مايقوما.... مايقوما (مهداه للاستاذ الفضل الحاج)

في العاصِمة .. الخرطوم
في لحظة ، من ذات يوم
والجــو هَبوب وسَموم
كابَّات غيومـو سِمــوم
إنسان .. وإنسانة
ماهُنْ عروس وعريس
شيطان .. وشيطانة
كـان تالِـتُن إبليـس
عمداً وبي إصرار
لاخوف ولا رهبة ..
من جُرْم أوعاقْـبة
إشتعلت الرغبــة
انعدمت النخــوة
إتبَهَلَت الشهــوة
واندلعت النــزوة
واتمادوا في الهفوة
إتمادوا فاتوا الميس وحَدّ اللعب بالنار
عِـِيييييكْ
غابوا في النشوة
وانزرعت البذرة ،
والبذرة ، مشئومة
مايقوما ، مايقوما
**
وسواري آخر الليل .. اللاّفي راكبي الخيل
حايمي ومشيها تقيل .
إتسمَّرت وقفت .. حَرَنت ، صهيلا صهيل
لما القلوب وجَفَت ..... شقَّت سكون الليل
صرخة وأنين وأنين
في خور تِحِت كُبري ..... إتناوشَنْ كلبين
اتهاوشَن جَمْ كـوم
نهَشَنْ طَرَف طرحة
مابين صراخ وعويل . الكوم نزفْـلُو دموم
والعسكري الضكران .
فَتْ ... نَطَّ .... جَبَد الكوم
واتفرزعَن كلبين
كاكيكهو شِرْبَ الـدم
وعينيهو دمَعَتْ .. دم
شال نفَسُو .. واتحزَّم
الطرحة لمّاها
الطفلة ضمَّاها
وفي دفتر الأحوال .. سمّاها مايقوما
من عطفو أدَّاها
مايقومـا ،، ودّاها
لي حي عتيق وعفيف
عامر بِنَاساتو ..
من كلِّ جِنْسِِ شريف
مليان سوادنة نُضَاف
والماهو سوداني
ضيفََنْ عزيز ونضيف
ومايقوما ... ضيفة الحي
مايقوما منقايي ... قامت في قلب الحي
لكن هِي ما كانت ... زي أيِّ كائن حي
مقطوعة من شدرة ... ثمرا المحرّم نَيْ
بي طيبة الطيبين ...... الدار بِقَت دارا
وارثين مكارم طي .. ما مات لهب نارا
الفقرا ، ما فُقَرا
شان خاطر الأطفال
بيناتُن النبقة ... واللقمة مقسومة
**
لكن في ناس ، غادي ، ما جايبي أخبارا
ناس علَّت اسوارا .... واتلملموا السُّمَّار
في بهارج الأنوار .... محتفلي بالمليار
ساوَّالا هلّولة
وغناها في الفاضي ...... داقَّالا مِزّيكا
نضميها في الفاضي .. تطرش كواريكا
ما شايلي هم غيرا
ولي غيرا ما فاضي ..منشدهي في شيكا
وبي كاشا مشغولة
ناسَنْ تقول ما ناس . معدومة الاحساس
نافخي..وكأنو خلاص
كلَّ البلد هُولا .. وكان البلد هُـولا
إذن .. الغلط هُولا .. كلّ البِموت هولا
والبِتْولِد هــولا
حتى إن بقت طفلة .. مرميِّي مجهولة
الفاجعة من هولا
في دفتر الاحوال .... سَمّوها مايقوما
**
ما ذنْبِ مايقوما
تمرق على الدنيا ، مجهولة الوالدين
محرومة . محرومة
لاعم ولا خالة ، حضناً قريب وحنين
تدفع تمن لحظة ، إتقاسمـوها اتنين
لا من ضمير صاحي ، لاخافوا رادع دين
لا حتى قولة خير .. وسيرة عديلة وزين
عمداً وبي إصرار
لاخوف ولا رهبة .. من جُرْم أوعاقْـبة
إشتعلت الرغبة
انعدمت النخوة ....... إتبهَلت الشهوة
واندلعت النزوة ..واتمادوا في الهفوة
إتمادوا فاتوا الميس وحًدْ اللعب بالنار
عِـِيييييكْ .. غابوا في النشوة
وانزرعت البذرة ، والبذرة ، مشئومة
مايقوما ، مايقوما
**
مايقوما ولدوها .. مكتولة ..... موؤدة
في الدنيا ما ادّوها . غير دنيا مسدودة
تمسك ثدِي الحرمان
ترضع وجع وهوان ... تشبع نبيشة حال
من كلِّ زول ولسان.. من قيلْ وقِيلَ وقال
بي حالا ، لو راضي
ناجضنَّـها الفارغين
بي سِيرة الماضــي
الشافعي ، يا ظالمين
مايقوما ،، مظلومـة
**
يا مؤتمر وطني .. لو إنتَ صِحْ وطني !
يا مؤتمر شعبي .. لو إنتَ صِحْ شعبي !
يا إتحاديين .... لو إتحاديين !
يا حركة شعبية
بعثِ وشيوعية
يا أمة ، يا أمة ، كان إنتو صِحْ صادقين
يا ناس يا حاكومة .. يا معارِضِين .. ياهووووي !
يا مشتَّتين ... جبهات
ومفرَّقين .. حركات
ومقسَّمِين... جِـيهات
يا اْخوانّا بالذِّمَّـــة
اتجيَّهوا ، اتلمّـــوا
ما أروع اللّمة
ما أجمل الأمة
لمَّان تكون ، لمَّا
على قلْبِ زول واحد
متماسكي ملمومة
تسمع صراخ طفلة
مسكيني، محرومة
ما نطقـت اليابـا
ما شافت اليُمّــة
في دفتر الأحوال
سمّوها مايقومـا
**
في اليقظة ، في نوما
والقعــدة والقومـة
المَرْقَـة والحومــة
مايقوما مجروحــة
مكسورة الخاطر
تنضـارا في روحـا
وطوَّالـي مغمومــة
يوماتـي مهمومــة
كُلْ ماتشوف لها زول
واقفلُو جَمْ زولـــة
في دنيا مزحومــة
بي آهة مكتومـــة
تسأل سؤال ضهبان :
ياتُن أبوي وأمــي ؟؟؟؟؟
وتصيح تصيح وتصيح
وصياحا شايلا الريـح
واضيعتي وهمِّـــي
من نزفي من دمــي
من أيِّ dna
ياتُن أبوي وأمـــي ؟؟
بي أيِّ dna
ورُّوني ابوي وامـي
من أيِّ dna
كُوسُولِي ابوي وامي



مايقومـا....كلمات : السر عثمان الطيب
الحان واداء جعفر السقيد:مايقوما

الأخ العزيز ابو مصطفى
أحياناً يكون عدم التعليق والرد أبلغ رد .. فالصمت والتأمل يغلبان .. فلك كل الشكر علي لحظات التأمل

لك التحية اخى عوض السيد.

يبدو واضح ان الاستاذ فضل فى ابوظبى.فضل يعطى المنتدى وقتا اكثر عندما يكون بالبحر.

العمل جميل و رائع و الصمت علية لا يفيد.

انا من اصدقاء هذا الدار ( المايقوما ) يا عوض و لى معهم قصص و قصص.

اشكرك يا ( النفطى )

من طرف عوض السيد ابراهيم في الثلاثاء ديسمبر 22, 2009

جميل ياعوض السيد وان تاتي بهذه المايقوما كهذا دوما انت جميل و بطيبتك العفوية -واكيد النفطي اخي شغل بال الراي العام حتي الكل ظل يردد اسمه في كل مكان حتي في ساحات الشعر والغناء اسمه كان بارزاً ومتصدر تلك العناوين
تحياتي لك وللمتداخلين

يا سلام ياخي والله قمة الحزن قبل الروعة