وقاموا بارجاع الاخر ويبقي السؤال عن ارجاع هذا النص هل سأقوم بكتابته من جديد او ماذا افعل به وهذه واحدة من الاشكاليات وانا بالنسبة لي يبدو الامر باني لم اخسر المنبر ولكني ربحت الكثير لأني عدت وانا الان وسط بلدي ووسط اهلي وهم الخاسرون بالرغم من مايطرحونه من ان الخرطوم عاصمة للثقافة في 2005م والحصار الثقافي يصبح منتهياً في ظل وجود الانترنيت والهواتف النقالة والان وعلي مستوي خارجي واسع كل الناس يعرفون انني جئت لاقامة ليلة شعرية وتم إلغاؤها ويبقي السؤال اذا لم يتحمل هؤلاء الناس عودة حميد فكيف سيتحملون عودة سيدي الميرغني وكيف سيتحملون عودة قرنق والسياسيين المعارضين ويبقي الواقع بأنني لم اخسر بل هم الخاسرون باستعداء الناس عليهم وكل الناس الذين جاءوا لحضور الليلة وعادوا مكسوفين سيكونوا غاضبين لما حدث وغير ذلك فإن وزير الثقافة عبدالباسط عندما التقاني في الرياض في تكريم عز الدين عمر موسي لماذا ناداني واحتضنني ولماذا صفق لي عندما كنت اقرأ في الشعر ولماذا كرمني السفير السوداني في الرياض واحمد الله اني وبالصدفة وثقت هذه الاحداث والقنصلية في جده تستدعينا في المناسبات للقراءات الشعرية وتقوم بتكريمنا فلماذا يكرموننا فماذا يعني هذا وهؤلاء الناس يخدعون من؟ ولو كنت مسؤولاً عن الثقافة لأقمت مشانق في الطرق للذين خدعوا الشعب السوداني وخدعوا السلطة ذاتها بالاغاني الجهادية المغشوشة والالفاظ الهتافية الفارغة التي لم تأت بنتيجة وهؤلاء هم الذين من المفترض ان امنعهم واحاكمهم وليس محاكمة القبيلة الشعرية من امثال حميد..

***************
اركز على شئ آخر في زمن حرق المنابر
***************
بين «ست الدار بت احمد» و«الزين ود حامد» و«السرة بت عوض الكريم» و«الضو وجهجهة التساب» «طيبة» .. «نورة» و«عبدالرحيم» و«الحسين في الرجعة للبيت القديم» بالاضافة الي شخصيات عديدة تحركت عبر نص حميد داخل وعي التفاصيل في القرية السودانية الي الوعي العام واصبحت تمشي عبر نصوص حميد في كل شوارع الخرطوم اين هذه الشخصيات في نص حميد الان؟
ـ اقول لك شيئاً وهي حقيقة اقدر علي ان اؤكدها ان النصوص الاخيرة التي تتحدث عنها الان وتقول انها غير موجودة او غابت عننا فدعني اقول ان الشخصيات لم تغب عننا بالمعني الكامل لكن ذات الهم الموجود في هذه الشخصيات يظل سائراً حتي اليوم فقط أنا في هذه الايام ركزت على جانب واحد اعتبره اهم في زمن حرق المنابر وهو شكل الاغنية ولعلك تعرف مايتطلبه الجو النفسي والجو العام للاغنية ولذلك رايت انت ان هذه الشخصيات اصبحت غائبة لكن هؤلاء الناس لم يذهبوا بعيداً بل ما زالوا يتجولون ويعملون في عملهم «فالسره» شغاله وتتجول معك في الخرطوم وبكل تكويناتها و«ست الدار» مازالت وحتي اليوم تكتب في خطاباتها و«الحسين» وحتي اليوم مازال يحارب في الجنوب ويقتل وهؤلاء يؤدون عملهم وسائرون ومعهم شخصية اخري لعلك نسيتها الا وهي «عيوشه» ولعلك متى ماخرجت ستلتقيها وكل هذه الشخصيات موجودة وبكل شراستها ولو سمعوا حديثك هذا فإنهم سوف لن يغضبوا فقط بل سيعتدو عليك«بالعكاز» اما عن النص فدعني اقول لك انني محتاج لشكل الاغنية والظرف الذي يعيشه الناس وتعيشه البلد والقصيدة نفسها بدليل ان «السره» و«ست الدار» تحتاج لخشبة مسرح حتي تتم قراءتها مثل زمان لكن الوضع اختلف حيث احترقت المنابر وليست هناك طريقة للوصول الي الناس الا عبر الاغنية واتمني وفي عودتي هذه ان اقدر علي فعل ماعجزت عنه في السنوات السابقة.
************
غني مصطفي لموته وهو حي
************
قصة قاسم امين .. «قتلوك الناس القصر الناس المهضومين .. الناس البالا مغطي الساسه المبيوعين» الربط في هذه القصيدة بين غناء مصطفي سيد احمد وماحدث؟
ـ ليس في الامر ربط فمصطفي غني لموته «ايها الراحل في الليل وحيداً» وعدد كثيراً من النصوص تجد مصطفي غني فيها لموته وهو حي ونحن لانريد ان نفتح جراحات ونثير زوبعة، نحن نريد ان نقي بقية الناس من هذه الموجعات، ومصطفي كان يعاني لوحده حيث يستقل التاكسي وحيداً ويذهب لغسيل الكلي ويعود وحده ولعل الناس القريبين منه يعلمون ذلك وهم الذين قتلوا مصطفي بحبهم.

سؤال كنت تتوقعه ولم نسألك له؟

ـ انتم سألتوني ولا اتوقع ان هناك سؤالاً لم تسألوني اياه، لكني اتوقع ان تسألني غداً وبعد غد واتمني ان تسألني يومياً واجيبك بما احمل لكن اقول لك ان قصيدتي كافية لتخبرك عن من هو هذا المخلوق وبمثلما قلت لك فان القصيدة وهيطه وهذا البلد وهيط وهاطة القصيدة ونحن جئنا لنغني لهذه الوهاطة ونتمني ان يسمعنا هؤلاء الناس ويستوعبوا مانطرحه نحن.

****************
اغني لشعبي ومين يمنعني
**************
اخر الكلام احلاه ماذا تريد ان تقول؟

ـ كلمتين أو مقعطين «من حقي اغني لشعبي .. ومن حق الشعب علىّ لا بأيدك تمنع قلبي ولاقلبي كمان بايدي » هذه اغنية غناها ودجباره في وقت من الاوقات.. «اغني لشعبي ومين يمنعني واغني لقلبي اذا لوعني..» غناها مصطفي، التحية لمصطفي واكيد ان روحه في ذلك اليوم حومت وادركت الحاصل وسعدت بموتها..

حَق الغُنى

محمد الحسن حسن سالم (حميد )

"ومن حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عِرق لا آه نتقادم .. سكتنا بياض النية
مش كلنا جينا من آدم .. مش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية"


من حقي أغني .. أغني لشعبي .. ومن حق الشعب عليّ
لا بي إيدك تمنع قلبي .. ولا قلبي كما بايديا
علمني أغني .. الطين .. المخرطه .. والطورية
الناس الصابرة .. سنين بالحالة .. الما دغرية
القابضة الجمرة في إيدا .. والجمرة تلهلب حية
لا قادرة الجمرة تقيدا .. لا قادرة تولع هيّ
يا قلبي بلاش نستعجل .. في الدرب شوية شوية
واصلين الما بتأجل .. لليوم الشمشو قوية
علمني الشوق نترجل .. نستحمل وجع الجية
لا القش بيهاب المنجل .. لاطب .. النار .. الكيه
يا صقر الآه يا ريح .. لا تنفض عش قمرية
من حقو يغني صريح .. ذرية ورا ذرية
ومن حقي أغني العالم .. إبداع وعلم حرية
إنساني شعوب تنسالم .. تنسالم بي حنية
على نخب الود نتنادم .. لا جنس ولا لونية
لا عِرق لا آه نتقادم .. سكتنا بياض النية
مش كلنا جينا من آدم .. مش آدم ابو البشرية
السجن إذاً يترايم .. نبنيها قلاع ثورية
عقبال الخير يترادم .. والدنيا تمش دغرية
مد كفك يا بني آدم .. حرية سلام حرية
__________________

كل ما تباعد بيننا عوارض .. كل ما هواك يا طيبة مكنى

تلد الغربة القرب الواعد .. بيكى أسمى الشوق وأكنى

لما أفوتك من دون خاطر .. أو دون خاطر منى تفوتى

بلقى حبايب فى كل حتة .. وكل بيوت الفقراء بيوتى

لا غيرت وراك السكة .. لا غيرت ملامح صوتى

لا غافلنى وهادن فنى .. غاب للمدن الما عرفتنى

سبنا الشوق الصبرو مصوبر .. للارياف الما وفتنى

للاطفال الناشفة ضلوعها .. ونازفة بغنى

أطمن روعها وهدى دموعها .. لبسمة بكرة الماها تمنى

ولا مصنوعة

للاطفال الناشفة ضلوعها .. ونازفة بغنى

أغعنى لشعبى ومين يمنعنى .. أغنى لقلبى إذا لوعنى

مخبر دربى الما رجعنى .. إذا طلعنى نخلة القرب

ولا الغربة الكدرومية .. تنزل غنوتى بقمرية

أو وقعنى ببطن الجب .. بطلع يوسف بالأغنية

أغنى الناس الما بتسمعنى .. امنى بعيد المبعد عنى

النادا نشيدها وكنت المعنى .. الأيدى فى إيدها وإيدها بتبنى

واريت غناوى لناس شغالة .. تكون سندالة وعود طورية

ضراع رجالة كتاب أطفاها .. وجملة بالها الما مكرية

سدة مالها وبقة فالها .. فى ليلة الدخلة على إسم قضية

حبيبة قلبى يا سودانية .. يا أسمى معانى لزول بيعانى

يا ود ضكران يا بت دغرية .. وانا إن سامعانى فصلت

أغانى غبش فقرية وروح غانيانى..هويتك منك يا دافعانى

.. براحة يدى كما الأشواقويا جابدانى براحة على

.. وما بتحير بين الفوق .. وبين الناس التحتانية

.. إلا مغير ولا عقوق .. ولا كفيف الإنسانية ..

ومنك وين يا كاشفة عينى .. بنور الإلفة ضيا الحنية

وحلم العلم ناس تتسالم .. والبنى آدم صافى النية

للاطفال الناشفة ضلوعها .. يطمن روعها وتبدا تغنى

غناوى بكرة الكم مسموعة .. حسيس طنبارة مع نقارة

صفقة حارة ودارة تغنى .. فيا حلتنا عليك ترابك

وأنت شبابك زينة الجنة .. أحلى عروس البلد اللتنا

ولا الغبش الرابة تغنى .. ولاهير المدن التصحى

وتمحى ظلام الحاصل عنى

كل ما تباعد بيننا عوارض .. كل ما هواك يا طيبة مكنى

ما طال فى بحرك فى مــى
ما طال فى بحرك فى مى
وتمرك مفرع بالجريد
شدرك أمد حد السمى
طينك معتق بالطمى
نبنيك أكيد .. نبنيك هوى
نبنيك أيوه سوا .. سوا من وجديد .. نبنيك جديد
إيد أبوى على إيد أخوى على إيدى انا
على إيد و إيد تجدع بعيد فى اللجة فى من راس ميضنه
حيكومة الفقر الدمار
الكضبن و الصهينة
اللى نقاص أيامنا كاس
اليالطيف سوس البحر نردم قفاهو حجر حجر
من ها الرصيف
الما قدر قدام سريحة الموج يقيف
الماانستر الرزقية وناس أيه
نسقيها كاس اسقنا يا
نوريها كيف عشق الحياة
سنانا فوق حجر القصاص
سوانا ناس ضرب البحر
جوانا احد من الرصاص
يا ضو حبيبين القسا


طول ما انت غرقان فى الأسى

تبت يدين ما ترمى ساس

ما تبنى مجدك من جديد

تفتح شبابيك الخلاص

تدخل نسيمات النشيد

بيت القصيد يستقبله

مستقبله .. و الحاضر الماضى التليد

يابلدى يافردة جناحى التانى

وكت الناس تطير لى عالمه

وآ فجعة الزول البيجيك

ما يلقى فيك غير الهجير ناسا تواتى مسالمه

مل البشاشات القبيل تلقاها ميته مسممه

والجاته جاته من الأرض ما جاته من تالا السما

ما أعتى غبنك يا ولد

وأعدل قضيتك وأعظمه

لاترجع السيف الجفير

والدنيا فايره مصادمه

من غير تجيب تار البلد .. ريح العوارض تهزمه

تطرد مع ابليس الأخير دعة الضلال

من جنتك يا آدمه

تاكل من الشجر الحلال

يغشاك نعاس فى ضل رمى .. تختال هضاريب الصعب

كربة ليالى المظلمه

يانيل قبل خاطرك يطيب

أرضك تفزع باللهيب

تكشح تواريب الغضب .. صعب المراس

نوبه و زنوج و بجه و حلب
رطانه عربان مو أشو
ومولدين تلقانا أو نلقاك ضوء
ظلمة لياليك العجاف
رشه نهاراتنا النشاف
آمنا بيك وموحدين
فى إيدنا فاس وقلم رصاص
شتله و كمنجه و مسطرين
و طبنجه فى خط التماس حـ

رسائل ست الدار بت احمد جابر
للزين ود حامد
( تلغرافات )
( جواب أول )
باسم الحاضر والمستقبل
ست الدار بت أحمد قالت :
ليك يا الزين ود حامد شوقنا
أما بعد ،
المبعوتة المنك .. وصلت
ورُح فكيت الطلب الفوقنا
باقي الدين يا الزين خلصتو
قدر الفاضل .. مصروف راشد والتومات
والجايات من جاي .. لا جاي
زي ما قت لك قبال ده
شهر إتنين حا نطهر راشد
شهر إتنين المدرسة تأجز
الله يبعد العارضي تجينا
وراشد حالف ما يطهر
إلا أبوهو وعمتو تحضر
وإلا يجيبو الغنايين
شان الشوق بت سرنا ترقص
قلنا نجيب المداحين
طنطن .. أنا جاي من الحج
وعارف راشد لما يطنطن
كل الدنيا الفيي تطنطن
غايتو بشر .. بس ربو يهون
ما كلمتك بالتومات
أول البارح جني يرطنن
قالن نحنا الخواجات
بسم الله .. مرق حصلت
لقيت لك جعفر زارد البيت بالخواجات
يبقى حداشر وخواجية
ناس البلد الكسرو عليهن
صدو يقلبو في إيديهن
عدمانين من إسم حكيم
ولا خبيراً للمشروع
علماء آثار .. فضلت في آثار
ما خموها الجونا قبلكن .. شن خلولنا بلا حجار
الله يصرف الخواجات
بينات جعفر والمحجوب .. والمحجوب والخواجات
طقت حجي .. العمدة طفاها
باقي الناس الجات للفرجي ..
قنبو قيلو شبعو لحوم .. والخواجة يصور ساكت
ستة خرفن وتيس ما كفن
ستة خرفن في فد يوم
المعدوم أشكال وألوان
أي خدار في اليوم داك في
كملن رف كمين دكان
أول كفو الخواجات
بعدو العمدة وصمد الساقية
ناس المجلس والمشروع
بعدو الطلبة وباقي الناس
حتى الشفع والحروم
ستة خرفن وتيس إنصفن
ستة خرفن في فد يوم
جات من صالح بت كلتوم
تسكت تخبز طول اليوم
لمن حرقت الدولاب
قنبت المسكينة تدعي
الله يصرف الخواجات
غاية الليلة السقا يشولق
واطات الله دي ست رشاها
ما في غنوتاً ما غناها
ما في مدحتاً ما سواها
حمارو صبح لحق أمات طه
سب الدين والأمريكان
جنس بدع
زولك ده يحير
عند الجد كان أده ينقنق
عند الفارغة يشيل ويبعزق
إذكرت كلامك ليا ..
إنو في ناس لاعبين بالدين
وناس لاعبابا الأمريكان
الله يصرف الأمريكان
الله يصرف الصرفيكان
ما خلوني نشدتك منك
كيفن حالك والخرتوم
كيف المصنع والعمال
حالم لسع نفس الحال ؟
وما رقوك سووك باشكاتب ؟
يورينا الله زيادة الراتب
كيف الناس والحالة عموم ؟
والعزابة الكحيانين
سيد البيت عل ما زكاكم
لسع تقعو تقومو براكم ؟
قلبي معاكم
ربي يخدر عود ضرعاتكم
بالي معاك يا الزين ود حامد
بالي هناك والشوق الشوق
خلى شدير الجوف محروق
راجي مطيرة الزين ود حامد
نحنا نصاحاً زي واطاتنا
نحنا نصاح إلا القراص والتجار والحاصل البحصل كل صباح
شتلاتك قبضن
الحملان كبرن بلحيل
العضمين الروكة إنزرعن
اوعك تشفق من تالانا
ولا نبقالك مشغولية
زيك واحد مستورين وما ناسين المسئولية
هي يا الزين زغرد
بت ام زين جابت لها بت
ستة أولاد حتان البت
المحجوب ينشد من خبرك
شافعو محسب من يومين
التومات طيبات ونصاح
إلا غباش بلحيل آ الزين
راشد كرر .. شهر اتنين كان ما جيت أنا ما بطهر
الله يبعد العارضي تعال
كان فد دور يدوك يا تعال
كان بالخصم إن شاء الله تعال
وما تتوصى .. وداعة الله
أوعى البشغل والعربات والحيكومة السمها فاير

أم أولادك ست الدار بت أحمد جابر

ست الدار بت أحمد كيفك
جاني جوابك مفتوح شارع
جاني جوابك وانا بتذكر في ناس راشد والتومات
في الشتلات والحالة عموم
ناس حلتنا التحت .. الفوق
الليهم الله وعيشة السوق
جاني جوابك وانا بتصور
في المشروع وعمايل جعفر
ولما بكيت .. يا ست الدار
أيوة بكيت .. يا ست الدار
لما قريت علماء آثار
علماء إيه يا بت الناس
سواح إيه .. ما عندك راس
ست الدار تتوهدبي ليه
ديلا جماعة السي آي إيه
تعرفي إيه السي آي إيه ؟؟
امريكان في كل مكان
ديل مالين الدنيا ملي
ديل قالين الخلق قلي
باسم الدين والأمريكان أي عوج مبدي ومختوم
صوتنا هناك وهنا مكتوم
ومافي فرق في الوقت الراهن بين واشنطن والخرطوم
أنا مأزوم .. مأزوم .. مأزوم
يا خرطوم وينك وينك
يا خرطوم شن شبّ وقلبك وسلبك
حلبك ؟ زنجك ؟ بجتك ؟ نوبتك ؟ عربك ؟
أنا مأزوم .. مأزوم .. مأزوم
يا خرطوم أزمني الصلبك فوق الطلحة الأمريكية
يا خرطوم .. أوه خرطوم .. أوه واشنطوم
طن .. لفتك فجراً يقطع رحطك
ست الدار سامعاني يا اخيتي ومرتي وامي وأم الكل
أنا بندهلك من شارع الله .. فوقي هجير والتحتي بقل
سبي معايا الشردو راجلك .. والحرمونا شوية الضل
سبي الحالة العالة علينا .. حتى احكيلك بالتفصيل
حاصل الحاصل يا بت أحمد
جاني وفد في المصنع زاير .. وكان الوفد ده أمريكاني
لفّ وفات اليوم التاني
جانا مدير المصنع فاير
وشو حمار العمدة العاير
نف المصنع فيهو خساير
وقالوا يخفضوا مئتين عامل
مئتي عامل في فد مرة
مائتين عامل .. مائتين عامل
يبقوا هوامل .. يبقوا هوامل ؟؟
ما يهموش .. الهم المصنع
تفّ قراروا وفات في حالو
مسئولين ونقابيين مافي العارض واللا اترجى
العمال من سمعوا احتجوا ... سيرو موكب صامد وصامت
إتضامنا معاهم سرنا ..
أب عرام دور عربيتو .. العربية الامريكية
زنقح خلا الموكب ثابت
احتجينا مع الإحتجو
إتكلمنا كلام موضوعي
قلنا المصنع حق الدولة .. والعمال أصحاب الحق
هي اللي تقرر والتتولى
هي البتحدد سير المصنع
إيد العامل هي العاد تنتج
ما المكنات الأمريكية
زيت العامل ياهو البطلع .. مو المكنات الأمريكية
ودرن الأيدي العمالية
أنضف من لسنات الفجرة
ودين الدقن الشيطانية
ومن كرفتة البنك الدولي .. وكل وجوه الراسمالية
وأشرف من ..............
داك الحين المصنع هاج
جات عربات اللات بوليس .. فضوا العالم بالكرباج
والبمبان الأمريكاني
شرقت شمس اليوم التاني
كنا حداشر ونوباوية
متهمنا بالتخريب والتحريض والشيوعية
البوليس صاقع شيوعية
وفاكر نفسو بنبذ فينا
هي آ بوليس أمك مسكينة
البوليس عمدني شيوعي
التحقيق طلعني مدان
التحقيق طبعاً تحقيقهم أو تحقيق الأمريكان
اسبوعين عشناهم جوه
اسبوعين زادننا قوة
ست الدار ما تشفقي خالص
ست الدار أنا ياني الزين
ست الدار سامعاني كويس ؟
كل الهم ما يغشى الغم بيتنا وراشد والتومات
وكل الناس الحالهم شاهد
ست الدار الشوق الواحد
لي حلتنا وليكم ليكم
وللإشراق في عينيكم
وكل الناس الزولهم صامد
شوق وسلام .
الزين ود حامد
ردي سريع .. باليد .. باليد
في دورين موعود بي شغلة
لمت لمت .. كان ما لمت أنا جاييكم وما ندمان
( بعد الحاصل والإتحصل ست الدار بت أحمد تكتب ) :
زيني الزين .. أب حالاً زين
جاني جوابك .. يا المبروك
وسابني أشوف الدنيا كويس
وأعرف غلط الصاح مظبوط
سابني أميز .. وأقدر أفرز .. أرجع أميز
فرحانابك يا أحزان
فرح النار بي لوح الزان
مبسوطابك يا المبسوط
ما هزاني مصيرك
قدر ما هزوني الميتين عامل
ميتين عامل في فد مرة
ميتين اسرة تروح وين
في الأيام النجسة المرة
ميتين عامل؟؟
والله مهازل
والله عمايل
يا أوغاد .. وينا نقابة السجم الشوم
وين عمال السكة رماد
وين الطلبة ووين الوين
بعتو شفيعكم يا عمال
بعتو وجيعكم للراسمال
وشن راجين يا تعسا الحال
هاكم دي ..
والله مهازل
ميتين عامل ؟
والله عمايل
عامل ساكن في آخر الدنيا
وصل المصنع بآخر بنية
ينتج كيف؟ شغال بي فونيا؟
عامل ينتج عشرين حتة
تلحقو منها قيمة إتنين
ستة بغطوا المنصرفات
سبعة.. تمانية .. تسعة بغطوا
أدها تسعة المنصرفات
كل الفايض .. بدخل وين؟
قولوا البفضل بمشي لي مين؟
وبرضو خساير؟
والله مهازل
يا مضغوط .. خفض ميزك حبة تين
تنك القعدة تلاتة خطوط
خفف مرتك توب مضغوط
من التمسحبو كبابي الصين
خفض عمرك يا ابن الفانية
وبي نظارتك واجه ثانية
ثانية عيون الشغالين
ثانية وبس
والله مهازل
ميتين عامل ؟
ميتين بيت ؟
ميتين اسرة بلا راس خيط؟
ميتين اسرة ملوها جراح
ميتين اسرة حا تولد صاح
وليكم يوم يا أولاد الهرمة
ليه يا الزين بتوصي عليّ
وانا بت احمد ست الدار
ام اولادك وهم صغار .. ام اولادك وهم كبار
وياك الزين ود حامد داك
كان متوظف .. ياكا الزين
كان متوقف .. ياكا الزين
ليش يا الدخري توصي عليا
اسبوعين قضيتن جوه
يبقى غصب .. زادنك قوة
ليش يا الزين بتوصي عليا
ليش يا الدخري توصي عليا
وعارف ام راشد والتومات .. مرتاً دغري وغلباوية
آه يا الزين .. لو كنت معاكم .. كنت بقيت النوباوية
ما تهتم يا الزين بالحاصل
واصل سعيك .. واصل واصل
واصل سيرك
كان ما كنت الزين ود حامد كان حا يكونك واحد غيرك
في فضاء فالك يا إنسان
نسمة تقولك في الإمكان
أبدع واحسن من ما كان
ياتو مطرتاً سوت شو .. فرقو غيما الأمريكان
ياتو رصاص ما عقبو خلاص
ياتو سجن يا الزين ود حامد
ياتو محن تمحى الإحساس
لما يكون في الساس والرأس
ياتو وطن يا الزين ود حامد
ياتو زمن دام للأنجاس
طه ترابلتو راحو الديش
غزّا بكانا اتنين رطانة
صاقع كلو من اسماعين
هو الفسر لهن الشغلانة
ويا اسماعين
ما كان الديش شقّ مسيمعك بالجبخانة
لو المجلس قبل اوراقك .. أو في الثانوي لقيت لك خانة
لكن قدرك يا إنسان .. بلداً هاص هيصة جبانة
طالو الناس التريانين .. ضلو الله الما ضلانا
أخّدو نورة الحاج بالدق
باكر دور ما خشّ عليها
خاتي اللوم قطع التمرات الفوق راس بيتو
الخلفاء شكوهو وما لقو حق
المحجوب إتلقى اخبارك وقال جاييك في أول بص
البرسيم طهرنا البارح
نعجة راشد صبحت والدة
الحيضان سقناهن لوبي
التومات طيبات ونصاح
راشد طيب
وانا طيبين
كل الناس يا الزين طيبين
ينشدو منك في الأفراح
وفي الأتراح .. الزين الزين
ما تشغل بالك
بس يا الزين كان درت مشورتي
اصلو كتالك ياهو كتالك
تجي مندلي
الواطة تراها
وبي جاي جاي .. بندبر حالك
ما الحيكومة الضاقت دمك
عينا محل قبلت قبالك
شورتك عندك
عندك شورتك
والببقالك .. الببقالك
التمرات بعناها آ الزين
خفنا السوس ونزالة السوق
مبعوتالك عشرة جنيه
والأشواق من هنا لا عندك
ست الدار أحمد جابر
تلغرافات :
تلغرفين في وقت واحد :
نوري . السوق .. ست الدار بت أحمد جابر
المحجوب في قطر اليوم
عفش الزين
النوباوية
الخرطوم .. الخرطوم بحري .. كشك الشعلة .. الزين ود حامد
راشد راقد والواطة جعفر طالق فيها بهايمو
ست الدار بت احمد جابر
نوري السوق المحجوب ود أحمد جابر
كتب الزين .. كل الاوراق .. راشد كيف
النوباوية
الخرطوم .. الخرطوم بحري .. كشك الشعلة
النوباوية
أنا في السكة وست الدار
راشد ود الزين ود حامد

الجابرية
كان ضحوية ... وكنّا نسنّد في المحروت
فجأة يدوي مكبر صوت
قال الريس مار بي فوقنا
من شغلتنا قلعنا عروقنا
إن شغلتنا بلا ماروقنا
فكّينالو حبل واسوقنا
وإنماسكنا يطمّن روقنا
قمنا جميع الحلة مرقنا .. البيشوفنا يقول وا شوقنا
كان ضحوية .. وكانت عين شمش الله قوية
وكان الريس في عربية .. واقف طولو تحت شمشية
هللنالو وهلجنالو .. ولوحنالن بالطورية
فرّ عبايتو وهزّ عصايتو .. وهزّو بنادقن الضابطية
صفقنالن صفقة قوية
زغردنالن .. وهّدن عندنا خمسة دقائق
قدمنالو كتاب الله درقة وسيف .. تبروقة هدية
قفة تمودة .. وفاس دهبية
وكنا قبل بيّتنا النية
وبين بنتين علّينا اليافطة .. اليافطة ام زيق الدمورية
وانعبينا هتافاً واحد :
( الجابرية تحي الثورة ..
دايرين بوسطة ومدرسة وسطى
والشفخانة وسوق منضبطة )
روح باسم .. قام خاطبنا بنهج الثورة الصارم وحازم
أمّن لازم من شفخانة والتعمير بالعون الذاتي
أمّن لازم من شفخانة ومدرسة وسطى
والتعمير بالعون الذاتي .. إلا البوسطة دي ينظر فيها
اما السوق .. السوق منضبطة
وبالتأكيد .. للتجار الأسعار واضحة
للمستهلك باينة وواضحة .. وإن جاملتوهن تبقى الغلطة
إنكيفنا .. رفعنا إيدينا وهزيناهن بالتأييد :
( لا تفريط في قوت الشعب ..
سحقاً سحقاً للرجعية
الجابرية ضراع الثورة ..
بالإنتاج حا نبني بلدنا )
وكانوا في جيهة ونحنا في جيهة
هُن إنهببو بالكابات .. وما همانا الصيف وعرقنا
فات الريس وانفرتقنا
انفرقنا على الجابرية .. كلنا ننضم وما صدقنا
بالجابرية تجيها البوسطة
الشفخانة ومدرسة وسطى
قلنا يا ريت لو زارنا فطور
وانحزمنا ضبحنا التور
كنا اقلاّ ضمنّا النور
أو ياريت لو زدنا الصفقة وعاش .. ويسقط ويوية اليوية
كنا أقلاّ ضمنا الموية
كنا بننضم بي إيدينا .. ( ده أحسن ريس مرّ علينا )
من الله خلقنا وشُفنا خلقنا .. ده أول ريس ذاتو يجينا
وكونه يجينا يقنّب بيننا .. يشوف البينا .. كفاية علينا
آ الجابرية يجوكي الحكماء
آ الجابرية تواصلي البرة
آ الجابرية ولادك تقرا
نمشي الليلة نصاقر الرادي
نمشي الليلي نحضر النشرة
كنا نرجع في كلماتو
إلا في ستة من الجابرية .. قالوا تعبكم خارم بارم
يذهب حاكم خلف الحاكم
والجابرية تظل في حالا .. حلة حياتها تسر الظالم
صدفة تموِّت وتحيا اطفالا
لا جلكوز لا تقرا رسالة .. لا راح يطلع منها عالم
ما بينصفكن إلاّ ضراعكن .. عبّو ضراعكم يا رجّالة
وخلو بصركن دغري وسالم
حكم العسكر ما بينشكّر
كلّه درادر .. كلّو مظالم
ما هو قدركن تحيو همالة
مقصودين والقاصد فاهم
وقاطعناهن .. حاربناهن
تمّيناها البينا شتائم
حالَتُن احسن ناس في الحلة
إيدا نزيهة .. عقولا نبيهة
وقلنا يفرزوا وقلنا فواهم
يطلعوا فالصو وقطاع رحمة
عينة شماتة وخارم بارم
وإحنا القصّر واثقين فيها
وقطعناها معاهم جملة وقاطعناهن
وصاروا في جيهة ونحنا في جيهة
مرّ اليوم .. الشهر .. الحول .. والجابرية بلد في حالا
قواسي شيوخا .. مآسي أطفالا
عذابات ناسا .. حلة تعافر ومقطوع راسا
من القُرّاصة ولي قَرّاصا .. حلة تعافر ومقطوع راسا
عشرين كيلو من الجابرية .. صبية تساسق بي كرّاسا
آ الجابرية عذابك فينا .. لاكي القرية ولا كي مدينة
وفد في وفد يقوم ويجينا
عايزة دراسة واجراءات
عون امريكي قرض ألماني وحاحاءات
وحد ما نشوفلنا مسعولين .. مسعولين أو خواجات
نجري نلم قدحاتنا عليها .. ترطن ترجع زي ما جات
الشفخانة وعايزة دراسة .. ومدرسة وسطى وإجراءات
لما المطوحة طالت بينا .. إنذكرنا العون الذاتي
إنحزمنا وقلنا برانا .. نبني نقوم لي الشفخانة
طوبة في طوبة .. وقومناها
ويوما التمت جات السلطة عربي وعجمي ومرة رطانة
الشفخانة ده ما هو بُكانا
هاك يا تلتلة هاك يا ورطة
وغصباً عنك يا الجابرية .. غصباً عنك يا أحوالا
وحمياتا وموت أطفالا
وحمرة عينكن يا رجالة
قوة إنشكت بيننا النقطة
وفي الجابرية تحوم الشرطة
هووا كلاب الحلة وصنّوا
ومن يوم داك ما شفنا الستة
وفد الحلة السافر جانا .. قال إنأكد شاف الخرطة
ونحن بدل نبني الشفخانة .. إنسرعنا بنينا النقطة
الشفخانة ده ماهو بُكانا .. وكانت غلطة إنقلبت ورطة
إنفاهمتو مع المسعول ؟؟؟ إنفاهمنا مع المسعول
وقال حا يقوِّم للشفخانة ؟؟؟ أو يدفع لنا حق الطين
مع إنو النقطة وكت بُنيانا قومتوها بلا زنزانة
في تقديرنا كلام معقول .. كون يقوِّم لي الشفخانة
حاجة تضحك .. محرقة ... هانة
انتو تقيفو مع المسعول
واللا الكنتو تقيفوا معانا
وقلنا وخفنا نصد الجاي .. خفنا نفشل باقي الخطة
فضلت جايي .. هي فضلت خطة
وانفرقنا على الجابرية .. وانعلقنا تجينا البوسطة
ومدرسة وسطى والشفخانة قصاد النقطة
تجينا .. تجينا .. تجينا ... تجينا
وما إنيقنّا ..
ناس إنولدوا وواحدين ماتو
لمّا الريس ودوشتو فاتو
فاتو العسكر .. وجو الأحزاب
ونفس الحلم إنجدد تاني
نفس الوجع الراح تحتاني
حتّلناهو جمعنا رفاتو
نفس اليافطة في نفس الحتة :
( الجابرية تحيي الشعب
دايرين بوسطة ومدرسة وسطى
والشفخانة بديل النقطة )
فينا إنكلم شيخ الحلة
صنقع .. دنقر .. سلم وصلّى
وكانوا كلاب الحلة بهووا
وقال كلمتنا تكون فد واحدي .. شان ننقوى ما ننزلا
شان مشهادنا وعدل الحلة .. نحن نفوِّز حاج البلة
وزاد هوهيو كلُّوب الحلة
وبعضنا عارض .. ردّ وفاوض
شيخ الحلة القام حمسنا .. بلة الحمش الزول ما دلة
أول فاهم وقبلوا ولدنا .. وراح يحكملنا بي شرع الله
هو .. هو .. هووا كلابنا .. لمّا استغرب شيخ الحلة
وانفرقنا على الجابرية
انفرقنا ويوم الليلة إنجمعنا عموم الحلة
شيخ الحلة قرا القرآن .. صنّوا كلاب الحلة وهووا
وبلة إنقدم سمّ وصلّى .. صنّوا شوية .. وهو هو هووا
وقام إنكلم .. وعند إنكلم كان بينقسم
النسوان الجاي تنهامز
الصبيان الجاي تنغامز
وكان بينبسّم
وكانو كلاب الحلة بهووا
شكّر وشتّم .. هو هو هووا
حلّل وحرّم .. هو هو هووا
هود سابنا .. وفات ودانا الآخرة وجابنا
قاطعناهو وصوتو إنوطّا
اصلاً واطي وتاني إنوطّا
دايرين بوسطة ومدرسة وسطى .. والشفخانة بديل النقطة
التموين وزيادة الحصة .. كهربا موية وسوق منضبطة
بلة انبرع وقال ببنيهن .. هو هو هووا كلابنا واستغربنا قبل بالمرة
لامن نهتف ترسى كلابنا .. لامن ينضم بلة يهووا
بلة انحمس وقال بسقينا .. وبي إذن الله يضوّى الحلة
هتف الشيخ وهتفنا وراهو :
لا تبديل لشرع الله .. هو هو هو
ولا ولاء لغير الله .. طاء طاء طاء
عاش الفارس امل الحلة .. بلة الطاهر علي حسب الله
بلة الطاهر علي حسب الله
كبر فينا وقام إندلّى
ولسة كلاب الحلة بهووا .. وزاد هوهيون
كبشاً ضاع .. من مرحاتو وفاقع باع
بلة الطاهر على بلاّع
كانت أول مرة نشوفو .. يومنا الشفنا اللاندكروزر
اللونا مخطط .. والبنوت الراسا مربط .. التنبوبر
لوري مكوش أقمشة .. سكر .. حتى الفوفو
وعتِّل تؤجر .. وامحى المنكر بي معروفو
بلة الطاهر علي بلاع .. اكرمناهو .. اكرمنا ضيوفو
يشبة مَرَتْ الشيخ في وشيو .. لولا الدقن الدشدش صوفو
بلة خبارك ما بتشبهنا وعامل زولنا
تاني نقول الزول برّانا نغير قولنا
إلا كبار الحلة بقولوا .. بلة ده هولنا .. بلة ده أصلاً من ها الحلة
إلا إنربّى وقرا في الخارج .. ورافق جدو الفتح التركي
وسيرتو انقطعت في المهدية
ومرة سمعنا استوطن برة .. وقام إنزوج من مصرية
جابت علي .. علي جاب الطاهر .. حتى الطاهر خلّف بلة
جدو اشيطن اخير ما لانا
وبلة انسركن جاء وبرانا
أقرب واحد لي حاج بلة .. أقرب واحد شيخ الحلة
بلة الطاهر علي حسب الله
أول مرة يصلي معانا .. قدمناهو وقام أمانا
صوتو مرخرخ لمن يقرا
يقرا ويقطع زي البطرا
لامن يركع جسمو متختخ
عند السجدة سجودو ممخمخ
شيخ الحلة يقول عن امرو
زول غرقان في الدين من عمرو
ستة سنين قابض في جمرو
ما فكاهو طريق الله .. صوتو وِدِرْ من كترة ذكرو
وجسمو التختخو شدة صبرو
قلنا حقيقة .. الزول بي عذرو
وفتنا قناعة .. ومانا قناعة
إلا الستة الصارو جماعة
قالوا ده زول ترباتو مياعة
ما بيشبهنا ورفعو وضاعة
زول زول دنيا ودنيا صياعة
قصة دينة ودقنو بضاعة
واحنا اصواتنا .. يا إما مضاعة
يا إما جهالة وناس متباعة
وفي الحالتين آمالنا مضاعة
وخارم بارم
كونها بوسطة ومدرسة وسطى ..
والشفخانة وموية نور
كونو يجينا ده ما منظور
وزيادة الحصة .. الزول زول سوق .. زول من جدو يلف ويدور
ويا الجابرية ده مطلب عادل كونو تطيبي تكاتبي وتقري
ضوك يشلع .. دشك يرشع .. واحنا دفعنا ضرائب بدري
ولسه بندفع .. لسع .. لسع
بس يا جماعة .. إن قضينا حياتنا تباعة .. وصنّيت رادي
وقول في الفاضي .. خوفنا نقوم ما نلقى أراضي
ونحنا أساسنا وراسنا زراعة
والجابرية إن دايرة شفاعة
ما بيشفع لها إلا ضراعا
عبو ضراعكن يا رجالة .. وخلو بصركم دغري وسالم
عبو ضراعكن يا رجالة
شيخ الحلة أضلّ وضلّ
واسألوا بُرّة وحاجة السُّرة
عن التيبان وحكاية الصُّرة
اللمّ البلة وشيخ الحلة مع شرع الله
والناس ديل العارضين برة
جرّبناهن كمين مرة
تاني نجرب شان ننضرّ
ويا الجابرية معاكي سلامة .. كان الفوقك ما فات مرة
كان كلماتن ناشف ريقا .. وكانت مرة
إلا حقيقة .. غلبنا نطيقا .. وين في الصرمة وقل القدرة
سكتناهن بس ما صنّوا .. وقاطعناهن تاني المرة
وبلة طريق الناس وخيارا
فوزناهو وجانا زيارة
كرمنالو التور وعرضنا .. وخليناهن برة الدارة
دايرين بوسطة ومدرسة وسطى
موية وكهربا والشفخانة .. زيادة الحصة وسوق منضبطة
وصدوا كلاب الحلة يهووا .. ينضم بلة يهووا معاهو
نهتف نحنا يزيد هوهيوا
مافي شهر جاتنا الخرسانة .. جان السيخ .. الطوب .. الرملة
جا الأسمنتى شكارة شكارة
عديناهن ألف شكارة
كرمنالن خيراً جانا
وكل كلاب الحلة الهوّن .. طفشنالن بالجبخانة
وفي صنانة تدودي الزانة
انغالطنا كتير في بعضنا .. أولى المدرسة ؟ واللا البوسطة
أولى المدرسة والشفخانة .. الشفخانة محل النقطة
ونان النقطة .. نحنا أهالي .. وودنا صافي
بينا معزة جرائم مافي
وما بنحتاج لي شرطة ونقطة
تحصل علة .. في شيخ الحلة وناس السلطة
نحنا الإيدنا بنت لي النقطة .. والجيرنا زبالة اطيانا
ناس السلطة إن دارو النقطة .. شي بُكان أرض الشفخانة
وما طالبانا خلاف زنزانة
مدرسة بوسطة
ستين طلبة وعشرين اوسطى .. شغالين ما ملو سخانة
مدرسة بوسطة .. وقلنا غُنانا
يا الجابرية .. الله أدانا
حاج البلة المبروك جانا
جاب المدرسة .. جاب البوسطة .. وبكرة يرجع للشفخانة
نصحى نصابح موية الدُّش .. نمسى نلاقي الضو عمانا
مدرسة بوسطة .. مدرسة بوسطة
وتاوق .. تاوق .. تاوق ..تاوق .. تخ
وفجأة تبين في السطح الخرطة .. وكب تنتصب الميضنة أخ
أخ من حظك يا الجابرية
سابع جامع بالجابرية
وصدوا كلاب الحلة يهووا .. أخ يا الناس الحالُن قطّ
هو .. هو .. هو .. هووووا
في البلدان الحظها فاجع
بق يا الصاح الماك متراجع
حرِّق دبش الدنيا الغلطة
بق وانفرق في الجابرية .. بق في ارحامنا في شافع نافع
ترفعوا امو في حيطة الجامع
يكتب يسقط دجل السلطة .. يسقط بلة وشيخنا التابع
وكشفناك وكشفنا الخطة ..
تحيا كلابك يا الجابرية .. يحيا ضراع الزيتُن طالع
غُلب يصارع مر الواقع
يحيا ترابك والطورية .. الجابرية تحيي الشارع
دايرين كهرباء دايرين موية .. دايرين سلطة وسوف منضبطة
دايرين هسة زيادة الحصة .. الشفخانة بديل النقطة
دايرين بوسطة ومدرسة وسطى .

بيني وبينك
كل ما تباعد بيننا عوارض .. كل ما هواك يا طيبة مكنّي
تلد الغربة القرب الواحد .. وبيكي أسمي الشوق وأكنّي
لما أفوتك من دون خاتر .. أو دون خاتر مني تفوتي
بلقى حبايب في كل حتة .. وكل بيوت الفقرا بيوتي
لا غيرت وراكي الجتة .. ولا بدلت ملامح صوتي
لا غفلني وهادن فني .. غامل المدن الما عرفتني
وتبن الصبر الشوقو مصوبر .. في الأرياف الكم وفّني
وبالإحساس الجاك مستعجل .. جيت متأنّي
للأطفال الناشفة ضلوعا ..
ونازفة .. بغني ..
أهدي دموعا .. وأطمّن روعا ..
ببسمة بكرة الماها تمني .. ولا مصنوعة
بتمرق منها .. تدخل مني .. شديرا فروعا .. تميد متّنّي
تكوفت فيها نسيمة حنّي
تلاقي طيورا الما ممنوعة .. تجول وتغنّي
عديل لا راجفة ولا مفزوعة .. خطاها نبياً داخل الجنّي
أغني لشعبي ومين يمنعني ..
أغني لقلبي إذا لوعني
مخير دربي الما رجعني
إذا طلعني نخلة القرب .. واللا الغربة الكدرومية
بتنـزل غنوتي بي قمرية
أو وقعني في بطن الجب .. بطلع يوسف بالأغنية
أغني .. أغني
أغني الناس الما بتسمعني
المني بعيد المبعد عني
الإيدي في إيدا .. وإيدا بتبني
في دنيا جديدة .. اليوم راح تدني
وأريت غنواتي في ناس شغالة
تكون سندالة وعود طورية
ضراع رجالة .. كتاب أطفالا ..
وجملة بالا الما مقرية
سدة مالا وبقة فالا
في ليلة الدخلة على اسمى قضية
حبيبة قلبي يا سودانية
يا أسمى معاني .. في زول بعاني
يا ود ضكران .. يا بت دغرية
وانا إن سامعاني .. فضلت أغاني غبش فقرية
حويتك منك .. يا دافعاني براحة إيديا
كما الأشواق .. ويا جابداني .. برفق عليّ
ما بتحير بين الفوق وبين الناس التحتانية
إلا مغير .. واللا عقوق .. واللا كفيف الإنسانية
ومنك وين يا كاشفة عينيّ
بنور الإلفة .. ضيا الحنية
وحلم العالم ناس تنسالم .. والبني آدم صافي النية
والأطفال الناشفة ضلوعا
إنمرتق روعا .. وجاتنا تغني
غناوي البكرة الكم مسموعة
سماع بلاّل .. في الدنيا الصنّي
حسيس طمبارة مع نقارة
صفقةّ حارة ودارة تهنّي
زفاف اغرودة .. نهار العودة .. أو زغرودة في ليلة الحنّي
فيا حلتنا عليك ترابك
وإنت شبابك زينة الجنّي
أحلى عروس البلد اللتنا .. واللا الغبش الرابة تهنّي
واللا هدير المدن التصحى وتمحى ضلام الحاصل عنّي

شكرا يا نقر على هذا الإهداء الجميل ومصطفى رحل منا لأنه كان لايشبههنا .... خاصة بعض الذين كانوا حوله فى قطر .. وأذكر ما قاله حميد عندما ذهب لقطر .. قال الآن أدركت لماذا رحل مصطفى .. لم أتفاجأ بكلمات حميد عن أغيتال مصطفى فأنا أدري تماما ما يعنيه الرجل.

سيرة السرة بت عوض الكريم
ــــــــــــــــــــــــــــــــــــــــــــــــــ ــ
جات داخلِة
زيْ مرقة غضبْ
من جُوف حليم
في زمن صعبْ
رمت السلام
زي شنطة
من كتف المسافر
بي تعبْ
زي رُدْخَة
رٌبْ
الله يا رب
قعدت على طرف
العِنْيقرِيب
المحاذي الواطة
ضايرت التراب
كُسَر العَوِيش
الفوقُو
شالت بإصبعَه
وشختت شخِيت
الله يا رب .
عاينّا فيها
نكُوس سبب
للكفرنة
وفورة الزهج
من دروة البال
الوهيط
ما عودتنا
تدس عوج
تكتم فرح
زي حالة
الزول البسيط
صنقعنا
في قعدتنا
راجعت الوشوش
دنقرنا
عند رفعة وشيها
المُتعَب
الجاد
الرحيم
الطيِّب
السمح
المعافى
رِهاب .. رهاب
ينشاف وسيم
إنوهطت
فوق العنيقريب
القديم
ومن تاني
ضايرت التراب
كُسَر العويش الفوقو
شالت بإصبعه
وشختت شخيت
وقالت ..
تصدِّقوا ؟!
يا ولادي
بقيت أبيت الليل
ممحَّنة في التميرات
القُدر فوق رأسَه
ما خمّت سبِيط
غلبَه الجرُورة
الفوق ضهرنا
تنزِّلَه
وتطلُق وشينا
مع الجماعة
إشِن دهانا ؟!
دي كم سنين ؟
والحال وقف
قطَّ وحلف
ما فيهُو لَو نُقَّاط بسيط
كان بوشنا
في حشَّ التمور
الليلي دُوشنا
معَ اللقيط
أي لا حِكت
هِي ولا بِقت
ما كُنّا قايلين
في حياتنا
يجينا أقسى من المضى
ساعة مروق الإنجليز
قُلنَّا الظُلم فات وإنقضى
تاريهُو كَمْتَر
وقام دقون !
حلْفِي !
وعُشر !
مَعَيُوقَة !
نال ؟!
دِمْسِيسْ !
ضِرِْيسِي ؟
وشوك جُمال ؟!؟
...
...
الله يارب
كُربَك كُرب
عاوْلِي التمور
الأرضِ بُور
الناس حطب
باجُور شهور
غلبان يدور
ما فيش مطور
ويجيك بعد دا
علِم طَلَب ؟!
...
...
الله ..
يا ربَّ
العالمين
الما جحدنا نِعِمْتُو
في الشُوف والسمع
راحة الولادي
ولا قلوبنا عِمَن
ولا غيَّرنا دين !
في الجابُو
ما قصَّر حَمُد
في الشالُو
ما قلنَّا لُو
وين
ماشيبو ؟
وين ؟!
...
...
عدَلت نعال
مقلوبة
في الجيهِة اليمين
حدَرت يسار
زمناً مو دا
الحيكومة
كانت بت حلال
بي حالَه
بي حرب الجنوب
بي قِلَّة المال
في الجيوب
كانت رخيِّة العيشِة
إلاَّ تَرَا العوِين
الكِبْرُوا
كِبْرُوا مليَّسِين !؟
عِلِمُن يطير !؟
إن كان هُو
ما صلَّح عوج
ما فادنا شي
ومحَق القبيل
لمِّينا
هِينْ × هِين × هِين
آ حليل رجالاً
سكّتن
غدراً غشاهن بالقفا
ولليلِة سيفُن في الجفير
يهرِج سنين ؟!
...
...
دا زمن قواسي
زمن ضلالة
أوانطجية
زمن حقارة
زمن مُهين
لاقين هواكُن
ضرُّوا
ضرّ يا عسكرياً
ما اتَّعظ
كتل الرُقاب
بيودِّي وين !؟!
ضرِّي آجلاليباً رُهاف
زمماً خُفاف
ضرَّ يا ضرَر
ضرَّ يا دقين !؟
منسلبطين عَرَق النبي !
وبالنار بتلعبو
يا عَوين
للحُول قريب
درب السلامِة
تخوجُو
بي درب الحرب !
غطيي قلب ؟
ولاَّ الحرب
بقرة حلِب
والأرض صين ؟!
ما كان عمل
ما كان دا دين !
يا أرزقيِّة
تخمجوا دم
والدم مُو
مُويا
ومانا طين ؟
منسلِّطين في الناس
دَحِين
لامِن يجي
اليوم الفصِل
والحق يبين
وين
تمشُوا
وين
تنسلُّوا
وين ؟!؟
وكان طال
وكان قِصر الزمان
الحين بحين
كَب يا رجالاً
سكّتُن
غدراً غشاهُن بالقَفا
ولليلِة سيفُن
في الجُراب
يهرجِ سنين ؟!
...
...
وإتاوَّهت ..
وحسِّيت
بأعماق الشوارع
والتواريخ المجيدة
إتأوّهت
وأدَّتني عين !
صنَّت شِوَيْتِْين ..
كُوركَت ..
يا بت ..
شمشنا إندهدَهَت
هُوي
يا بِنيِّة وِكتنا راح
شُوفِيلي
شافِع بت فطين
جاء من الطحين ؟!
الله !!
فترنا من الطحين !!؟
...
...
وكان الوكت
زالَف عصر
عين الشمش
مشدوهة
بي دوْشَة سحاب
عرَق المراكبيِّة
البعاد
راحِل
معَ ريحة التساب
ما تدري مارقِة
من البيوت
الحلِّة
ولاّ من التراب !؟
التاس تقول
مدقُوقَة
طالعِة على الحُقاب
مفلوقة
بي حجر الصعاب
المُرَّة
نازلِة على البحر
مشروقة
بي موية السراب
الفرَّ
مشنوقة عقاب ؟
يا الحُرَّة
كيف بِقت الرُقاب
مسْيوقة
بي قيد السلاب
وإنشرَّ
من نشر الحجاب
في عروقَه
أشكدِّي الخراب ؟!
من بعدِ
ما انبلج الفرج
من ضِْيقتا
خدعوها بي حيلة كتاب
رفعوهو فوق
سِن الحراب
ودهت الهزائم
خِلْقَتا
فالناس بدَل
عن نِقَّتا
التلقى فكَّة ريقتا
وبدل القصور
الفي الخيال
التبقى ماهلِة
كِرِْيرْقَتَا !!
وما جاتَه راحةً
طَلَقَتا
إلاَّ التعمِّر
طَلْقَته
في بندقيةً
حقَّتا
وبي ها الشوارع
وبقَّتا
تنسدَّ منَّك
دقَّتا
ودم فلْقَتا
ومُر شرْقَتا
ونار شنْقَتا
يا دقن
دينك سرْقَتا !!؟
قطعَت وضوها
إنشرَّفت
مسحَت وشيها
إنشهَّدت
قالت نِست
ما تاقت الأوضة التحت
عند مرْقَتا !؟
دارت تقوم
جَبَد العَنيقريب
الحنيِّن
طِرْقَتا
عند نتْقَتا
رجَفَت بِشيش
رجفت بِشيشي
من الغضَبْ
ولاَّ من التعَبْ ؟
فتَر السنين ؟
ولاَّ الكُبر ؟
دا الما قِدِر
يمْسَح
سماحة خِلْقتا ؟!
زي نِيَّتا البيضاء
الشَعَر
وموِّيج بحر
كان الجبين ؟!
...
...
مدِّيت يميني
أساعِدَه
ردَّت يسارَه
تباعِدَه ؟!
وقالت لِي
أبوي ..!
وفِّر ضُراعك
للبلد ؟
وأدخُر مُرُوَّتَك
آولد
لي يوم بحين !
أحفض كرامتك
تحفضك ؟
الموت !
ولا العيش المهين ؟
الموت
نَفاد الما نَفَد
الموت
حياة الميِّتين
أَخَتاها جنِّة
معَ الفِقَر
وأدخُل
جحيم المتعَبين
وإن ما قِدرْتَ
علي دا
أبوي !
رب لك دقين ؟!
وضحكت ..
حمدنا الله
الحنون
جِيدَن خَلَقْنا
بلا دقون !!؟
وضحكنا زين
!!؟
؟؟!
وتاقَت حديثَه
على الخراب
الشُوفتُو
ما دايرا لَه عين
عقبت متاقاتَه
الرياح
رفعت قُران
شوكة سنط
ساسُويِي
جايي من المراح
يا خيري ودَّ
دي المستراح !
والشوكي
تحت الدُوكي
يا
داك الركين
الشوك بَمُرْقَ الشوك ؟!
وشوكاً فينا شين ؟
مرّاقو ربَّ العِزّة
شعباً ماب يلين
الجايي
حيكومتنا
لكن الزمن
دِبُّويي
داير النهمِة
وينكن !!
يا الخزين ؟؟
ما قلَّ حاشا صَبُرْنا
لَكِن لا مِتِْين ؟!؟
دعكت عيونَا
التوَّّعت
مسحت وشيها
وصنْقَعَت
كان الغيوم
إنجمَّعَت
تِقْلَت على الريح
النصيح
كان المطور
شوَْْوْوْ
ترَّعَت
زي باكي
فوق دمَّ الحِسين ؟!
لكن دا وين !؟
والتاني وين!؟
وإتلوَّعت
معقول !
في ناساً ما وِعت؟!
لليلِة
بالن بيَن بِْين !!
وكيف
وإنتو نوحنا
من الدَعَت
مؤمنَّا
من جُحر الدقون
الكاكي
يلدَغ مرَّتين
والتالتِة
قرْصَة أبُو الحِصين !
وحسِّيت بأنها
دمَّعت
شهقت عيونّه
الدمعتين
حسِّيت بأنِّي
مِتل حجر
جدعوهو
في نُصَّ البحر
قام البحر
بنَى فوقُو طين
حسِّيت
بأعماق الشوارع
والتواريخ البعيدة
إتأوَّهت
وأدتني عين !
...
...
ومرقت ..
...
...
متِل دخْلَة
غَضَب
صدر المسامح
والحليم
في أيام عجاف
كرَمَت ..
صداها ..
قفا السنين
...
"الجايي
حاكومتنا
كيف !
ومتين !
وين ‍‍‍‍؟"
...
ومرقت ..
مَرَاة
مرَقت
مرَاة
...
...
دي السُرَّة
بت عوض الكريم
مرَاة ..
ماب تلاوِز
لاب تخاف
زي الضفاف
الماب تهاب
ضَنَب التماسيح
والكلاب
قُومة البحر
ولاَّ الجفاف !
مَرَاة من قديم
مَرَاة بت قبائل
قالوا
لا
واختاروا في الحق
الجحيم
ومن رِفقة الفَسِل
الخلاء
وكانت نَعم
تدِّي النعيم
...
مرأة من صميم
ضَهَر الغلابى
الماب تنكِّس رأسه
غير ساعة الصلاة
أو ترمي تيراب
في التراب
أو تستشِف
وجهَ الأديم
...
...
السُرَّة
بت عوض الكريم
ما فيها
من عادة الحريم
غير السماحة
القدَّمت
قُدم الدهب
حافضنو
في حُقاً قديم
في أقصى كِيم
ما فيها
من طبع الرجال
غير الأيادي
الخشْنِة
زي قولة النصيحة
وكت تعكِّم
في الصميم
ساعة يكون
الحُكمِ ضِيم
...
...
...
تسعين سنة ؟!
ويا السُرَّة
بت عوض الكريم
بصرِك بصير
سمعِك سميع
نضمِك نضيم
بالِك محلُّو
صبي وسليم
تسعين سنة ؟!
وعُودِك أمدَّاً
ما انحنَى
شامخ
بلا البان القديم
تسعين سنَّة !
ومن فِتنتِك
إستغفر الله العظيم .؟!

الشوق الحاصل

لا قاصد .. إتلموا الإتنين يا نوارى

يا درقة وسيف .. يا حزما كيف

من شر الصيف والشتا باراى

يا شعلة نار بقت

جواى عدتنى ظلام بحر العارضة

يا شعلة غز بقت جواى

عدتنى ظلام بحر العارضة

يا بت العرب النوبية

يا بت النوبة العربية

بى فردة نخوة بجاوية

أو شجرة صحو الزنجية

دسينى من الزمن الفارغ

من ريح المتعة الوقتية

والليل أتحكر بيناتنا

يا شمس الناس المروية

سوقني معاك يالحمام
... ...
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منام
... ...
سوقني محل ما المحنة
وأيادي تقطّر سلام
سماحة الحياة فوق أهلنا
وبلادي تقرقر وئام
... ...
غلابه وأمان مو الطيابة
ضكارى بصارى وكرام
حباب الحبان في بابه
وتدخلوا عليّ الحرام

فقارى ولكن غنايا
غنايا بهذا الغمام
بهذا النيل كم تغايا
وتيرابا نرميهو قام
... ...
إرادة القمره البتقدر
براها تضوي الضلام
شعاع شمشاً ياما خدّر
وإذا يبَّس لا يُلام
... ...
فيابا خرابا الحرابة
وخرابة فكر سوسي سام
خرابة الكل نفسو تأبى
عقابه .. تلِم عم سام
... ...
ولِيد مخلوق للقرايي
خزين مدخور للجِسام
تتمر نيتو التخايي
إلاما مذهلل إلام

درب من دم ماب يودي
حرِب سُبّه .. حرب حرام
تشيل وتشيل مابيِ تدِّي
عُقب آخرتا إنهزام
... ...
بطانة الشيطان قديمِة
وبعد دا منو العرشو دام
إذا الإنسان ما ليهُ قيمِة
علي إيش خلَّفُو سام وحام
... ...
تعالوا الدم ما هو مويةِ
ولا ها ترايي المسام
خباري بحمر في اخويا
وطراوة الخوة إبتسام
... ...
تعالوا نحانن بعضنا
نخل قلبو على التُمام
نبضنا يشهل أرضنا
وأرضنا تجِم العضام
... ...
تعالوا بدل نبني ساتر
نخيب ظن الصدام
نطَّيب للعازه خاطر
نقوم لأطفاله سام
... ...
أخير كرّاكةً بتفتح
حفير وتراقد الركام
أم الدبابة البتكشح
شخير الموت الزؤام
... ...
تعال لي غابتك يا خيرا
تعال لها يا أسده الهمام
بدل دوشكة يغني طيره
محل قنبلة عش نعام
... ...
بلد صمَّي وشعب واحد
عصية على الإنقسام
أبيه وبكراها واعد
صبية ومشهاده تام
... ...
بساطا أحمدي كم يشيلنا
وتشهِّلنا على الدوام
نَقِل لينا تقوِّي حيلنا
ودليلنا تمام التمام
... ...
نلقّم سقف المتاهة
نجم هدّاي في الضلام
ونطعِّم حرف النزاهة
لإيئلافك يا حمام
ديموقراطية وأمان
سوا .. سوا عالين مقام
مواريثنا المن زمان
محصَّنة في أروع نظام
... ...
بريدك يا زول بريدك
بعشقك حتّى الهيام
أريحيتك عد تزيدك
مهابة وليك القيام
... ...
عهدي معاك يا حمام
حبِيْب الرُسل الكرام
رسول الأمراء العظام
عصامي على ما يرام
... ...
ماب تهدِل في خنادق
ولا ب تقدِل فوق حطام
ولا ب تنزل في فنادق
وسطنا مراعيك قُدام
... ...
فيا ملدوغ من أديس
معوَّق في كوكدام
تعال عمِّر فينا ميس
كفانا طشيش الكلام
جناحيك جنوب شمال
وأمش طوِّف يا حمام
محِل غصن العزّة مال
عليك وعليهُو السلام
حكيم الطير يا مهبِّر
شُراكة القَتَلة اللئام
متين بإسم الحق تكبِّر
وبالرحمة تصلِّي إمام
... ...
فلاحة العالم تعمر
محبّة مودة ووئام
تشمِّر ساعد السلام
... ...
سوقني زمن كُلُّو عافي
نتاجو عِلم خيرو عام
بري آيمة من المنافي
وطن وافي على الدوام

ابو الزهور
كل عام وانتم بألف خير؛
اعلم تماما ما يعنيه رحيل مصطفي بالنسبه لك
حميد قال:

انا يمكن ان اعطيك عنواناً كبيراً جداً وعنوان واحد تأتي التفاصيل تحته فمصطفي لم يمت .. مصطفي قُتل .. أما كيف قُتل فهنا يمكن أن نقوم بسردها وهذا الملف دعوه لوقته، ونحن عندما نقول إن مصطفي قُتل فإننا لا نريد أن نزعج أهله في ود سلفاب، فنحن نتحدث عنه كمبدع وليس كإنسان يعاني من المرض فما حدث لمصطفي هو اغتيال معنوي وغير الاغتيال المعنوي هناك الاشياء التي قصّرت عمره وبعد ذلك يمكن أن نفصِّل هذه الحقيقة وكل الناس القريبين والمحيطين بمصطفي يعرفون الطريقة التي رحل بها هذا المصطفي ومن هنا احييه وأحيي ذكراه وأهله..

لعلك من الذين يقصدهم حميد

عروس الطين

بيني وبين النهر ضحايا
وكم من قتلة ونصّابين
وقدر الغيم اللمّا سمايا ....
شالوا الريح وبي حُمرة عين
حبل البئر ودلوها منتّف ...
وحارساتنها دابيين
ريقي دقيق .. والخطوِ مكتّف
ما بين كهنة وربّاطين
وانا ناذرلِكْ ، كان أسقيكِ
وترجعي طيبة عروس الطين
ويرجع عصب العشم الفيكِ ...
وزي ما كان من قبل سنين
يا ترقوة الحلم الزّامِكْ ..
ما أقواك على السكّين !!!
لما غِشَاكِ الصيف الحارق ...
حتحتيهو الصفق الأصفرْ
والنوّار اليا دوب مارِق ...
علمتيهو تمُام ينضرضرْ !!!
فرعك عِز الزّمن الزانق ...
عاهد ليفك وابى مِنْ يكبْر
شان ما يبقى حُراب ومشانق ..
واللاّ مطارق في ايد العسكرْ !!!!
وشان الساق الناجرو الخالق ..
ساترو لحاهو ... يفضِّل أخضرْ
روّضتيها جذورك ترحل تالا الموية التحت الأرضْ
وفوق الزمن الريحي الأمحل ..
كيف تنماسك وتسند بعضْ
ما كان عَرضِك الا الطُّول ..
لا كان طولِك غير العرضْ
وين بالساهلة يفرِّط زولِك
واللاّ يفوت المال والعِرْضْ ؟؟؟؟
قال طيراً نفد بي حِنّو ...
لى جملة عَقابو يغنوا :
يا أكباد الرفاق لا تئنو !!
طرِّقوا لى المناقير سِنّو !!
شن طعم العرق والدم
واحنا عوجنا ما عدلنو ؟؟
هِبّن يا طيور من جم ....
رخمتين فوق صقر كتلنو
حُلماً زانو ليك كابوس ...
وراجنبو الليالي يصِنّو
والوعد المشتت روس .....
وكاويق شِنْ بترْجِن منو ؟؟
وما بتنغشّن ... حاشا وحاشا
وما بتنكسرن .. أي والله !!
وما بتندلّن لي حباية
ودود معقود في شبك الباشا
وكم هبّرتِنْ شركو وطِرتَنْ
لي قندولكِن في الحواشة
وقلتِن شارق
فجراً حارق
وكل الوخم الزيف يتلاشى
وتنفض طيبة غبارا العالق
وتقبض نسمة خير ودعاشة
وبيني وبين النهر ضحايا
وكمين قتلة ونصابين
وقدر الغيم اللمّا سمايا ..
شالو الريح وبي حمرة عي

شكراً كتير والقصائد من اروع ما سمعت من شعر حميد بالاضافةلمجموعة تفاصيل ما حدث والضو وجهجهة التساب
رحم الله مصطفي ومتع شاعرنا المبدع محمد الحسن سالم حميد بالعافية
واتكرمش الحلم البَعدْ
قرّب يوافينا ابتعد
لو مدت ايد كان اتجبد

عزيزي الغالي جد : النقـــر
كل سنه وانت بألف خير وعافيه ,,,,, والله مشتاقين , عرجت الى هنا ووجدتك داخل اندياح عميق كعادتك مع العزيز الغالي نوارة المنتدى وشذاها الفواح عمك الرائع أزهري الحاج أنا بقول لعميد المنتدى الأزهري كل عام وأنت بألف خير.
عجبتني الزهيرات التي قطفتها من حديقة العملاق حميد هذا الشامخ ,ودايماً يا ود المحلج بتتحفنا من زمان من أيام مرورك علينا في الخرطوم بهذه النفحات , وتستحق الفوز بلقب ودالمحلج ...
أهديك من عبق حميد ولك أبناء الحباك من الشاعر حميد من قصيدته (مصابيح السماء التامن طشيش )
جاي مارق من دخول الغيث
شرايين التراب السايقة أوردة الوطن
قشرا اليباب ... نشرا العطش
كل ما سرت قطرات درب الرحمة...
في جوفو أرتعش حال الشجر
بال العصافير الخيالها مع الدغش
مشدوه متل خاطر طفل
من ضل برش راكوبة فوق حافة حجر
واقع سجر ...واقف بعد نقط المطر
ويستنشق إحساس السحاب
بين لهفة الطين والشمس
لمت وراء ضهر الجبال
في عبها المهتوك شفق
آخر رمش في الدنيا من جفن النهار
والليل ملقيلا الطرف
سعف النخيل مال منتعش
بال الطفل يرقد على ضهر الرعد
يجمع مصابيح السماء التامنة ويطش
لو يلقى راس رسن الزمن
ديك لحظة ما كانت تمش
شان يندهش
يتمطق الحلم البعد قرب يوافينا ابتعد
لو مدت إيد كان أنجبد
يا الدنيا بي ريحة الدعاش لو تنعرش
أو تنفرش تحت الفراشات بالبرد
فوقها الوعد صادق يمش
يا غادي منك فوت كلام الشوق
من القلب الخشم بابو البلد
شقيش مستف وحدتك
سايب بنات الحلة يا كمين ولد
تسترسل الأيام بحر
قبال يقالد القيف شرد
مالك رحيلك دون وداع زي الحرد ؟
رواسي راح والجو صلاح
كارب شراع
لا أنفر للريح لا أنفرد
لليلة شان نار الصراع
لهليبا بعدك ما برد
بدلت كيف سعة الوجود
بي ضيق لحد ؟
باغتنا ريح الفجعة ليل
فرنب في جوفنا
مرابنا الصبر شال سعن الجلد
صابنا الذهول
زي التكنو قبل دا ما فارقنا زول
قبل الرسول
ولة التقول
أول قلوب في الدنيا يغشاها القدر
بعدن تضيع منو الدروب
تطمبج الساحات حريق
يضوي الفريق المشتعل
كل الفريق شوقر وراك
يا جرحنا المابندمل
لا بان وراك شهد الغنا
ولحن الحناجر ما همل
صاقر خلايا أبو الدبر
يدبن حنايا نمل ... نمل
وين ماشي يا نبض الرحيق
سايب المشاعر ريق دقيق
تحت المغنين التفل
غنياتن الورطانة أو لوطانة
في الريق المقق
حتحت ورق في طين زبل
أوصاف على جسد الحبيبة بهق ... بهق
تحت احتمالها مرضرضة
زي لعبة ما استهوت طفل
يا نهنهات متكبرتة ودنانا يترنح دغل
أوطان بتتشايح عرق وإنسانا مجبور يشتغل
ما ضر من بعد الغرق
جوف الضحية إذا أنشرق
يا سيفي هوبي على الكتل
وين ماشي يا قمر الهناء
الكرمنا عن ساعة مرق
سايب لياليك لي نجوم
واقفات وجوم .. على فد رجل
فرع الغنا الميل هنا
على مين وراك حا يتكل
والشيل تقل
شعبا يشيلوا الشيلة في ..
لكن ظروفن هل تفي ؟
*************** ***************

(الاخ الاكبر) الفاتح
شمت فيني الشوق ؛

شكرا علي المرور ؛ ستبقي بصمتك دائما فينا لا تنسي ابدا.

النقر الجميل

مهمى يعلو سور وراء سور
ستروي السواقي البور

انك رائع دوماً

هذا اروع ماقرأت اليوم

يازول يارائع
مانحنا كمان مشتهنك
ابقى واصل ماتنقطع كتير كدا

شكرا سهاد ؛ ايميل المنتدي استدرجني الي ما خطته يداك .
انا مفجوووع بحميد ....
سلمتك انتي والاعزاء الفاتح محمد توم وفيصل خليل البوست ده عسي ان نعطي حميد
بعض من قليل مما اعطي لهذا الشعب فقد كان لسانه ؛ و مفرداته التي استحواها من بيئة
الشايقية اصبحت شائعة في كل السودان ؛ سبحان الله !
شكرا كتييييييييييييير يا قريبتي ؛

تسلم ود المحلج ...
ونسأل الله الرحمة والمغفرة للراحل مصطفي سيد أحمد ...
ولك التحية ...