شين ودشن لصلاح أحمد إبراهيم

أظن صلاحاً يقصد السودان بكلمتي (شين ودِشن)

شين ودشن
شين ودشن
حر سيافى شين
شين ودشن كلمة مافى شين
وهظاره خشن
بسموم وسوافى
تسال شن الحبه الفيهو
الحب في ذاتو مبرر كافي
ماشين ودشن حار سيافى شين
عشان بقعة خراب
مافيها شجر
راويها سراب واطاطا حجر
حصحاصا يولع في الرمضاء
الحب سلطان مسلط نافى
لغيره مرض لكن شافي
الشعب الحر الفعله بسر
آب لحما مر
في الزنقة أم لوم قدام باينين
البسمع فيهم يا أبو مروة
بي فرارة ينط من جوه
يبادر ليك من غير تأخير
دا اخو الواقفة يعشى الضيف
الحافظ ديمه حقوق الغير
سيد الماعون السالي السيف
الهدمه مترب وقلبه نظيف
لا تسالنى عن حب وطني
الفقران وغنى

نعم قرأت هذه القصيدة فى منتدى آخر وأن صلاحا يعني بذلك السودان.

ايضا انا قراتها فى منتدى اخر وبالظبط هو يعنى بها السودان

فعلاً كان يقصد السودان أعزائي (مجرداً) ولكن شاعرنا بحسه المرهف لم ينسى أهل السودان الطيبين ... حين قال ,
الشعب الحر... الفعلو بُسر........ أب لحماً مر
في الزنقة أم لوم قدام باينين.. البسمع فيهم يا أبو مروة
بي فرارو ينط من جوة... يبادر ليك من غير تأخير
دا أخو الواقفة يعشي الضيف.. الحافظ ديمة حقوق الغير
سيد الماعون السالي السيف.. الهدمو متّرب وقلبه نضيف
لا تسألني عن حب وطني الفقران وغني !

ولا رآيكم شنو ؟

شكراً أبومصطفى على هذه القصيدة الرائعة والتي تغنت بها فرقة "عقد الجلاد" ..وصلاح يعني بها السودان كما ذكرتم مجسداً في شخص محمد احمد الأغبش والذي نسأل الله له ان يستريح قريباً حين يضرب الهمبريب شبابيكه ويطيب الحال. سأحاول البحث عنها في الـ Youtube بصوت عقد الجلاد وإنزالها.

دخلت هنا عشان اسلم عليك ياابو الشوش ومارق طوالى......كل سنه وانت طيب والعيد الجاى عرييييييييييس

تحياتي وسلامي ابوإبراهيم وكل سنة وانت طيب وكذلك جميع افراد الاسرة الكريمة الصغيرة والكبيرة..آميين ..