رد: اجمل واشهر الطبخات..في الحباك!!!

اليوم ملاح نعيميه رهيب 00000تتزكر يا موج ملاح النعيميه بتاع تكل

بوست حكاية الف تحية وانا اقول الجماعة ديل خرمانين لي سهاد كدا ليه؟اتاري الجوع كافر ...حبابكم عشرةياعمو فيصل بلا كشرة بس فطور سريع عصيدة عشريف بملاح تقلية كارب وصحن شية وصحن شعيرية والشطة خضراء...واعدكم بوصفات لاكلات بلدية...بتاكلو كول ومرس ياجماعة؟العصيدة ابتاكلوها بالمعلقة ؟

تسلمى خالتو اقبال

الجماعة ديل بيكلوا بأياديهم ( هو العصيدة بياكلوها بالملعقة ) كمان دى ما سمعنا بيها.

الرجال ديل بياكلوا اى حاجة ( كول - مرس الى أخره )

كدى خلينا من الوصفات جهزى الفطور بتاعك ناس ابوكى غريق و الجنيد ديل جيعانين.

غريق شيا صحن الشيه دا من قدام الجنيد لانو الزول دا كان لقى الشيه دى قدامو حقنا بيروح.

بالهناء و الشفاء.

تسلموا استاذه اقبال ... والعزيز فيصل

قالوا
" الما بياكل بإيدوا ما بشـــبع "
الملعقة عادة موجودة في الصينية لزوم تكملة الShow
والجماعة بعد شوية
"يشمقوا إيد الجلابية .... ويقولوا واحد وستين "

تسلموا ياقزاز علي إحيائكم للوجبات البلدية دي ..ايام بس نجيكم بس كتروا لينا من الكَوّلْ وأمبلض وحاجات زي ده

والله ده كلام يا اخوانا انا اقول الجماعه ديل مشو وين اتاريهم
مع ملاح النعيميه
وانا ما جايبه خبر
يديكم العافيه
ويا اخيتى اقبال
والله من ما بعدنا من البوست ده بقينا نجغمس ساى ما عارفين نطبخ شنو
لكن امس الفطور ده فاتنى لازم تعوضينى اخيتك
قرمانا حار لى الاكل البلدى .
ود نويه اخبارك
يا اخوى الكول عرفناه علا
امبلض دى اخيتك ما عرفتها
لازم تورينا ليها عشان اجربها
واعملها
اوعك تقول على حنكوشه .
تحياتى

الخواجية ...ما بتعرفي ملاح أم بلط !!؟؟؟
وأعتقد ميه بالمية هو ملاح الوكية التقيل ..ويشبه التقلية ...ولا موهيك !؟ .... إحترامااااتي

مرحب بي ناس لندن مالكم دايرين تضحكوا عليكم جنابو ..شكلكم كده مع ناس "ام يونس "وعمة ترباس ديل نسيتو أي حاجه بلدية ...هذي أحدي مشتقات الويكه ...وكان دايرة تعرفي أكتر كلمي الدكتورة تزودك بي بخره كده
تحياتي ؛؛؛؛؛؛؛؛؛؛؛؛؛؛؛؛

والله اول مره اسمع بيهو
يا عتمان يا اخوى
شفت ليك بهول
عارف انا قلت يكون ده ملاح صفق العرديب
حصل اكلته ؟
تحياتى

ياى يا ودنويه
ما تقول ملاح امتكشو!!!
والله اول مره اسمع بيهو لكن
يسال منه اخيتى الدكتوره
ليك على الفطور الجاى بملاح امبلض
ومن هسا قول لى جنابو كان ما سلمت العندك ما بنعزمك للفطور (العنده حاجات الحج ماء زمزم والمصحف)
تحياتى

النااااااااااااااس الزينين
السلام جاكم
والله الكلام سمح بالحيل ...
علا يا سهاد يا اختي ام بلط دا كيفنوا
ومن هسع اكان عرفتيهوا وري اخيتك عارفاها وحيدة ومقطوعة بهنا
يديكو العافية

سلام ياالفي التكل شيوخ وميارم...ملاح ام بلط ويكة وملح وبصلاية مافوقو شرموط...وام تشكو طبيخ الخضرة بس الخضرة بتكون ناشفة..تنشفن في عيدانها وتحتنها ياسهاد وصباح..قلت اقبض الجو قبل الميرم الدكتورة تجي.

سلام ناس الحله

الليلة الجماعة طالبين ملاح ( ام بق بق ) يا عيين لو سمحتو سوهو اسع.

تحياتى

سلامات يا الفي التُكل والضراء ..رندوقكم عجيب لكن!!!؛كده جهزوا لينا "أمتكشو" و"أم بُق بُق" ديل كان ماعم شاويش جا دخل لينا فيهن شوكة وحاجاتو الكتيرة المابعرفا ديك
تحياتي؛؛؛؛؛؛؛؛؛؛؛؛

من طرف **nashi** 12th أبريل 2011, 13:05

ماشاء الله ان شاء الله لمه في الحرم

وبالهناءالنعيمية وام تكشو وام بق بق

وماتنسو " العفوص" بالدكوة والشطة الخضراء والبصل الابيض

وسلاماااااااااااااااااات والله بالجد مشتاقين

والله ما عندك عوجه يا اقبال يا اخيتى
عينى عليك بارده .
والله فاقدنك اخيتى الدكتوره
وما بنفعنا الفطور من غيرك .
ومنى ليكم (موليتا)
بالبصل والشطه والليمون والدكوه .
وجنبه كدى جك ملان مويه بارده فيها التلج بسوى كرج كرج .
وبالهناء والشفاء

انشاء الله تسلموا يارب
لكن يا سهاد يا اختي ما تقولي لي
موليتا عجيبيييييييية انشاء الله يدك ما توجعك....
اها بكره كان حيين الفطور علي منو؟؟؟؟
انا قايتوا علي الغده ومن هسع بورق في خدرتي
عشان ناوية افركها ومعاها كسرة حاااااااااااااااااارة
وصحن سلطة خضراء والشطة باليمون
ودعتكم الله النتم باقي خدرتي دي
عشان الغدة امرقه ليهم بدري بدري
عشان ود نويه وفيصل ديل ما يستعجلوني
سلاااااااااااااااااام

خدرتك دي اخريها ياصباح ..ماقالوا دايرين ام بق بق في الفطور مفروكة بامية عيونها قلات..تعالي ياسهاد صوطي العصيدة كلم احمر بشطة خضراء..انتو يارجال ام بق بق دي ماجراداية...اقعدو عافية

والله مافي احلا منكم ... ناس ودنويه ديل يا أقبال بس قعدين يتشهو ساي كدة ماتخدميهم شويه.
انشاء الله صواطة عصيدة دي كمان دايرة ليها عرفة..ما الحياة شراكة ولا ماكدة ياناس؟..
اليوم الفطور عندي،، عصيد بملاح بتيخ(يارب تكونو عارفنو) كان ماتعرفو اكلو وعلى ضمانتي..كمان عندنا زر بلبن الله يستر مايبقى في زول مابياكلو، بلحين تعبتا فوقو،،وسلطة ناعمة بدكوة،،وعليها ملاحة شطة وليمون،،
مانسيت الشية بس الحكيم قال اكلو كتير ماسمح وانتو شايفاكم بتكترو فيه كتير خلاص،،
المويه في القرعة اليمينكم ،شوفتوهو بارد من الدوانة حق بيتنا
ينفعكم انشاء الله

والله يا سوووووووووومه
انت عسل عديل وملاح البتيخ دا جبتي من وين؟؟
لكن طعمه سمح خلاص
تسلمي يارب

من الاكلات كمان ملاح ام بلط وملاح العرديب وملاح البرنوق وزيت الكرناكه وام حليبين وام جقوقة هههههههه اسماء غريبة طبعا

من طرف **nashi** 26th مايو 2011, 06:51

شاكرة مروركم واضافاتكم يا اخواني واخواتي
كتر الف خيركم
ومعزومين فطور

تسلمي يا احسان يا اختي
واكييد جايين بالحيل
تحياااااااااااااااااااااتي

وينكم يا اخوانا
اخيتى الدكتوره
رمضان على الابواب
ومنتظرين الابداعات
الما خمج اها يا اخواتى اقبال وبت العمد وناهد شدن حيلكن
وعايزين
رمضان صحى .
التحيه للحلوه الصبوحه
وبختك رمضانك جميل وسط الاهل والاحباب
خلاص جيبى لينا معاكى طبخه طبختين كده
جداد (فرش).

اها فتكن عافيه
امشى اجلى عدتى واجهز حالى
ورمضان مبارك

رمضان كريم تصوموا وتفطروا علي خير
التحية لكل حواء وهي تستعد لهذا الشهر المعظّم من تهجيزات (حلو مر؛ آبري؛ كركدي ؛قنقليس ومعاهم كمان (عمة ترباس وام يونس بتاعت ناس لندن وكده) وحاجات تانية لم نتعرف عليها

[img]https://apap.ahlamontada.com/script%20src='http://img594.imageshack.us/shareable/?i=62173316.png&p=tl' type='text/javascript'/scriptnoscript اجمل واشهر الطبخات..في الحباك!!! - صفحة 6 62173316

اجمل واشهر الطبخات..في الحباك!!! - صفحة 6 62173316

/noscript[/img][img][/img]البوست العسل ده نكتو من وين يا جماعه

من طرف **nashi** 23rd يوليو 2011, 16:41

والله اخيتكن بتعوس ليها في حاجه ما معروفه تطلع شنو ......قمردين..كسرة.. رقاق

غايتو ان شاء الله تطلع حاجه كويسه
هههههههههههههههههههه
ورمضان كريم عليكم كلكم
تصوموا وتفطروا علي خير

يا دكتورة بشيشك علينا ترى انحن على الحافة ما خليتى لينا اكلة شعبية ما ذكرتيها والختام كانت بليلة الفريك ورمضان على الابواب نقعوا على وين عاد يااختى, اخوك بموت فى النعيمية والبامية المفروكة ومعاها شطة خضراء بالليمون تبقى حاجة تانية .
مشكورة يا اختى على الوصفات السمحةواللذيذة.

رفعنا البوست اكثر من مره و الجماعة عملوا نايمين

كدى ورونا الحاصل شنو اسع؟

رمضان كريم

صباحات ياكابتن ...تعرف أشتقت لي العصير بتاع (بابا حسين)

اليوم انا وفيصل خليل فاطرين بعصيده بتاعة دامرقى بالتقليه والروب حاجه تجمم الريق\\

عقبااااااااالكم

من طرف **nashi** 24th يوليو 2011, 15:12

محمد نوية كتب:
رمضان كريم تصوموا وتفطروا علي خير
التحية لكل حواء وهي تستعد لهذا الشهر المعظّم من تهجيزات (حلو مر؛ آبري؛ كركدي ؛قنقليس ومعاهم كمان (عمة ترباس وام يونس بتاعت ناس لندن وكده) وحاجات تانية لم نتعرف عليها

غالبا تكون شلت مقرونك ملان حاجات حتي جيت راجع
ههههههههههههههههههه
رسل لي طرقه طرقتين حلو مر cheers

من طرف **nashi** 24th يوليو 2011, 15:24

Suhad Abduelgfaar كتب:وينكم يا اخوانا
اخيتى الدكتوره
رمضان على الابواب
ومنتظرين الابداعات
الما خمج اها يا اخواتى اقبال وبت العمد وناهد شدن حيلكن
وعايزين
رمضان صحى .
التحيه للحلوه الصبوحه
وبختك رمضانك جميل وسط الاهل والاحباب
خلاص جيبى لينا معاكى طبخه طبختين كده
جداد (فرش).

اها فتكن عافيه
امشى اجلى عدتى واجهز حالى
ورمضان مبارك

حاجه خفيفه

وصفه سريعه وممكن الشباب يعملوها لانها ظريفه شديد ودي علي قول الزعيم من الحاجات البتلقلق

هههههههههههههههه

اها

مقدار لشخص واحد:

1-بيضة

2- كوب لبن

3- ملعقتان شكر ناعم

4-ملعقة كبيرة سمن

5- ثلاث ملاعق عسل مولاص اسود

الطريقة:

اخلطي كل المقادير في خلاط ما عدا المولاص صبيه في القالب يفضل زجاج مقاوم للحرارة او الومنيوم

ثم صبي المقادير من الخلاط فوق العسل المولاص في القالب

وادخليها الفرن لمدة 25 دقيقة الي نصف ساعة

يمكن اختبارها بشوكه للتاكد من انها استوت

تقدم بارده

***************

في ناس تاني يوميا حيعملوها Very Happy

اغزاء البوست السلام عليكم اود ان اشارك معكم هذه الوجبات التي لا اعلم ان كانت دسمة ام خفيفة وذلك لانني لا اعلم الا اسماءها ارجو من كل من :
1:ا.سهاد
2:د. احسان
3:ا. إقبال
ترجمة الاتي ومزيد من الشرح:
مرس
امتكشو
وأمبلض
لعفوص
وملاح البرنوق وزيت الكرناكه

ههههههههههههه
بعدين الواحد يعزم اصحابو يجي يقول ليكم اعملو لينا ملا عفوص و مرس

اغزاء البوست السلام عليكم اود ان اشارك معكم هذه الوجبات التي لا اعلم ان كانت دسمة ام خفيفة وذلك لانني لا اعلم الا اسماءها ارجو من كل من :
1:ا.سهاد
2:د. احسان
3:ا. إقبال
ترجمة الاتي ومزيد من الشرح:
مرس
امتكشو
وأمبلض
لعفوص
وملاح البرنوق وزيت الكرناكه

ههههههههههههه
بعدين الواحد يعزم اصحابو يجي يقول ليكم اعملو لينا ملا عفوص و مرس

دكتورة البتاعه دى اسمها شنو؟

ول نويه والله مشتاقين يا عزيزى و بابا حسين فاقدك شديد

الزعيم الليلة كل العائدين من المهجر كمان يفطروا معانا بالعصيدة الحلوه بتاعت امبارح

تحياتى

هههههههه والله ياصالح اخوي ضحكتني جنس ضحك ،،اول شيئ مافي ملاح اسمها العفوص، العفوص دي عبارة عن بصلة وليمونة وشطة ودكوة وملح بتتعمل مع بعضها وتتاكل من غير ماتتخت في النار واذا اتعملت بصفق التبلدي بتبقى رهيييييييييييبة@الامبلط دا ياخوي مابصلة وملحة وويكة وموية وعود شرموط بس شفتى ساهلة كيف@عوعاكم يا اقبال واحسان وسهاد تقولو لي كلامي ماصح هههههه@المرس عبارة عن شحم يتم تخميرو لمدة من الزمن ثم يتم تصنيعها وبتحتاج لكمية من الشرموط ولا تحتاجة لكمية من البصل المهم فيه انو يضرب ويضرب ويضرب لمن يبقى ابيض زي الصابون زي ماقاعدين نسميه@@@الا باقي الحاجات القلتها دي يفتح الله ويستر الله@@محتاجة لستعانة من حبيباتي المتلأكدة انهم ح يقولو لي @@رايك شنو في اختك موش حريفة هههههههه

سلامات ياكابتن سلِّم لينا علي آدم بالله...بس زعلان منك لأنو ماوديتنا لي حِتة العصيدة القالا غريق دي
تحياتي؛؛؛؛؛؛؛؛؛؛

هههههههههه تحياتي سومة علك طيبة وشكرا للشرح تاريهو الكلام ساهل بس الاسماء خلتو صعب خلاص

من طرف **nashi** 28th يوليو 2011, 14:38

اقبال عبداللطيف كتب:سلام ياالفي التكل شيوخ وميارم...ملاح ام بلط ويكة وملح وبصلاية مافوقو شرموط...وام تشكو طبيخ الخضرة بس الخضرة بتكون ناشفة..تنشفن في عيدانها وتحتنها ياسهاد وصباح..قلت اقبض الجو قبل الميرم الدكتورة تجي.

يا اختي انتي ما ساهلة ماشاء الله خبرة

ربنا يحفظ

من طرف **nashi** 28th يوليو 2011, 14:40

فيصل خليل حتيلة كتب:

دكتورة البتاعه دى اسمها شنو؟

ول نويه والله مشتاقين يا عزيزى و بابا حسين فاقدك شديد

الزعيم الليلة كل العائدين من المهجر كمان يفطروا معانا بالعصيدة الحلوه بتاعت امبارح

تحياتى

البتاعة دي الا نقطع ليها اسم

كدي ساعدني نلقي ليها اسم عربي

هههههههههههههه

شغاله شف ساي من اهلي الهنا ديل

مشكور اخوي

من طرف **nashi** 28th يوليو 2011, 14:47

سومه العمدة كتب:والله مافي احلا منكم ... ناس ودنويه ديل يا أقبال بس قعدين يتشهو ساي كدة ماتخدميهم شويه.
انشاء الله صواطة عصيدة دي كمان دايرة ليها عرفة..ما الحياة شراكة ولا ماكدة ياناس؟..
اليوم الفطور عندي،، عصيد بملاح بتيخ(يارب تكونو عارفنو) كان ماتعرفو اكلو وعلى ضمانتي..كمان عندنا زر بلبن الله يستر مايبقى في زول مابياكلو، بلحين تعبتا فوقو،،وسلطة ناعمة بدكوة،،وعليها ملاحة شطة وليمون،،
مانسيت الشية بس الحكيم قال اكلو كتير ماسمح وانتو شايفاكم بتكترو فيه كتير خلاص،،
المويه في القرعة اليمينكم ،شوفتوهو بارد من الدوانة حق بيتنا
ينفعكم انشاء الله

سلام يا سومه العسل

اخيتك طبعا زارت فاشر ابوزكريا في عام 2005م

وبعدين الدنيا كانت رمضان

والناس النزلت معاهم عملوا اكلات سمحه وطاعمه شديد

محتاجين تشرحي لينا شويه لانه عندي اعتقاد انه اطعم الاكلات السودانية هي الاكلات الدارفورية

منتظراك

الداهية دى ما عندها اسم هناك يا دكتورة

و هل الداهية دى من الشغلات البتلقلق؟

كان عندها قولى بالرطانه و كان ما عندها خلينا نستعين بعمك بشير الحاج

هههههههههههههها

تحياتى

من طرف **nashi** 1st أغسطس 2011, 08:08

بسم الله نبدأ اول يوم في رمضان

وكل عام وانتم بالف خير

**************

تقلية بطريقه جديده

قطعي البصل مربعات صغيرة وضعي كمية من الزيت علي النار واتركي البصل مع تحريكه لفتره حتي يبدأ لونه في التغير نحو اللون الاصفر الذهبي

-ضعي اللحم المفروم في صحن وصبي عليه كمية تساوي نصف كوب من الماء وحركي ثم صبي في الحلة وواصلي في التحريك لمده 5دقائق

ضعي البهارات من ثوم وفلفل وكسبرة وشمار وقرفه مسحون ناعمة

وضعي الملح واستمري في التحريك

اخلطي عدد 3 حبات طماطم كبيرة لونها احمر قاني في الخلاط واضيفيها للحله

اضيفي ملعقه او اثنتان من الصلصه المعلبة

تاكدي من ان طعم الملح مناسب

اضيفي الويكة المسحونه

وحركي بحركة دائرية بطيئة مع تخفيض النار

***************

بالهنا والشفاء

**

عوض السيد اخوي الحاجات الرسلتهن بالدي اتش ال لي يوم الليله ما وصلن من رمضان الفات

Sleep

يبقى الليلة يا احسان الفطور بتقلية معمولة بطريقة جديدة

معانا ضيوف من بلاد برده عايزين ليهم سامبوكسا و شوية حلاوة يعنى بسبوسة و باسطة

طبعا مؤكد باقى الفطور جاهز للاخوة و نقول ليكم تفضلوا على البرش

شكرا احسان

سلامات يا احبابنا واحباب الحباك
ورمضانكم يتبارك انشاءالله
اخيتى الدكتوره
والله تقليتك دى لما
شامه ريحتها عديل كده
ربنا يديكى العافيه
واكيد حاطبقها الليله بالقراصى .
*ابو احمد سلامات ورمضانك مقبول
يا اخوى
جماعتك ديل
انا بجهز ليهم البسبوسه
الليله وانشاءالله تعجبهم
بسبوسه سودانيه ميه الميه
اها
تعالو معاى
لمطبخ نجهز مع بعض ......

المقادير:
- كوبان من السميد وملعقتا طعام من برش جوز الهند.

- ثلاثة أرباع الكوب من السكر.

- ملعقة طعام من الباكينغ باودر.

- ربع قالب من الزبدة المذوبة وكوب من القشدة. (ناس الكرسترول العالى ما يقربو معانا )

- كوب من اللبن الزبادي.

- القليل من الطحينة لدهن الصينية.

- القليل من اللوز للزينة. (او فول سودانى)

قطر السكر:

- كوبان من السكر.

- كوبان من الماء، فانيلا.

- ملعقة طعام من عصير الليمون.

- ملعقة طعام من السمن البلدي.

الطريقة:

- تخلط المكونات الجافة أي السميد وبرش جوز الهند والسكر والباكينغ باودر مع بعضها، ثم تضاف إليها الزبدة والقشدة.

- يدعك هذا المزيج باللبن الزبادي للحصول على عجينة، تدهن الصينية بالطحينة ويسكب فيها الخليط ويترك حتى يختمر.

- يقطع محتوى الصينية إلى أشكال مربعة منتظمة وتوضع حبة لوز(او فول سودانى) في كل مربع، تخبز الصينية في الفرن حتى تحمر.

- يحضر القطر بغلي السكر مع الماء، وقبل انتهاء الغلي يضاف عصير الليمون والفانيلا والسمن المذوبة.

- يصب القطر الساخن فوق البسبوسة وتخبز مجدداً في الفرن لمدة 5 دقائق. (او بس
تقفلى الفرن وتدخليها فى سخانة الفرن فقد ودى افضل على حسب تجربتى ) .
وطلعيها وتخليها تبرد
وتجهزى
الطبق لتقديم برشه بجوز هند باللاوان المختلفه
وترصى البسبوسه وتقديميها بالهناء والشفاء احلى بسبوسه لى احلى ناس (احباب الحباك)
(نصيحه )يجب ان تكون
مرتين فقط فى شهر رمضان لانها دسمه .
ما خالص تمنياتى لكم بصيام صحى خالى من الامراض

صحة وعافية

مساء الخير ........ معليش يا جماعة ..... تلاتة صحون أنا شايفها الان دخلت التلاجة .... 1. أم جنقــر معمولة بدخن جديد وروب صبوح ... 2. سلطة روب .... فيها كمية من التبش المحشوش دقاق .... وقالوا ليا نخليها برة ... قلتا لالا .... بــارده أحلى 3. الشغلات الرسلتيهن في الرد بتاعك ..... سابقاً ياسهاد رجعت صحبتك خالده وعملت لينا التحلية بتاعتك وبمواصفاتك ***************** ياناس رمضـــان كريم ..... دي إضافة لأعمال اليوم الأول

رمضان كريم
يا ناس الداخل (طبعا اختك منغايزه يا الفاتح)
من ناس الداخل دى الصايمن مع اهلهم ديل.
يعنى
قررت اعمل
عشرين حاجه
والان كمان ضفت
سلطة الروب بتاعتكم
دى
لكن اكيد ما زى حقتكم
لكن (كيتن لدنيا دى اعملها
واخليها تطلع زى بتاعتكم )
سلامات يا خالده
والله مشتاقه ليك كتير
وبتمنى
تتواصلى معانا
فى المنتدى ونعرف اخبارك.
رمضانكم كريم
تحياتى لجميع بدون فرز
وبالهناء الفطور (المدنكل بتاعكم ده )
وما تنسونا من الدعوات
تحياتى

من طرف **nashi** 2nd أغسطس 2011, 10:25

يا سهاد يا اختي مشكورة علي صينية البسبوسه ما قصرتي

ورمضانك كريم

رمضان كريم عليكم تصوموا وتفطروا علي خير.......
بعدين ياناس لندن بسبوستكم دي عجيبه من أوصافا دي ؛بس دايره جنابو وتعليقو ؛ماعارفو جاء ولا لسه مستمتع بجو االاسكندرية