اجمل واشهر الطبخات..في الحباك!!!

دى الاآآآآآآآآآآآآآبرى شكرا يا ول نويه

شكراً يااخ ---------عصيرك رهييييب -مافي عصير المنقة ولا الجوافة
تسلم---------

قلنا أخير من قعاد ساى ( زى ما قال أخونا الامين الجعلى الله يطراه بالخير.

شايف المدام امس ما قصرت معاى خالص عندما فاجأتنى بفطور قامت بأخذ الوصفة

من المنتدى و المفاجأة الكبرى قامت ايضا باستخدام نفس الاوانى المعروضة فى هذا

البوست.

و الفطور ( فضلت خيركم كان )

طبعا بالاضافة للعصاير من حلو مر و قمر الدين و الانناس هناك البليلة و

البلح ( البليلة ) كوكتيل بتاع لوبيا و عدسية و كبكبيه بالاضافة ال شوربة

الخضار.

اما ( العضة ) فحدث و لا حرج اولا صحن العصيد متحكر فى نص الصينية و حوله

المطايب من شية جمر و كبدة و بوفتيك و سلطات من ما جميعو و فول بطبيعة

الحال عليه زيت سمسم نقى و الجبنة برة.

انتهينا من الاكل و على طول الشاى و القهوة و عينك ما تشوف الا النور هاك

يا ونسة و جنس ( فونقات مع الشاى و القهوة ) عجيبة.

لو سمحتو لى اكمل الباقى بعدين طبعا باقى معاكم العشاء و السحور.

فى امان الله

إنا لله يا فيصل اخوي
الدميعات من امس علي الهبشة
عاد رمضان بعد نجي السودان إلا نعيدو من اولو جديد

شكرا على المرور د.احسان و الاعزاء ول ابا نويه و الزعيم.

و الله يا زعيم كنت مرتب للمسألة تمام لكين شايف الافضل و بحسب وصيتك

ما ندخل فى تفاصيل العشاء و السحور.

لكم الشكر يا احسان و خلينا نشوفك بكرة فاطرة بشنو انتى و ول ابا نويه

فى امان الله

اها ننقل ليكم طريقة عمل البسبوسه وهي طريقه سهله ومجربه لانو الليله الفطور جهزتو من بدري ممكن دي تساعدكم في التحليه برضو
المقادير:
- كوبان من الدقيق وملعقتا طعام من جوز الهند.

- ثلاثة أرباع الكوب من السكر.

- ملعقة طعام من الباكينغ باودر.

- ربع قالب من الزبدة المذوبة وكوب من القشدة.

- كوب من اللبن الزبادي.

- القليل من الطحينة لدهن الصينية.

- القليل من اللوز أو الفول السوداني للزينة.

قطر السكر:

- كوبان من السكر.

- كوبان من الماء.
- فانيلا.

- ملعقة طعام من عصير الليمون.

- ملعقة طعام من السمن البلدي.

الطريقة:

- تخلط المكونات الجافة أي الدقيق وجوز الهند والسكر والباكينغ باودر مع بعضها، ثم تضاف إليها الزبدة والقشدة.

- يدعك هذا المزيج باللبن الزبادي للحصول على عجينة، تدهن الصينية بالطحينة ويسكب فيها الخليط ويترك حتى يختمر.

- يقطع محتوى الصينية إلى أشكال مربعة منتظمة وتوضع حبة لوز في كل مربع، تخبز الصينية في الفرن حتى تحمر.

- يحضر القطر بغلي السكر مع الماء، وقبل انتهاء الغلي يضاف عصير الليمون والفانيلا والسمن المذوبة.

- يصب القطر الساخن فوق البسبوسة وتخبز مجدداً في الفرن لمدة 5 دقائق.
بالهناء والشفاء
وما تنسوني من الدعوات

منقول

البسبوسة المظبوطه

3 كوبايات سميد, ممكن اثنين ناعم و واحده خشن لو بتحب البسبوسه شويه خشنه
كوبايه سكر
علبة قشطه و نفس العلبه مويه
ملعقه صغيره باكنق باودر
ملعقه صغيره فانيليا حسب الرغبه

للتسقيه ممكن علبة نستله الحليب المحلي المكثف او الشيره العاديه لو ما عندك حليب مكثف لكن جربوها بيه بتلطع رهيبه


الشربات او الشيره
كوبايه و نص سكر
ثلاثه ارباع كوبايه مويه
عود قرفه و حبتين حبهان و ذرة ملح او عصرة ليمون (حسب المزاج) و ملعقه صغيره فانيليا




الطريقه
اخلطي الدقيق و الباكنبق باودر و السكر كويس و اضيفي القشطه و المويه و الفايليا و حركيهم شديد و لو عندك مضرب ما بطال

ادهني الصينيه بشويه طحينه و صبي عليها العجينه بتاعتك و على فرن مسخن لمدة 45 دقيقه لكن راغبوها لانه الافران بتختلف

اول ما تطلع من الفرن نصب عليها الشربات الساخن (ما يكون بيغلي لكن لسه سخن) و نغطيها بفويل شويه و نفتحها. لو اضفنا الحليب المكثف بدل الشيره بتكون شويه ناششفه. ممكن برضه تعملي نص كمية الشيره و تلخبطيها بالحليب المكثف بتدي نكهه. ممكن برضه نصب نص العجينه في الصينيه و عليها مكسرات مبروشه و بعدها نصب النص الثاني و نواصل عادي. كده بقت بسبوسه محشيه


محل ما تسري تمري ولا بقولوا شنو؟


منقول عشانكم
واعفو لي لو جوعتكم

وصفات الفطاير :

ثلاثة كبابي دقيق كبيرة

كاسة ونص زبادي

تلت كباية زيت

ملعقة كبيرة خميرة فورية

ملعقة كبيرة سكر

ملعقة صغيرة ملح

نص كباية موية

تخلطي الزيت والموية والزبادي والخمير والسكر والملح سوا بدون ترتيب

بعد داك تبدي تكبي الدقيق وتعجني بايدك لغاية مقدار الدقيق يخلص

العجينة حتكون بقت متماسكة وبتفك من الماعون..تخليها تخمر بعد

ما تغطيها بكيس نايلون..حوالي نص ساعة او 45 دقيقة

العجينة دي ممكن تحشيها باي حاجة .لحمة مفرومة,خضار مشكل,هوت دوق

جبن كيري او جبنة بيضاء مع ((زعتر)) او بدون..

بتطلع رهيبة..


ايوة نسيت تمسحي الفطائر ببيض مخفوق او لبن بودرة مزوب بشوية موية

وتمسحي الصينية بشوية زيت..والفرن حرارته 170 درجة..

بالهنا والشفا..

شكرا يا دكتوره والله الواحد بعد شويه يكفكف الجلابيه وبعين قويه يتحدى الوليه ويقول ليها ده غلط وده ما صاح ودى زيديها معلقه كبيره ويقعد ينظر فى البسبوسه والفطائر والحاجات البتلقلق دى

شكرا يا دكتوره والله الواحد بعد شويه يكفكف الجلابيه وبعين قويه يتحدى الوليه ويقول ليها ده غلط وده ما صاح ودى زيديها معلقه كبيره ويقعد ينظر فى البسبوسه والفطائر والحاجات البتلقلق دى

يا ريت والله يا غريق اخوي الثقافة الغذائية تتطور ونمتلك المعلومات كلنا وكمان نساعد بعض
تسلم اخوي

مشكورين يا جماعه والله هذا البوست افادنا كثيرا والان نحاول نجرب نعمل الباسطه والبسبوسه

شكرا د.احسان -الزعيم غريق -العزيز الفاتح محمد توم و الغالى ول ابا نويه.

عايزين فتوى قوية من ناس الاسلامى عن هذا البوست و هل فيه تجريح لصيامنا؟

شكرا لقد اضفتم القا الى البوست و ربنا ما يحرمنا منكم.

ول ابا داير ليك بخرة فى الملوخية و البامية ياخ بالغت دى ما بتختها ساى

بدون وصفه محددة و تمشى و تجى تلقاها بقت حاجة بتتاكل و موضوع انتهى.

تحياتى

إنت يا ول نويه بقارى تايوان ولا شنو ما عزبت بالبقر رشاش وسويتو ام حليبين ووالله ام مطيعينه فى رمضان عجيبه دايرين واحد منكم يورينا ام مطيعينه بسوها كيف000تحياتى

صباحكم نور الزعيم و الصديق ول ابا نويه.

يا ول ابا انتى والله تايوان بتاعت الزعيم دى لا تستطيع نفيها لانك فى

النهاية بدلا عن البخرة ( بصيت او شفيت ) من الحاجة فى ابوجبيهه.

يديكم العافية و الله ضحكتونا من الصباح و روقتو جازنا يا فرد.

وين د.احسان الليلة ما مرت على البوست بتاعا دا.

تحياتى

اصلى يا ول نويه والله امطيعينه حازميه ميه الميه شكرا لك ولفيصل على التعليق 000وين يا دكتوره عاوزين لينا حاجه تجمم الريق

صباح الخير يا ناس الحله.

كلامكو كتر بدون فايدة.الكلام الماعندو صورة ما منا فايدة.كن در تتكلم عن

صحن العصيدة جيب الصورة بتاعت صحن العصيدة و ختها لاخوانك داخل ( بضم

الخا )فى المصيبة بتاعتكم دى الاسمها المنتدى دى.عشان اخوانك يقرو و يشوفو

الشوف فى رمضان سمح شديد.

بت عبد الرازق ول الفكى الحاج الوراقاية حقتكى دى اكتب فيها ساى نامن

رمضان يمشى و خلوها تقعد فى محلها ول ابوكى السر ما يشيلها عشان يوم رمضان

حق السنة الجاية يجى يلقاها قاعدة.

ول ابا كمبال بدور ليه امطيعينة كان قدرتى جيبها ليه الليلة و كما

قدرتى سوى ام تكتلنى اليوم.

ارقدو عافية

السلام عليكم ورحمة الله وبركاته


بسم الله الرحمن الرحيم


.
ازيكم جميعا الحاضرين والغائبين



اليوم اقدم لكم الاكل السوداني


اكلات حلوة وسهلة وياريت تعجبكم






عصيدة بملاح الروب
من المطبخ السوداني
واكلة سودانيه شعبيه



http://simsimaya.files.wordpress.com...pg?w=250&h=237

المقادير:



3م ك بصل مجفف مطحون ناعما 2م ك لحم العجل المجفف ومطحون ناعما

2 كاس زبادى (زنة الكاس 500 جم) 3 م ك دقيق أبيض

نص فنجان فول سودانى مطحون ناعما (تحميص خفيف)

3م ك زيت ملح فلفل ملقعة سمن بلدى (او زبدة) ويكة(بامية مجففة)

http://simsimaya.files.wordpress.com...pg?w=250&h=234

الطريقة:



فى قدر يوضع البصل واللحم وكوب من الماء على النار

حتى يبدأ فى الغليان ويضاف الملح والفلفل ويترك لمدة 3 دقائق

http://simsimaya.files.wordpress.com...pg?w=250&h=188

يخلط الدقيق مع الزبادى جيدا ثم يضاف الى الخليط السابق

ويحرك حتي يغلظ قوامه ويبدا فى الغليان (يمكن اضافة 1/4 م ص ويكة)

http://simsimaya.files.wordpress.com...pg?w=250&h=188

تخفض النار ويترك لمدة 7 دقائق

يذاب الفول بقليل من الماء ويضاف اليه مع التحريك لمدة 2 دقيقة

تضاف السمن ويرفع من على النار

يقلب كل دقيقة حتى تهدا حرارته (حتى لا تتكون طبقة جامدة عل السطح )

العصيدة:



عجينة الكسرة السودانية المخمر المصنوع من الذرة النابتة

يكون قوام العجين سائلا نوعا ما

يوضع قدر عميق يوضع 2كوب من الماء مضاف اليه الملح

يرفع على النار حتى يبدأ فى الغليان

يضاف العجين الى الماء المغلي وهو على النار مع التحريك بخفة

حتى يغلظ قوامه(زي عمل الكاستر) ويترك على النار مع التحريك حتى ينضج

ويمكن اضافى الماء اذا كان القوام غليظ جدا

تحضر قوالب يمن مسحها بقليل من الزيت أو تبلل بالماء

تصب العصيدة فى القوالب وتترك تبرد

فى طبق عميق تقلب العصيدة ويضاف اليها ملاح الروب

http://simsimaya.files.wordpress.com...pg?w=250&h=181 وبالهنا والشفا يتبع>>>


الروابط دى يا جماعه فيها صور العصيده بالروب البتجمم الريق


تحياتى منقوووووول

يا اخوي غريق كتر الف خيرك بس ماااا بنفتح الروابط ولا حاجه

يا جماعة اكتبوا لينا وصفة "ام حليبين " وان شاء الله يا غريق اخوي تسأل المدام وتوثق واشكرها نيابة عنا
تسلموا كلكم وخليكم قريبين "الحاجات البتلقلق" جاية في الطريق جهزوا الملاعق

شكرا عزيزنا محمد نويه على هذا الجهد و الالق يا جميل.

والله البيتزا و غيره من ( الاكال) الما نافع بتاع البندر دا ما بينفع

معانا بالله شوف العصيدة وحلاوتها

والله البوست ابدااااااااااااااااااااااع

تراث وخبرات تراكمية مميزة ونقترح يا دكتورة تخصيص طبق يومي

فطور سحور حتي نهاية رمضان

وكتروا لينا من ام بقبق وام تفيفة وام علي وام سلاليك لو امكن
تصوموا وتفطروا علي خير
تعريجة:-
ول نوية بنات عمك ديل بكتلن في عصيدة ولا اصلة !؟؟؟

جنابو أمين منقة قال:
وكتروا لينا من ام بقبق وام تفيفة وام علي وام سلاليك لو امكن
تصوموا وتفطروا علي خير
تعريجة:-
ول نوية بنات عمك ديل بكتلن في عصيدة ولا اصلة !؟؟؟

والله يا جماعة الواحد بقى لازم يراجع المنتدى قبل ما يبدا اليوم عشان يلقى

ليه كم قفشة كدة تنزل منو الهم و الغم دا.

كتر خيركم جنابو و ول ابا نويه.

يا د.احسان شنو عامله غمرانه ما اتفقنا كل يوم صورة و صوت فى البوست

بتاعك دا.

والله يا غريق بت عمى لو مشيت تتشوبر ليها بحاجاتك البتلقلق دى تقطع فى كنش

واحد تانى كان قال ليك تعال بهناك ما بتجى.

لكم التحية

فيصل خليل حتيلة كتب:
جنابو أمين منقة قال:
وكتروا لينا من ام بقبق وام تفيفة وام علي وام سلاليك لو امكن
تصوموا وتفطروا علي خير
تعريجة:-
ول نوية بنات عمك ديل بكتلن في عصيدة ولا اصلة !؟؟؟

والله يا جماعة الواحد بقى لازم يراجع المنتدى قبل ما يبدا اليوم عشان يلقى

ليه كم قفشة كدة تنزل منو الهم و الغم دا.

كتر خيركم جنابو و ول ابا نويه.

يا د.احسان شنو عامله غمرانه ما اتفقنا كل يوم صورة و صوت فى البوست

بتاعك دا.

والله يا غريق بت عمى لو مشيت تتشوبر ليها بحاجاتك البتلقلق دى تقطع فى كنش

واحد تانى كان قال ليك تعال بهناك ما بتجى.

لكم التحية

اضحك الله سنك اخي فيصل وباعد بينك وبين همك ..قول آمين
ووصيتي ان تلزم نفسك بعدد ثابت من الصلاة علي النبي يومياً

وطبعاً يا فيصل - دعواتك - الزنقة خفت علي شوية وحاحاول اشتري كاميرا مخصوص عشان البوست ده وكل ما اعمل طبق "فاهم" كده انزل ليكم صورته ولا رأيك شنو؟

صباحاتكم بيض اولاد ابّا
ول نوية والله ريقي جمّ عدييييييييل كدا لأنّي ضعيف امام الحلومر دا شديد...

ما قلنا بس مسكنا طرف الكرتونة دي الباقي خليهو علينا

نشووووفك

اتاريك الطرد ما وصلك كان عارفة كان رسلته ليك طرقه طرقتين يا محمد اخوي

بالهناء والشفاء لكم
ول نوية ملاحك خطيييييييير
بس امس كنت معزوم لي مع جماعة لقيت عندهم ملاح مرس (مصران)خطييييييير بس الاتكون عندك كمامات ....بعد فيه حلاة
تحياتي

لالا يا اخوانا براحه علينا
رمضان سخن والبوست سخن
دى حاجات عجيبه والله يديم ويبارك
زهير يا اخوى اعمل حسابك ناسك ديل ان عزموك تانى انا معاك وبجيب ليك معاى كمامات
ماتشيل هم
رمضان كريم وبالهناء والشفاء

نشكر جميع من مر من هنا
وبالهناء والشفاء يا رب
ويا سهاد كدي اكتبي لينا وصفه وصفتين من الاتعلمتيهو في بلاد الانجليز
ولك الشكر مقدما
تسلموا

ازيكم يا بنوت المنتدى.

والله يا جماعة رمضان دا خلاص بقى فى النص و دايرين لينا وصفات كدة تتناسب

مع ( العشرة الفى النص ديل ) العشرة الفاتن موضوعن انتهى.

دايرين تورونا الخواجات ديل بيعملو شنو للعشرة الفى النص.هم الناس دول

بيصوموا عندكم بهناك يا بنات.

كان بيصومو ولا لا جيبو لينا حاجة منهم تخارجنا من العشرة الفى النص .

شكرا ليكم.

دى جرسه سااااااااااى يا فيصل 0000من الله خلقك شفت ليك خواجه بصوم!!!!

اخيتى الد كتوره والله اتعلمت الكتير علا ما بفوتن شغلاتك الحلوات ديل لكى منى يا سيتى
حاقدم ليكم طبق اسمه ام يونس وده من اختراعى انا
فيصل يا اخوى ما تخلينا فى تقليت اخونا ود نويه ده احسن
شكلك
عايز تتم باقى الصوم ده
جكه (يا سيدى الخواجات ديل عمرهم ما بعرفو اكل ) عشان كده قرض على كده .علا جماعت اخيتى الدكتوره ديل
هم ناس الاكل الصحى
نتظر طبق صينى منك يا الدكتوره !!!!!!!!! غريق يا اخوى والله الخواجات ديل صايمن خلقه (برقر وجبس) عليك الله ده ما صيام؟؟؟ علا فيصل اخوى ده بوستكم ده انت وولا نويه والدكتوره تعبا تعب شديد خلاص خلاه يشتهى ساى

ننتظر طبق "ام يونس" وقزقزوا بالفي الصحن ده


الله غالب
ما انعدلت ولا حاجه نرسلها لود نوية في الايميل

تسلم ود نويه يااخوى ومشكور على السؤال ...الدكتوره يختى
طبقى بسيط جدا وعملته عشان العيال ما بياكلو الخضار وقلت اقريهم واغير ليهم الطريقه وبالفعل المسالة عجبتهم وسالونى دى شنو يا ماما قلت ليهم دى اسمها ام يونس ..
المقادير :
3 قطع فلفليه (حمراء وخضراء وصفراء )
3 قطع بطاطس مسلوقه
3 قطع جزرات مسلوقات
2 قطع كوسه مسلوقه خفيف
ربع قطعة قرنبيط مسلوق(وده مهم جدا بالنسبه للاطفال وللاسف كل اطفال العالم بنفرو منه نسبة لرايحته القويه)
3 بيضات لتحمير
كبايه دقيق (خالى من الباكينج باودر)
زيت لتحمير
ملح وفلف اسود وحبه سوداء
زيتون(واخضر واسود)
الطريقه:
تقطعو الخضار المسلوق مكعبات صغيره باضفة الى الفلفليه بانواعها وتخلطيهم مع بعض وتضيفى الملح والفلفل والحبه السوداء
وبتكون عجينه خشنه بتاعت خضار تفرشيها وتقطعوها بالاشكال البتريحكم ولا ما عندكم اشكال ممكن بالكبايه وتشيلو العجينه تقمزوها فى البيض بعد اضافة شويه من الملح والفلفل الاسود وبعد داك قمزوها فى الدقيق وحمروها فى الزيت ... وزينوها بالزيتون الاسود والاخضر...
ويا رب تعجبكم وبالهناء والشفاء و كده تكونو ضمنتو انكم اكلتو وجبه كاملة ومتكاملهوبسيطه وما مكلفه لا رايكم شنو ؟؟؟؟؟؟؟؟؟؟؟

حاجه تجمم الريق

بالهناء والشفاء اخوى غريق
وحاجه بسيطه وساهلة العمل يعنى ما مدعبه ورمضان كريم

يا خوانا بصراحة كدا في احلي من الشية والمطايب دي ؟
اللهم ادمها نعمة واحفظها من الزوال