مسدار حنين لصلاح أحمد إبراهيم

حنين........صلاح احمد ابراهيم

قلبى على الشهيد تحت التراب دافننو
وقلبى مع السجين خلف الحديد رامنو
وقلبى مع المواطن الحر اذى ملاحقنو
ديل سودانا والباقين يمين ما منــــــــو
-
كل يوم يمر بالمر أشيب فى همومو
الليل اتلت سهران اعد فى نجومو
شاعرك يا وطن فى الغربة حرقان يومو
متين يروق ويضوق القدلة فى خرطومو
-
يمكن مافى غير الرجعة فى صندوق
ويمكن يقولو لا من وين يعرفو الذوق
مهما كان نفوسنا عزيزه أنفنا فوق
وآخرتها مافى غير الذكرى للمخلوق
-
يا طير ان مشيت سلم على حبانى
جيب خبر الوطن يمكن قليبو طرانى
جيب نسام زلالو ال منو مره روانى
جيب لمحات جمالو الاصلى مو برانى
-
عرج على جبال كررى وتوخى يمينك
وفى اطراف مقابر البكرى احنى جبينك
حلق فوق معالم البقعة متع عينك
وسلم لى على الدايما بسأل وينك
-
أدخل ليهو بالباب الصغير دامع
وفى حوش التراب اسجد تحية جامع
سلم فى خشوع قول ليهو جيتك راجع
اقلع بين ايديهو ال فى ضلوعك ساجع
-
مجكن فى الوطا تحكيلو محني الراس
ما شغلتنى عنك تب بلاد الناس
وما شاقتنى من غيرك مغاني وكاس
ولا وسوس بقلبى الهامى بيك وسواس
-
محمد حن فى يثرب لانفاس مكة
هل معقول صلاح فى الغربة ما يتشكى
يا طير ان مشيت قول لى صديقة مكه
ما بنساك حتى لو الارض تندك

محمد حن فى يثرب لانفاس مكة
هل معقول صلاح فى الغربة ما يتشكى
يا طير ان مشيت قول لى صديقة مكه
ما بنساك حتى لو الارض تندك.



ونحن لن ننساك يا شاعر الوطن...