قبل وأحضان فى مسارح الخرطوم........ منقول

رضي الفنانون أو أبوا .. فقد أصبح الفن أداة خطيرة من أدوات هدم أركان المجتمع القائمة علي المثل والقيم النبيلة والأخلاق الفاضلة .. وأداة لتدمير قيم الجمال .. وبصحيح العبارة أصبح فعل من الشيطان .. ولا نقول هذا الحديث لنصنع من الحبة قبة .. ولكن نقول بناء علي الكثير من الشواهد والظواهر..ومنها الظاهرة الجديدة التي إستشرت وأصبحت سمة ملازمة للكثير من حفلات مسارح الخرطوم وبالأخص تلك التي يحييها مطربين شباب .. حيث تطالعنا الصحف في اليوم التالي بحكاية فتاة صعدت إلي المسرح وقبلت (مطرب زمانه)أحمد الصادق .. وأخري إرتمت في أحضان المطرب الذي لم تلد حواء مثله مطرب (طه سليمان).. وحكاية المطربة السودانية المعروفة (إيمان لندن) التي قبلها شاب أثيوبي علي خشبة المسرح بعد أن أمسك برأسها وهي ترقص كأنها (أعجاز نخل منقعر) في حفل بأديس أبابا..وهذه الحادثة بالتحديد وثقت لها المواقع الإليكترونية ..كما وثقت لغيرها من حفلات الرقص والفسوق .
وهي ظواهر ما كان لها مكان في المجتمع السوداني الذي تحكمه الكثير من التقاليد وروح الدين المتأصلة في النفوس .. ونخاف أن تركنا لها الحبل أن تصبح من الحوادث الطبيعية الملازمة للحفلات .. خاصة وأن هناك من يناصرها بدعوي أنها تعبير شخصي يندرج تحت باب حرية التعبير.. والأمثلة في هذا الصدد كثيرة .
حال الفن اليوم يغني عن السؤال .. فقد أصبحت مدعاة للعبث والفوضي وطريقاً سهلاً للثراء .. لا ضابط ولا رابط .. أصبحت الألقاب تطلق علي من لا يستحق .. فسمعنا بالإمبراطور والقيصر وفنان الشباب الأول والكروان وغيرها من ألقاب تطلق علي شباب في مرحلة (التمهيدي فن) .. أحاطوهم بهالة من البريق الزائف وهم لم يقدموا بعد ما يشفع لهم .. والغالبية منهم باحثين عن شهرة ومال .. وهما من وجهة نظرهم الضيقة لا يتأتيا إلا بولوج ساحة الفن .. أما الكبار فحدث ولا حرج .. فممعظمهم أصبح لا شاغل له إلا التصريح للصحافة والتقليل من شأن الآخرين بإطلاق العبارات الجارحة المشحونة بالسخرية التي نهانا عنها ديننا الحنيف.. والبعض الآخر إحترم نفسه وفضل الإنزواء والإبتعاد نهائياً وبالأصح (هرب بجلده) .. ولم يبق إلا قلة من الذين يفهمون أن الفن مسؤولية ووسيلة لإشاعة المحبة بين أركان المجتمع .. وأن الفن الحقيقي ليس موسيقي تصحبها كلمات غزل ولا حفلات تصاحبها القبل والأحضان والرقص الماجن.. يفهمون أن الفن يمكن أن يبني الكثير من صروح الخير والفضيلة ويلعب دوراً كبيراً في حل الكثير من مشكل المجتمع .. بالدعوة إلي المحبة والسلام والترويج بشعارات الوحدة .. ويفهمون أن الفن الحقيقي هو الذي يأخذ بأيدي الشباب بعيداً عن الفسق والمجون ..وهؤلاء عاجزون عن فعل شئ أمام المد الشيطاني ..وأمام(راجل المرة حلو حلا) و(النسي أهلو ما نسانا) و(الدكاترة الستة) و(قنبلة) التي شوهت شظاياها وجه الفن الجميل.
مسؤولية من ما يحدث ..وكيف نوقفه عند حده وقبل كل ذلك يجب أن نعلم من أين أتت هذه الظواهر .. ومن أين أتي هؤلاء كما قال أديبنا الراحل الطيب صالح .

هذا أمر خطير

اولاً كلامك صاح وممتاز وزي العسل ... بس صدقني انا إيمان لندن دي ما برضي فوكا ..!!! وعارفك بتزعل ... إنسانه طيبه رقيقة شفافة ... محترمة جداً لا تغيب عنها الإبتسامة الحلوة ...وبعدين يا جماعة هي ذنيها شنو ... واحد معجب ومتكيف زي كده ..واثيوبي ..أنبسط وطلع باس الراس ونزل ..فوكة شنو دي ... ( تعرف يا عوض جيب اضانك جاي : انا ذاتي كان لقيت طريقه ببوسه ..بس فوق راسا ... بس) يا جماعه والله كبرتوا الحكاية جداً ...وراي هي ليس لها ذنب في ما حصل ... ومعليش عوض لصراحتي ووضوحي في هذا الخصوص ...بس لا تقول لأم علياء ...محبتي ..

لكن يا ابو علياء بره البلد الناس ما بتقول ايمان لندن وبس المؤسف أن الأمر مربوط بالسودان.

اكتر شئ عاجبني فيك صراحتك ووضوحك يا شاويش
قلت لي الجماعة كبروا الحكاية وسلم لي علي لندن

مشكور يااستاذ على الموضوع اثار انتباهي في التعليق على الموضوع ان مافيها حاجه وهذه المشكله الكبيره السكوت الدفاع اولا معلوم ان الغناء والمسارح والطرب والرقص محرم والاشد من ذلك عدم الانكار والتبرير بان المسأله بسيطه , بني اسرائيل اهلكهم الله بانهم كانو لايتناهون عن منكر فعلوه كانو يقولو بسيطه مالنا ومالهم
فسأل الله ان يحمينا من الفتن وان يهدي لندن ولابريطنيا دي ماعارف وكل الفنانين

قبل لحظات ...فتحت المشاهير ..وشاهدت الحفل ...ورأيت الفنانه إيمان لندن تغني ....وهي تلبس ثوب شفون مورد بورود حمراء مربوط من النص ..وتلبس كاب أصفر باحمر من الداخل والشعر الجميل المسترسل من خارج التوب ...وحذاء عالي احمر ... وكانت بتغني اغنية لأديس ابابا والحفل فيه ناس جلوس ومجموعة تصور امام المسرح من الجوالات ... وفجأه طلع أثيوبي وهو شاب في حدود 23 اسمر اللون... وكان برقص معها اثيوبي باكتافه ... وفجأه أمسك برأسها وباس راسها فوق الكاب ... وهي واصلت عادي ... واصلاً ما كا يوجد شئ ملفت وشاذ ...يا ناس خلوا البنت البريئة جداً في حالها ...وهي لا ذنب لها صدقوني ..محبتي

اخي عثمان مامفترض تغني اصلا الامور هذه محرمه فهي لمن تنتهك حرمات الله وماتخليها في حالها واجب اي مسلم الانكار وابسط الانكار بقلمك وكتابه الحق

تعرف أخي إني احترمك جداً واحترم آراءك ... وأحترم ديننا الحنيف ... وأقدس شرع الله ... ولكن التزمت الشديد في الدين والتعصب جعل الناس غير المسلمة اكثر هروباً من ديننا السمح + الموت والقتل والدمار بإسم الدين ؟؟؟ما هذه الأشياء؟؟؟ ما هذا التعصب ؟ ولملحت من ؟؟؟... وارجو أن تستدل لي بآية تحرم الغناء وسوف لن اسمعه بعد اليوم او اشاهده ...وكان الرسول (ص) يشاهد الأحباش يرقصون بالمدينة المنورة والسيدة الكريمة عائشة على كتفه تشاهد الإحتفال... لماذا هذا التعصب إذن ؟... ويقول المقال المنقول : قبل واحضان بالمسرح ...ما هذا الكذب ؟؟؟واين الأحضان واين القبل؟؟؟!!! يا ناااس خلوا الناااس تبتهج ... وكفايه حرمااان ...محبتي

عززيزي عثمان انا ايظن احترمك واقدرك لكل انسان وجه نظر وانا احترم وجهات النظر
بخصوص الغناء الايه في سورة لقمان يكفي تضارب الاقوال بين اهل العلما فمن اتقى الشبهات استبرأ لدينه وعرضه ومن زقع في الشبهات فقد وقع في الحرام ... مافي تعصب هنا ملفي تنفير من الدين انما قول الحق من شاء فليؤمن هذا راى الدين .اما بخصوص هروب الناس من الدين هم الخوارج التكفيرين الذين يفجرون السفارات والابراج وينحرو باسم الجهاد .... مشاهدة ارجو التأكد من موضوع مشاهده الاحباش حتى لانكون ممن قال فيهم عليه الصلاة والسلام من كذب علي متعمدا فليتبوأ مقعده من النار حمنا الله واياكم من النار .... ينقسم كل شي الى نصفين قبيح وطيب يوم القيامه يؤتى بالغناء هل يعقل ان يوضع مع القران والكلام الحسن لا اظن ذلك . اخيرا لا اقول انا الصحيح وانت الخطأ لا والله وانما ارت ان انكر منكرا لقوله تعالى كنتم خير امه اخرجت للناس تأمرون بالمعروف وتنهون عن المنكر وهذا من خلال الاطلاع والبحث والله اعلم جزا الله خيرا الاستاذ على الموضوع وانكر المنكر
ووفق الله الاخ يعقوب لمايحب ويرضى وجمعنا الله على الخير دائما وابدا لك الشكراجزله

أخي الغالي .... لك التحية على ردك الجميل ... وعندما سألتك عن الآية التي تحرم الغناء !!! إنت قلت لي : سورة لقمان ...وبس ... لم تذكر لي آية بعينها ...وهل انت تقصد :
الآية : (5) بسورة لقمان والتي تقول :
(5) ومن الناس من يشترى لهو الحديث ليضل عن سبيل الله بغير علم ويتخذها هزواً أولئك لهم عذاب مهين (6) (صدق الله العظيم ) .

أم قصدك الآية : (18) بنفس السورة والتي تقول :
(18) واقصد في مشيك وأغضض من صوتك إن أنكر الأصوات لصوت الحمير (19)
(صدق الله العظيم )
إن كان قصدك هذه الآيات ... فهي مجتمعة لا تدل على حرمة الغناء فأرجو ان توضح لي ... ولا زلت اقول البنت بريئة ... محبتي .

أقترح تعليق النقاش فى هذا الأمر

ماتخلي الجماعة ياأستاذ عايزين نستفيد اليومين دي ماعارفين الصاح من الخطاء ...

وكان بقت علي المسرح هينة الغريق قدام .....؟

تم تعليق الموضوع لوقت اخر ولا اقول الا الله أعلم
الاخ عثمان الموضوع له ابواب شتى انا اطالع هذا الموضوع من خلال المواقع الاسلاميه المنتشرة فالنبحث اكثر اغلغنا الموضوع التزاما بمقترح الاستاذ عوض لكم الشكر والتحيه

أشكرك أخى.....
زهير لك العتبى حتى ترضى

ونلتزم بالإغلاق ... بس البنت ظريفه ولطيفه ومظلومه ... محبتي ...

والله انت الظريف يا ابو عفان بس ما مظلوم

يا جماعة عم شاويش معجب بالبنت و (منداااااااااح) ما تخلو الناس في حالهايااخزانا

يا جماعة الموضوع دة يمكن يكون كمرة خفية؟
شكرا حبيبنا عوض السيد
نلتزم

كنا دايرين نقول راينا مادام قلتو اغفلوه اهو خليناهو

انا قايتو بدين الفنجطة البعد البوسة هل هي تفاعل مع المسيقى ام فرحة بالبوسة؟

والله يا ابن عمى انت بتاع (مدايد) هسه فى داعى للمديده الحاره دى.
اما انت يا محمد قادم انا كان عرفت درب عروسك الا أفتنك يا رشاشه

يا ابن عمي يا حبوب شايف اخوك غريق اليوم لبس عمتو تاني
ديك كانت مناورة على الظلط ولا شنو؟ انا قايتو ما شفت شعر كان حالق صلعة ما عارف
طبعا المجاهذين بيحلقوا ليهم صلعة كان خالفوا التعليمات

ده شعر ماعندنا ليه رقبة قايتو انتو تجيبو الشمار قبل مايبقي زاتو ؛هسي بالله نكتو دي من وين كمان
التحية لكم

اليومين ديل يا ابن عمى قالو السودان فيه برد شديد عشان كدا غريق لبس العمه لكن لمن كان لابس العراقى كان الجو (دافى) هههههههههه

عوض السيد صاحبك طارق صورتو الوراكم ليها دى من الثانوى كده خلى يجيب صوره جديده وشوف الظلط الصحى

حياك اخوى غريق.
طارق لسه وليد(صغيرونى) كان بقى (مزلّط) تبقى مشكله كبيره.
يا ابن عمى قول النصيحه*** كلّمنى مالك.........

طارق مشكور كتير كتير على هذه الإبداعات ... والله بالجد بسطني 120 قيراط ... وانت ضحطت كل الأقاويل الخاصة بالقبل والأحضان ع المسرح ... والباب ده سديناه بس البنت حلوة ... وإبتسامة هادئة وبريئة ... وصدقوني البنت مظلومه ...( بس ما تكلموا ام علياء ..... ) وشعرت معاوية ما عارف راحت مني وين ماعارف ...لكم أحبتي جميعاً.... محبتي ...

عوض السيد الحبيب
لقد قفلتم على هذا الموضوع المهم وكان بالإمكان إثراء النقاش الهادف خاصة أن مسألة الغناء من الأمور المؤرقة لبعض الضمائر وأن الكل في مرحلة من المراحل كان لهم شئ من التعلق .... الغناء يحب تصنيفه ومنه ما يقع فى المباح ومنه ما يدخل فى المحظور وهناك ما يقود إلى المفسدة وأذا جردنا الموضوع من الصفة الشخصية يمكن أن يكون هذا البوست مفيدا ومفيد جدا ... أقدر خوفكم إن إختلاف الرؤى والمذاهب والتفكير قد يقود للخصام .... ولكن متى ما تفهمنا أن إختلاف وجهات النظر لا ينفى كوننا أحباب فأنت مريخابي يا عوض وأحبك حتى النخاع وهناك هلالاب لا أقول أني لا أحبهم ولكنهم غير مستعدين لمباداتنا نفس المشاعر .... دعونا نتناول الأمر كهلال مريخ أو إتحادي وحزب أمه مثلما كان الشريف حسين والمحجوب وزروق وتلك الثلة الطيبة ..... هذه دعوة لفتح الموضوع على نار هادئة وصدور مفتوحة للآخرين ومشرعة للأحبة وعامرة بالصفاء ...... أبوحميد عثمان وبقية الرفقة كنت مولعا بالغناء وتحديدا بصديقي الراحل مصطفى سيد أحمد، زهدت في الغناء بعده وأنتقلت لمرحلة الإعداد للآخرة وفي النفس شئ من حتى.

حاشية

أبوحميد ما زلت في إنتظار رد رسالتي التي أرسلتها لك قبل أكثر من أربعة أشهر لإزالة سوء فهم

تسلم على تفهمك الراقي ... بالجد أخونا عوض السيد ... ربما خاف ان يؤدي بنا نقاش هذا الموضوع للفرقة والشتات ودخول الغابه من جديد ... وصدقني مهما يكن نحن اخوان وأحباء اصفياء ... بس البنت بالجد حلوة ... وطيبه ورقيقه ...وأعتقد ارجو فتح الباب على نار هادئه جداً ...اقل حرارةً من نار الولاعة ...ولو أني مع إحترامي ... دخان السجائر بزعجني ...والغرفة المظلمة بتزعجني اكثر ..وبكون سعيد جداً إذا كانت الإنارة مضيئة تماماً بكون في غاية السعاده وبنام سعيد جداً في الإضاءة...منذ ان احضرت ام علياء المدينة المنورة لم نطفئ النور ولا يوم واحد ..إلا إذاتم فصله من شركة الكهرباء ..يعني بنحب النوم على الضوء ....أعرف اني سطحت وخرجت بره الشبكه ..والسؤال : يعني هل كل الأطراف لديها قبول بفتح موضوع الغناءحلال ام حرااااام ؟؟؟ ننتظر مداخلاتكم بس ...البنت بريئة جداً ... محبتي ...

التحية دوما لكم اعمامي وارائكم دائماً محل تقدير وقبول ؛ وزي ماقلتو نفتح الباب علي نار هادئة (مافيها عويش) وياعم ازهري راجع الخاص كدة
التحية والتقدير لكم

تم تحويل النقاش الهادء الى المنتدى الاسلامي وانشاء الله ستكون نارة هادئه حتى النهايه

قال الامام علي كرم الله وجهه:روحوا القلوب ساعة بعد ساعة فان القلوب اذا أكرهت عميت.
كذلك قال الغزالي في الاحياءمن لم يحركه السماع فهو ناقص مائل عن الاعتدال بعيد عن الروحانية.زائد في علظ الطبع)
وهناك حجج قوية لابن حزم ذكرها الشيخ القرضاوي وقد قمت بنقلها في المنتدي الاسلامي
خلاصة الكلام ان الموضوع فيه خلاف ولا يوجد فيه حكما قطعيا.

والله ياطارق كنت بسمع بي بت لندن لكن انت بتعمل حاجات الله يستر .

من شفتها طوالي بضم صوتي ل شاويش البت حلوه ...وطيبة ...ومظلومة ..ولطيفة .

زهير لك التيحية والتقدير ياخي قصتكم شنو انت وشاويش شايفكم منداحيين زي ماقال الاخ محمد عبدالله قادم انحنا نصلح وانتو تجو تخربوا تاني

حيدر ...زهير ..مداخلاتكم بطعم السكر ...محبتي ...

التحاياالعطره لك حيدر .
كده بيني وبينك البت كيف .
(شوف العين مابكتل غزال )

احترامي ...

زهير اخوي الطريق مراقب بالرادار والعين قالوا بتدخل النار
ورد عن الامام علي رضي الله عنه قولهاعط الكلام من المزح بمقدار ما تعطي الطعام من الملح) وماشادد رجل الدين الا غلبه وكلو في حب المصطفي صلي الله عليه وسلم

صلي الله علية وسلم

زهير الجماعة منتظرنك فى البيت!

تحياتى

والله أقرأ وانا ميت من الضحك..... أيه الحلاوه دى.
أبو الزهور اقتراحك لا شك محل تقدير بشرط ان لا يقود الى الغابه.
حيدر أخوى بقيت مطوّع عديييييييل.
ابو علياء ما زال يدافع عن رأيه.
زهير بسرعه على البيت فيصل قال ليك الجماعه منتظرنك(بس ما تنكر)

اخوي عوض السيد والله اكتر حاجه محيراني ومضحكاني جدا تشبث ابو علياء برايه وعدم التزحزح عنه قيدانمله والرهيفه اتنقد

ابو علياء يا حيدر زى ما بيقول هو(خطير وبالليل بطير)
لكن ليك على اذا ربنا أحيانا انا نازل السودان واجازتى متزامنه مع اجازته وسأزوره فى البيت وأوعدك سأفتح الموضوع فى (القسم) وسأنقل لك شكل مداخلاته فى الموضوع.
طبعا فى اللحظه ديك حيكون(جباااااااااان جدا).
ما تخاف يا ابو عفان سوف لن انقل رأيك الحالى فى (القسم) لأن المهم رأيك داخل (القسم) وقتها

بالله ياعوض السيد صاحبنا من الناس البيخافو من وزارة الداخلية ماكنت قايلوا من النوع داك

يا شباب
اقتراح بسيط
كان دايرين ابو علياء يغير موقفة
كلمو ليه ام علياء
هسه بيدين وبيشجب وبندد بالغناء كله

حيدر وطارق صبحكم الله بالخير..... أمبارح اتصلت على ابو علياء بالليل ولما جبت ليهو سيرة وزارة الداخليه جرّ واطى.
سأرسل له متر ونصف من شعرة معاويه على بريده اليوم(عالم جبانات بشااااااااكل)

صدقوني مداخلاتكم الرائعة اثلجت صدري ... وبعدين لازم تجرسونا يعني ... انا طبعاً قلت البنت ممتازة وطيبه ... وبس ... أحبتي : والله العظيم لقدآنستونا ونسيتونا آلام ومواجع الغربة ...وأصبحتم ملاذنا الآمن الذي نلجأ إليه ... وبقينا كل ما الواحد تجيه حبة زهجة كده بيجي داخل عليكم ...إنتو على طول بتخففو عليه بطفشاتكم الحلوة ...وربنا يحفظكم لنا جميعاً أيه الأحباب ... محبتي ..

ابو علياء صباح الخير.
انت الذى تثلج صدور أحبتك فى المنتدى بقفشاتك وطيراناتك وتعليقاتك البريئه التى لا تقصد منها سوى اثراء النقاش وتلطيف الأجواء يا رجل يا راقى.
لكن دا برضو ما بيحلك من حكومتك لو ما قلت الرووووووووب

اها يا جماعة الزول دة ما قال البنية طيبة وبس تاني المشكلة وين ؟
لكن يا ابن عمي ليه تتصل على الراجل في البيت وتذكروا باثيوبيا
كيف ما يجر واطي ؟ ما كلام الليل بيمحاه النهار